Translate

Thursday, September 24, 2020

Tuesday, September 22, 2020

ചർച്ച് ആക്റ്റിന് വേണ്ടിയുള്ള സമരത്തെ അട്ടിമറിക്കുന്നത് ആര് ?

ബർ. യൂഹാനോൻ റമ്പാച്ചന്റെ വെളിപ്പെടുത്തൽ


https://youtu.be/k8Wnwidbwok

വഴിതെറ്റിപ്പോകുന്ന വേദോപദേശം

നവീകരണത്തിന്റെ വഴിയേ-20

പ്രൊഫ. പി.സി ദേവസ്യ

ചെയർമാൻ, KCRM - പാലാ ഫോൺ: 9961255175

*

ഒരു ക്രൈസ്തവനായിരിക്കുന്നു എന്നതിൽ അഭിമാനിക്കത്തക്കവിധം ക്രിസ്തു എനിക്ക് അഭിമതനാണ്. പക്ഷേ സഭ അവതരിപ്പിക്കുന്ന ക്രിസ്തുവുമായി എന്റെ ക്രിസ്തുവിനു ഒത്തിരി വ്യത്യാസവുമുണ്ട്. എന്നാൽ അതിന്റെ പേരിൽ സഭാംഗത്വം രാജിവെച്ചു പോകാനൊന്നും ഞാൻ തയ്യാറല്ല.

*

ഒരു കണക്കിന് നാം ഭാഗ്യവാന്മാരാണ്. ചിന്താസ്വാതന്ത്ര്യവും അഭിപ്രായസ്വാതന്ത്ര്യവും പൊതുവേ അംഗീകരിക്കുന്ന ഒരു കാലയളവിലാണ് നമ്മുടെ ജീവിതം. കാനോൻ നിയമപ്രകാരം ആരുടെയും കഴുത്തുവെട്ടാൻ സഭയ്ക്ക് കഴിയുകയുമില്ല. സഭാധികാരികളോട് പറ്റിക്കൂടിനിന്നാൽ കിട്ടുന്ന ചില്ലറ 'നക്കാപ്പിച്ച'കൾ നഷ്ടപ്പെടുമെന്നുമാത്രം. അതിനു തയ്യാറുള്ളവർക്ക് തിരുത്തലുകൾ നിർദ്ദേശിക്കാം, ആവശ്യപ്പെടാം, അതിനുവേണ്ടി പ്രത്യക്ഷസമരം പോലും ചെയ്യാം.

*

വേദോപദേശത്തിന് വഴിതെറ്റുന്നു എന്ന തോന്നൽ ഒരു സാധാരണ ക്രിസ്ത്യാനിയായ എനിക്ക് കുറെ മുമ്പുതന്നെ ഉണ്ടായതാണ്. ആകാവുന്ന സ്ഥലങ്ങളിലൊക്കെ അതു ഞാൻ തുറന്നു പറഞ്ഞിട്ടുമുണ്ട്. കഴിഞ്ഞ പത്തിരുപത് ലക്കങ്ങളിലായി 'സത്യജ്വാല'യിൽത്തന്നെ വിയോജനസ്വഭാവമുള്ള കുറിപ്പുകൾ ഞാൻ എഴുതിയിരുന്നു. അടുപ്പമുള്ള ചില അച്ചന്മാരോട് ഒന്നു വായിച്ച് അഭിപ്രായം പറയണം എന്ന് പറയുകയും ചെയ്തിരുന്നു. എന്തൊക്കെ പറഞ്ഞാലും ഞാൻ ഒരു സത്യക്രിസ്ത്യാനിയാണ് എന്നറിയാവുന്നതുകൊണ്ടാകും, ആരും ഒരു അഭിപ്രായവും പറഞ്ഞില്ല.

 ക്രിസ്തുവിന്റെ ദൃശ്യശരീരമാണ് എന്ന് സ്വയം അവകാശപ്പെടുന്ന സഭയിലെ അഭിഷിക്തർ, അനഭിഷിക്തരുടെ നേതൃത്വത്തിലുള്ള സഭാപ്രവർത്തനങ്ങളോട് വ്യക്തമായ അകലം പാലിക്കുന്ന സ്ഥിതിയാണ് കത്തോലിക്കാസഭയിൽ ഉള്ളത്. അടുപ്പമോ സാഹോദര്യമോപോലും ആ നിലപാടിന് മാറ്റം ഉണ്ടാക്കാറില്ല. വിശ്വാസസംബന്ധമായ ഗഇഞങ നിലപാടു സ്വീകരിക്കാൻ അതുകൊണ്ട് അവർക്ക് കഴിയുകയില്ല എന്ന് എല്ലാവർക്കുമറിയാം. പൗരോഹിത്യാഭിഷേകത്തിന്റെ സമയത്ത് മേൽപ്പട്ടക്കാരന്റെമുമ്പിൽ  മുട്ടുകുത്തിനിന്ന് ഔദ്യോഗികസഭയുടെ നിലപാടുകൾ ശരിയായാലും തെറ്റായാലും അതിനു വിധേയമായിക്കൊള്ളാം എന്നൊരു പ്രതിജ്ഞ അഭിഷിക്തർ ചെയ്യുന്നുണ്ട്. തീർച്ചയായും അത് പാലിച്ചേ പറ്റൂ. പാലിച്ചാൽമാത്രംപോരാ, എതിർനിലപാടുകൾ കണ്ടാൽ എതിർക്കുകയും വേണം. അതുകൊണ്ടുതന്നെ, സഭയോടുള്ള വിധേയത്വം പ്രകടമാക്കുകയാണ് പുരോഹിതർ പൊതുവേ ചെയ്യുന്നത് എന്ന് ഞാൻ മനസ്സിലാക്കുന്നു. പക്ഷേ, പുതിയ വേദോപദേശത്തിനുവേണ്ടിയുള്ള ആവശ്യം ഞാൻ ഒന്നുകൂടി ശക്തമായി ഉന്നയിക്കുകയാണ്. അതിനുള്ള കാരണങ്ങൾ പല കുറിപ്പുകളായി ഞാൻ മുമ്പേതന്നെ ഉന്നയിച്ചിട്ടുള്ളവയാണെങ്കിലും ഒന്നുകൂടി ചുരുക്കി എഴുതാം.

വിശ്വാസത്തിന്റെ തലപ്പെട്ട രഹസ്യങ്ങളായി പഠിപ്പിക്കുന്ന രണ്ടു കാര്യങ്ങൾ- ദൈവത്തിന്റെ ഏകത്വവും ത്രിത്വവും! കർത്താവിന്റെ കുരിശു മരണവും ഉയിർപ്പും വീണ്ടെടുപ്പും - എനിക്കുവേണ്ടി എന്റെ മാമോദീസാക്കാലത്തുതന്നെ തലതൊട്ടപ്പനും തലതൊട്ടമ്മയും അംഗീകരിച്ചിട്ടുള്ളവയാണ്. അതിനെ നിഷേധിച്ചു പറയാൻമാത്രം തെളിവുകളൊന്നും എന്റെ പക്കൽ ഇപ്പോഴുമില്ല. പക്ഷേ അവയെപ്പറ്റി പഠിക്കുവാനും, സംശയം ഉന്നയിക്കുവാനും വേണ്ടിവന്നാൽ  തിരുത്തുവാനുമുള്ള അവകാശം അഭിഷേകപ്രതിജ്ഞ ചെയ്യാത്ത എനിക്ക് തീർച്ചയായും ഉണ്ട്. ഞാൻ ക്രിസ്തുവിനെ പഠിക്കാൻ കഴിയുന്നത്ര ശ്രമിച്ചിട്ടുണ്ട്. ഒരു ക്രൈസ്തവനായിരിക്കുന്നു എന്നതിൽ അഭിമാനിക്കത്തക്കവിധം ക്രിസ്തു എനിക്ക് അഭിമതനാണ്. പക്ഷേ സഭ അവതരിപ്പിക്കുന്ന ക്രിസ്തുവുമായി എന്റെ ക്രിസ്തുവിനു ഒത്തിരി വ്യത്യാസവുമുണ്ട്. എന്നാൽ അതിന്റെ പേരിൽ സഭാംഗത്വം രാജിവെച്ചു പോകാനൊന്നും ഞാൻ തയ്യാറല്ല. നിൽക്കുന്നിടത്തുനിന്ന് ക്രിസ്തുവിശ്വാസം മുറുകെപ്പിടിക്കാനാണ് എന്റെ തീരുമാനം. കാരണം, സഭയുടെ ഒരു 'സ്വകാര്യസ്വത്താണ്' ക്രിസ്തു എന്ന വാദം ഞാൻ അംഗീകരിക്കുന്നില്ല. സഭാനുഷ്ഠാനങ്ങൾക്കിടയിൽ സഭയുടെ വിശ്വാസപ്രമാണം ഞാനും ഏറ്റുചൊല്ലാറുണ്ടെങ്കിലും  മറ്റു മഹാഭൂരിപക്ഷം വിശ്വാസികളെയുംപോലെ അതിന്റെ അർത്ഥതലം പൂർണമായി ഉൾക്കൊള്ളാൻ ഞാനും ശ്രദ്ധിക്കാറില്ല. ഇതൊരു കുറവായി ഞാൻ കരുതുന്നുമില്ല. ക്രിസ്തു ലോകത്തിലേക്ക് വന്നത് സകലമനുഷ്യരെയും രക്ഷിക്കാനാണെന്ന് ഞാൻ വിശ്വസിക്കുന്നു. പക്ഷേ, മാമോദിസാവെള്ളം തലയിൽ വീണാലേ രക്ഷപ്പെടൂ എന്ന വിശ്വാസം എനിക്കില്ല. ബൈബിൾ പഴയനിയമം യഹൂദജനതയുടെ സാംസ്‌കാരികവളർച്ചയുടെ രേഖാചിത്രമായി ഞാൻ കരുതുന്നു. ആ പശ്ചാത്തലത്തിൽ ക്രിസ്തുവിന്റെ ജീവിതവും പ്രവർത്തനങ്ങളും വിവരിക്കുന്ന കൃതിയാണ് പുതിയനിയമം. ഇതിനുപുറമേ, ക്രിസ്തുവിനെ സംബന്ധിക്കുന്ന ഒത്തിരി പാരമ്പര്യങ്ങളും നമ്മൾ സ്വന്തമാക്കിയിട്ടുണ്ട്. ഇതിൽനിന്നെല്ലാം ഉരുത്തിരിഞ്ഞുവരുന്ന വിശ്വാസങ്ങളും അനുഷ്ഠാനങ്ങളും കൂദാശ എന്ന പേരിൽ സഭ പിന്തുടരുന്നുണ്ട്. നവീകരണവാദികൾക്ക് നല്ലതെന്ന് തോന്നുന്നവയിലൊക്കെ പങ്കെടുത്ത് നമ്മുടെ സാമൂഹ്യബന്ധം നഷ്ടപ്പെടാതെ സൂക്ഷിക്കുന്നതാണ് നല്ലത് എന്ന് ഞാൻ കരുതുന്നു. വിശ്വാസികൾക്ക് തങ്ങളുടെ വിശ്വാസത്തെപ്പറ്റി ചിന്തിക്കുവാനോ പഠിക്കുവാനോ അവകാശമില്ല എന്ന 'ഇമ്പിരിമേത്തൂർ മനോഭാവം' സഭ അവസാനിപ്പിക്കണം.

വിയോജിപ്പുകൾ സഭയിൽ പണ്ടുമുതലേ ഉണ്ടായിരുന്നു എന്നാണ് നാം മനസ്സിലാക്കേണ്ടത്. പക്ഷേ നിഖ്യാ, കോൺസ്റ്റാന്റിനോപ്പിൾ സൂനഹദോസുകളും വിശ്വാസപ്രഖ്യാപനങ്ങളുംവഴി ഔദ്യോഗികസഭ പരിശുദ്ധാത്മാവു നൽകിയ അഭിഷേകവരം (കാരിസം) വിശ്വാസികളിൽനിന്ന് തട്ടിപ്പറിച്ചു സ്വന്തമാക്കുകയാണ് ചെയ്തത്. ചക്രവർത്തിഭരണത്തിന്റെ അധികാരഗർവ്വും ശിക്ഷയുടെ വാൾമുനയും കാണിച്ച് പാവം വിശ്വാസികളെ, അന്നുമുതൽ ഇന്നുവരെ സഭ അടക്കി നിർത്തിയിരിക്കുന്നു! പക്ഷേ, അത്രയും വിധേയത്വം കാണിക്കേണ്ട സ്ഥിതി ഇപ്പോഴില്ല. എന്നാൽ പണ്ട് എതിർക്കുന്നവരെയൊക്കെ 'കച്ചിത്തുറു'വിൽ കെട്ടിയിട്ട് തീ കൊളുത്തുന്ന ഇൻക്വിസിഷന്റേതായ ഒരു ഇരുണ്ടയുഗം ഉണ്ടായിരുന്നു എന്ന് അഭിഷിക്തരും സമ്മതിക്കുന്നു.

ഒരു കണക്കിന് നാം ഭാഗ്യവാന്മാരാണ്. ചിന്താസ്വാതന്ത്ര്യവും അഭിപ്രായസ്വാതന്ത്ര്യവും പൊതുവേ അംഗീകരിക്കുന്ന ഒരു കാലയളവിലാണ് നമ്മുടെ ജീവിതം. കാനോൻ നിയമപ്രകാരം ആരുടെയും കഴുത്തുവെട്ടാൻ സഭയ്ക്ക് കഴിയുകയുമില്ല. സഭാധികാരികളോട് പറ്റിക്കൂടിനിന്നാൽ കിട്ടുന്ന ചില്ലറ 'നക്കാപ്പിച്ച'കൾ നഷ്ടപ്പെടുമെന്നുമാത്രം. അതിനു തയ്യാറുള്ളവർക്ക് തിരുത്തലുകൾ നിർദ്ദേശിക്കാം, ആവശ്യപ്പെടാം, അതിനുവേണ്ടി പ്രത്യക്ഷസമരംപോലും ചെയ്യാം. എന്നുകരുതി എന്നും കൊടി പിടിക്കണം എന്നല്ല പറയുന്നത്.

ചർച്ച് ആക്റ്റിന് വേണ്ടിയുള്ള സമരം ആവശ്യമാണ്. എന്നുകരുതി ചർച്ച് ആക്ട് വന്നതുകൊണ്ടുമാത്രം പ്രശ്‌നങ്ങൾ തീരുന്നില്ല. തിരഞ്ഞെടുക്കപ്പെട്ട എത്രയോ പ്രതിനിധികൾ ചൂഷകരായി മാറുന്നു. അപ്പോൾ നിലപാടുകൾ ആണ് വേണ്ടത്. അടിച്ചു തകർക്കുന്ന നിലപാടുകളാണ് ഒന്നാംതരം എന്നും കരുതരുത്.  ആധ്യാത്മികതയും അനുഷ്ഠാനങ്ങളുമൊക്കെ തകർക്കുകയല്ല നമ്മുടെ ലക്ഷ്യം. എല്ലാം എപ്പോഴും യുക്തിയുടെയും ബുദ്ധിയുടെയും വെളിച്ചത്തിൽ പരിശോധനാവിധേയമാക്കുക. സത്യം കണ്ടെത്തിക്കഴിഞ്ഞാൽപ്പിന്നെ വിട്ടുവീഴ്ച പാടില്ല, അത്രമാത്രം!

 ഇവിടെ നാം ചർച്ച ചെയ്യുന്ന അടിസ്ഥാന വേദോപദേശത്തിന്റെ കാര്യം അതല്ല. പാപ-പുണ്യങ്ങൾ, ക്രിസ്തുവിന്റെ രക്ഷാകരപ്രവർത്തനം, രക്തസാക്ഷിത്വം ദൈവരാജ്യസ്ഥാപനം ഇവയൊക്കെ ശരിയായിത്തന്നെ വിലയിരുത്തപ്പെടണം.

ക്രിസ്തു ഒറ്റപ്പെട്ട പാപങ്ങളെയോ പാപികളെയോ അല്ല എതിർത്തത്; മറിച്ച്, സംഘടിത ചൂഷണങ്ങളെയാണ്. ഇത് മനസ്സിലാക്കാൻ അക്വീനാസോ ആഗസ്തീനോസോ ഒന്നും പഠിച്ച് ഡോക്ടറേറ്റ് എടുക്കണമെന്നില്ല, സുവിശേഷം മനസ്സിരുത്തിവായിച്ചാൽ മതി. പഴയനിയമത്തിലെ ഉല്പത്തി പുസ്തകത്തിൽ കഥയാണുള്ളത്. പഴം പറിച്ചുതിന്നു എന്ന ക്രിയയല്ല പ്രധാനം,  തനിക്കു അവകാശമില്ലാത്തത് കൈയടക്കി എന്ന അന്യന്റെ അവകാശത്തിലേക്കുള്ള കടന്നുകയറ്റമാണ് പാപമാകുന്നത്. കായേന്റെ കാലമാകുമ്പോൾ അവകാശനിഷേധം സോദരനിഗ്രഹമായി വളരുന്നു. എന്നിട്ടും ദൈവം കായേന് സംരക്ഷണം കൊടുക്കുകയാണ് ചെയ്തത്. അവകാശനിഷേധം, അന്യന്റെ മുതലിലേക്കുള്ള തിരിഞ്ഞുനോട്ടം ഇവ സാമൂഹ്യതിന്മയായി വളർന്നുവരുമ്പോഴാണ് വെള്ളം, തീ, മഹാമാരി ഇവയൊക്കെക്കൊണ്ട് പ്രപഞ്ചനാഥൻ തിരിച്ചടിക്കുന്നത്. യേശു വന്നപ്പോൾ അദ്ദേഹം ചുങ്കക്കാരെയും വേശ്യകളെയും വെറുത്തില്ല. സമ്പന്നരും നിയമവ്യാഖ്യാതാക്കളും പാവങ്ങളെ ഞെരുക്കിയപ്പോൾ ക്രിസ്തു വ്യക്തമായും അവശരുടെ പക്ഷംചേർന്നു (ലൂക്കാ. 4:18-19). അന്ധർക്ക് കാഴ്ച്ചയും ബന്ദിതർക്ക് മോചനവും പ്രഖ്യാപിച്ചു. സമ്പത്ത് അഴിച്ചു പങ്കിടുന്ന ജൂബിലിവർഷം ആവശ്യപ്പെട്ടു. ഇതായിരുന്നു സുവിശേഷത്തിൽ നാം കാണുന്ന ക്രിസ്തുവിന്റെ രക്ഷാകരപ്രവൃത്തി. ഇതാണ് ആദിമസഭ പിന്തുടർന്ന സാമൂഹികക്രമം (അപ്പ.പ്രവ.2:44-47).  ഇതിന്റെ പേരിലാണ് എതിരാളികൾ ക്രിസ്തുവിനെ രാത്രിയിൽ പിടിച്ച്,  വെളുപ്പിന് വിസ്തരിച്ച്,  ഉച്ചയ്ക്ക് പച്ചയ്ക്കു കൊന്നത്.  ഇത് പരിഹാരബലിയൊന്നുമല്ല; ധീരരക്തസാക്ഷിത്വമാണ്. രക്തസാക്ഷി മരിക്കുന്നില്ല. ക്രിസ്തുവിന്റെ ഉയിർപ്പ് ഏറെ പ്രധാനമാകുന്നത് അങ്ങനെയാണ്. ക്രിസ്ത്യാനിയുടെ മനസ്സിൽ ക്രിസ്തു ഉയിർത്തിട്ടുണ്ടെങ്കിൽ അയാൾ ക്രിസ്തുവിന്റെ രക്ഷാകരപ്രവൃത്തിതന്നെ തുടരണം. മരണാനന്തരം അല്ല, ജീവിച്ചിരിക്കുമ്പോൾത്തന്നെ ചെയ്യേണ്ട പ്രവൃത്തിയെപ്പറ്റിയാണ് നാം പറയുന്നത്. അതാണ് നാം പഠിപ്പിക്കേണ്ട വേദോപദേശവും.

ഈ ഭൂമിയിൽ ദൈവരാജ്യം വരുത്താനാണ് ക്രിസ്തു രക്തസാക്ഷിത്വം വരിച്ചത്. നിന്റെ രാജ്യം ഈ ഭൂമിയിൽ വരണമേ എന്നാണല്ലോ ക്രിസ്തു ആഗ്രഹിച്ചതും പ്രാർത്ഥിച്ചതും. അങ്ങനെ പ്രാർത്ഥിക്കാനാണല്ലോ അനുയായികളെ പഠിപ്പിച്ചതും. നമുക്കും ക്രിസ്തുവിന്റെ രക്ഷാകരപ്രവൃത്തിതന്നെ തുടരാം!

Tuesday, September 15, 2020

വീണ്ടും സീറോ-മലബാർ സഭാസിനഡിന്റെ വഞ്ചന!

 ഷൈജു ആന്റണി ഫോൺ: 9388998006

(ജോ. കൺവീനർ, എസ്.ഒ.എസ് ആക്ഷൻ കമ്മറ്റി)

സീറോ-മലബാർ സഭാസിനഡ് വീണ്ടും എറണാകുളം-അങ്കമാലി അതിരൂപതയിലെ വിശ്വാസികളെയും വൈദികരെയും വഞ്ചിച്ചിരിക്കുന്നു! അതിരൂപതയുടെ അടിത്തറയിളക്കിയ ഭൂമി കച്ചവടത്തിലുണ്ടായ നഷ്ടപരിഹാരത്തിന് തീരുമാനമാകാതെ സീറോ-മലബാർ സഭയുടെ 28-ാമത് സിനഡിന്റെ രണ്ടാം സമ്മേളനവും പിരിഞ്ഞു. വിശ്വാസികളുടെയും വൈദികരുടെയും പ്രതീക്ഷകളെ തല്ലിക്കെടുത്തിയ ഈ സിനഡിന് ശേഷം അതിരൂപതയിൽ ചാരം മൂടിക്കിടന്ന കനലുകൾ ആളിക്കത്തും.

ബിഷപ്പ് കരിയിലിന് അഡ്മിനിസ്‌ട്രേറ്റീവ് ആർച്ച് ബിഷപ്പെന്ന നിലയിൽ ഇക്കാര്യത്തിലുള്ള സർവ്വാധികാരങ്ങളും റോമിൽനിന്ന് കല്പിച്ചുനൽകിയിട്ടും, ക്രിയാത്മകമായി യാതൊന്നും ചെയ്യാതെ വൈദികരെയും വിശ്വാസികളെയും വഞ്ചിക്കുകയായിരുന്നു എന്ന തിരിച്ചറിവിലാണ് അൽമായ സംഘടനകൾ. റെസ്റ്റിറ്റിയൂഷൻ നടപ്പാക്കുന്നതിനായി ഉണ്ടാക്കിയ ഡ്രാഫ്റ്റിങ് കമ്മിറ്റി മരവിപ്പിച്ചു നിർത്തിയിരിക്കുകയാണ്. ഇതുമായി ബന്ധപ്പെട്ട് അതിരൂപതാ ട്രിബ്യൂണലിൽ നൽകിയിരിക്കുന്ന വിവിധ കേസുകൾ പരിഗണനയ്ക്കുപോലും എടുത്തിട്ടില്ല. അതിനാൽത്തന്നെ, അതിരൂപതാകൂരിയ കുറ്റവാളികളെ സംരക്ഷിക്കുന്നു എന്ന സംശയത്തിന്റെ നിഴലിലാണ്.

ഈ തിരിച്ചറിവിൽനിന്ന് എല്ലാം വീണ്ടും തുടങ്ങുകയാണ്. മേജർ അതിരൂപതയിലെ മുഴുവൻ വിശ്വാസികളെയും വീണ്ടും സമരമുഖത്തേക്ക് വലിച്ചെറിയുന്ന സീറോ-മലബാർ സിനഡ്, വരുംകാല സംഭവങ്ങളുടെ പരിപൂർണ്ണ ഉത്തരവാദിത്വം ഏറ്റെടുക്കേണ്ടിവരും. വൈദികരുടെയും വിശ്വാസികളുടെയും ക്ഷമാപൂർണ്ണമായ സമീപനത്തെ അവരെ വഞ്ചിക്കാനുള്ള ഉപായമാക്കി സിനഡ് മാറ്റുകയായിരുന്നു.

പ്രിയപ്പെട്ട സിനഡ് ബിഷപ്പുമാരേ, റസ്റ്റിറ്റിയൂഷൻ നടപ്പാക്കണമെന്ന ഉത്തരവ് റോമിൽനിന്ന് തനിയേ വന്നതല്ല. ഞങ്ങൾ വിശ്വാസികളും  വൈദികരുംചേർന്ന് നേടിയെടുത്തതാണ്. അതു ഞങ്ങളുടെ അവകാശമാണ്. അതിനെ അട്ടിമറിക്കാനോ, അതിൽ വെള്ളം ചേർക്കാനോ ഞങ്ങൾ നിങ്ങളെ അനുവദിക്കുകയില്ല.

എറണാകുളം നഗരത്തിന്റെ ഹൃദയഭാഗത്തുണ്ടായിരുന്ന മൂന്നേക്കർ വരുന്ന 5 ഭൂമികൾ കപ്പലണ്ടിപ്പിണ്ണാക്കു പോലെ ചുളുവിലയ്ക്ക് വിറ്റുതുലച്ചതിന്റെ നഷ്ടപരിഹാരമാണ് ഞങ്ങൾ ചോദിക്കുന്നത്. അത് നിങ്ങളുടെ ഔദാര്യമല്ല. റോമിലെ പരിശുദ്ധ സിംഹാസനം അടിവരയിട്ടുറപ്പിച്ചു തന്ന ഞങ്ങളുടെ അവകാശമാണ്.

പ്രിയ കരിയിൽ പിതാവേ, അങ്ങിപ്പോൾ അലങ്കരിക്കുന്ന പദവി അങ്ങേക്ക് സ്വമേധയാ ലഭിച്ചതല്ല. റസ്റ്റിറ്റിയൂഷൻ നടപ്പിലാക്കുന്നതിനുവേണ്ടി ഞങ്ങൾ നേടിയെടുത്തതാണ്. അതിനാൽത്തന്നെ അങ്ങയുടെ പ്രഥമവും പ്രധാനവുമായ ദൗത്യം റസ്റ്റിറ്റിയൂഷൻ നടപ്പാക്കുക എന്നതുമാത്രമാണ്. കഴിഞ്ഞ ഒരു കൊല്ലം അതു നടപ്പാക്കാതെ അങ്ങു വിശ്രമിച്ചു. ഇനി അതു നടപ്പില്ല.

അതിരൂപത പണം കൊടുത്തു വാങ്ങിയ കോട്ടപ്പടി ഭൂമി വിൽക്കണമെന്ന് പറയാൻ ആർക്കും അവകാശമില്ല. അതു വിറ്റാൽത്തന്നെ അത് റസ്റ്റിറ്റിയൂഷൻ ആവുകയുമില്ല. പിടിയാവിലയ്ക്ക് ഭൂമി വിറ്റതിന്റെ നഷ്ടം തീർക്കുന്നത് മറ്റൊരു ഭൂമി വിറ്റു കൊണ്ടാണോ? നിങ്ങളുടെ കുതന്ത്രങ്ങൾക്ക് തല വച്ചു തരാൻ ഇനിയും ഞങ്ങൾ തയ്യാറല്ല.

ധാർമിക ബോധം നഷ്ടപ്പെട്ട ഒരു കൂട്ടം ആളുകളായി സിനഡ് ബിഷപ്പുമാർ എല്ലാവരും തരംതാഴരുത്. ഇനി പഠനങ്ങൾ ആവശ്യമില്ല. നടപടികളാണാവശ്യം. ഇൻജോഡി കമ്മീഷൻ റിപ്പോർട്ട് ഉടൻ പുറത്തു വിടണം. കഴിഞ്ഞ സമരകാലങ്ങളിൽ നിങ്ങൾ തന്ന വാഗ്ദാനങ്ങൾ മറക്കരുത്.

ഇനിയുണ്ടാകുന്ന സമരങ്ങൾക്കും, സത്യഗ്രഹങ്ങൾക്കും, മറ്റു കോലാഹലങ്ങൾക്കും ഉത്തരവാദികൾ അതിരൂപതാ കൂരിയയും സിനഡു ബിഷപ്പുമാരുംമാത്രമായിരിക്കും.

സഭയുടെ അധികാരച്ചരടുകൾ

ഷൈജു ജോസ് താക്കോൽക്കാരൻ (അഡ്മിൻ JSL) ഫോൺ-9372220215

ഇപ്പോളെനിക്ക് ഭീഷണികളും അസഭ്യവർഷങ്ങളും തീരെയില്ല എന്നുതന്നെ പറയാം. ഒരു സമയത്ത് നിരന്തരം ഫോൺ വിളിച്ച് കൊല്ലുമെന്നും കാലുവെട്ടുമെന്നും ഒക്കെപ്പറയുമായിരുന്നു. തന്നെയുമല്ല, ഒരു പാട് നുണപ്രചരണങ്ങളും നടത്തുമായിരുന്നു. ഇപ്പോൾ അതെല്ലാം നിശ്ശേഷം നിലച്ചിരിക്കുന്നു! അകാരണമായി വികാരിയും പുരോഹിതഭക്തരും ഒറ്റപ്പെടുത്താൻ നോക്കിയപ്പോൾ, ഓടാതെ തിരിഞ്ഞുനിന്നു എന്നതായിരുന്നു ഭീഷണിക്കു കാരണം.

ഈ അസഭ്യവർഷം നടത്തുന്നവർ ആരുംതന്നെ മറ്റു മതസ്ഥരല്ല; എല്ലാം ക്രിസ്ത്യാനികൾതന്നെയാണ്! എന്തുകൊണ്ട് ക്രിസ്ത്യാനികൾ ഇങ്ങനെയായി എന്നത് വളരെ ഉറക്കെ ചിന്തിക്കേണ്ട വിഷയമാണ്. ഇത്രത്തോളം നിയന്ത്രണശേഷിയുള്ള, സുസംഘടിതമായ മറ്റൊരു മതമില്ല. വത്തിക്കാനിലിരിക്കുന്ന മാർപ്പാപ്പയ്ക്ക് കേരളത്തിലെ നാട്ടിൻപുറത്തിരിക്കുന്ന ഒരു സാധാരണ വിശ്വാസിയെ കൈയെത്തിപ്പിടിക്കാൻ കഴിയുന്നത്ര ആസൂത്രിതമായ സംഘടനാരീതികളാണ് സഭയ്ക്കുള്ളത്. അതിരൂപത, രൂപത, ഇടവക, പ്രാർത്ഥനായൂണിറ്റുകൾ എന്നുവേണ്ട, ഓരോ വിശ്വാസിയുടെയും ഓരോ നീക്കവും കൃത്യമായി അറിയുവാനുള്ള സംവിധാനങ്ങൾ ഒരുക്കിയിട്ടുണ്ട്, ആധികാരിക സഭ. അതിൽ കുടുംബ ഡയറി, കുമ്പസാരക്കണക്ക്, വരിസംഖ്യക്കണക്ക് എന്നിങ്ങനെ ഓരോ കുടുംബത്തിന്റെയും വ്യക്തിയുടെയും വിവരങ്ങളും ഉൾപ്പെടുന്നു.

സത്യം പറയാം, ഇത്രകാലം ഇതെല്ലാം ഒരുതരം അഭിമാനമായി, അല്ലെങ്കിൽ വളരെ നിസ്സാരമായിക്കണ്ട് നമ്മളെല്ലാവരും ഈ സംവിധാനത്തോട് സഹകരിക്കുകയായിരുന്നു.

എന്നാൽ ഇതൊന്നും ഒട്ടും നിസ്സാരമോ അഭിമാനകരമോ ആയ കാര്യങ്ങളല്ല. ഇതെല്ലാം മത-പുരോഹിതനിയന്ത്രണങ്ങളുടെ ചരടുകളാണ്. ഓരോ ചരടും ഓരോ ചങ്ങലയായി വളർന്നിരിക്കുന്നു. ദൈവത്തിന്റെപേരിൽ പലരും നമ്മളെ അടക്കിഭരിക്കുന്നു, നമ്മളെ അതിരുവിട്ട് നിയന്ത്രിക്കുന്നു. ഈ അധികാരസ്വരം കുറച്ചുനാൾ മുമ്പുവരെ മിക്കപുരോഹിതരുടേയും പ്രസംഗങ്ങളിൽ കേൾക്കാമായിരുന്നു. ഇപ്പോൾ ആ അധികാരസ്വരം പുറപ്പെടുവിക്കുന്നതിനുള്ള അവസരം യാദൃശ്ചികമായി അവർക്ക് നഷ്ടപ്പെട്ടിരിക്കുന്നു എന്നുമാത്രം. അവർ വീണ്ടും വരും, പൂർവ്വാധികം ശക്തിയോടെ. ഇന്ന് ക്രൈസ്തവസമൂഹത്തിലെ എല്ലാ മേഖലകളിലും പുരോഹിതാധിപത്യമാണുള്ളത്. സകല കാര്യങ്ങളും പ്രത്യക്ഷമായും പരോക്ഷമായും നിയന്ത്രിക്കുന്നത് പൗരോഹിത്യമാണ്. മുഴുവൻ അധികാരവും അതിന്റെ അടയാളമായ സമ്പത്തും പൗരോഹിത്യത്തിന്റെ കൈവശമാണ്. ഭൂമിയിൽ സമ്പാദ്യം കൂട്ടിവയ്ക്കരുതെന്ന് വിശ്വാസികളെ കാലാകാലങ്ങളായി ഉപദേശിച്ച പുരോഹിതവർഗ്ഗം ഇന്ന് ജന്മികളായി മാറിയിരിക്കുന്നു. അവരുടെ ഒരിറ്റ് ദയവിനുവേണ്ടി ജനങ്ങൾക്ക് അവരുടെമുമ്പിൽ ഓച്ഛാനിച്ചു നിൽക്കേണ്ട ഗതികേട് വന്നിരിക്കുന്നു.

വിദ്യാഭ്യാസരംഗത്താണ് ഈ ആധിപത്യം ഏറ്റവും കൂടുതലുള്ളത്. കേരളത്തിലെ വിദ്യാഭ്യാസരംഗത്തിന്റെ 75%-വും ക്രൈസ്തവസഭകളുടെ കീഴിലാണ്. ഇന്ത്യൻ ഭരണഘടനയിലെ ന്യൂനപക്ഷാവകാശപ്രകാരമാണ് ഇതെല്ലാം അവർ കൈവശപ്പെടുത്തിയിരിക്കുന്നത്. ഇതിൽ ഏതെങ്കിലും ഒരു സാധാരണ വിശ്വാസി അഭിമാനിക്കുന്നുണ്ടെങ്കിൽ, അത് അവന്റെ അറിവില്ലായ്മ എന്നുമാത്രമേ പറയാൻ സാധിക്കൂ. ആലോചിച്ചുനോക്കൂ, ഭരണഘടനയിലെ ഈ ആനുകൂല്യം ക്രൈസ്തവസമുദായത്തിലെ ഒരു സാധാരണക്കാരനും അനുഭവിക്കാൻ സാധിക്കുന്നില്ല എന്നതല്ലേ സത്യം? സഭാനിയമപ്രകാരമാണ് (കാനോൻ നിയമം) ഇവയെല്ലാം ഭരിക്കപ്പെടുന്നത് എന്നതാണ്, അതിനു കാരണം. ഇത് എത്രയോ വലിയ അനീതിയാണ്!

വാസ്തവത്തിൽ, ജനാധിപത്യ ഇന്ത്യയിലെ നിയമപ്രകാരമാണ് ഇവ ഭരിക്കപ്പെടേണ്ടത്. ഈ നീതിനിഷേധത്തിന്റെ ദൂഷ്യഫലം അനുഭവിക്കുന്നത് ക്രിസ്ത്യാനികൾ മാത്രമല്ല; മറിച്ച്, ഇന്ത്യയിലെ ഓരോ പൗരനുമാണ്. ഇത് അത്യന്തം ഗൗരവതരമായ ഒരു വിഷയമായതുകൊണ്ടാണ്, ഇവിടെ ഒരു പള്ളി നിയമം (ഇവൗൃരവ അര)േ കൊണ്ടുവരണമെന്ന് നമ്മൾ പറയുന്നത്. പൗരോഹിത്യാധികാരം അതിനെ നഖശിഖാന്തം എതിർക്കുന്നത്, കാനോൻ നിയമം അവർക്കു നൽകുന്ന അധികാരസുഖം അതവർക്കു നഷ്ടപ്പെടുത്തും എന്നുള്ളതുകൊണ്ടാണ്. 'ചർച്ച് ആക്ട് വേണ്ട' എന്ന് വിശ്വാസികളിൽനിന്നും ഒപ്പു ശേഖരണം നടത്തിയവർ, ചർച്ച് ആക്ടിനെതിരെ പൊതുസമ്മേളനങ്ങൾ സംഘടിപ്പിച്ചവർ എന്തുകൊണ്ട് ചർച്ച് ആക്ടിന്റെ വിശദാംശങ്ങൾ ദേവാലയങ്ങളിൽ പ്രസിദ്ധപ്പെടുത്തുന്നില്ല? കേരളത്തിലെ പ്രബുദ്ധരായ വിശ്വാസികൾ, ഈ നിയമം എന്താണെന്നും, അതിന്റെ ആവശ്യകത എന്താണെന്നും സ്വയം മനസ്സിലാക്കട്ടെ. പുരോഹിതർ പറയുന്നത് മുഴുവൻ അതേപടി അനുസരിക്കുന്ന വെറും വിഡ്ഢിവിശ്വാസികളായി നമ്മൾ ഇനിയും മാറരുത്!

ഇന്ത്യൻ ഭരണകൂടം, ഓരോ സാധാരണക്കാരനും അവകാശമായി നൽകിയ ആനുകൂല്യങ്ങളാണ് ക്രൈസ്തവസമൂഹത്തിലെ അണുമാത്ര ന്യൂനപക്ഷമായ പുരോഹിതവിഭാഗം കൈവശം വച്ച് അനുഭവിക്കുന്നത്. ഇവരുടെ ആധിപത്യം ഇന്ന് അതിവിപുലമായിരിക്കുന്നു. ഭരിക്കുന്ന ഗവൺമെന്റുകളെപ്പോലും നിയന്തിക്കാൻ തക്ക സ്ഥിതിയിലേക്ക് അത് വളർന്നിരിക്കുന്നു. ഇതു മനസ്സിലാക്കാൻ ഒറ്റക്കാര്യംമാത്രം നോക്കിയാൽമതി - ഇവരുടെ വിദ്യാഭ്യാസസ്ഥാപനങ്ങളിലെ ജീവനക്കാർക്ക് സാധാരണക്കാരന്റെ നികുതിപ്പണത്തിൽനിന്ന് ഗവൺമെന്റ് ശമ്പളം കൊടുക്കണം. എന്നാലോ, ജീവനക്കാരെ ഇവർ നേരിട്ട് നിയമിക്കും, അതിൽ ഗവൺമെന്റിന് ഇടപെടാൻ പാടില്ല! ഇതെന്ത് നീതി? ഈ ഇരുപത്തൊന്നാം നൂറ്റാണ്ടിലും ഇങ്ങനെ നടക്കുന്നത് എന്തുകൊണ്ടാണ്? ഇതിന് ഒരു മാറ്റം വരുത്താൻ 1957 മുതൽ പലരും ശ്രമിച്ചിട്ടുണ്ട്. അവരെല്ലാം ഈ 'ദൈവികാധികാരി'കളുടെ കരുത്തിന്റെ ഫലം അനുഭവിച്ചറിഞ്ഞിട്ടുമുണ്ട്!

എന്നാൽ, ഇന്ന് കാലം മാറിയിരിക്കുന്നു. ഇവിടെ തുല്യനീതിക്കുവേണ്ടിയുള്ള മുറവിളി ഉയരുകയാണ്. ജനങ്ങൾ ഇത്തരം വിഷയങ്ങളിൽ ബോധവാന്മാർ ആയിക്കൊണ്ടിരിക്കുന്നു. ഇവിടെ ഒരു മാറ്റം അനിവാര്യമായിരിക്കുന്നു.  ഇനിയും ഈ അനീതി ഇവിടെ നടമാടാൻ നാം അനുവദിച്ചുകൂടാ...!

 

Sunday, September 13, 2020

ചർച്ച് ആക്ട് ക്രൈസ്തവരുടെ അവകാശം

ജോൺ കരമ്യാലിൽ, ചിക്കാഗോ(USA)

*

ചർച്ച് ആക്ട് ഇല്ലാത്തതുകൊണ്ടാണ്, കേരളത്തിലെ ക്രൈസ്തവരുടെ സ്വത്തുക്കൾ അന്യാധീനപ്പെട്ടുപോവുകയും പുരോഹിതാധിപത്യം സഭയിൽ നിലനിൽക്കുകയും ചെയ്യുന്നത്. കേരളത്തിലെ ഓർത്തോഡോക്‌സ് - യാക്കോബായക്കാരുടെ പ്രശ്‌നത്തിനും ഇത്തരമൊരു നിയമത്തിന്റെ അഭാവമാണു കാരണം.

*

ചർച്ച് ആക്ട് എന്നത് ഉപഭോക്താക്കളായ വിശ്വാസികളെ, അതായത് ആത്മായരായ സാധാരണക്കാരെ  അവരുടെ സഭാസ്വത്തിന്റെ ഉടമസ്ഥരാക്കുന്ന നിയമമാണ്. തദ്വാരാ, അവർ മതമേധാവികളുടെ അടിമത്വത്തിൽനിന്നു  മോചിതരാവുന്നു; അവർ ചൂഷണത്തിൽനിന്നു പുറത്താകുന്നു. എല്ലാ വരുമാനത്തിനും കൃത്യമായ കണക്കുകളും രേഖകളും ഉണ്ടാവുന്നു; സുതാര്യത കൈവരുന്നു; പണം ധൂർത്തടിക്കപ്പെടാത്ത സാഹചര്യമുണ്ടാകുന്നു.  വിശ്വാസികളുടെ ഇടയിൽനിന്നു വിശ്വാസികൾതന്നെ നടത്തിപ്പുകാരെ തെരെഞ്ഞെടുക്കുന്നതിനാൽ പണം ധൂർത്തടിക്കപ്പെട്ടാൽ ചോദ്യംചെയ്യാനും, ആ പണം തിരിച്ചുവരുത്താനും സാധിക്കും. രണ്ടാമതൊരാവശ്യം വന്നാൽ ആദ്യം സമാഹരിച്ചതിൽനിന്നു മിച്ചമുള്ള പണം ഉപയോഗിക്കുകയും ആവാം.  

കേരള നിയമപരിഷ്‌കരണ കമ്മീഷൻ ചെയർമാനായിരുന്ന ബഹു. ജസ്റ്റീസ്  വി. ആർ. കൃഷ്ണയ്യർ ചർച്ച് ആക്ടിന്റെ കരടുരേഖ 2009-ൽ ഗവണ്മെന്റിന് സമർപ്പിച്ചതാണ്.

ചർച്ച്  ആക്ട്  നിലവിൽ വന്നാൽ, മതസ്ഥാപനങ്ങളിലും സഭാസ്ഥാപനങ്ങളിലും പണം  മിച്ചം  വരും; സഭാസ്ഥാപനങ്ങളിലെ   സാമ്പത്തിക   ഇടപാടുകളിൽനിന്നു പൂജാരിമാർ മാത്രമായ പുരോഹിതരെ പൂർണ്ണമായും ഒഴിവാക്കാം. പൂജാരിമാരുള്ളിടത്താണ് പണത്തിന് എപ്പോഴും കുറവുണ്ടാവുക; അവരുള്ളിടത്തോളം കാലം ഒന്നിനും പണം തികയില്ല. ഒരു ആവശ്യം വരുമ്പോൾ, ആവശ്യത്തിനുള്ള  തുകയുടെ പല മടങ്ങു പണമാണ് സമാഹരിക്കുക.  ചെലവു കഴിഞ്ഞുള്ള വൻതുകയുടെ കണക്കുകൾ  പൂജാരിമാർക്ക് ആരെയും ബോധ്യപ്പെടുത്തേണ്ടതില്ലാത്തതിനാൽ  ആ പണം അവർ എടുത്ത് കണക്കുകൾ സമാസമമാക്കും. എന്നാൽ ഈ പണം വിശ്വാസികളിൽനിന്നു തിരഞ്ഞെടുക്കപ്പെട്ട കമ്മിറ്റിയാണു കൈകാര്യം ചെയ്യുന്നതെങ്കിൽ, ആദ്യം സമാഹരിച്ചതിൽ മിച്ചമുള്ളതിൽനിന്നെടുത്തു കാര്യങ്ങൾ നടത്തുകയും, രണ്ടാമതൊരു  പണപ്പിരിവു ഒഴിവാക്കുകയും ചെയ്യാം. ചോദ്യം  ചെയ്യപ്പെടാത്ത  പൂജാരിമാർ (വൈദികർ) പണം കൈകാര്യം ചെയ്യുന്നിടത്ത് എപ്പോഴും പണം ആവശ്യമായിവരും; പിരിക്കുന്തോറും, അഥവാ കൊടുക്കുന്തോറും പുതിയ ആവശ്യങ്ങൾ ഉണ്ടാക്കിക്കൊണ്ടേയിരിക്കും. ഇവരുടെ പ്രവൃത്തികൾ വിലയിരുത്തുമ്പോൾ ഇവർ ദൈവശാസ്ത്രത്തിനുപകരം, തട്ടിപ്പുസാമ്പത്തികശാസ്ത്രമാണ് പഠിച്ചതെന്നു തോന്നും.

'ചർച്ച് ആക്ട്' അഥവാ 'ചർച്ച് ട്രസ്റ്റ് ബിൽ' എന്നു കേട്ടപ്പോഴേ അതിന്റെ ഗുണവും  മഹത്വവും മനസ്സിലാക്കിയ ക്രിസ്ത്യൻ പുരോഹിതർ, അത് തെറ്റാണെന്നും വിശ്വാസികളായ മനുഷ്യർക്കു ദോഷം വരുത്തുമെന്നും പള്ളികളെയും വൈദികരെയും ദൈവത്തെയും അത് ഇല്ലാതാക്കുമെന്നും, സ്വയം ചിന്തിക്കുവാനുള്ള കഴിവോ പ്രതികരണശേഷിയോ ഇല്ലാത്തവരായ വിശ്വാസികളെ    വിശ്വസിപ്പിക്കുന്നതിൽ  കുറെയൊക്കെ വിജയിച്ചു. എങ്കിലും,  അവർക്കുതന്നെ ആ വിജയത്തിൽ അത്ര വിശ്വസിക്കുവാനാവുന്നില്ല. കാരണം, ഒരു സ്ത്രീയ്ക്കു തന്റെ ഗർഭം എക്കാലത്തും മറച്ചുവയ്ക്കുവാനും  മൂടിവയ്ക്കുവാനും ആവില്ലാത്തതുപോലെ,   ചർച്ച്    ആക്ടിലെ   സത്യങ്ങളും  പുറത്തുവരുമെന്നും അത് അധികം വൈകാതെ നിലവിൽ വരുകതന്നെ ചെയ്യുമെന്നും അവർക്കറിയാം.  ചർച്ച് ആക്ട് നിലവിൽ വന്നാൽ സഭകൾ നികുതി കൊടുക്കേണ്ടിവരുമെന്നും, ആ നികുതി ജനത്തിനു വെറുതെ നഷ്ടപ്പെടുമെന്നും പറഞ്ഞു ജനങ്ങളെ തെറ്റിദ്ധരിപ്പിച്ചു വിശ്വസിപ്പിക്കുന്നു. ഇനി അങ്ങനെ കൊടുക്കേണ്ടിവന്നാൽത്തന്നെ, ചെലവുകൾ കഴിഞ്ഞുള്ള വരുമാനത്തിന്റെ ഒരംശം മാത്രമാണുകൊടുക്കേണ്ടിവരിക. അങ്ങനെയാവുമ്പോൾ സാധാരണ വിശ്വാസികളിൽനിന്നുമുള്ള കുത്തിപ്പിഴിയലുകൾ കുറയും; കുറയുകമാത്രമല്ല,  അതില്ലാതാവുകയും ചെയ്യും.

      

അമേരിക്കയിലെയും യൂറോപ്പിലെയുംപോലെ പള്ളികൾ പൂട്ടിപ്പോവാതിരിക്കുവാനും, വിശ്വാസികൾ വിശ്വാസത്തിൽ ഉറച്ചുനിൽക്കുവാനും ചർച്ച് ആക്ട് അത്യന്താപേക്ഷിതമാണ്.  ഇടവകപ്പള്ളിയുടെ സ്വത്തുക്കൾ ഇടവകക്കാരുടെ ഉടമസ്ഥതയിൽ കൊണ്ടുവരുന്ന ഒരു സിവിൽനിയമമാണ് ചർച്ച് ആക്ട്. മെത്രാന്മാരും മെത്രാപ്പോലീത്തന്മാരും കർദ്ദിനാളന്മാരും ഇന്ന് രാജാക്കന്മാരെപ്പോലെ വാഴുകയാണ്. രാജാവിനു നിയമസംഹിതകൾ ഇല്ലല്ലോ, പറയുന്നതെല്ലാം നിയമങ്ങളാണ്. എന്നാൽ, അവർ ജനസേവകരും കാവൽക്കാരുമായിരിക്കണം. അവരെ അപ്രകാരമാകാൻ നിർബന്ധിക്കുന്നു, ചർച്ച് ആക്ട്. അതോടെ ജനത്തിന്റെ ഐക്യവും കൂട്ടായ്മയും വർധിക്കും.

 ചർച്ച് ആക്ട് നടപ്പിൽ വരുത്തുന്നത് ഔദാര്യമല്ല; അത് ഗവണ്മെൻരിന്റെ ഭരണഘടനാബാധ്യതയും ജനങ്ങളുടെ അവകാശവുമാണ്. കാനോൻ നിയമം വിശുദ്ധമെന്നു പറഞ്ഞു പൗരോഹിത്യം വിശ്വാസികളെ തെറ്റിദ്ധരിപ്പിക്കുകയും കബളിപ്പിക്കുകയും ഭയപ്പെടുത്തുകയും  ചെയ്യുന്നു. ഇവിടെ ജനങ്ങൾ ഭയപ്പെടാൻ പാടില്ലാത്തതാണ്. കാരണം, കാനോൻ  നിയമങ്ങൾ  ദൈവികനിയമമല്ല; മറിച്ച്, സുഖലോലുപരും സ്വേച്ഛാധിപതികളുമായ പുരോഹിതവർഗ്ഗത്തിന്റെ നിർമ്മിതിയാണ്. ഏതു സഭാ നിയമങ്ങളായാലും, അതെല്ലാം സിവിൽ നിയമത്തിന്റെ അധീനതയിൽ ആക്കേണ്ടതാണ്.

ചർച്ച് ആക്ട് ഇല്ലാത്തതുകൊണ്ടാണ്, കേരളത്തിലെ ക്രൈസ്തവരുടെ സ്വത്തുക്കൾ അന്യാധീനപ്പെട്ടുപോവുകയും പുരോഹിതാധിപത്യം സഭയിൽ നിലനിൽക്കുകയും ചെയ്യുന്നത്. കേരളത്തിലെ ഓർത്തോഡോക്‌സ് - യാക്കോബായക്കാരുടെ പ്രശ്‌നത്തിനും ഇത്തരമൊരു നിയമത്തിന്റെ അഭാവമാണു കാരണം.

ചർച്ച് ആക്ട്, ക്രൈസ്തവസഭകൾക്ക് ദോഷംചെയ്യുമെന്നു വിശ്വാസികളെ പഠിപ്പിച്ചു  വിശ്വസിപ്പിച്ചാലേ സഭാധികാരികളായിത്തീർന്നിരിക്കുന്ന പൂജാരിമാർക്ക്  ഈ    സ്വത്തുക്കൾ പൂർണ്ണമായും അനുഭവിക്കുവാനാവൂ. ചർച്ച് ആക്ട്  ശരിക്കും വായിച്ചു മനസ്സിലാക്കിയാൽ അത് തികച്ചും ക്രൈസ്തവമാണെന്നും ക്രൈസ്തവ വിശ്വാസികൾക്ക് ഏറെ  ഗുണകരമാണെന്നും മനസ്സിലാക്കാം. ചർച്ച് ആക്ടുമൂലം തങ്ങളുടെ സ്വകാര്യസുഖങ്ങൾക്കുവരുന്ന ഭംഗമാണ്  വൈദികവൃന്ദത്തെ ക്ഷോഭിപ്പിക്കുന്നതും ചൊടിപ്പിക്കുന്നതും. സഭകളുടെ സ്വത്ത്  സർക്കാർ   കൊണ്ടുപോവുമെന്ന് അവർ   പറയുന്നത് തെറ്റും നുണയുമാണ്. ചർച്ച് ആക്ടിലൂടെ  സഭകൾക്കും സഭാസ്വത്തിനും കൂടുതൽ സംരക്ഷണമാണ് ലഭിക്കുന്നത്.

 

Friday, September 11, 2020

'ചർച്ച് ആക്റ്റ് നിരസിച്ചവർക്ക് ഇനി സമാധാനമുണ്ടാകില്ല!'


*

...ചർച്ച് ആക്റ്റ് നടപ്പാക്കി ന്യായം നടപ്പാക്കണം എന്ന വ്യക്തമായ സന്ദേശം അദ്ദേഹം നൽകിയിരിക്കുകയാണ്.

ഇത് വിശ്വാസികൾക്ക് ശുഭലക്ഷണമാണ്. സർക്കാരിന് അശുഭകരമാവുകയും ചെയ്യും.

ലക്ഷങ്ങളായ വിശ്വാസികളുടെ ആവശ്യം തിരസ്‌കരിച്ച് വിരലിലെണ്ണാവുന്ന ബിഷപ്പുമാരുടെ ആവശ്യം അംഗീകരിച്ച സർക്കാരിന് ഇനി സമാധാനമുണ്ടാവില്ല...

*

['അഖിലകേരള ചർച്ച് ആക്റ്റ് ആക്ഷൻകൗൺസിൽ' ചെയർമാൻ  അഡ്വ ബോറിസ് പോൾ, സെക്രട്ടറി ജോസഫ് വെളിവിൽ എന്നിവർ ചേർന്നു നടത്തിയ പ്രസ്താവന]

ജസ്റ്റിസ് വി.ആർ.കൃഷ്ണയ്യർ ചെയർമാനായ നിയമപരിഷ്‌കരണ കമ്മീഷൻ ക്രൈസ്തവവരുടെ സഭാസ്വത്തു ഭരണത്തിനായി കരട് നിയമം തയ്യാറാക്കി കേരള സർക്കാരിന് സമർപ്പിച്ചത് 2009-ൽ ആണ്. ഇന്ത്യൻ ഭരണഘടന പ്രകാരം അങ്ങനെയൊരു നിയമം പാസ്സാക്കി നടപ്പാക്കാൻ സർക്കാർ ബാധ്യസ്ഥവുമാണ്.

ഇത് 2020. വിവിധ രാഷ്ട്രീയനിലപാടുകളുള്ള സർക്കാരുകൾ ഈ നിയമം നടപ്പാക്കാതെ ഇത്രയുംകാലം ഭംഗിയായി തട്ടിക്കളിച്ചു. ക്രൈസ്തവ വിശ്വാസിസമൂഹത്തേക്കാൾ ഏതാനും ചില ബിഷപ്പുമാരുടെ വാക്കുകൾക്കാണ് എല്ലാ ഭരണാധികാരികളും വിലകല്പിക്കാറുള്ളത്. ഇടതുപക്ഷ സർക്കാർ പ്രതീക്ഷ നൽകിയിരുന്നു. സി.പി.ഐ പരസ്യമായി നിയമനിർമ്മാണത്തെ അനുകൂലിച്ചു. 2019 നവംബറിൽ രണ്ടു ലക്ഷം ക്രൈസ്തവർ സെക്രട്ടേറിയറ്റിനു മുന്നിൽ ശക്തിപ്രകടനം നടത്തി തങ്ങളുടെ ഇംഗിതം സർക്കാരിനെ അറിയിച്ചു. കേരള ഗവർണർ സമരക്കാർക്ക് അനുകൂല നിലപാടെടുത്ത് സർക്കാരിന്റെ ഭരണഘടനാബാധ്യത സർക്കാരിനെ ഓർമ്മിപ്പിച്ചു.

എന്നാൽ പ്രതീക്ഷകളെ ഇല്ലാതാക്കി, 'ആ നിയമം നടപ്പിലാക്കേണ്ട എന്ന് തീരുമാനിച്ച'തായി സർക്കാർ രേഖാമൂലം അറിയിച്ചു! ബിഷപ്പുമാർ എന്ന ന്യൂനപക്ഷത്തെ അംഗീകരിച്ച് സമൂഹം എന്ന ഭൂരിപക്ഷത്തെ കൊഞ്ഞനംകുത്തി കാണിച്ച തീരുമാനം!

ഇനിയൊരു സമരം എങ്ങനെ എന്ന ചിന്തയിലിരിക്കെ, സാഹചര്യങ്ങൾ ദൈവികമായി സൃഷ്ടിക്കപ്പെട്ടിരിക്കുന്നു! പിറമാടം ദയാറായിൽ ആഗസ്റ്റ് 19-ന് അഭിവന്ദ്യ ബാർ യൂഹാനോൻ റമ്പാച്ചൻ മരണം വരെയുള്ള നിരാഹാര സമരം ആരംഭിച്ചിരിക്കുന്നു.

ചർച്ച് ആക്റ്റ് നടപ്പാക്കി ന്യായം നടപ്പാക്കണം എന്ന വ്യക്തമായ സന്ദേശം അദ്ദേഹം നൽകിയിരിക്കുകയാണ്. ഇത് വിശ്വാസികൾക്ക് ശുഭലക്ഷണമാണ്. സർക്കാരിന് അശുഭകരമാവുകയുംചെയ്യും. ലക്ഷങ്ങളായ വിശ്വാസികളുടെ ആവശ്യം തിരസ്‌കരിച്ച് വിരലിലെണ്ണാവുന്ന ബിഷപ്പുമാരുടെ ആവശ്യം അംഗീകരിച്ച സർക്കാരിന് ഇനി സമാധാനമുണ്ടാവില്ല. ക്രൈസ്തവ വിശ്വാസികൾ കൂടുതൽ ഊർജ്ജസ്വലരായി ഉണർന്ന് പ്രതികരിക്കാൻ റമ്പാച്ചന്റെ നിരാഹാര സമരം നിമിത്തം ആകും. എല്ലാക്കാലവും എല്ലാവരേയും പറ്റിക്കാനാവില്ല.

ഈ സമരം വിജയിച്ചിരിക്കും. വിജയിപ്പിച്ചിരിക്കും.

സുപ്രീംകോടതിവിധി പുനഃപരിശോധിക്കണം

എം.എൽ ജോർജ്ജ് മാളിയേക്കൽ 

(സെക്രട്ടറി, 'കാത്തലിക് ലേമെൻസ് അസ്സോസിയേഷൻ') ഫോൺ: 9400953632

ഇന്ത്യൻ പൗരന്മാരായ ക്രൈസ്തവർ പടുത്തുയർത്തിയിട്ടുളള പളളികളും സ്ഥാപനങ്ങളും സ്വത്തുക്കളും പൊതുവായിട്ടുളളതാണ്. ജീവകാരുണ്യപ്രവർത്തനങ്ങളെ മുൻനിർത്തിയുളള അവ ട്രസ്റ്റ് രൂപേണയുളളതാണ്. ഓരോ പള്ളിയും ഓരോ സ്വതന്ത്രറിപ്പബ്‌ളിക്കായാണ് ക്രൈസ്തവസഭയുടെ ആരംഭംമുതൽ പ്രവർത്തിച്ചുപോന്നിട്ടുള്ളത്. അതാതു പളളികളുടെ പൊതുയോഗമാണ് ഭൗതികകാര്യങ്ങൾ നിയന്ത്രിച്ചു പോന്നിട്ടുളളത്.

*

ഇന്ത്യയിലെ ക്രൈസ്തവസമൂഹം ഇന്ന് അരക്ഷിതരാണ്. നേരായ ഒരു പള്ളിഭരണനിയമത്തിന്റെ അഭാവംമൂലം അവരുടെ മതസമ്പത്തും ജീവിതമൂല്യവും നഷ്ടപ്പെടുകയാണ്. യാക്കോബായ-ഓർത്തഡോക്‌സ് വിഭാഗത്തിന്റെ കലഹങ്ങൾക്കും വ്യവഹാരങ്ങൾക്കും ഇന്നും അറുതിവരാത്തതിന്റെ കാരണവും മറ്റൊന്നല്ല. കലഹങ്ങൾ ക്രമസമാധാനപാലനത്തിനു ഭീഷണി ഉയർത്തുകയാണ്.

*

ഒരു ആചാരം സമൂഹത്തിൽ മുപ്പതുവർഷം തുടർച്ചയായി നിലനിന്നാൽ ആ ആചാരം ഭരണഘടനാ വിരുദ്ധമല്ലെങ്കിൽ അതിന് നിയമത്തിന്റെ പരിഗണനയുണ്ടായിരിക്കെ, ആ നിലയിലുള്ള ആനുകൂല്യംപോലും യാക്കോബായസഭയ്ക്കു ലഭ്യമായില്ല. 'വൃക്ഷത്തെ അതു പുറപ്പെടുവിക്കുന്ന ഫലംകൊണ്ടാണ് വിലയിരുത്തേണ്ടത്' എന്ന തത്ത്വംവച്ചുനോക്കിയാൽ, കേരളസമൂഹത്തിൽ വലിയ രീതിയിൽ ക്രമസമാധാനത്തകർച്ചയ്ക്കും അക്രമങ്ങൾക്കും വഴിയൊരുക്കിയ ഈ കോടതിവിധി മികവാർന്ന ഒന്നാണെന്നു വിലയിരുത്താൻ ആർക്കും കഴിഞ്ഞെന്നുവരില്ല.

*

[യൂഹാനോൻ റമ്പാച്ചൻ തുടങ്ങിയിരിക്കുന്ന നിരാഹാരസമരത്തിന്റെ പശ്ചാത്തലത്തിൽ കാത്തലിക് ലേമെൻസ് അസ്സോസിയേഷൻ പുറപ്പെടുവിച്ച പ്രസ്താവന]

ബഹുമാന്യരേ,

ഇന്ത്യയിലെ യാക്കോബായ-ഓർത്തഡോക്‌സ് ക്രിസ്തീയവിഭാഗങ്ങളിൽ ഉടലെടുത്ത സഭാതർക്കക്കേസ് ആരംഭിച്ചിട്ട് ഒരു നൂറ്റാണ്ട് പിന്നിട്ടു. സ്വാതന്ത്ര്യലബ്ധിക്കുമുമ്പ് അന്നത്തെ കോടതിയുടെ മുൻപിൽ എത്തിപ്പെട്ട വിവാദത്തിന് നാളിതുവരെ പരിഹാരമുണ്ടായിട്ടില്ല. സ്വാതന്ത്ര്യലബ്ധിക്കുശേഷം ഇന്ത്യ ഒരു സ്വതന്ത്ര ജനാധിപത്യ-മതേതര റിപ്പബ്‌ളിക്കാവുകയും അതിനനുസൃതമായ ഭരണഘടനയും നീതിന്യായവ്യവസ്ഥയും നിലവിൽവരുകയും ചെയ്തു. അതോടെ ഭരണഘടനയ്ക്ക് വിധേയമല്ലാത്ത നിയമങ്ങളും ചട്ടങ്ങളും അസാധുവായി.

എന്നാൽ ക്രൈസ്തവരുടെ മതസമ്പത്തുകൾമാത്രം ഇന്ത്യൻ ഭരണഘടനയ്ക്ക് വിധേയമായി ജനാധിപത്യരീതിയിൽ ഭരിക്കുന്നതിനും നിയന്ത്രിക്കുന്നതിനും വിനിയോഗിക്കുന്നതിനും ആവശ്യമായ നിയമം സർക്കാരുകൾ പ്രാബല്യത്തിലാക്കിയിട്ടില്ല. ഇത് ക്രിസ്ത്യൻ സമൂഹത്തോട് കാണിക്കുന്ന കടുത്ത വിവേചനമാണ്.

നിരന്തരമായ നിവേദനങ്ങളുടെ ഫലമായി ശ്രീ. അച്ചുതാനന്ദൻ സർക്കാർ 2007-ൽ, ക്രിസ്ത്യൻ സഭകളുടെ പളളികളും സ്ഥാപനങ്ങളും സ്വത്തുക്കളും വരുമാനങ്ങളും ഇന്ത്യൻ ഭരണഘടനയ്ക്കുവിധേയമായി സഭാംഗങ്ങളുടെ പങ്കാളിത്തത്തോടെ ഭരിക്കുന്നതിനും നിയന്ത്രിക്കുന്നതിനും വിനിയോഗിക്കുന്നതിനും ആവശ്യമായ നിയമം ഉണ്ടാക്കുന്നതിന് കേരള നിയമപരിഷ്‌കരണകമ്മീഷനെ അധികാരപ്പെടുത്തിക്കൊണ്ട് ക്രിസ്ത്യൻ സമൂഹത്തോട് സന്മനസ് കാണിച്ചു. നിയമപണ്ഡിതനും നീതിനിഷ്ഠനും മനുഷ്യസ്‌നേഹിയുമായ ജസ്റ്റീസ് വി. ആർ. കൃഷ്ണയ്യർ ചെയർമാനായ നിയമപരിഷ്‌കരണകമ്മീഷൻ ജനാധിപത്യ രീതിയിൽ വിശദവും വിപുലവും ദീർഘവുമായ തെളിവെടുപ്പുകൾ നടത്തി കുറ്റമറ്റ ''ദി കേരള ക്രിസ്ത്യൻ ചർച്ച് പ്രോപ്പർട്ടീസ് ആന്റ് ഇൻസ്റ്റിറ്റിയൂഷൻസ് ട്രസ്റ്റ് ബിൽ' എന്ന നിയമത്തിനു രൂപംനൽകി, 2009 റിപ്പബ്‌ളിക് ദിനത്തിൽ നിയമപ്രാബല്യത്തിലാക്കണമെന്ന ശിപാർശയോടെ കേരള സർക്കാരിന് സമർപ്പിച്ചിരുന്നു. കേരളത്തിലെ ജന്മി-മുതലാളിമാരുടെ ഉടമസ്ഥതയിലിരുന്ന ഭൂമി, കൃഷിക്ക് പാട്ടത്തിനെടുത്ത സാധുകർഷകർക്ക് പതിച്ചുനൽകിക്കൊണ്ട് ജന്മി-കുടിയാൻ ഫ്യൂഡൽ വ്യവസ്ഥിതിയെ തകർത്ത, ജന്മിമാരുടെ കീഴിൽ അഗതികളും നിരാലംബരുമായിരുന്ന അനേകം സാധുകുടുംബങ്ങൾക്ക് കുടികിടപ്പ് അവകാശം സ്ഥാപിച്ചുനൽകിയ ഇടതുപക്ഷ സർക്കാരുകളുടെ മുഖമുദ്രതന്നെ നീതിബോധമായിരുന്നു. അന്ന് കമ്യൂണിസ്റ്റ് പ്രസ്ഥാനത്തിന്റെ നേതൃനിരയിലുണ്ടായിരുന്നവരെല്ലാംതന്നെ പ്രായാധിക്യത്താൽ അവശരോ, കാലയവനികയിൽ അപ്രത്യക്ഷരോ ആയി. അല്ലായിരുന്നെങ്കിൽ, തീർച്ചയായും, കേരളസഭയിൽ ഇന്നു നിലനിൽക്കുന്ന പുരോഹിതജന്മിത്വത്തിൽനിന്ന് അവർ ഇവിടുത്തെ ക്രൈസ്തവരെ മോചിപ്പിക്കുമായിരുന്നു.

അച്ചുതാനന്ദൻ സർക്കാരിന്റെ കാലത്തെ സി.പി.എം. സംസ്ഥാന സെക്രട്ടറിയും ഇന്നത്തെ മുഖ്യമന്ത്രിയുമായ ശ്രീ. പിണറായി വിജയനും, ശ്രീ. അച്ചുതാനന്ദൻ സർക്കാരിൽ ആഭ്യന്തര വകുപ്പ് മന്ത്രിയും ഇന്നത്തെ സി.പി.എം. സംസ്ഥാന സെക്രട്ടറിയുമായ  കോടിയേരി ബാലകൃഷ്ണനും അന്നത്തെ എൽ.ഡി.എഫ്. കൺവീനറായിരുന്ന വൈക്കം വിശ്വനുംമറ്റും ഫ്യൂഡൽ വ്യവസ്ഥിതികളുടെ പ്രണേതാക്കളായ ക്രിസ്ത്യൻ പുരോഹിതവർഗ്ഗത്തിന്റെ സ്വാധീനത്തിനും പ്രീണനത്തിനും വിധേയപ്പെട്ട് പ്രസ്തുത ബിൽ നിയമപ്രാബല്യത്തിലാക്കാൻ ശ്രീ. വി. എസ്. അച്ചുതാനന്ദൻ ഗവൺമെന്റിന് പിൻബലം നൽകാതെ അട്ടിമറിക്കുകയാണു ചെയ്തത്. 'കാത്തലിക് ലേമെൻസ് അസ്സോസിയേഷൻ' ഇവരുമായി സംസാരിച്ചപ്പോൾ പറഞ്ഞത്, 'മെത്രാന്മാരെ പിണക്കിക്കൊണ്ട് ഈ നിയമം പാസാക്കിയാൽ അടുത്ത അഞ്ചു വർഷത്തെ ഭരണം ഞങ്ങൾക്ക് നഷ്ടമാകും' എന്നായിരുന്നു! തുടർന്ന് അധികാരത്തിൽവന്ന യു.ഡി.എഫ്. സർക്കാരിൽ വിശ്വാസമർപ്പിച്ച് അസ്സോസിയേഷൻ ഭാരവാഹികൾ മുഖ്യമന്ത്രി ഉമ്മൻ ചാണ്ടിയെ സമീപിച്ചപ്പോൾ അദ്ദേഹം പറഞ്ഞത്,''പ്രസ്തുത നിയമം പാസാക്കാൻ തുനിഞ്ഞാൽ മുഖ്യമന്ത്രിക്കസേര എനിക്ക് നഷ്ടപ്പെടും' എന്നും! എൽ.ഡി.എഫ് - ഉം യു.ഡി.എഫ് - ഉം മെത്രാൻ പ്രീണനനയം സ്വീകരിച്ചതുകൊണ്ട് എന്തുനേടി? എൽ.ഡി.എഫ് - ന് തുടർഭരണം കിട്ടിയോ? ഉമ്മൻചാണ്ടി ഉറപ്പിച്ചെടുത്ത മുഖ്യമന്ത്രിക്കസേര ഇന്ന് അദ്ദേഹത്തിനുണ്ടോ? ഇടതുപക്ഷവും വലതുപക്ഷവും ആത്മപരിശോധന നടത്തുന്നത് നന്ന്. രാജ്യത്ത് ധർമ്മവും നീതിയും നിയമവാഴ്ചയും ഉറപ്പുവരുത്തുകയാണ് ഭരണകർത്താക്കളുടെ കടമ. അത് യഥാവിധി നിർവ്വഹിച്ചില്ലെങ്കിൽ തലപ്പത്ത് അനീതി ഭരണംനടത്തി ഭരണകർത്താക്കൾ അവഹേളിതരായിത്തീരും എന്നതാണ് അനുഭവപാഠം.

ഇന്ത്യയിലെ ക്രൈസ്തവസമൂഹം ഇന്ന് അരക്ഷിതരാണ്. നേരായ ഒരു പള്ളിഭരണനിയമത്തിന്റെ അഭാവംമൂലം അവരുടെ മതസമ്പത്തും ജീവിതമൂല്യവും നഷ്ടപ്പെടുകയാണ്. യാക്കോബായ-ഓർത്തഡോക്‌സ് വിഭാഗത്തിന്റെ കലഹങ്ങൾക്കും വ്യവഹാരങ്ങൾക്കും ഇന്നും അറുതിവരാത്തതിന്റെ കാരണവും മറ്റൊന്നല്ല. കലഹങ്ങൾ ക്രമസമാധാനപാലനത്തിനു ഭീഷണി ഉയർത്തുകയാണ്. സീറോ-മലബാർ സഭയിലും സീറോ-മലങ്കര സഭയിലും, റോമൻ (ലത്തീൻ) കത്തോലിക്കാ സഭയിലും സി.എസ്.ഐ.  സഭയിലും സ്ഥിതി കലുഷിതമാണ്. ഇന്ത്യൻ പൗരന്മാരായ അത്മായർ തങ്ങളുടെ അവകാശങ്ങൾക്കും പൗരസ്വാതന്ത്ര്യത്തിനുംവേണ്ടി മെത്രാന്മാരുമായി നിരന്തരം സംഘർഷത്തിലും നിയമയുദ്ധത്തിലുമാണ്. സീറോ-മലബാർ സഭയിലെ മെത്രാന്മാരുമായി 'കാത്തലിക് ലേമെൻസ് അസ്സോസിയേഷൻ' നിയമയുദ്ധത്തിലേർപ്പെട്ടു തുടങ്ങിയിട്ട് മൂന്ന് പതിറ്റാണ്ട് കഴിഞ്ഞു. എന്നാൽ, ഇന്ത്യൻ നീതിന്യായപീഠം നീതിപൂർവ്വകമായ തീർപ്പ് കൽപ്പിക്കാൻ വൈമുഖ്യം കാട്ടുകയാണ്. ഭരണഘടനാവിരുദ്ധവും പുരോഹിതസൃഷ്ടവുമായ കള്ളക്കാനോനും കാപ്പിക്കാനോനും പൗരസ്ത്യ കാനോനും പാശ്ചാത്യ കാനോനും അവലംബമാക്കിക്കൊണ്ടാണ്, ഇന്ത്യൻ ജുഡീഷ്യറിയുടെ നീതിന്യായാസനം ഇന്നും വിധിപ്രസ്താവം നടത്തുന്നത്. ഈ നടപടി ഒരു റിപ്പബ്‌ളിക്കായ ഇന്ത്യയെ അപഹസിക്കലാണ്.

ഇന്ത്യൻ പൗരന്മാരായ ക്രൈസ്തവർ പടുത്തുയർത്തിയിട്ടുളള പളളികളും സ്ഥാപനങ്ങളും സ്വത്തുക്കളും പൊതുവായിട്ടുളളതാണ്. ജീവകാരുണ്യപ്രവർത്തനങ്ങളെ മുൻനിർത്തിയുളള അവ ട്രസ്റ്റ് രൂപേണയുളളതാണ്. ഓരോ പള്ളിയും ഓരോ സ്വതന്ത്രറിപ്പബ്‌ളിക്കായാണ് ക്രൈസ്തവസഭയുടെ ആരംഭംമുതൽ പ്രവർത്തിച്ചുപോന്നിട്ടുള്ളത്. അതാതു പളളികളുടെ പൊതുയോഗമാണ് ഭൗതികകാര്യങ്ങൾ നിയന്ത്രിച്ചു പോന്നിട്ടുളളത്. വി. ബൈബിളിലെ അപ്പസ്‌തോലപ്രവർത്തനം 2:44, 4:32, 6:2-4, ഇത് വ്യക്തമാക്കുന്നു. ഭൗതികകാര്യങ്ങളിൽ പളളിക്കാർക്കിടയിൽ തർക്കങ്ങളുണ്ടായാൽ പളളിയോഗത്തിലെ ഭൂരിപക്ഷ തീരുമാനപ്രകാരമാണ് അന്തിമ വിധിത്തീർപ്പ് കൽപ്പിക്കേണ്ടത്. രാജ്യത്ത് പര്യാപ്തമായ നിയമം പ്രാബല്യത്തിലില്ലാത്ത അവസ്ഥയിൽ വിശ്വാസപരമായി ബൈബിളിലെ നിയമങ്ങളാണ് ക്രൈസ്തവർ അവലംബിക്കേണ്ടത്. ഈ പൊതുതത്വം യാക്കോബായ-ഓർത്തഡോക്‌സ് സഭാതർക്കക്കേസിൽ കോടതികൾ പരിഗണിച്ചിട്ടില്ല. ക്രിസ്ത്യൻ പളളികൾ പളളിക്കാരായ അത്മായർ വീതപ്പിരിവെടുത്തും വീതപ്പണികൾ ചെയ്തും വീട്ടമ്മമാർ പിടിയരി സ്വരൂപിച്ചും നേർച്ചകാഴ്ചകളർപ്പിച്ചും പടുത്തുയർത്തിയിട്ടുളളവയാണ്. അത് തർക്കകക്ഷികളിൽ ന്യൂനപക്ഷമായ ഓർത്തഡോക്‌സ് വിഭാഗത്തിനുമാത്രമായി കൽപ്പിച്ചുത്തരവുനൽകിയ 2017-ലെ സുപ്രീംകോടതി വിധി ഇന്ത്യൻ നീതിന്യായ വ്യവസ്ഥയ്ക്ക് യോജിച്ചതാണോ എന്നു പരിശോധിക്കേണ്ടത് ആവശ്യമാണെന്നു തോന്നുന്നു.

ഒരു ആചാരം സമൂഹത്തിൽ മുപ്പതുവർഷം തുടർച്ചയായി നിലനിന്നാൽ ആ ആചാരം ഭരണഘടനാ വിരുദ്ധമല്ലെങ്കിൽ അതിന് നിയമത്തിന്റെ പരിഗണനയുണ്ടായിരിക്കെ, ആ നിലയിലുള്ള ആനുകൂല്യംപോലും യാക്കോബായസഭയ്ക്കു ലഭ്യമായില്ല. 'വൃക്ഷത്തെ അതു പുറപ്പെടുവിക്കുന്ന ഫലംകൊണ്ടാണ് വിലയിരുത്തേണ്ടത്' എന്ന തത്ത്വംവച്ചുനോക്കിയാൽ, കേരളസമൂഹത്തിൽ വലിയ രീതിയിൽ ക്രമസമാധാനത്തകർച്ചയ്ക്കും അക്രമങ്ങൾക്കും വഴിയൊരുക്കിയ ഈ കോടതിവിധി മികവാർന്ന ഒന്നാണെന്നു വിലയിരുത്താൻ ആർക്കും കഴിഞ്ഞെന്നുവരില്ല.  ഈ സാഹചര്യത്തിൽ പ്രസ്തുത വിധി പുനഃപരിശോധനയ്ക്കു വിധേയമാക്കി, 'ഓവർ റൂൾ' ചെയ്ത് ഇന്ത്യൻ ഭരണഘടനാ വിധേയമായ വിധിപുറപ്പെടുവിച്ച് ഇന്ത്യൻ ജുഡീഷ്യറിയുടെ അന്തസ് സംരക്ഷിക്കുവാൻ സുപ്രീംകോടതിയുടെ ഭരണഘടനാബഞ്ചിനും ഭരണഘടനാഫുൾബഞ്ചിനും ബാധ്യതയുണ്ട്. സുപ്രീംകോടതി അതിന് സന്മനസ് കാണിക്കാത്തപക്ഷം, ബഹു: ഇന്ത്യൻ പ്രസിഡണ്ട് ഇക്കാര്യത്തിലിടപെട്ട് അതിനാവശ്യമായ നിർദ്ദേശം സുപ്രീംകോടതിക്ക് നൽകുകയാണ് കരണീയമായിട്ടുളളത്.

സ്വാതന്ത്ര്യലബ്ധിക്കുശേഷം രാജ്യത്ത് അധികാരം കൈയാളിയ കേന്ദ്ര-സംസ്ഥാന ഭരണാധികാരികളുടെ പക്ഷപാതവും വിവേചനവും കാര്യക്ഷമതയില്ലായ്മയും നിയമനിർമ്മാണസഭകളുടെ ഉദാസീനതയും സത്യപ്രതിജ്ഞാലംഘനവും ഭരണഘടനാലംഘനവുമാണ്, തെറ്റായതും നീതീകരണമില്ലാത്തുമായ കോടതിവിധികൾക്കും അരക്ഷിതാവസ്ഥയ്ക്കും ഇടയാക്കിതീർത്തിട്ടുളളത്. വിവാദകക്ഷികളിൽ ബഹുഭൂരിപക്ഷംവരുന്ന യാക്കോബായ വിഭാഗം നൂറ്റാണ്ടായി കഠിനാധ്വാനത്തിലൂടെ പടുത്തുയർത്തി സ്വതന്ത്രമായി കാത്തുപരിപാലിച്ച് ആരാധനനടത്തിപ്പോരുന്ന ആരാധനാലയങ്ങളിൽനിന്നാണ്, നീതിബോധവും തത്വദീക്ഷയുമില്ലാത്ത ശ്രീ. പിണറായി വിജയന്റെ ഇടതുപക്ഷ സർക്കാർ പോലീസിനെ ഉപയോഗിച്ച് നിഷ്‌കരുണം നരനായാട്ട് നടത്തി അവരെ തെരുവിലാക്കിയിരിക്കുന്നത്! ഇത് ക്രൂരവും കിരാതവുമാണ്.

'കേരള ക്രിസ്ത്യൻ ചർച്ച് പ്രോപ്പർട്ടീസ് ആന്റ് ഇൻസ്റ്റിറ്റിയൂഷൻസ് ട്രസ്റ്റ് ബിൽ' നിയമപ്രാബല്യത്തിലാക്കണമെന്ന ആവശ്യവുമായി ഈ രംഗത്ത് അതിശക്തമായി പ്രവർത്തിക്കുന്ന സമരനായകനാണ് വന്ദ്യ ബാർ യൂഹാനോൻ റമ്പാൻ. അദ്ദേഹം 2020 ആഗസ്റ്റ് 19-മുതൽ എറണാകുളം ജില്ലയിലെ പിറമാടം ദയറായിൽ സർക്കാർ ചർച്ച് ആക്ട് നിയമപ്രാബല്യത്തിലാക്കുന്നതുവരെയോ അല്ലെങ്കിൽ തന്റെ മരണംവരെയോ നിരാഹാരസമരം നടത്തിവരികയാണ്. ഈ സമരത്തിലൂടെ സീറോ-മലബാർ, സീറോ-മലങ്കര, ലത്തീൻ (റോമൻ കത്തോലിക്കാ), സി.എസ്.ഐ, മാർത്തോമ്മാ, യാക്കോബായ എന്ന വേർതിരിവുകൂടാതെ ഇന്ത്യൻ പൗരന്മാരായ മുഴുവൻ ക്രൈസ്തവരുടെയും അവകാശസംരക്ഷണമാണ് അദ്ദേഹം ലക്ഷ്യംവച്ചിരിക്കുന്നത്. ''സത്യമായും ദൈവത്തിന് പക്ഷപാതമില്ലെന്നും, അവിടുത്തെ ഭയപ്പെടുകയും നീതിപ്രവർത്തിക്കുകയും ചെയ്യുന്ന ആരും ഏത് ജനതയിൽപ്പെട്ടവനായാലും അവിടുത്തേക്ക് സ്വീകാര്യനാണെന്നും ഞാൻ സത്യമായും അറിയുന്നു'', എന്നാണ് തിരുവചനം. അത് ഉൾക്കൊളളുവാനുളള ഹൃദയവിശാലതയും സന്മനസും ധാർമ്മികബോധവും സാമൂഹികപ്രതിബദ്ധതയും സാഹോദര്യസ്‌നേഹവും നാം ഓരോരുത്തർക്കും ഉണ്ടാകുമെന്ന് വിശ്വസിക്കുന്നു. അദ്ദേഹത്തിന്റെ ത്യാഗപൂർണ്ണമായ ഉദ്യമത്തിന് 'കാത്തലിക് ലേമെൻസ് അസ്സോസിയേഷ'ന്റെ ധാർമ്മികപിന്തുണയും പങ്കാളിത്തവും പ്രഖ്യാപിക്കുന്നതോടൊപ്പം പ്രാർത്ഥനയും ഹൃദയംഗമമായി നേരുകയും ചെയ്യുന്നു!