അമ്മമാർക്ക് ഇന്നെന്റെ മംഗളങ്ങൾ

 ഇന്ന് ലോകം മുഴുവൻ അമ്മമാരുടെ  ദിനമാണ്. അല്മായ ശബ്ദത്തിൽ കവികളെകൊണ്ട് നിറഞ്ഞിരിക്കുന്നുവെങ്കിലും എനിക്കുമാത്രം കവിതകളറിയത്തില്ല.  ഗദ്യമായിതന്നെ എഴുതട്ടെ.

  അമ്മയാകുന്നത് ഒരു പെണ്‍കുട്ടിയുടെ ജീവിതത്തിലെ സുപ്രധാനമായ ഒരു ദിനമാണ്.  സ്ത്രീത്വം  അവളിൽ ഉദയം ചെയ്തുവെന്ന് അറിയുന്നതും അന്നാണ്. അവളുടെ മാംസ രക്തങ്ങളിൽനിന്ന്  ജനിച്ച  പുതു ജീവന്റെ തുടിപ്പുകൾ അവൾക്കന്ന്   അനുഭൂതികളുടെ  സ്വർഗം കൊണ്ടുണ്ടാക്കിയ പളുങ്കു കൊട്ടാരമായിരിക്കും. പെറ്റമ്മമാരുടെ ഈ ദിനത്തിൽ   അവൾക്കായി   കൂപ്പുകൈകളർപ്പിക്കുന്നത്   അവളുടെമാത്രം  സ്ത്രീത്വ ത്തിന്റെ ചൈതന്യത്തെയാണ്.

 ജനിച്ച ഒമനത്തമുള്ള  കുഞ്ഞിന് അമ്മയോട് സ്നേഹം പ്രകടിപ്പിക്കാനറിയത്തില്ലെങ്കിലും അമ്മയെന്ന ദേവത അവളുടെ, അവന്റെ ഹൃദയ തുടിപ്പുകളിലും  പ്രതിഫലിക്കും. അവൾ അമ്മയാകുന്ന പളുങ്കു ദിനത്തിൽ മാതൃത്വം മുറ്റി നന്ദിയോടെ തനിക്ക് ജന്മം തന്ന  അമ്മയേയും സ്മരിക്കും.

കുഞ്ഞായിരുന്നപ്പോൾ അമ്മയായ ഈ കുട്ടിയും സ്വപ്നം കണ്ടിരിന്നു. ഒരിക്കൽ ഞാനും കൌമാരം മുറ്റിവളരും. അവളുടെ സ്വപ്നത്തിലും കുഞ്ഞായ ഒരു വീട്, കുടുംബം, തന്റേതായ കുഞ്ഞുങ്ങളും. ഓടി ചാടി, ഊഞ്ഞാലാടി  തത്തികളിച്ച നാളുകളിലെ  അവളിലെ  അമ്മ ഇന്ന് സത്യത്തിന്റെ കാഹളമൂതി. അവളുടെ കൈകളിൽ, അവളുടെ സ്വപ്നത്തിലെ കുട്ടി വളരുകയാണ്. ഈ കാലങ്ങളിലെല്ലാം അവളുടെതായ ആ കുഞ്ഞ് വളർന്നുകൊണ്ടിരുന്നു. അവൾ അമ്മയാകുന്ന മധുരിക്കുന്ന ഓർമ്മപോലെ  മറ്റൊരു  ദിനം അവൾക്കില്ല.

എനിക്കുമുണ്ടായിരുന്നു അമ്മ. ആ അമ്മ മരിച്ചു. എങ്കിലും  എന്റെ അമ്മയുടെയും മധുരിക്കുന്ന ഓർമ്മകൾ അയവിറക്കികൊണ്ട് സമസ്ത ലോകത്തിലെ പ്രസവിച്ച  അമ്മമാരെ ഞാനും നിങ്ങളെ ഈ  ദിനത്തിൽ നമിക്കുന്നു.മംഗളങ്ങൾ.