മറ്റൊരു ജോവാൻ ഓഫ് ആർക്ക്?

ഞാറയ്ക്കൽ സംഭവത്തിൽനിന്ന് 
മറ്റൊരു ജോവാൻ ഓഫ് ആർക്ക്?

ജോവാൻ ഓഫ് ആർക്ക് - ദുർമന്ത്രവാദിയെന്നു മുദ്രകുത്തി കത്തോലിക്കാസഭ ചുട്ടുകൊല്ലുകയും പിന്നീട് അതേ സഭതന്നെ സി. അൽഫോൻസയെപ്പോലെ വിശുദ്ധ ആക്കിയാക്കിയതുവഴി കാശുണ്ടാക്കാൻ സഭയെ സഹായിക്കുകയും ചെയ്ത ഫ്രാൻസിലെ ധീരവനിത! സാഹചര്യം വ്യത്യസ്തമാണെങ്കിലും തന്റെ പരിമിതികൾക്കുള്ളിൽ നിന്നുകൊണ്ട് ഏതാണ്ട് അതേ നിലവാരത്തിൽ അനീതിക്കും അക്രമത്തിനുമെതിരെ പോരാടുകയും മാറ്റൊരു അഭയയാവാതെ അത്ഭുതകരമായി രക്ഷപെടുകയും ചെയ്ത സന്യാസിനിയാണ് സി. ടീന സി.എം.സി. അവരും ഞാറയ്ക്കൽ പ്രശ്നവുമായുള്ള ബന്ധം വ്യക്തമാക്കുന്നതിനു മുൻപ് അവരെ ഒന്നു പരിചയപ്പെടുത്താം.

ചേടത്തിയും അനിയത്തിയും മഠത്തിൽ ചേരാൻ വാശിപിടിച്ച് ആദ്യം അനിയത്തിയും പിന്നീട് ചേടത്തിയും ഒരേ സന്യാസസഭയിൽ അംഗമായതിൽ അനിയത്തിയാണ് സി.. ടീന. ജ്യേഷ്ഠസഹോദരിയാണ് സി. ആനി ജെയ്സ്. സന്യാസിനിയായ ശേഷം കുട്ടികൾക്ക് കരിയർ ഗൈഡൻസും പരിശീലനവും നൽകുന്ന സെന്റ് മേരീസ് വൊക്കേഷണൽ ട്രെയിനിങ് ഇൻസ്റ്റിറ്റ്യൂട്ടിന്റെ ചുമതല ആയിരുന്നു സി. ടീനയ്ക്ക്- 1988 മുതൽ. പിന്നീട് അതിന്റെ കീഴിൽത്തന്നെയുള്ള സെന്റ് മേരീസ് പ്രസിന്റെ ചുമതലകൂടി കിട്ടി. കൂടാതെ സെന്റ് അഗസ്റ്റിൻസ് അനാഥാലയത്തിന്റെ ചാർജും; ഒപ്പം അതിന്റെതന്നെ കീഴിലുള്ള എസ്റ്റേറ്റിന്റെ ചുമതലയും. ചേച്ചിയാകട്ടെ അവിടെത്തന്നെയുള്ള സെന്റ് മേരീസ് ടെക്നിക്കൽ സ്കൂളിലെ അധ്യാപിക. ഈ സ്കൂളിന്റെ ഭാഗം തന്നെയാണ് വൊക്കേഷണൽ ട്രെയിനിങ് ഇൻസ്റ്റിസ്റ്റ്യൂട്ട്.

അങ്ങനെയിരിക്കെ 1992ൽ ഒരു സംഭവമുണ്ടായി. 17 വയസുകാരിയായ ഒരു ഹിന്ദുപെൺകുട്ടി വീട്ടിൽ നിന്നും ഒളിച്ചോടി എറണാകുളത്തെത്തി. അവിടെവെച്ച് ഒരു മുസ്ലിം യുവാവുമായി പരിചയപ്പെടുകയും അവനും കൂട്ടുകാരനുംകൂടി തേവര കോളെജിലെ അധ്യാപകനായ ഫാ.. തൂണേലി സി.എം.ഐ. വഴി ടി കുട്ടിയെ സെന്റ് അഗസ്റ്റ്യൻസ് അനാഥാലയത്തിൽ എത്തിക്കുകയും ചെയ്തു. ദിവസങ്ങൾ കടന്നു പോകവെ പെൺകുട്ടിക്ക് അസ്വസ്ഥത. ചുമതലക്കാരിയായ സി. ടീന കുട്ടിയോട് കാര്യങ്ങൾ ചോദിച്ചറിഞ്ഞു. സംശയം നിശ്ചയമായി - കുട്ടി ഗർഭിണിയാണ്! കോളെജിൽ പഠിക്കുന്ന കൂട്ടുകാരനെ ബന്ധപ്പെട്ട് മുതലു കൈപ്പറ്റാൻ ആവശ്യപ്പെട്ടു. പയ്യൻ കരഞ്ഞു കാലുപിടിച്ചുപറഞ്ഞു – തനിക്കു യാതൊരു മനസറിവുമില്ല. എങ്കിൽ മറ്റവനെ കണ്ടുപിടിക്കാൻ സഹായിക്കണമെന്നു ടീന നിർദ്ദേശിക്കുകയും അവനതു കൃത്യമായിത്തന്നെ ചെയ്യുകയും ചെയ്തു. വളരെ തന്ത്രപൂർവം കരുക്കൾ നീക്കി ഉത്തരവാദിയെ പിടികൂടി. അവനോടു ലോഹ്യത്തിൽ പറഞ്ഞുനോക്കി, പയ്യൻ വഴങ്ങുന്നില്ല. പെൺകുട്ടിയും കഴിഞ്ഞതൊക്കെ ഓർമ്മിപ്പിച്ചു. പയ്യൻ അടുക്കുന്നില്ല. ശബ്ദമുയർന്നു. നാട്ടുകാരറിഞ്ഞു. ആളുകൂടി. പൊലീസെത്തി. സ്റ്റേഷനിലെത്തി. ഇരുവീട്ടുകാരെയും വിളിച്ചുവരുത്തി. കാര്യം സാധിക്കാൻ മതം തടസമായില്ലെങ്കിലും അന്യമതത്തിൽപ്പെട്ട പെൺകുട്ടിയെ സ്വീകരിക്കാൻ പയ്യനൊ വീട്ടുകാരൊ തയ്യാറായില്ലത്രെ! ഒടുവിൽ പണം കൊടുത്ത് അമ്മയുടെകൂടെ പെൺകുട്ടിയെ പൊലീസ് പറഞ്ഞുവിട്ടു! മുൻപരിചയത്താൽ അമ്മ വഴിതെറ്റാതെ ആശുപത്രിയിലെത്തി പ്രശ്നപരിഹാരം നടത്തി.

പിന്നീടാണു കഥയുടെ സസ്പെൻസ്... പെൺകുട്ടിക്ക് സി. ടീനയെ മതി!. പൊലിസതാ പെൺകുട്ടിയുമായി വീണ്ടും അനാഥാലയത്തിൽ! അല്ലെങ്കിൽ അവൾ വണ്ടിയിൽനിന്നു ചാടി ചാവുമത്രെ! പക്ഷെ, അവളെ അനാഥാലയത്തിലെടുക്കാൻ മറ്റു സിസ്റ്റേഴ്സ് സമ്മതിക്കുന്നില്ല. ഗത്യന്തരമില്ലാതെ ടീന അവളെ മദർ തെരേസാ കോൺവെന്റിൽ ഏൽപ്പിച്ചു. പിന്നീട് കോടതിയിൽ നിന്ന് കടലാസെത്തുകയും പെൺകുട്ടിയെ കോടതിയിലെത്തിക്കേണ്ട ചുമതല വന്നുകൂടുകയും ചെയ്തപ്പോഴാണു താനൊരു ഊരാക്കുടുക്കിലാണ് അകപ്പെട്ടിരിക്കുന്നതെന്ന് സി. ടീന തിരിച്ചറിഞ്ഞത്. പൊലീസിന്റെ പക്ഷപാതവും നിരുത്തരവാദിത്തവും കേസിന്റെ നൂലാമാലയും സി. ടീനയെ ഒരു തീരുമാനത്തിലെത്തിച്ചു- നിയമം പഠിക്കണം. അങ്ങനെ 1998ൽ 47മത്തെ വയസിൽ സി. ടീന നിയമപഠനത്തിനു ചേർന്നു.

2002ൽ പാസായി പുറത്തുവന്നപ്പോഴാണു അടുത്ത പാര! സന്നത്തെടുക്കുന്നതിന്റെ തലേന്നു വൈകിട്ട് 5 മണിക്ക് അതിൽനിന്നു ബാർ കൗൺസിൽ സി. ടീനയെ വിലക്കിക്കൊണ്ടുള്ള കത്തു നൽകി. കാരണം, സന്യാസം ഒരു തൊഴിലാണ്. ഒരു തൊഴിലിൽ ഏർപ്പെട്ടിരിക്കുന്നവർ വക്കീൽ പ്രക്ടീസ് ചെയ്യാൻ പാടില്ല. കേസായി.... ടീന കേസ് ജയിക്കുകതന്നെ ചെയ്തു – 2006 മെയ് 26നു പ്രാക്റ്റീസാരംഭിച്ചു. (ഈ വിധിവഴി 6 പുരോഹിതർകൂടി രക്ഷപെട്ടു. ഈ കേസിന്റെ ക്രെഡിറ്റ് അതിലെ തോമസ് പുതുശേരി എന്ന ‘മിടുക്കൻ പുരോഹിതൻ തട്ടിയെടുത്തു എന്നതു വിധിവൈപിരിത്യം) അതേ വർഷമാണല്ലോ ഞാറയ്ക്കലിൽ സഭയുടെ വിമോചകൻ ഫാ. ആന്റണി ചിറപ്പണത്തിന്റെ രണ്ടാം വരവും സംഘർഷങ്ങളും; ഒടുവിൽ ചിറപ്പണത്തെ ഇടവകക്കാർ ഓടിക്കുന്നതും! ഇതിനിടയിൽ ചേച്ചി സി. ആനി ജെയ്സ് റിട്ടയർ ആയി. അവരെ ഞാറക്കൽ ഇംഗ്ലിഷ് മീഡിയം സ്കൂളിന്റെ പ്രിൻസിപ്പലായി സി.എം.സി. സഭ നിയമിച്ചു. തുടർന്ന് അവതീർണനായ ഫാ. കരിയാറ്റിയാണല്ലൊ സംഘർഷം മഠത്തിനുള്ളിലെത്തിച്ചത്. (കരിയാറ്റിക്ക് മഠത്തിന്റെ ശാപം ഏറ്റു. രോഗം ബാധിച്ച് ഫാ. കരിയാറ്റി മൂന്നു മാസത്തിനുള്ളിൽ മരണമടഞ്ഞു.)

2009 ആഗസ്റ്റ് 25ലെ കോൺവെന്റ് ആക്രമണത്തിൽ സി. റെയ്സിക്ക് ഗുരുതരമായി പരിക്കേറ്റ വിവരമറിഞ്ഞ് എറണാകുളം പ്രൊവിൻസിന്റെ എഡ്യുക്കേഷൻ കൗൺസിലറായ സി.നീനപോൾ ആവശ്യപ്പെട്ടതനുസരിച്ച് സി. ടീന എറണാകുളം ജനറൽ ആശുപത്രിയിൽ എത്തി സി. റെയ്സിയോട് വിവരങ്ങൾ മനസിലാക്കി. തന്റെ നിയമപരിജ്ഞാനം ഉപയോഗപ്പെടുത്തി, സ്വന്തം സഹോദരിമാർക്കു വേണ്ടി പൊരുതാൻ ടീന നിശ്ചയിച്ചു. പക്ഷേ, അതൊരു വലിയ തെറ്റാണെന്നും തന്റെ ജീവിതവും ജീവനുംവരെ വിലയായി നൽകേണ്ടിവരുമെന്നും അവർ, വഴിയേ അനുഭവിച്ചറിഞ്ഞു. കേസിൽ നിന്നു പിന്മാറണം എന്നാവശ്യപ്പെട്ട് മദർ ജനറൽ മുതൽ മെത്രാൻവരെ വെറുതെ പറയുക മാത്രമല്ല, ഭീഷണിപ്പെടുത്തുകതന്നെ ചെയ്തു..

അതേക്കുറിച്ച് ടീന പറയുന്നു - ‘രാപകൽ സമ്മർദ്ദവും ഭീഷണിയും... മദർ ജനറൽ സി. എഡ്വേർഡ് ഒരു ദിവസം വൈകീട്ട് ആറരമണിക്ക് തുടങ്ങിയ ചർച്ച അർദ്ധരാത്രിയും കഴിഞ്ഞ് വെളുപ്പിനു 3 മണിയായതോടെ എനിക്ക് തലചുറ്റൽ വന്നു... ഛർദ്ദിക്കാൻ വരുന്നു... ഞാൻ പ്രൊവിഷ്യാളമ്മയോടു പറഞ്ഞു, എന്റെയമ്മേ, എനിക്കു വയ്യ, ഞാൻ ഒരിത്തിരി നേരം കിടക്കട്ടെ... ദിവസങ്ങളോളം ഞാൻ ഉറക്കമില്ലാതെ കിടന്നിട്ടുണ്ട്...’ സഭാധിക്കൃതർക്ക് ഒന്നേ പറയാനുള്ളു. ‘ഞാറക്കൽ സിസ്റ്റേഴ്സിനോട് കേസിൽ നിന്നു പിന്മാറാൻ പറയൂ.... സ്കൂൾ നമുക്കു വേണ്ട. അതു വിട്ടുകൊടുക്കാൻ പറയൂ. ടീന പറഞ്ഞാലേ അവർ കേൾക്കു... ടീനയ്ക്ക് വേണ്ടതെന്താന്നു വെച്ചാൽ ചോദിച്ചോ... മോൾക്കു ഞങ്ങൾ തരാം...’ എന്നാൽ, സ്വന്തം സഹോദരങ്ങളെ വഞ്ചിക്കാൻ ടീന തയാറായില്ല.

3 ദിവസങ്ങൾക്കു ശേഷം 2009 ജൂൺ 3നു എറണാകുളം റാണിമാതാ കോൺവെന്റിലെ അംഗമായ സി. ടീന കൂനമ്മാവിൽനിന്നും എറണാകുളത്തേക്ക് കെഎസ്.ആർ.ടി.സി ബസിൽ യാത്ര ചെയ്യുകയായിരുന്നു. ബസ് 2 കി.മീ. പിന്നിട്ടപ്പോൾ സി. ടീന ബസിൽ നിന്നും തെറിച്ച് റോഡിൽ വീണു?! മഠത്തിലും മെത്രാസനത്തിലും വിവരം അറിയിച്ചു.. മറുപടി ക്രൂരമായിരുന്നു... അവരുടെ കാര്യത്തിൽ ഞങ്ങൾ ഇടപെടുകയില്ല. അവരെ സഹായിക്കാൻ വേറെ ആളുകളുണ്ട്!! ആരൊക്കെയോ ചേർന്ന് സി. ടീനയെ ലിസ്സി ആശുപത്രിയിൽ എത്തിച്ചു... വലതുകാലിൽ രണ്ടൊടിവ്, തോളെല്ലു തകർന്നു, വലതുവശത്തെ വാരിയെല്ലുകൾ നാലെണ്ണം ഒടിഞ്ഞു. തലയിൽ പതിനെട്ടു കുത്തിക്കെട്ട്...!!! എട്ടു ദിവസം അബോധാവസ്ഥയിൽ...! ബോധം തെളിഞ്ഞപ്പോഴോ... ശരീരം മുഴുവൻ പ്ലാസ്റ്ററിട്ട് പരസഹായമില്ലാതെ അനങ്ങാൻകൂടി കഴിയാത്ത അവസ്ഥ...

ഈ അവസ്ഥയിൽ കഴിയുന്ന ആളോടു ചെയ്യേണ്ടതുതന്നെ സഭാധികാരികൾ ചെയ്തു-ഒരു ‘ഫത്വാ’ പുറപ്പെടുവിച്ചു -‌ ‘കോൺവെന്റിലുള്ള ആരും ടീനയെ കാണുകയോ ടീനയോടു മിണ്ടുകയോ അവരുടെ കാര്യത്തിൽ ഇടപെടുകയൊ ചെയ്യാൻ പാടില്ല...’ ടീനയെ ആശുപത്രിയിൽനിന്നു ഡിസ്ചാർജ് ചെയ്യിക്കുന്നതിന്റെ തലേദിവസം - ജൂൺ 26 - അന്നത്തെ ദീപികപ്പത്രത്തിൽ എറണാകുളം ബിഷപ്പ് തോമസ് ചക്യത്തിന്റെ കുബുദ്ധിയിൽ വിരിഞ്ഞ ആ അപൂർവമായ പരസ്യം സി. ടീനയുടെ ചിത്രം സഹിതം വന്നു... ‘സി.. ടീനയെ സഭാവിരുദ്ധപ്രവർത്തനങ്ങളുടെ പേരിൽ സി.എം.സി. സഭയിൽ നിന്നും പുറത്താക്കിയിരിക്കുന്നു...’ പുറത്താക്കപ്പെട്ടയാളിന്റെ അറിവിലേക്കായി ദീപികയുടെ ഒരു പ്രതി ടീന കിടന്നിരുന്ന മുറിയുടെ കതകിനടിയിലൂടെ തള്ളിവെച്ചിരുന്നു! അങ്ങനെ ചരിത്രത്തിൽ കേട്ടുകേൾവിപോലുമില്ലാത്ത ഒരു പുതുചരിതം സഭാധികാരികൾ സഭയിൽ എഴുതിച്ചേർത്തു - പത്രപ്പരസ്യം നൽകി ഒരു സന്യാസിനിയെ സഭയിൽനിന്നു പുറത്താക്കി....! കാരണം, ടീനയ്ക്കു  ബോധം തെളിഞ്ഞതോടുകൂടി അധികാരികൾക്കും ബോധം തെളിഞ്ഞു, പണി പാളിയെന്നും; പുറത്താക്കാതെ ഇതു ഒഴിവാകില്ലെന്നും! അപകടത്തിൽ അധികാരികളുടെ പങ്കു വെളിച്ചത്തുവരുമെന്നു ഭയന്നിട്ടാകണം ഇന്നും ആ എം.ആർ.സി.റ്റി. കേസ് കൊടുക്കാനോ നഷ്ടപരിഹാരം നേടാനോ ശ്രമിക്കാത്തതും അതിനു വേണ്ടിയുള്ള ടീനയുടെ നിരന്തരമായ അഭ്യർഥന ചെവിക്കൊള്ളാത്തതും!

പുറത്താക്കിയ വിവരം വീട്ടിൽ അറിയിച്ചെങ്കിലും വീട്ടുകാർ ടിനയെ ഏറ്റെടുക്കില്ലെന്നു വ്യക്തമാക്കി. മഠാധികാരികളുടെ നടപടിയെ സാമൂഹ്യപ്രവർത്തകർ എതിർത്തു... നുൺഷ്യോക്ക് പരാതി അയച്ചു. റോമിലെ മുഖ്യകാര്യാലയത്തിൽ നിന്നു മറുപടി ലഭിക്കുംവരെ നടപടി എടുക്കരുതെന്നു കാണിച്ചുള്ള നുൻഷ്യോയുടെ മറുപടി കിട്ടി. അതോടെ കിട്ടാനിരിക്കുന്ന മറുപടി വരാതിരിക്കാനും നടപടി ത്വരിതപ്പെടുത്താനുമായി മേജർ ആർച്ച് ബിഷപ്പ് വർക്കി വിതയത്തിൽ വിമാനത്തിൽ പോയി മഠാധികാരികൾക്ക് അനുകൂലമായ കത്ത് കയ്യിൽ വാങ്ങി പറന്നെത്തി! നോക്കണേ കാര്യക്ഷമത!! ജെ.സി.സി നേതാക്കളായ ടീനയുടെ സഹോദരൻ ജെറിയും പുല്ലൂടനും വെളിവിലുമൊക്കെ ചേർന്ന് അഡ്വ. വർഗീസ് പറമ്പിൽ വഴി കോടതിയെ സമീപിച്ച് മഠാധികൃതരുടെ നടപടി സ്റ്റേ ചെയ്തു... കോടതി വിധിയൊന്നും തങ്ങൾക്കു ബാധകമല്ലെന്നു പറഞ്ഞ സി.എം.സി. നേതൃത്വം, ടിനയെ ആശുപത്രിയിൽനിന്നു ജൂൺ 27നു ബലമായി ഡിസ്ചാർജ് ചെയ്യിച്ചെങ്കിലും മഠത്തിലെടുക്കാതെ ആശുപത്രിയിൽത്തന്നെ ഉപേക്ഷിച്ചു. ഇതറിഞ്ഞ സാമൂഹ്യപ്രവർത്തകർ ഇടപെട്ട് പ്രതിഷേധിച്ചു. ഫാ. പോൾ തേലക്കാട്ടും ലിസ്സി ആശുപത്രി ഡയറക്ടർ ഫാ. മാത്യു മുട്ടംതോട്ടിലുമൊക്കെ ഇടപെട്ട് മഠാധികാരികളുമായി നടത്തിയ ചർച്ചയെത്തുടർന്ന് ജൂലൈ 13നു ടീനയെ നായരമ്പലത്തെ സി.എം.സി. മഠത്തോടനുബന്ധമായി ഡോ. സിസ്റ്റർ ഐഡയുടെ ‘ഉദയഭവൻ ക്ലിനിക്കിലെ’ ഒരു മുറിയിൽ ഏകാന്തതടവുപുള്ളിയെപ്പോലെ മാറ്റിപ്പാർപ്പിച്ചു... ഒരു ശുശ്രൂഷകയായി മേരിയെന്ന ഒരു സ്ത്രീയെ ഏർപ്പെടുത്താനുള്ള ഔദാര്യം സഭാധികാരികൾ കാണിച്ചു. ആ മേരിയുടെ സേവനത്തെ മധുരമായ ഒരോർമ്മയായി ഇന്നും ടീന താലോലിക്കുന്നുണ്ട്.. റാണിമാതായിലേക്കെന്നല്ല, കോൺവെന്റിലേക്ക് ഇനി പ്രവേശിപ്പിക്കില്ലെന്നു അധികാരികൾ തീർത്തു പറഞ്ഞു. (ടീനയെ ശുശ്രുഷിച്ചതോടെ വർഷങ്ങളോളം പാവങ്ങൾക്ക് സൗജന്യചികിൽസ നൽകിയിരുന്ന ഉദയഭവൻ അസ്തമിച്ചു - ഡോ. ഐഡയെ അവിടെ നിന്നും ട്രാൻസ്ഫർ നൽകി ഓടിച്ചു! ക്ലിനിക് പൂട്ടിച്ചു.) മുകളിൽ മഠവും താഴെ ക്ലിനിക്കും ആയിരുന്നെങ്കിലും ടീനയ്ക്ക് മഠത്തിൽ പ്രവേശനമില്ലായിരുന്നു. മഠത്തിൽക്കയറിയുള്ള ആക്രമണത്തിൽ പരിക്കേറ്റ സി. റെയ്സിയെ ആശുപത്രിയിൽ നിന്നു ഡിസ്ചാർജ് ചെയ്തശേഷം റാണിമാതാ മഠത്തിൽ നിർത്തിയായിരുന്നു ശുശ്രൂഷിച്ചിരുന്നത്. അന്ന് അവർ മഠാധികൃതർക്ക് വേണ്ടപ്പെട്ടവരായിരുന്നുവല്ലോ!   

ഇതുകൊണ്ടൊന്നും അധികാരികളുടെ പ്രതികാരദാഹം അടങ്ങിയിരുന്നില്ല... അവർ ഒറ്റുകാരെ തിരഞ്ഞുകൊണ്ടിരുന്നു, ടീനയെ മഠത്തിൽ നിന്നും പുറത്താക്കാൻ... ഒടുവിൽ അന്നത്തെ പ്രൊവിൻഷ്യാൾ ഒരാളെക്കണ്ടെത്തി - അമൽ... പുതിയ ശുശ്രൂഷക ഏലിക്കുട്ടി വഴി ആവശ്യം ടീനയുടെ അടുത്തെത്തി. - അയാൾക്കു സിസ്റ്റർ ടീനയെ കല്യാണം കഴിക്കണം... ടീന അതിനു വഴങ്ങണം.... ഇതായി അധികാരികളുടെ ഡിമാന്റ്. സർവാംഗം പ്ലാസ്റ്ററിട്ടു കിടക്കുന്ന സിസ്റ്ററെക്കെട്ടാനും ആളുണ്ടായി! തന്റെ ഒടിഞ്ഞ കാലുകൊണ്ടായാലും തൊഴിച്ച് അവനെ ഓടിക്കുമെന്നു പറഞ്ഞ് ടീന അതു തള്ളിക്കളഞ്ഞു.. (അവനൊരു അലവലാതി ആയിരുന്നെന്നു പിന്നീടറിഞ്ഞത്രെ! സഭാധികാരികൾക്ക് അങ്ങനെയുള്ളവരെയും കൊള്ളാമെന്നു ചുരുക്കം) അതോടെ ആ കാവൽക്കാരിയുടെ പണി പോയി; പകരം പുതിയ കുട്ടി വന്നു.

വർഷം ഒന്നു കഴിഞ്ഞിട്ടും, സ്വന്തം കാര്യങ്ങൾ സ്വയംചെയ്യാൻ പ്രാപ്തിയുണ്ടായിട്ടും സിസ്റ്ററെ ശുശ്രൂഷിക്കുന്ന പെൺകുട്ടിയെ മാറ്റാനൊ സിസ്റ്ററെ മഠത്തിൽ പ്രവേശിപ്പിച്ച് ഭക്ഷണം നൽകാനൊ പോലും മഠംകാർ തയ്യാറയില്ല. ടീന കാവൽക്കാരിയെ മറ്റാൻ ആവശ്യപ്പെട്ടു. ചെലവു ചുരുക്കാം, ആ കുട്ടിക്കും സിസ്റ്റർക്കും മോചനവും കിട്ടുമല്ലോ! പക്ഷെ, മൂന്നു മാസം കഴിഞ്ഞിട്ടും യാതൊരു നടപടിയും ഉണ്ടായില്ല. അവർ  മദറിനോടു കാരണം തിരക്കി. മദർ സമ്മതിച്ചെങ്കിലും അനുമതിക്കായി ജനറാളെ ബന്ധപ്പെട്ടപ്പോൾ ജനറാൾ തടഞ്ഞു - കുട്ടിയെ മാറ്റാൻ പാടില്ല. ഇതേത്തുടർന്ന് 2010 സെപ്റ്റംബർ 20നു ടീന ജനറാളിനെ നേരിൽക്കാണാനായി ആലുവ ജനറലേറ്റിലെത്തി. കാര്യങ്ങൾ പറഞ്ഞു. തനിക്ക് അനുകൂലമായി കോടതി വിധിയുണ്ടായിട്ടും തന്നെ എന്തുകൊണ്ടു മഠത്തിൽ പ്രവേശിപ്പിക്കുന്നില്ലെന്ന ടീനയുടെ ചോദ്യത്തിനു മറുപടിയായി ജനറാൾ നയം വ്യക്തമാക്കി - കോടതിവിധി സഭയ്ക്കു ബാധകമല്ല!

സിസ്റ്റർ ടീന വജ്രായുധം തന്നെ പ്രയോഗിച്ചു - മഠത്തിനുള്ളിൽ നിരാഹാരസത്യഗ്രഹം ആരംഭിച്ചു.... അധികാരികൾ വഴങ്ങിയില്ല... സാധാരണപോലെ ക്ഷേമാന്വേഷണത്തിനെത്തിയ സഹോദരൻ ജെറി വിവരം മനസിലാക്കിയപ്പോഴേക്കും 7 ദിവസം പിന്നിട്ടിരുന്നു... സംഭവം പുറത്തായി കാട്ടുതീപോലെ പരന്നു... ആർ.ഡി..ഒ., തഹസിൽദാർ മുതലായവർ ഇടപെട്ടു. ടീനയുടെ ആവശ്യങ്ങൾ ന്യായമാണെന്നു ഉദ്യോഗസ്ഥരെല്ലാം അംഗീകരിച്ചു. പക്ഷെ, നിയമത്തിനതീതരാണല്ലൊ സഭാധികാരികൾ! അതുകൊണ്ടുതന്നെ അവർ വഴങ്ങിയില്ല. ഇതേത്തുടർന്ന് സെപ്റ്റംബർ 30നു രാവിലെ 10 മുതൽ ഞങ്ങളുൾപ്പെടെയുള്ള ജെ.സി.സി പ്രവർത്തകർ ആലുവാ സി.എം.സി. ജനറലേറ്റിനു മുൻപിൽ ഐക്യദാർഡ്യസത്യാഗ്രഹം ആരംഭിച്ചു. പ്രതിഷേധം രണ്ടു മണിക്കൂർ പിന്നിട്ടതോടെ ടീനയുടെ എല്ലാ ഡിമന്റുകളും അംഗീകരിച്ച് അവരെ റാണിമാതാ കോൺവെന്റിൽ തിരിച്ചെടുത്തു...

എന്നാൽ, സഭയ്ക്കു വേണ്ടാത്തവളായി, ആരും മിണ്ടാത്ത, ആരും തിരിഞ്ഞു നോക്കാത്ത അധഃകൃതയും ബഹിഷ്കൃതയുമായ ഒരു അംഗമായി, തന്റെ വക്കീൽ പണിയുമായി അവർ അവിടെ കഴിഞ്ഞുകൂടുന്നു എന്നതാണു സത്യം. പണ്ട് കൊക്കിനോടു ചെന്നായ പറഞ്ഞതുപോലെ ‘തല തിരികെത്തന്നു എന്നുള്ളതു തന്നെ ഒരു വലിയ ഔദാര്യം’ എന്നതാണ് സഭയുടെ നിലപാട്! ഇവരൊക്കെയാണ് സ്വർഗരാജ്യത്തിന്റെ കുത്തക സ്റ്റോക്കിസ്റ്റുകളും വിതരണക്കാരും! തെരുവു വേശ്യകളും അവിടെ അടിപിടികൂടുന്ന മദ്യപാനികളും ഇവരെ അപേക്ഷിച്ച് എത്രയോ ഭേദം!

ഗുണപാഠം: പുരോഹിതശാപം അഥവാ മെത്രാൻശാപം എന്നത് കെട്ടുകഥയല്ലെന്നു ഇനിയെങ്കിലും മനസിലാക്കുക, അതു വരുന്ന വഴികളും അജ്ഞാതമായിരിക്കും.
K. George Joseph. 9496313963 

''കോട്ടയം ക്‌നാനായരൂപതാസ്ഥാപനം 10-ാം പീയൂസ് മാര്‍പാപ്പായ്ക്കു വിനയായി'' -പി.സി.ജോര്‍ജ് എം.എല്‍.എ.

(2015 മെയ്‌ലക്കം സത്യജ്വാലയില്‍നിന്ന്)

2015 ഏപ്രില്‍ 25-ന് 'ക്‌നാനായകത്തോലിക്കാ നവീകരണസമിതി' (kcns) ഉഴവൂരില്‍ സംഘടിപ്പിച്ച കുടുംബനവീകരണസെമിനാറും കുടുംബ സംഗമവും ഉദ്ഘാടനം ചെയ്തുകൊണ്ട് ശ്രീ. പി.സി.ജോര്‍ജ് എം.എല്‍.എ. നടത്തിയ പ്രസംഗത്തിന്റെ ഉള്ളടക്കമാണ് താഴെക്കൊടുക്കുന്നത് -സത്യജ്വാല എഡിറ്റര്‍

ദൈവത്തിലും ക്രിസ്തുവിലും വിശ്വസിക്കുന്നവരുടെ സമൂഹങ്ങളാണ് ക്രൈസ്തവസഭകള്‍. സീറോ-മലബാര്‍ സഭയുടെ ഭാഗമായ കോട്ടയം രൂപത അത്തരമൊരു ക്രൈസ്തവസമൂഹമാണ്. എന്നാല്‍, ക്‌നാനായ സമൂഹത്തിനു പുറത്തുനിന്നു വിവാഹം കഴിക്കുന്നവരെ ആ സഭാസമൂഹത്തില്‍നിന്നു പുറത്താക്കുന്ന ഒരു ആചാരം ഈ രൂപതയില്‍ ഇന്നു നിലനില്‍ ക്കുന്നു. മറ്റു കത്തോലിക്കാരൂപതകളില്‍നിന്ന് വിവാഹംകഴിച്ചു എന്ന ഒരേയൊരു 'തെറ്റി'ന്റെ പേരില്‍, അവര്‍ തങ്ങളുടെ സമൂഹത്തില്‍നിന്ന് ഒഴിവാക്കപ്പെടുന്നുവെന്നത് വളരെ ദാരുണമായ ഒരു കാര്യമാണ്. അതിലൂടെ, ഒരു ഗതികെട്ട സാഹചര്യത്തിലേക്ക് അവര്‍ തള്ളപ്പെടുന്നു. ഈ സാഹചര്യം എങ്ങനെ തരണംചെയ്യണമെന്ന് ആലോചിക്കുന്നവരാണല്ലോ, എന്റെ മുമ്പില്‍ ഇവിടെയിരിക്കുന്ന എല്ലാവരും.

വിവാഹം വ്യക്തിപരമായ ഒരു കാര്യമാണ്, വിശ്വാസവിരുദ്ധമായ ഒരു നടപടിയല്ല. അപ്പോള്‍ അതിന്റെ പേരില്‍, തങ്ങള്‍ ജനിച്ചുവളര്‍ന്ന സഭയില്‍നിന്നും സമുദായത്തില്‍നിന്നും അംഗങ്ങളെ പുറന്തള്ളുവാന്‍ ക്രിസ്തുവില്‍ വിശ്വസിക്കുന്ന ഒരു സഭയ്ക്ക് എങ്ങനെ സാധിക്കും എന്നതാണ് എന്റെ ചോദ്യം. അതു ക്രൈസ്തവമാകുന്നതെങ്ങനെ? സഭ വിശ്വാസത്തിലധിഷ്ഠിതമാണ്. ആ വിശ്വാസത്തിലെവിടെയെങ്കിലും വെള്ളം ചേര്‍ക്കപ്പെടുമ്പോള്‍ ഭിന്നതകളും ചേരിതിരിവുകളും പുറന്തള്ളലുകളുമൊക്കെ ഉണ്ടായാല്‍, അതു മനസ്സിലാക്കാന്‍ പറ്റും. പക്ഷേ, ഇവിടെ ഒരേ വിശ്വാസത്തിലുള്ളവരെ സഭാസമൂഹത്തില്‍നിന്നു പുറന്തള്ളുകയാണ്!

ലോകമെങ്ങുംപോയി തന്റെ സുവിശേഷം പ്രസംഗിക്കാനും മനുഷ്യരെ മാനസാന്തരപ്പെടുത്തി സത്യവിശ്വാസത്തിലേക്കു സ്വീകരിക്കാനുമാണ് യേശു ഉപദേശിച്ചത്. അങ്ങനെ വിശ്വാസത്തിലേക്കു വരാന്‍ തയ്യാറാകുന്നവരെ സ്വീകരിക്കാന്‍ കോട്ടയം രൂപത തയ്യാറാണോ എന്നു ചോദിച്ചാല്‍ അല്ല എന്നാണു

ത്തരം. അങ്ങനെയെങ്കില്‍, ഈ ക്‌നാനായസഭയെ ഒരു ക്രൈസ്തവസഭയായി എങ്ങനെ കാണാനാകും എന്നു നാം ചോദിക്കേണ്ടിയിരിക്കുന്നു. വിശ്വാസം സ്വീകരിച്ചു ക്രൈസ്തവരാകാന്‍ തയ്യാറായിവരുന്നവരെ സ്വീകരിക്കാന്‍ തയ്യാറില്ലാത്ത, സ്വന്തം സഭയിലെ വിശ്വാസികളെ വിശ്വാസബാഹ്യമായ കാര്യങ്ങളുന്നയിച്ച് പുറത്താക്കാന്‍ വെമ്പുന്ന, ഈ രൂപതയെങ്ങനെ ക്രൈസ്തവസഭയാകും?

കോട്ടയം രൂപത ഏറ്റവും പ്രാധാന്യം കൊടുക്കുന്ന വിശുദ്ധന്‍ പത്താം പീയൂസ് മാര്‍പാപ്പായാണ്. അദ്ദേഹമാണല്ലോ തെക്കുംഭാഗസമൂഹത്തിനായി ഈ രൂപത അനുവദിച്ചത്. ഇത്തരമൊരു ജാതീയരൂപതയാകുമെന്ന ധാരണ തീര്‍ച്ചയായും അന്നദ്ദേഹത്തിന് ഉണ്ടായിരുന്നിരിക്കാനിടയില്ല. എങ്കിലും അതിനുള്ള സാധ്യതകളെക്കുറിച്ചോ സാഹചര്യത്തെക്കുറിച്ചോ വേണ്ടത്ര പഠിക്കാതെയാണെന്നു തോന്നുന്നു, അദ്ദേഹം  കോട്ടയം  രൂപതാപ്രഖ്യാപനം നടത്തിയത്. ഇത് പിന്നീടദ്ദേഹത്തിനുതന്നെ വിനയായിത്തീരുകയും ചെയ്തു. അദ്ദേഹത്തെ വിശുദ്ധനായി നാമകരണം ചെയ്യാനുള്ള നടപടികള്‍ക്കിടെ അതിനു മുഖ്യതടസ്സമായി വന്നത് ഈ രൂപതാ പ്രഖ്യാപനമായിരുന്നു.

ക്‌നാനായ സമുദായത്തില്‍ ഇന്ന് ഏറ്റം ഗൗരവതരമായ ഒരു പ്രശ്‌നമായിരിക്കുന്നത്, സ്വസമുദായത്തില്‍നിന്നു വിവാഹം കഴിക്കാന്‍ പെണ്ണുങ്ങളെ കിട്ടാതെ, 40-ഉം 45-ഉം വയസ്സായിട്ടും അവിവാഹിതരായി കഴിയേണ്ടിവരുന്ന അനേകം പുരുഷന്മാരുണ്ട് എന്നതാണ്. സ്വവംശവിവാഹനിഷ്ഠ എന്ന ക്‌നാനായ സഭയുടെ നിയമമുള്ളതുകൊ ണ്ടാണ് അവര്‍ക്ക് ഈ ഗതികേടുണ്ടായത്. പുറത്താക്കല്‍ ഭീഷണിയില്ലായിരുന്നെങ്കില്‍ അവര്‍ മറ്റു രൂപതകളില്‍നിന്നു വിവാഹം കഴിച്ച് സാധാരണ നിലയില്‍ ജീവിക്കുമായിരുന്നു. ക്‌നാനായസമൂഹത്തില്‍ വളരെപ്പേര്‍ക്ക് കുടുംബജീവിതം നിഷേധിക്കപ്പെടുന്ന ഈ സാഹചര്യം എത്ര അപകടകരമായ ഒരു സ്ഥിതിവിശേഷമാണു സൃഷ്ടിക്കുന്നതെന്ന്, ഈ സമൂഹവും ഈ സാഹചര്യത്തിനുത്തരവാദികളായവരും ചിന്തിക്കേണ്ടിയിരിക്കുന്നു. ക്രൈസ്തവജീവിതം നയിക്കുന്ന ക്രൈസ്തവകുടുംബങ്ങളെ മിശ്രവിവാഹിതരെന്നു വിശേഷിപ്പിച്ചും സമുദായത്തില്‍നിന്നു പുറത്താക്കിയും അപമാനിക്കുന്ന നടപടിയില്‍നിന്ന് സഭയുടെ ഉത്തരവാദപ്പെട്ടവര്‍ പിന്മാറണം.

ഈ പ്രശ്‌നത്തില്‍ കൂടുതല്‍ ചര്‍ച്ചകള്‍ നടക്കണം. ചര്‍ച്ചകളിലൂടെയും പ്രാര്‍ത്ഥനയിലൂടെയും ഈ പ്രശ്‌നം പരിഹരിക്കപ്പെടുകതന്നെ ചെയ്യും. സമരത്തിനൊന്നും പോകേണ്ട ആവശ്യം വരില്ല. മാര്‍പാപ്പായ്ക്ക് അപേക്ഷ നല്‍കണം. മേജര്‍ ആര്‍ച്ചുബിഷപ്പുംമറ്റുമായി ചര്‍ച്ച നടത്തണം. എല്ലാ മെത്രാന്മാരെയും ഈ വിഷയത്തില്‍ ഇടപെടുത്തണം. തീര്‍ച്ചയായും നിങ്ങളോടൊപ്പം ഞാനുണ്ടാകും. നിങ്ങളുടെ പിതാവുമായി ഇക്കാര്യം ഞാന്‍ സംസാരിക്കുന്നതാണ്. നിങ്ങളുടെ പ്രശ്‌നം നീതിയുക്തമാണ്. അത് അംഗീകരിക്കപ്പെടുകതന്നെ ചെയ്യും. അതിനുവേണ്ടി നമുക്കു കൂട്ടായി പരിശ്രമിക്കാം.

യോഗയും ഹൈന്ദവ ദർശനവും

By ജോസഫ് പടന്നമാക്കൽ




ഹിന്ദുവെന്ന പദം തികച്ചും ആധുനികമാണ്. സിന്ധുനദി തടത്തിലെ സംസ്ക്കാരമെന്ന അർത്ഥത്തിൽ ഭാരതീയ ജനതയെ ഹിന്ദുക്കളെന്ന് വിദേശികളാണ് ആദ്യം വിളിച്ചത്. വൈദിക മതങ്ങളെ പ്രധാനമായും  ആറു ദാർശനീക  സ്കൂളുകളായി അറിയപ്പെടുന്നു.    സംഖ്യാ,യോഗാ, ന്യായാ, വൈശേഷികാ, മീമാംസ, വേദാന്താ എന്നിങ്ങനെ വേദിക്ക് പാരമ്പര്യ സിദ്ധാന്തങ്ങളായി  വൈദിക സ്കൂളുകളെ തരം തിരിച്ചിരിക്കുകയാണ്.  ബഹുമുഖങ്ങളായ  നദികൾ നാനാ ദിക്കുകളിൽനിന്നായി നോക്കെത്താത്ത സമുദ്രത്തിൽ പതിക്കുന്നപോലെ  ഏക ദൈവത്തെ പ്രാപിക്കാനായി പല മാർഗങ്ങളാണ്  ഹൈന്ദവ മതം വിഭാവന ചെയ്തിരിക്കുന്നത്.  അതിൽ 'യോഗാ' ഒരു വഴിയാണ്. ദൈവം നാനാ ജാതി മനുഷ്യരിലും ജീവജാലങ്ങളിലും കുടികൊള്ളുന്നുവെന്ന്  ഹൈന്ദവമതം വിശ്വസിക്കുന്നു. മതമോ ജാതിയോ, സ്ത്രീ പുരുഷ വ്യത്യാസമോയില്ലാതെ  ദൈവത്തിന്റെ ചൈതന്യം   എവിടെയും പ്രസരിക്കുന്നുവെന്നും ഓരോരുത്തരുടെയും കർമ്മഫലമനുസരിച്ച്  മോക്ഷം ലഭിക്കുന്നുവെന്നും പരമ സത്യത്തിൽ അലിഞ്ഞു ചേരുന്നുവെന്നും ഹൈന്ദവ മതം വിശ്വസിക്കുന്നു. നീതിയും സത്യവും  ധർമ്മവും  കൈകൊണ്ടവർ കർമ്മ ഫലങ്ങൾക്കനുസരണമായി പരബ്രഹ്മം പ്രാപിക്കുന്നതായി ഹൈന്ദവ മത സിദ്ധാന്തങ്ങളിൽ പറയുന്നു.  ഹൈന്ദവം  ആരെയും രക്ഷിക്കുന്നും  വിധിക്കുന്നുമില്ല. എന്നാൽ അദ്ധ്യാത്മികതയുടെ അളവു കോലുകൾ ജന്മജന്മാന്തരങ്ങളിൽക്കൂടി ഒരുവനെ മോക്ഷ പ്രാപ്തിയ്ക്ക് പ്രാപ്തനാക്കുന്നു. യോഗായെ വിലയിരുത്തേണ്ടത് വൈദികകാലം മുതൽ പാരമ്പര്യമായി നേടിയ ജ്ഞാന വിജ്ഞാന കോശത്തിലെ ഉള്ളടക്കമനുസരിച്ചായിരിക്കണം.


സംസ്കൃതത്തിലെ 'യുജു്' എന്ന പദത്തിൽനിന്നുമാണ്  'യോഗാ' എന്ന  വാക്കിന്റെ ഉത്ഭവം. ഏകീകരിപ്പിക്കുക, യോജിപ്പിക്കുക എന്നിങ്ങനെ ഈ വാക്കിനർത്ഥം കല്പ്പിക്കാം.  ഇന്ദ്രിയങ്ങളെ  നിയന്ത്രിച്ച്  മനശക്തി  എങ്ങനെ പ്രാപിക്കാമെന്നു  ഹൈന്ദവ പുരാണങ്ങൾ  യോഗായെപ്പറ്റി  വർണ്ണിച്ചിരിക്കുന്നു. ക്രിസ്തുവിന് നൂറ്റാണ്ടുകൾക്കപ്പുറമെഴുതിയ ഭഗവത് ഗീതയിലും ഭഗവാൻ കൃഷ്ണൻ   നാലുതരം യോഗാകളെപ്പറ്റി പറയുന്നുണ്ട്.  ഭക്തി, ജ്ഞാനം, കർമ്മം, ധ്യാനം എന്നീ  യോഗാദികളെയാണ് ഭഗവദ് ഗീതയിൽ വിവരിച്ചിരിക്കുന്നത്.  ഹൈന്ദവ പുരാണങ്ങളിൽ ഈ നാല് സത്ഗുണങ്ങൾ മോക്ഷ പ്രാപ്തിക്ക് അത്യാവിശ്യമെന്നു കരുതുന്നു. യോഗാദികളിലെ നാലെണ്ണത്തിൽ  ഏറ്റവും അറിയപ്പെടുന്നത് 'ധ്യാന യോഗായാണ്.  മനസിനെ പുഷ്ടിപ്പെടുത്തി വിചാര വികാരങ്ങൾക്കതീതമായി മനസിനെ നിയന്ത്രിക്കുമ്പോൾ എകാഗ്ര ചിന്തയിൽ മാത്രം ലയിക്കുമ്പോൾ 'ധ്യാന'യോഗയാകും. ഏകാന്തതയിൽ ഒരു ഇരിപ്പിടത്തിലിരുന്ന് മനസിനെ പരിശുദ്ധമാക്കാനുള്ള പ്രായോഗിക പരിശീലനമാണ്  ധ്യാനയോഗകൊണ്ട് ഉദ്ദേശിക്കുന്നത്.  ശരീരമൊന്നാകെ  നിശ്ചലമാക്കിക്കൊണ്ട്  കഴുത്തും തലയും  നേരെ പിടിച്ച്,  അനങ്ങാതെ,  കണ്ണുകൾ  മാറ്റാതെ   ഒരേ  ദിശയിൽക്കൂടി  മൂക്കിനെ മാത്രം  ദൃഷ്ടി പതിപ്പിച്ചുകൊണ്ട് മനസിനെ  സമചിത്തമാക്കാൻ,ധ്യാനനിരതനാകാൻ    ഭഗവത് ഗീതയിൽ,   ആറാം അധ്യായത്തിൽ 12-13 ശ്ലോകത്തിൽ കൃഷണ ഭഗവാൻ പറയുന്നുണ്ട്‌.


നാല് ദിശകളിലായി യോഗായെ വിവരിക്കുന്നുവെങ്കിലും യോഗാദികൾ തമ്മിൽ പരസ്പ്പരം ബന്ധപ്പെട്ടതാണ്.   ഏതെങ്കിലുമൊന്നിൽ  മുഴുവനായി പഠിക്കുന്നവർ മറ്റു മൂന്നു യോഗ കർമ്മാദികളെയും പ്രായോഗിക തലത്തിൽ കൊണ്ടുവരേണ്ടതായുണ്ട്.   സ്വാമി ചിന്മയാനന്ദൻ പറഞ്ഞിരിക്കുന്നത് 'യോഗായിലെ നാലു സൂത്രങ്ങളിൽ ഏതെങ്കിലും ഒന്നിൽ പ്രാവിണ്യം നേടുന്നവൻ അതോടൊപ്പം മറ്റു മൂന്നു യോഗാ മാർഗങ്ങളും അറിഞ്ഞിരിക്കുമെന്നാണ്. ' ബുദ്ധിമാൻ യോഗാദികളിൽ പ്രാവീണ്യം നേടി  സ്വയം ആത്മത്തെ കണ്ടെത്തും.  നാം നമ്മെത്തന്നെ  സ്വയം മനസിലാക്കാനായി  യോഗായുടെ നാലു വഴികളും മനസിലാക്കണം.  ഏതു മാർഗങ്ങളിൽക്കൂടി സഞ്ചരിച്ചാലും യോഗായെന്നത്  ജീവിതകാലം മുഴുവൻ    അർപ്പിതമനോഭാവത്തോടെ  കൈവെടിയാതെ സംരക്ഷിക്കേണ്ട ഒന്നാണ്. യോഗായിൽ വിദ്യ നേടാൻ    ദൈവഭക്തിയും സ്ഥിരമായ സമ ചിത്തതയോടെയുള്ള പരിശീലനവും ആവശ്യമാണ്.


യോഗാ സൂത്രങ്ങളുടെ ആദ്യ രചയിതാവ് ബി.സി.  രണ്ടാം നൂറ്റാണ്ടിൽ  ജീവിച്ചിരുന്ന 'പതാഞ്ചലി മുനി'യാണെന്ന് വിശ്വസിക്കുന്നു. പതാഞ്ചലി യോഗായിൽ 195 സൂത്രങ്ങളുണ്ട്. പതാഞ്ചലിയെന്ന മുനി ആരെന്നോ ഏതു കാലത്ത് ജീവിച്ചിരുന്നുവെന്നോ  കൃത്യമായ ഒരുത്തരം തരുവാൻ കഴിയില്ല. പതാഞ്ചലി മുനിയുടെ പേരിൽ അനേക സംസ്കൃത ഗ്രന്ഥങ്ങളും ആയുർവേദ ഗ്രന്ഥങ്ങളുമുണ്ട്.  കൂടാതെ സംസ്കൃത ഭാഷയെ നവീകരിച്ചുകൊണ്ട്  ഗ്രാമറു പുസ്തകവും എഴുതിയിട്ടുണ്ട്. പൗരാണിക കാലത്തിലെ മറ്റനേക പ്രസിദ്ധരായവരെപ്പോലെ  പതാഞ്ചലിയെ ചുറ്റിയും ഇതിഹാസ കഥകൾ രചിച്ചിരിക്കുന്നതു കാണാം . ആയിരം തലകളുള്ള അനന്ത സർപ്പ സ്വരൂപത്തിന്റെ മുകളിൽ വിഷ്ണു ഭഗവാൻ ഇരുന്നരുളുന്നപൊലെ  ഭൂമിയിലുള്ളവരെ യോഗാ പഠിപ്പിക്കാൻ സ്വർഗത്തിൽ നിന്ന് പതാഞ്ചലിയെന്ന  ദേവൻ ഒരു കുഞ്ഞു സർപ്പത്തിന്റെ രൂപത്തിൽ താഴേയ്ക്കു പതിച്ചുവെന്ന ഒരു കഥയുമുണ്ട്.  പതാഞ്ചലി എഴുതിയ ഗ്രന്ഥങ്ങൾ സ്വന്തമായി എഴുതിയതെന്നു വിശ്വസിക്കാൻ സാധിക്കില്ല.  ഗുരുക്കന്മാർ തങ്ങളുടെ രചനകൾ സ്വന്തം പേരിലെഴുതാൻ ആഗ്രഹിക്കാതെ പ്രസിദ്ധരായ പൂർവിക ഗുരുക്കന്മാരുടെ പേരുകളിൽ  എഴുതുക സാധാരണമായിരുന്നു.   പലരു കൂടി സഹകരണത്തോടെ ഗ്രന്ഥങ്ങൾ രചിക്കുന്ന സമയം പ്രസിദ്ധരായവരുടെ  പേരുകളിൽ ഗ്രന്ഥങ്ങൾ പ്രസിദ്ധീകരിക്കുകയെന്നതും കീഴ്വഴക്കമായിരിക്കാം.


ബി.സി.  600-ൽ എഴുതിയതെന്നു വിചാരിക്കുന്ന ശ്വേതവതാര ഉപനിഷത്തിൽ തീവ്രമായ യോഗായിൽ മുഴുകിയിരിക്കുന്നവരുടെ  പരാമർശനങ്ങളുണ്ട്.  ഉപനിഷത്ത്  പറയുന്നു,   "വായൂ, ഭൂമി, വെള്ളം, അഗ്നി, എന്നീ പദാർത്ഥങ്ങൾ  കൊണ്ട് ശരീരം സമ്പുഷ്ടമെങ്കിൽ ആ ശരീരം അഗ്നി പോലെ ജ്വലിക്കുന്ന  യോഗാകൊണ്ട് നിറഞ്ഞിരിക്കും. രോഗമോ, വാർദ്ധ്യക്യമോ മരണമോ ആ ശരീരത്തെ കീഴടക്കില്ല. ആരോഗ്യം, ഉണർവ്, പൂർണ്ണമായ ശബ്ദം, ശരീരത്തിൽ ദുർഗന്ധം വമിക്കാതിരിക്കുക, എന്നിവകൾ യോഗാ അനുഷ്ടിക്കുന്നവർക്ക്  ലഭ്യമാണ് . ഒരു കണ്ണാടി വൃത്തിയാക്കുന്നപോലെ  യോഗാസനങ്ങളിൽക്കൂടി മനസിനെ പവിത്രമാക്കി  ആത്മത്തെ കണ്ടെത്തുന്ന  യോഗി സ്വന്തം ശരീരത്തെ   നിയന്ത്രണാധീതമാക്കി ദുഖങ്ങളെയും   ഇല്ലാതാക്കും. "


വിവേകാനന്ദൻ യോഗാസനയെപ്പറ്റി പറഞ്ഞത് " സൌകര്യപ്രദമായ ഒരു ഇരുപ്പിടം ലഭിച്ചാലേ   ശ്വാസോച്ഛാസ വ്യായാമങ്ങൾ   പ്രായോഗിക തലങ്ങളിൽ ഫലപ്രദമാവുകയുള്ളൂ.  ശരീരത്തിന്റെ അസ്ഥിത്വം ഉണ്ടെന്നുള്ള അനുഭൂതികൾ നമ്മിൽ ഉണ്ടാവരുത്.   ആരംഭത്തിൽ യോഗാ  അഭ്യസിക്കുന്നവന്റെ ശരീരത്തിൽ   തടസങ്ങളും ബുദ്ധിമുട്ടുകളും അനുഭവപ്പെടും. എന്നാൽ അറിയുക, സ്ഥായിയായ ശരീര ദർശനത്തെക്കാളുപരിയായി നമ്മുടെ മനസിനെ പരിവർത്തന വിധേയമാക്കുന്നുവെങ്കിൽ ശരീരത്തിൽ  ഇന്ദ്രീയാനുഭൂതികൾ ഇല്ലാത്തതായ  ഒരു സ്ഥിതിവിശേഷം വരും.  സ്വന്തം ശരീരത്തെ   നമ്മുടെ നിയന്ത്രണത്തിലാക്കി  കീഴ്പ്പെടുത്താൻ കഴിഞ്ഞാൽ, ഉറച്ച നിശ്ചലാവസ്തയിൽ ശരീരത്തെ പ്രതിഷ്ടിച്ചാൽ യോഗാഭ്യാസ വ്യായാമങ്ങൾ അടിയുറച്ചതായിരിക്കും. എന്നാൽ, ശരീരത്തിന് ബാഹ്യമായ തടസങ്ങളുണ്ടായാൽ  നാഡി വ്യൂഹങ്ങൾ തടസപ്പെടും. മനസും അസ്വസ്ഥമായിക്കൊണ്ടിരിക്കും."        


യോഗാ ഒരു വ്യായാമം മാത്രമെന്നും  മനുഷ്യ ശരീരാവയവങ്ങളെ പ്രത്യേക രീതിയിൽ വിന്യസിപ്പിക്കുക മാത്രമാണ് ലക്ഷ്യമെന്നുള്ള  തെറ്റിധാരണ സാധാരണ ജനങ്ങളിലുണ്ട്. ആരോഗ്യപരമായ അനേക ഗുണങ്ങൾ യോഗാസനങ്ങൾ കൊണ്ട് നമ്മുടെ ശരീരത്തിനു ലഭിക്കാറുണ്ട്. രക്ത സമ്മർദ്ദം കുറയ്ക്കാൻ കഴിയുന്നു. വാത രോഗങ്ങള്ക്കും പുറം വേദനകൾക്കും ഗുണപ്രദമാകും. ശരീരത്തിൽ ഇമ്മ്യൂണിറ്റി വർദ്ധിപ്പിക്കാൻ സാധിക്കും. അടുത്ത കാലത്തെ പഠനത്തിൽ യോഗാ കൊണ്ട് കുട്ടികളുടെ ക്ലാസ്സിലെ ഗ്രേഡ് വർദ്ധിപ്പിക്കാൻ സാധിക്കുമെന്നും തെളിഞ്ഞിട്ടുണ്ട്.


ക്രമമായ യോഗാസനങ്ങൾ കൊണ്ട് നമ്മുടെ ആരോഗ്യാവസ്ഥ വർദ്ധിപ്പിക്കാൻ സാധിക്കുമെങ്കിലും യോഗായിലെ പരമമായ ലക്ഷ്യം അതല്ല.  ആധുനിക കാലത്തെ യോഗാ ഗുരുക്കളിൽ സുപ്രധാന രണ്ടു വ്യക്തികളാണ് ശ്രീ ബി .കെ.എസ്  അയ്യങ്കാരും പട്ടാബി ജോയിസും. അവരുടെ അഭിപ്രായത്തിൽ 'യോഗാസനമെന്നാൽ  വെറും വ്യായാമത്തിനായുള്ളതല്ല. എന്നാലത് ഊർജത്തിന്റെ ഘടകങ്ങളെ ആവഹിക്കാനുള്ളതാണ്.' ശരീരത്തിൽ ഊർജത്തെ സമതുലനാവസ്തയിൽ എങ്ങനെ സമാഹരിക്കാം?  ഊർജത്തിന്റെ  ഘടകങ്ങളെ നിയന്ത്രിക്കണം. മനസിന്റെ വ്യതിയാനങ്ങളെയും തടയണം. യോഗാദി ഗുണങ്ങളെ തിരിച്ചറിഞ്ഞ് അനുഭവസ്തമാക്കണം. നമ്മിൽ തന്നെ ഒരു സ്വയം ബോധവല്ക്കരണം ഉണ്ടാവുകയെന്നതാണ് യോഗായുടെ ലക്ഷ്യം .ശാരീരികമായ അഭ്യാസംകൊണ്ടു  മാത്രം യോഗായുടെ സത്ത ലഭിക്കില്ല. യോഗാഭ്യാസം ചെയ്തു കുറച്ചു വിയർത്തതുകൊണ്ടോ നീണ്ട ശ്വാസോച്ഛാസ പ്രക്രിയകൾ നടത്തിയതുകൊണ്ടോ പ്രയോജനം നേടില്ല.  യോഗായിൽ ശാരീരിക വ്യായമത്തെക്കാളും ആദ്ധ്യാത്മികതയാണ് പ്രാധാന്യം. സപ്ത നാഡികളെ നിയന്ത്രിച്ചുകൊണ്ട് മനസിനെ പരിപാവനമാക്കിയാലെ യോഗായുടെ ഗുണമേന്മ കണ്ടെത്താൻ സാധിക്കുള്ളൂ. എങ്കിൽ 'ഞാനെന്ന' സത്യത്തെ അനുഭവ സമ്പത്താക്കാൻ സാധിക്കുമെന്നു  പ്രസിദ്ധ യോഗാ ഗുരു നോയ്സ് പറയുന്നു.


യോഗാ അഭ്യസിക്കുന്ന ഒരുവന്  ശരിയായ  ഉൾകാഴ്ച ആവശ്യമാണ്.  ഗുരുവില്ലാത്ത യോഗാഭ്യാസങ്ങൾ തികച്ചും  നിരർത്ഥകവും യോഗായുടെ പരിപാവനമായ മൂല്യങ്ങളെ മനസിലാക്കാത്തതുമാണ്. അങ്ങനെയുള്ള യോഗാകൾ വെറും വ്യായാമം മാത്രമായിരിക്കും. മില്ല്യൻ കണക്കിന് ജനങ്ങൾ യോഗാസനങ്ങൾ അഭ്യസിക്കുന്നുണ്ടെങ്കിലും വാസ്തവത്തിൽ അത് ഈശ്വര ദർശനമില്ലാത്ത, യോഗായുടെ സത്തയില്ലാത്ത വെറും അഭ്യാസം മാത്രമെന്ന് ആധികാരികമായി യോഗാ കൈകാര്യം ചെയ്യുന്ന ഗുരുക്കൾ അഭിപ്രായപ്പെടുന്നു.


ഹൈന്ദവ തത്ത്വ സംഹിതകളിൽ ഗുരുവിന് വളരെയധികം പ്രാധാന്യം കല്പ്പിച്ചിട്ടുണ്ട്. ഒരു ഗുരു തന്റെ ശിക്ഷ്യന്മാരെ പഠിപ്പിക്കേണ്ടത് പാരമ്പര്യത്തിനു വിധേയമായിട്ടായിരിക്കണം. മറിച്ചുള്ള ചിന്താഗതികളിൽ ഗുരുവിന് യുക്തമെന്നു തോന്നുന്ന പോലെ പഠിപ്പിച്ചാൽ അത്  'ഞാൻ' എന്ന  അഹം ഭാവം കൊണ്ടായിരിക്കാം.  തങ്ങളുടെ ഗുരുവിൽ നിന്ന് നേടിയ പാരമ്പര്യമായ    അറിവുകൾ   ശിക്ഷ്യഗണത്തിനു പകർന്നു കൊടുക്കുമ്പോഴാണ് യോഗായുടെ പരിശുദ്ധി ദൃശ്യമാകുന്നത്. പാശ്ചാത്യർ ഗുരുവെന്ന പദമുപയോഗിക്കുന്നത് ഹൈന്ദവ പാരമ്പര്യത്തിന്റെ പരിശുദ്ധിയില്ലാതെയാണ്. അജ്ഞതയുടെ അന്ധകാരത്തെ തുടച്ചുമാറ്റി ജ്ഞാനം നല്കുന്നയാളാണ്  ഗുരു. ഗുരുവെന്നാൽ വെറുമൊരു അദ്ധ്യാപകൻ മാത്രമായിരിക്കില്ല.  ഗുരുക്കന്മാർ ശിക്ഷ്യഗണങ്ങളെ നയിക്കുന്നതോടൊപ്പം അവരുടെ  അഭിലാഷങ്ങളും ആഗ്രഹങ്ങളും പൂർത്തികരിക്കാനും     തയ്യാറാവണം. ശിക്ഷ്യഗണങ്ങളുടെ ആദ്ധ്യാത്മികതയിലെ ഉൾക്കാഴ്ചകൾ ഉണർത്താൻ കഴിവുമുണ്ടായിരിക്കണം.  ഉപനിഷത്തുകൾ പറയുന്നു, 'ഗുരുവെന്നാൽ ദൈവമാണ്; ഗുരു തന്നെയാണ്,  ബ്രഹ്മാവും, വിഷ്ണുവും, പരമ ശിവനും. ആ ഗുരുവിനെ ഈശ്വരതുല്യമായി നമസ്ക്കരിച്ചു നിത്യവും വന്ദിക്കണം.   അദ്ദേഹം നമ്മുടെ കണ്മുമ്പിലുള്ള  പരബ്രഹ്മമാണ്. (വിഷ് വാസര തരം ) ഗുരു ശിക്ഷ്യ ബന്ധത്തിലും ഹൈന്ദവ പുരാണങ്ങൾ പ്രാധാന്യം കല്പ്പിക്കുന്നുണ്ട്. ഹൈന്ദവ ഇതിഹാസ പുരാണമായ മഹാഭാരതം അതിനു തെളിവാണ്. ഗുരുവിനെ ആദരിക്കാനും സ്നേഹിക്കാനും ഭക്തി പ്രകടിപ്പിക്കാനും അർജുനനെ മാത്രമല്ല ദുര്യോദനനെയും പഠിപ്പിക്കുന്നുണ്ട്.


യോഗായുടെ ചരിത്രപശ്ചാത്തലം പരിശോധിക്കുകയാണെങ്കിൽ  ഗുരു പാരമ്പര്യത്തിൽ നിന്നും വരുന്ന ഒരു ഗുരുവിന്റെ കീഴിൽ  യോഗാ  അഭ്യസിക്കണമെന്നുമുണ്ട്. ഗുരുകുല വിദ്യാഭ്യാസ കാലയളവിൽ  ഗുരു തന്റെ ശിക്ഷ്യന്മാരുടെ വഴികാട്ടിയായിരുന്നു. യോഗാദികൾ  അഭ്യസിപ്പിക്കാൻ   പരിചയസമ്പന്നനായ ഒരു ഗുരു ആവശ്യമാണെന്നു   പഴം പുരാണങ്ങളും ഹതയോഗാ ടെക്സ്റ്റുകളും  വായനക്കാരെ ഓർമ്മിപ്പിക്കുന്നു.  ആധുനിക കാലത്ത് ഉപനിഷത്തുക്കൾ കല്പ്പിക്കുന്ന പ്രകാരം ഒരു ഗുരുവിനെ കണ്ടെത്തുകയെന്നതും എളുപ്പമല്ല. ഒന്നും രണ്ടും ആഴ്ചകൾ കൊണ്ട് യോഗാ പഠിപ്പിക്കുന്ന സ്കൂളുകളും ചിലർ നടത്തുന്നു. അവിടെ പഠിച്ചവർ യോഗാ അദ്ധ്യാപകരായി  മാറുന്നതും ഹൈന്ദവ ശാസ്ത്രങ്ങൾക്ക് വിരോധാഭാസമാണ്. അനേക വർഷങ്ങൾ അർപ്പിത മനോഭാവത്തോടെ യോഗാ പരിശീലിച്ചവർക്കു മാത്രമേ നല്ല ഗുരുവാകാൻ കഴിയുള്ളൂവെന്നു യോഗാഗ്രന്ഥങ്ങൾ സൂചിപ്പിക്കുന്നു.  പതാഞ്ചലി  യോഗാ  സൂത്രായിൽ (1-14) നിരന്തരമായ യോഗാഭ്യാസത്തിന്റെ പ്രാധാന്യത്തെ വിവരിക്കുന്നുണ്ട്. 'യോഗാ ഒരുവൻ  ഭക്തിയോടെയും വിശ്വാസത്തോടെയും ഇടവിടാതെ നീണ്ടകാലം പരിശീലിച്ചാലെ  സ്ഥായിയായ ആദ്ധ്യാത്മിക പുരോഗതി ലഭ്യമാവുള്ളൂവെന്നു' 'പതാഞ്ചലി' വ്യക്തമാക്കിയിട്ടുണ്ട്. ആറു വർഷം തൊട്ടു പത്തു വർഷം വരെയെങ്കിലും, പരിശീലനക്കളരിയിൽ യോഗാ അഭ്യസിച്ചവർക്കേ  നല്ലൊരു യോഗാ ഗുരുവാകാൻ സാധിക്കൂ.  അഷ്ടാംഗ യോഗായിൽ ഗുരു പാരമ്പര്യം കർശനമായി   അനുശാസിക്കുന്നു.


യോഗായുടെ പ്രസിദ്ധരായ ഗുരുക്കന്മാർ യോഗാസനങ്ങൾ പഠിക്കുന്നതിന്റെ പ്രാധാന്യം ചൂണ്ടിക്കാണിയ്ക്കുന്നുണ്ടെങ്കിലും ഒരു രോഗിയ്ക്കോ  ശരീരത്തിൽ   തീവ്രമായ മുറിവുള്ളവനോ യോഗാ പരിശീലനം കൊണ്ട് നേട്ടങ്ങളുണ്ടാകാൻ പോവുന്നില്ല. യോഗാസനങ്ങൾ നല്ല  പരിജ്ഞാനമുള്ള ഗുരുവിൽ നിന്ന് പരിശീലിക്കണമെന്ന്  യോഗായെ   ആധികാരികമായി കൈകാര്യം ചെയ്യുന്നവർ അഭിപ്രായപ്പെടുന്നു.  പരിജ്ഞാനമുള്ള ഗുരുക്കൾ  യോഗായുടെ പവിത്രീകരണത്തിന്  ആവശ്യവുമാണ്. 'പ്രാണായാമാ' പോലുള്ള ആസനങ്ങൾ പഠിക്കാൻ ശരീരത്തെ മുഴുവനായും സപ്ത നാഡികളെയും   പൂർണ്ണനിയന്ത്രണത്തിൽ കൊണ്ടുവരേണ്ടതായുമുണ്ട്. എങ്കിലേ  ഉപബോധ മനസിനുള്ളിലെ ആത്മത്തെ ഉണർത്തി അനുഭവ സമ്പത്താക്കാൻ   സാധിക്കുകയുള്ളൂവെന്നു യോഗികൾ വിശ്വസിക്കുന്നു.   ലോകത്തിന്റെ  പ്രകാശമെന്നത്  ആത്മസത്തയെ കണ്ടെത്തുകയാണെന്നും പ്രസിദ്ധരായ യോഗാചാര്യന്മാർ  രേഖപ്പെടുത്തിയിട്ടുണ്ട്.
പാരമ്പര്യ യോഗാചിന്തകൾ പ്രായോഗിക ജീവിതത്തിൽ നടപ്പാക്കുക എളുപ്പമല്ല. കാരണം ഇന്നത്തെ യോഗാസംസ്ക്കാരം  പാശ്ചാത്യമായി കഴിഞ്ഞിരിക്കുന്നു. യോഗായെ തികച്ചും ഉത്ഭാദന മേഖല പോലെ വ്യവസായിവൽക്കരിച്ചിരിക്കുന്നതായും കാണാം.


മനുഷ്യർ പരസ്പരം സ്നേഹത്തോടെയും സഹവർത്തിത്തോടെയും  ജീവിക്കാനുതകുന്ന യോഗായെന്ന ശാസ്ത്രത്തെ  വ്യവസായ സംരംഭമാക്കിയ വഴി  അതിന്റെ  പരിശുദ്ധി നഷ്ടപ്പെട്ടുകൊണ്ടിരിക്കുന്നു.  ആധുനിക കാലത്തെ  വിവിധ സംസ്ക്കാരങ്ങളിൽ  കാണുന്ന യോഗാകൾ യോഗസൂത്രാദി ഗ്രന്ഥങ്ങളിൽ  വിവരിച്ചിട്ടുള്ളതല്ല.  വൈദിക കാലങ്ങളിലെ പൗരാണിക പുസ്തകങ്ങളുടെ അടിസ്ഥാന മൂല്യങ്ങളുള്ളതുമല്ല. ഭക്തിയോ വിശ്വാസമോ അദ്ധ്യാത്മികതയോ വ്യാവസായിക യോഗായിൽ കാണില്ല. മായം ചേർത്ത് ഒപ്പിയെടുത്ത യോഗാക്കളരികളാണ് ഇന്ന് ലോകത്തിന്റെ വിവിധ ഭാഗങ്ങളിൽ പ്രവർത്തിക്കുന്നത്. പഠിക്കുന്നവരും പഠിപ്പിക്കുന്നവരും യോഗായുടെ പവിത്രതയെപ്പറ്റി വ്യക്തമായി മനസിലാക്കുന്നില്ല. ഇന്ന് അഭ്യസിപ്പിക്കുന്ന  ഭൂരിഭാഗം കളരികളിലെ യോഗാ  വെറും പാഴായ വ്യായാമം മാത്രമാണ്. യോഗായുടെ പുതിയ ഇനങ്ങൾ ആരംഭിക്കുകയും പ്രയോജന രഹിതങ്ങളായ  അത്തരം യോഗാകൾ താമസിയാതെ ഇല്ലാതാവുകയും ചെയ്യുന്നു. ലാഭേച്ഛയോടെയുള്ള   യോഗാ പാഠങ്ങൾ  ഭഗവത് ഗീതയുമായൊ ഉപനിഷത്തുക്കളുമായൊ   പൌരാണിക യോഗ സൂത്രാദികളുമായൊ യാതൊരു ബന്ധവും കാണില്ല. ആധുനിക കാലത്തെ വ്യാവസായിക യോഗാ പൂർവിക പിതാക്കന്മാരുടെ പാരമ്പര്യ യോഗായെ നശിപ്പിച്ചുകൊണ്ടിരിക്കുന്നു.  പരിശുദ്ധിയില്ലാത്ത കച്ചവട യോഗാ  ആദ്ധ്യാത്മിക വീഥിയിൽനിന്നും വഴുതി മാറി   പകരം  വ്യവസായിക മുതലാളിമാരുടെ  കുത്തകയായി മാറി.


ക്രിസ്തുവിനു മുമ്പു മുതൽ പരമ്പരാഗതമായി  കാത്തു സൂക്ഷിച്ച  യോഗായുടെ പവിത്രതയെ നശിപ്പിച്ചുകൊണ്ടുള്ള ആധുനിക യോഗാസന മുറകൾ മനുഷ്യ നന്മയ്ക്ക് ഗുണപ്രദമായിരിക്കില്ല. യോഗായുടെ പരിശുദ്ധി നിറഞ്ഞ  ഗുണങ്ങൾ ലഭിക്കണമെങ്കിൽ ദൈവിക വഴിയെ മാത്രം ചിന്തിക്കണമെന്ന് ഉപനിഷത്തുക്കൾ ഉരുവിടുന്നു.  സർവ്വ കർമ്മങ്ങളിലും സത്യം മുഴങ്ങി കേള്ക്കണം. വ്യവസായിക യോഗാകളിൽ പണത്തോടുള്ള ആസക്തി കാരണം സ്വാർത്ഥ താല്പര്യങ്ങൾക്ക് മുൻതൂക്കം നല്കുന്നു. അത്തരം യോഗാകൾ സമൂഹത്തിൽ  പ്രശ്നങ്ങൾ സൃഷ്ടിക്കുകയേയുള്ളൂ. ഹിന്ദുക്കളെ സംബന്ധിച്ച് യോഗാ ഒരു പാരമ്പര്യ സ്വത്താണ്. അതിന്റെയർത്ഥം യോഗായുടെ അവകാശം ഹിന്ദുക്കൾക്ക് മാത്രമെന്നല്ല. യോഗായെന്നുള്ളത് ഒരു മതത്തിന്റെയും രാജ്യത്തിന്റെയും കുത്തകയെന്നു കരുതാനും കഴിയില്ല. ഇത് സനാതന ധർമ്മത്തിൽ നിന്നും പരിവർത്തന വിധേയമായി വന്ന വിദ്യയാണ്. ജാതി മത വിഭാഗിയതകൾക്കതീതമായി  പൂർവിക തലമുറകളിൽ നിന്നും  അണയാതെ കാത്തു സൂക്ഷിച്ച പവിത്രമായ സനാതനത്വത്തിൽ ഓരോ ഭാരതിയനും തുല്ല്യയവകാശമാണുള്ളത്.


പണ്ടു കാലത്ത് രാജ പ്രഭുതികളും പുരോഹിതരും അമ്പല തമ്പുരാക്കന്മാരും യോഗായെ കുത്തകയായി കരുതിയിരുന്നു. പകരം,   യോഗായിന്ന്  വ്യവസായികളുടെയും കോർപ്പറെറ്റുകളുടെയും  നിയന്ത്രണത്തിലേക്ക്  വഴുതി മാറുന്നതും  കാണാം. ചില ക്രിസ്ത്യൻ ഗുരുക്കൾ പാരമ്പര്യ യോഗായെ   ക്രിസ്ത്യൻ യോഗായെന്നു പേരിട്ടു വിളിക്കാറുണ്ട്.  യോഗായെന്നുള്ളത് ജൂഡോ ക്രിസ്ത്യൻ വാക്കല്ല. റോമൻ കത്തോലിക്കാ സഭയുടെയോ  നവീകരണ സഭകളുടെയോ ഗ്രന്ഥങ്ങളിൽ  യോഗായെപ്പറ്റി പറഞ്ഞിട്ടില്ല.   യോഗായെന്ന  വാക്ക് 'കിംഗ് വേർഷൻ' ബൈബിളിലും ഇല്ല. 'യോഗാ'യെന്നുള്ളത് വേദിക്ക് സംസ്ക്കാരത്തിൽ കടന്നു കൂടിയ സംസ്കൃത വാക്കാണ്.


ക്രിസ്ത്യാനികൾ യോഗാ പഠിക്കാൻ ഒരുമ്പെടുന്നുവെങ്കിൽ വേദിക്ക് സംസ്ക്കാരത്തിന്റെ അടിത്തറയിലേക്ക് പോകുന്നുവെന്ന് മനസിലാക്കണം. മറിച്ചുള്ള ചിന്തകളിൽ യോഗാ അഭ്യസിക്കുന്നവർ മാർക്കറ്റിംഗ് ഗുരുക്കളുടെ മായം ചേർത്ത യോഗായാണ് പഠിച്ചതെന്നു   കരുതിയാൽ മതി.  പാശ്ചാത്യ ആദ്ധ്യാത്മികതയിൽ കാണാത്ത പലതും കിഴക്കിന്റെ ആത്മീയ മണ്ഡലങ്ങളിൽ ഒളിഞ്ഞു കിടക്കുന്നതു  കാണാം. ആത്മീയത തേടി കിഴക്കിന്റെ ഉപനിഷത്തുക്കൾ ചികയാൻ പടിഞ്ഞാറൻ രാജ്യങ്ങളിലുള്ളവർ ഭാരതത്തിൽ വന്നെത്താറുണ്ട്. കിഴക്കിന്റെ ആദ്ധ്യാത്മികതയിൽ ആരെയും നിത്യ നരകത്തിൽ തള്ളിവിടാറില്ല. പാപിയെന്ന് ആരെയും മുദ്ര കുത്തുകയോ, അവർക്കായി  പ്രാർത്ഥിക്കുകയോ ഇല്ല. എന്നാൽ യോഗായെന്നുള്ളത്  ദൈവവുമായി സല്ലപിക്കാനുള്ള ഒരു പ്രായോഗിക വഴിയാണ്. 'ഞാൻ വഴിയും സത്യവുമെന്ന് ' യേശു പറഞ്ഞതുപോലെ യോഗാദികളും  ഈശ്വരനിൽ ലയിക്കാൻ ഹൈന്ദവ വിശ്വാസത്തിലെ  മറ്റൊരു വഴിയാണ്. യേശു മാത്രമേ ദൈവത്തിങ്കലേയ്ക്കുള്ള വഴിയെന്നു ചിന്തിക്കുന്നവർക്ക്  യോഗായുടെ ആന്തരികാർത്ഥം മനസിലാക്കാൻ സാധിക്കില്ല. മത മൗലിക ക്രിസ്ത്യൻ ചിന്തകളിൽ ആദ്ധ്യാത്മികതയുടെ ഉത്തരം  വചനങ്ങളിൽ മാത്രം ഒതുങ്ങി നില്ക്കുന്നു. മതപുരോഹിതരുടെ വാക്കുകളിൽ അടിമപ്പെട്ടും കിടക്കുന്നു. സത്യമായ യോഗായിലെ അഭ്യാസങ്ങൾ ക്രിസ്ത്യാനികളുടെ ചിന്തകളെയും സനാതന  തത്ത്വത്തിലേക്ക്  വഴി തിരിച്ചു വിടും. യോഗാ അഭ്യസിക്കുന്നവർ ക്രിസ്ത്യൻ പാരമ്പര്യം പരിത്യജിക്കണമെന്നില്ല.  യോഗായെ സ്വീകരിക്കുന്ന മൂലം ഭാരതീയ സംസ്ക്കാരത്തെ ഉൾക്കൊള്ളാനുള്ള   ആന്തരിക ജ്ഞാനം  ക്രിസ്ത്യാനികളിലും ഉണ്ടാവുകയാണ്. ഭാരതവും, രാജ്യത്തിലെ സ്നേഹമുള്ള  ജനങ്ങളും രാജാക്കന്മാരും എല്ലാക്കാലത്തും  വിദേശ സംസ്ക്കാരത്തെ സ്വീകരിച്ചിട്ടേയുള്ളൂ. പടിഞ്ഞാറേ സഹോദരരെ ആദരപൂർവമേ കണ്ടിട്ടുള്ളൂ. പകരം സംഭവിച്ചത് പടിഞ്ഞാറുള്ളവർ അമ്പലങ്ങളടിച്ചു തകർത്തു.  ഭാരത സംസ്ക്കാരത്തെ നശിപ്പിക്കാനെ പുറത്തുനിന്നുള്ളവർ ശ്രമിച്ചിട്ടുള്ളൂ. മതത്തിന്റെ പേരിൽ  കുടുംബങ്ങളെ തല്ലിപ്പിച്ച് പല വിഭാഗങ്ങളാക്കി. ഒരുവന്റെ യോഗായിലെക്കുള്ള വരവുവഴി വേദിക്ക് തത്ത്വങ്ങളിലേയ്ക്ക് എത്തുകയാണ്. യോഗാ, ഹിന്ദു മതത്തിന്റെ ഭാഗമായി തീർന്നെങ്കിൽ യോഗാ പരിശീലിക്കുന്നവർ ഹിന്ദുവാകണമെന്നില്ല. പക്ഷെ, ചരിത്രത്തിലേക്ക് തിരിഞ്ഞു നോക്കുന്നവർ യോഗായുടെ ആരംഭം സനാതന തത്ത്വങ്ങളിൽനിന്ന് ഉത്ഭവിച്ചതാണെന്നു മനസിലാക്കുകയും ചെയ്യും.

Cover Page: EMalayalee: http://emalayalee.com/varthaFull.php?newsId=101026

Malayalam Daily News: http://www.malayalamdailynews.com/?p=157379

അത്മായാശബ്ദം വെബ്സൈറ്റിൽ ഇന്ന്

Another Indian priest faces misconduct allegations in US

Is Islam a religion of war or peace? Both – and Muslims must decide, priest says

Missionaries of Charity asked to get permission for aid work in Nepal

Why do US Christians leave Church? 

Indian priest pleads guilty to sex crime in US 

Dalit youth killed for keeping Ambedkar song as ringtone

CASTLES IN THE AIR : Year of Sound and Fury :: Indian Currents Editorial

Cardinal’s Cardinal Sin – 3 Reactions Worth Reflection

US archdiocesan priest launches seminary project in India

An appropriate location to see the Christian World at a Glance: Church Citizens' Voice, now the most read religious online news portal in India.

കളിക്കുന്നതു മുഴുവൻ കള്ളക്കളി !

ഈ കാഞ്ഞിരപ്പള്ളി മെത്രാനു വേറെ ഒരു പണീം ഇല്ലെന്നു തോന്നുന്നു, വീണ്ടും ഇൻഫാമും കൊണ്ടു വരുന്നുണ്ട്. ഇൻഫാമിന്റെ ഒരൂ മുൻ ജില്ലാ പ്രസിഡന്റാണ് ഇപ്പോൾ പറയുന്നത്, ഇൻഫാം ജനങ്ങളെ വഞ്ചിക്കുകയായിരുന്നെന്ന്. കൃത്യം കണക്കുകൾ നിരത്തിക്കൊണ്ടു പറയുന്നതിനെ കണ്ണടച്ചു കാണിച്ചാൽ ശരിയാകുമോ മെത്രാച്ചാ? ആകുമായിരുന്ന ഒരു കാലം ഉണ്ടായിരുന്നു. എവിടെ കർഷകൻ ചിന്താക്കുഴപ്പത്തിൽ ആകുന്നുവോ അവിടെ ഇറക്കുമതി ചെയ്യാൻ പാകത്തിൽ ഇൻഫാമിനെ ഒരുക്കി നിർത്തിയിരിക്കുകയാണ്, എന്നു കേൾക്കാൻ തുടങ്ങിയിട്ട് കുറെയായി. പശ്ചിമഘട്ടം മൂത്തു വന്നപ്പോൾ, ഇടുക്കിയിലെ കാടുകളിൽ നിന്നു കുറുക്കന്മാരും ഇൻഫാം ഇൻഫാം എന്നോലിയിടുന്നത് എല്ലാവരും കേട്ടതല്ലേ? ഈ കാഞ്ഞിരപ്പള്ളീയിലാണ് രൂപതയുടെ പേരിൽ എന്ന വ്യാജേന പണ്ടൊരു സ്ഥാനാർഥി തിരഞ്ഞെടുപ്പിൽ നിന്നതും കോൺഗ്രസ്സിന്റെ ജോസഫ് വാഴക്കൻ തോറ്റതും. അന്നു ജയിച്ച കണ്ണന്താനം പിന്നീട് അറക്കന്റെ ഇഷ്ടതാരമായതു നാം കണ്ടു. അന്നദ്ദേഹത്തെ ജയിപ്പിക്കാനായിരുന്നു ആ കളിയെന്ന് ഇപ്പോൾ ആർക്കെങ്കിലും തോന്നിയാൽ കുറ്റം പറയാൻ പറ്റുമൊ? കളിക്കുന്നതു മുഴുവൻ കള്ളക്കളിയെന്നു ചിന്തിക്കുന്നതാണോ തെറ്റ്? കോൺഗ്രസ്സിനെ എതിർത്തോളൂ, പിണറായിയെ അനുസരിക്കുകയും ചെയ്തോളൂ. ഓഡിയിലോ പോഷേയിലോ ഷെവർലേയിലൊ സഞ്ചരിച്ചോളൂ; പക്ഷെ, അതത്മായന്റെ ചെലവിൽ വേണ്ട ജേഷ്ടാ? അതു കർത്താവിന്റെ മറവിൽ വേണോ ജേഷ്ടാ? ഈ മെത്രാൻ ജർമ്മനിയിൽ ഇറങ്ങിയാൽ പഴത്തൊലി എറിയുമെന്നു ജർമ്മൻ കത്തോലിക്കർക്കു പറയേണ്ടി വന്നില്ലെ? ഇപ്പോ വീട്ടിൽ ഇരിക്കാറായല്ലൊ. നില വിട്ടാൽ ഒരു തട്ടിലും വാഴില്ല.

തട്ടിപ്പില്ലാത്ത ഒരു സഭാപദ്ധതിയെപ്പറ്റി കേൾക്കാനേയില്ലെന്നായിട്ടുണ്ട്. എറണാകുളം രൂപതയുടെ വാറ്റ്കണക്ക് കേട്ടിട്ടില്ലാത്തവർ കേട്ടോളൂ. എന്നിട്ട് തീരുമാനം പറ. ഒരു പള്ളിയിൽ ഒരു ദിവസം ഒരു കുർബാനക്ക് രണ്ടു ടേബിൾ സ്പൂണ്‍ ഉപയോഗിച്ചാൽ, ഒരു കൊല്ലം 365 x 2 = 730 ടേബിൾ സ്പൂണ്‍ വീഞ്ഞു വേണം. ഒരു ലിറ്റർ എന്ന് പറഞ്ഞാൽ 67 ടേബിൾ സ്പൂണാണ്. അതായത്, ഒരു പള്ളിക്ക് ഒരു കൊല്ലം 730/67=10.89 ലിറ്റർ വീഞ്ഞു വേണം. എറണാകുളം അതിരൂപതയിൽ പള്ളികൾ 440. അവിടെ വേണ്ടത്, 440 x 10.89 =4791 ലിറ്റർ. 23 വർഷം മുൻപ് അനുവദിച്ച, കൊല്ലത്തിൽ 1600 ലിറ്റർ ഇപ്പോൾ 5000 ലിറ്റർ ആക്കി തരുവാൻ രൂപത ആവശ്യപെട്ടത് തെറ്റാണോ? 23 വർഷത്തിനു ശേഷം പള്ളികൾ എത്ര കൂടി? പുതിയ അനുവാദപ്രകാരം, ഇവിടെ മിച്ചം വരുന്നത്, (5000-4791= 209) രൂപത വെറുതെ കളയാൻ പോകുന്നു. (ഈ കണക്കു ഫെയിസ് ബുക്കിൽ കണ്ടതാണ്; രൂപതയുടെ കണക്ക്, ഇതാണോ അല്ലയൊ എന്നൊന്നും എനിക്കറിയില്ല. പക്ഷെ, രൂപതാ കണക്കിനോട് സാമ്യം കാണൂന്നുണ്ട്). ചോദിച്ചോട്ടെ? ഒരു പള്ളിയിൽ ഒരാഴ്ചയിൽ ആകെ 7 കുർബാന വെച്ചേ മുൻ വർഷങ്ങളിൽ നടന്നിരുന്നുള്ളോ? കഴിഞ്ഞ വർഷങ്ങളിൽ അനുവദിച്ചിരുന്ന 1600 ലിറ്ററല്ല രൂപത വാറ്റിക്കൊണ്ടിരുന്നതെന്നു സ്പഷ്ടമല്ലേ? മാത്രമല്ല, 'ഈ വീഞ്ഞ് വേറെ ആവ്വശ്യത്തിന് വിലക്കു വാങ്ങിയവരുമുണ്ട്, സൽക്ക്ക്കരിക്കാൻ ഉപയോഗിച്ചിട്ടുമുണ്ട്'; വെള്ളാപ്പള്ളി നടേശൻ ഇങ്ങനെ പറഞ്ഞപ്പോൾ ആരും ഒന്നും മിണ്ടിക്കേട്ടില്ലല്ലൊ! വ്യക്തിഗത സഭയായ മാർത്തൊമ്മാ സഭക്കു ഭാരതീയ പാരമ്പര്യമനുസരിച്ച്, വീഞ്ഞു വേണമെന്നാരു പറഞ്ഞു? എന്റെ മെത്രാച്ചോ, പഴയ അടി ഇവിടെ ഇനി നടക്കില്ല. സലോമിയുടെ മരണ കാരണം പോപ്പുലർ ഫ്രണ്ടാണെന്നു പറയുന്ന ആരെയെങ്കിലും കാണിച്ചു തരാമൊ? സത്യം പറയാൻ ആർക്കും ഇപ്പോ മടിയില്ലച്ചാച്ചന്മാരെ.

ഇത്ര മൂപ്പാണെങ്കിൽ എവന്മാരെ മൂക്കിൽ കയറ്റിയേക്കാം എന്നു ചിന്തിച്ചും സമയം കളയണ്ട മെത്രാച്ചന്മാരെ. അത്മായനെ ഉരുട്ടുന്ന കാലം പോയി. ഒരു ചുക്കും അവരെ ഇനി ചെയ്യാൻ പോകുന്നില്ല. കുട്ടികളേ പള്ളികളിൽ നിന്നിറക്കി വിട്ടാൽ, കൂദാശകൾ നിഷേധിച്ചാൽ, ശ്മശാനം അടച്ചിട്ടാൽ.... ദശാംശം കിട്ടിയില്ലെന്നു പറഞ്ഞു മുറുമ്മിയാൽ, എന്താ ചെയ്യേണ്ടതെന്നു KCRMലെയോ JCC യിലെയോ ആരോട് ചോദിച്ചാലും പറഞ്ഞും കൊടുക്കും, വേണ്ടത് ചെയ്തും കൊടുക്കും. 12 ലക്ഷം, കന്യാസ്ത്രിക്കു കൊടുക്കേണ്ടി വന്നത് ഓർമ്മയുണ്ടല്ലൊ അല്ലേ? മത്തങ്ങാ കമ്മറ്റിക്കു നേരെയാക്കാൻ ഇവിടെ വഴികളൊന്നും കാണില്ല മെത്രാച്ചന്മാരെ. ഇത്രേം നാളും അത്മായർ പറഞ്ഞു കൊണ്ടിരുന്നതു രണ്ടു മൂന്നു സിമ്പിൾ കാര്യങ്ങളാ. 1 പള്ളിക്കകത്തെ കാര്യം അച്ചൻ നോക്കുക, പുറത്തെ കാര്യം അത്മായൻ നോക്കുക. 2 മെത്രാന്റെ ജോലി അത്മായനെ ഭരിക്കലല്ല, നയിക്കലാണ്. 3 പോക്രിത്തരം കാണിക്കുന്ന മെത്രാനെ പിരിച്ചു വിടാനും ജനങ്ങൾക്കു കഴിയണം. ഒരു വ്യക്തിഗതസഭ എന്ന പരിഗണനയിൽ റോമിന്റെ കീഴിൽ വിലസാൻ നമുക്കനുവാദമുണ്ട്. പടിഞ്ഞാറു നിന്നു കാനോൻ വരുന്നതു വരെ ഭാരത സഭയുടെ സ്വത്ത് വിശ്വാസികളുടെ കൈയ്യിൽ ആയിരുന്നു. അന്ന് സഭ വളരുകയായിരുന്നു, ഒരു വൈദികനും ലോഡ് കണക്കിനു സാമഗ്രികൾ മുക്കിയിട്ടുമില്ല, ഏതു പെണ്ണിനും അന്നു പള്ളീമുറിയിൽ ധൈര്യമായി പോവുകയും കുമ്പസ്സാരിക്കുകയും ചെയ്യാമായിരുന്നു താനും.

വരാപ്പുഴ അതിരൂപതാ സിനഡ് പണപ്പെട്ടി അത്മായനെ ഏൽപ്പിക്കണമെന്ന് തന്നെ ആവശ്യപ്പെട്ട്` തയ്യാറാക്കിയ പ്രത്യേക ഇടയ ലേഖനം 90% പള്ളികളിലും വായിച്ചില്ലെന്നു പറഞ്ഞാൽ എന്താ സ്ഥിതി? ഇതു നടന്നത് അടുത്ത ദിവസം. മദ്യനയത്തിൽ സർക്കാരിനെ അൽപ്പം കൂടി ഉലത്തിയേ അടങ്ങൂവെന്ന് ആലഞ്ചേരി, നിയമങ്ങൾ ഉണ്ടാക്കാൻ സർക്കാരിനു അധികാരമുണ്ടെന്നു ആർച്ച് ബിഷപ് കല്ലറക്കൽ, മലബാറീന്ന് ഒരു ജാലിയൻ വാലാ ബാഗും ഇടക്കിടെ അമറിക്കൊണ്ടിരിക്കും. ആലഞ്ചേരിയുടെ ക്നാനായാ ഡിക്രി സുബോധമുള്ള ഒരു ക്രിസ്ത്യാനി എഴുതാൻ ഇടയുള്ളതല്ല എന്നാണ് അതിനെപ്പറ്റി മാർ ഭരണികുളങ്ങര എഴുതിയത് വായിച്ചാൽ മനസ്സിലാകുന്നത്. ഞാൻ ഇടക്കിടക്ക് ആലഞ്ചേരിയെ ഓർമ്മിപ്പിക്കാറുണ്ട്, പണീ അറിയാൻ വയ്യെങ്കിൽ ഓക്കൻ കളിച്ചു രസിക്കെണ്ടാ, ബെനഡിക്റ്റ് മാർപ്പാപ്പാ കാണിച്ചു തന്ന ഒരു വഴിയുണ്ട് എന്ന്. വിവരം കെട്ട കുറെ മെത്രാന്മാരെയും അനുസരണയില്ലാത്ത കുറെ അച്ചൻമ്മാരെയും കൊണ്ട് നരകത്തിൽ പോകുന്നതിനേക്കാൾ നല്ലത് ഇതൊന്നുമില്ലാതെ സ്വർഗ്ഗത്തിൽ പോകുന്നതല്ലേ, പിതാവേ? കാര്യങ്ങൾ കാര്യമായി ഒരൊ ദിവസവും പത്തു മുപ്പതു ലക്ഷം പേരുടെ മുമ്പിൽ എത്തിക്കാനുള്ള സൗകര്യം അത്മായാശബ്ദം ഇപ്പോൾ ചെയ്തിട്ടുണ്ട്.

ബനഡിക്റ്റ് അച്ചനെ പൂജിക്കണമെന്നു തന്നെയാ എന്റെ അഭിപ്രായം. അദ്ദേഹം ഒരിടത്തോട്ടും ഒളിച്ചോടിയില്ലല്ലോ. വന്നു വന്ന്, ഓരൊ ജില്ലക്കും ഒരു ലുക്കൗട്ട് മദ്ധ്യസ്ഥനെ വീതം നിയോഗിക്കണമെന്നു തോന്നുന്നു.

kcrmindia: സർക്കാരിനെ താഴെയിറക്കുവാൻ ലക്ഷ്യമിട്ടാണ് ഇൻഫാം രൂപീകരിച്ചത് ...

റെജി ഞള്ളാനി (ഇൻഫാം മുൻ ഇടുക്കി ജില്ലാ സെക്രട്ടറി)

http://kcrmindia.blogspot.in/2015/05/blog-post_21.html?spref=bl

ഇൻഫാം കർഷകരെ വഞ്ചിക്കുകയായിരുന്നു 
കത്തോലിക്കാ സഭയുടെ നേതൃത്വത്തിൽ രൂപീകൃതമായ ഇൻഫാമെന്ന കർഷക സംഘടന സുന്ദര മൊഹന വാഗ്ദാനങ്ങളും വലിയ പ്രതീക്ഷയും നൽകി കർഷകരെ വഞ്ചിക്കുകയായിരുന്നു. അന്നത്തെ ആന്റണി സർക്കാർ, സഭയുടെ സ്വത്തുക്കൾ സംബന്ധിച്ച കണക്കുകൾ ശേഖരിക്കുവാൻ ആഗ്രഹിച്ചിരുന്നു. ഇതിന്റെ അപകടം മണത്തറിഞ്ഞ കത്തോലിക്കാ സഭ സർക്കാരിനെ താഴെയിറക്കുവാനും അപകീർത്തിപ്പെടുത്തുവാനും ഇൻഫാം രൂപീകരിക്കുകയായിരുന്നു, ഇക്കാര്യം സംഘടനയുടെ ചെയർമാൻ ഫാ. മാത്യു വടക്കേമുറി എന്നോട് പറഞ്ഞിട്ടുണ്ട്. സഭാനേതൃത്വത്തിന് ജനങ്ങളിൽ മതിയായ വിശ്വാസമില്ലാതിരുന്നതിനാൽ സംഘടനയുടെ ഓരോ യൂണിറ്റുകളുടെയും രക്ഷാധികാരികളായി അതാതു പ്രദേശങ്ങളിലെ പള്ളി വികാരിമാരെയാണ് നിയമിച്ചിരുന്നത്. 

 കാർഷിക ഉല്പ്പന്നങ്ങളുടെ വിലയിടിവിനു കാരണം സർക്കാരിന്റെ പിടിപ്പുകേടാണെന്നു വരുത്തിത്തീർത്ത് ലക്ഷക്കണക്കിന് കർഷകരെ സംസ്ഥാന സർക്കാരിനെതിരെ തിരിച്ചുവിടുന്നതിൽ കത്തോലിക്കാ സഭ വിജയിച്ചു എന്നു പറയാം. അംഗത്വ ഫീസായും മറ്റു സംഭാവനകളിൽനിന്നും സജീവ പ്രവർത്തകരിൽ നിന്ന് കടമായും വടക്കേമുറിയച്ചന്റെ നേതൃത്വത്തിൽ സഭ കോടികൾ തട്ടിയെടുക്കുകയായിരിന്നു. വടക്കേമുറിയച്ചൻ നിയന്ത്രിച്ചിരുന്ന എസ്. ഡി.എ. എന്ന സന്നദ്ധ സംഘടന വഴിയും അച്ചൻ വൻതുക തട്ടിയെടുത്തു. നിരപരാധികളായ നിരവധിപേർ വഞ്ചിക്കപ്പെട്ടു. ഈ സാമ്പത്തിക ക്രമക്കേടുകളേക്കുറിച്ച് സി.ബി. ഐ. പോലുള്ള ഏജൻസികളെക്കൊണ്ട് സർക്കാർ ഉടൻ അന്വേഷിപ്പിക്കണം .പുരോഹിതരെ വശ്വസിച്ച് തെരുവിൽ ഇറങ്ങിയ കർഷകരുടെ ഉല്പന്നങ്ങൾക്ക് നല്ല വില വാങ്ങിത്തരാമെന്നു പറഞ്ഞ് നാട്ടുകരിൽനിന്നും കോടിക്കണക്കിനു രൂപ ഷെയറായി പിരിച്ചെടുത്ത് സ്ഥാപനങ്ങൾ ആരംഭിക്കുകയും , സഭയുടെ അനധികൃത സ്വത്തുക്കളെ സംബന്ധിച്ച അന്വേഷണത്തിൽ നിന്നും സർക്കാർ പിൻമാറിയതോടെ കർക്ഷകരെയും സ്ഥാപനങ്ങളെയും തെരുവിലെറിഞ്ഞ് പുരോഹിതർ വീണ്ടും പള്ളിമേടകളിലേയ്ക്ക് ചെക്കേറുകയായിരുന്നു. ഇൻഫാമിൽ വിശ്വസിച്ചിറങ്ങിയ പാവപ്പെട്ട കർഷകർക്ക് ഒരു രൂപയുടെ വിലവർദ്ധനവ് ലഭിച്ചില്ലെന്നു മാത്രമല്ല വൻ സാമ്പത്തിക നഷ്ടവും ഉണ്ടായി.

കേന്ദ്ര സർക്കാർ ഏകീകൃത സിവിൽകോഡ് കൊണ്ടുവരുമെന്ന ഭയവും വിദേശത്തുനിന്നും സഭക്ക് സന്നദ്ധ സംഘടനകളുടെ പേരിൽഎത്തിച്ചേരുന്ന പണത്തേക്കുറിച്ച് കേന്ദ്ര സർക്കാർ അന്വേഷണം ആരംഭിച്ചതുമാണ് നൂനപക്ഷ പീഡനമാരോപിച്ച് ഇന്ത്യയെ ദേശത്തും വിദേശത്തും അപകീർത്തിപ്പെടുത്തുവാൻ ശ്രമം നടന്നത് . ഇൻഫാമിന്റെ പേരിൽ വടക്കേമുറിയച്ചനേയും സഭയെയും വിശ്വസിച്ച് പലവിഭാഗങ്ങളിലായി പണം മുടക്കിയവർക്ക് ലക്ഷങ്ങൾ ഇന്നും കിട്ടാനുണ്ട്. സഭയുടെ ചില ആജ്ഞാനുവർത്തികളെ ഉപയോഗിച്ച് നിഗൂഡ ലക്ഷ്യത്തോടെ ഇൻഫാമിനെ ഒരിക്കൽക്കുടി രംഗത്തിറക്കി ജനങ്ങളെ വഞ്ചിക്കുവാൻ സഭ തയ്യാറെടുക്കുകയാണ്. സഭ തുടങ്ങിവച്ച എല്ലാ സ്ഥാപനങ്ങളും വൻ സമ്പത്തിക വളർച്ചകൈവരിച്ചപ്പോൾ ഇതേ സഭയുടെ കർക്ഷക സംഘടനയായ ഇൻഫാം കർഷകർക്കുവേണ്ടി തുടങ്ങിവച്ച ഒരുസ്ഥാപനങ്ങളും നിലനിൽക്കുന്നില്ലെന്നുതന്നെയല്ല കർഷകർ വൻ സാമ്പത്തിക കെണിയിലുമായി ഇനിയും നമ്മൾ വഞ്ചിതരാവണമോ? ........

പത്തംഗ മത്തങ്ങാക്കമ്മറ്റി!

ആലഞ്ചേരി പിതാവിന്റെ സപ്തതി സമുചിതമായി തന്നെ ആഘോഷിച്ചില്ലെന്ന്, ആർക്കും പറയാൻ സാധിക്കില്ല. കേക്കു മുറിക്കാൻ സാക്ഷാൽ മമ്മൂട്ടി തന്നെ വന്നില്ലേ? രണ്ടൂപേരും ഒരേ മേഖലയിൽ തൊഴിൽ ചെയ്യുന്നവരാണെന്നും, സഭയും സിനിമയും തമ്മിൽ യാതൊരു വ്യത്യാസവുമില്ലെന്നും, ഒന്നമ്മയുടെ കീഴിലാണെങ്കിൽ മറ്റേത് അച്ചന്റെ കീഴിലാണെന്ന വ്യത്യാസമേയുള്ളൂവെന്നും, ഒന്നു പുറം കാണിച്ചും മറ്റേത് അകം കാണിച്ചുമാണ് പണം ഉണ്ടാക്കുന്നതെന്നുമൊക്കെ വാദിക്കുന്നവരും കാണും. മനുഷ്യേനെന്താ പറയാൻ വയ്യാത്തെ? ക്രിസൊസ്റ്റോം തിരുമേനിയുടെ 98, മോഹൻലാൽ വട്ടയപ്പം മുറിച്ചാണ് ആഘോഷിച്ചതെന്നും ഓർക്കണം. വന്നു വന്നു പൗരോഹിത്യ രജത ജൂബിലിക്കു കലാഭവൻ മണിയും, കന്യാസ്ത്രികളുടെ ജൂബിലികൾക്ക് ഉർവ്വസിയും സിനഡിനു ഗ്രൂപ്പ് ഡാൻസുമൊക്കെ നിർബന്ധം എന്നു വന്നു കൂടായ്കയില്ല. എന്തൊക്കെയാണെങ്കിലും സിനിമായും സഭാക്രമങ്ങളും ഒരു ഫോർമുലായിൽ ആണ് ഉറപ്പിച്ചിരിക്കുന്നത്. രണ്ടിന്റെയും വ്യാജ സി ഡി യും ധാരാളം. ഒരു ധ്യാനത്തിന്റെ പരസ്യം അവസാനിക്കുന്നത്, 'രോഗശാന്തി പ്രാർഥനയും, ആന്തരിക സൗഖ്യ പ്രാർഥനയും, കുടുംബ നവീകരണ പ്രാർഥനയും, പരി. ആത്മ അഭിഷേക പ്രാർഥനകളും ഉണ്ടായിരിക്കുമെന്നു സംഘാടകർ പ്രത്യേകം അറിയിക്കുന്നു എന്നു കൂടി കാണിച്ചല്ലേ? സഭയും സിനിമയും തമ്മിലുള്ള പൊരുത്തങ്ങൾ ഒരിക്കലും തീരില്ല. 

നമ്മുടെ പണ്ടത്തെ ഹൈറേഞ്ച് സംരക്ഷണ സമിതിയെ ഓർമ്മിക്കുന്നുണ്ടായിരിക്കുമല്ലൊ. അതിന്റെ അമരക്കാരൻ അച്ചൻ കുറച്ചു നാൾ മുൻപ് ഈ സമിതി രാഷ്ട്രിയം ഉപേക്ഷിക്കുകയാണെന്നു പറഞ്ഞതായി ഞാനും പത്രങ്ങളിൽ വായിച്ചിരുന്നു. അവിടുത്തെ എം പി ഒരു മന്ത്രിയുടെ കോളറിനു കേറി പിടിച്ചെന്നു കേട്ടപ്പോഴെ കരുതിയതാ കോളറുള്ള ഉടുപ്പുകൾ ഇടുന്നവർ അടിയന്തിരമായി രാഷ്ട്രീയം വിടാൻ തയ്യാറായേക്കും എന്ന്. ഇപ്പോൾ കൊച്ചുപുരക്കൽ അച്ചൻ പറഞ്ഞെന്നു കേൾക്കുന്നു സമരം നിർത്താൻ പോകുന്നില്ലായെന്ന്; അത്തരം പ്രചാരണങ്ങൾ കരുതിക്കൂട്ടി ആരൊ ചെയ്യുന്നതാണെന്നും അദ്ദേഹം പറഞ്ഞെന്നു കേട്ടു. ചിലരല്ലെങ്കിലും അങ്ങനെയാ. കൊള്ളാനുള്ളത് കൊണ്ടേ അടങ്ങൂ. 

സഭക്കു വേണ്ടിയും സമൂഹത്തിനു വേണ്ടിയും ഇങ്ങിനെ നാട്ടുകാരെ ഭരിച്ചാണെങ്കിലും നയിച്ചാണെങ്കിലും ജീവിക്കുന്ന വൈദികരുടെയും കന്യാസ്ത്രികളുടെയും കഥകൾ കേട്ടാൽ ആരും കരഞ്ഞുപോകും. അവസാനകാലം വെറും വെയിസ്റ്റ് പോലെയാണവർ പ്രീസ്റ്റ് ഹോമുകളിലും മഠങ്ങളിലുമൊക്കെ കഴിയുന്നത്. 'അപ്പനു കഞ്ഞി വേണോ പയറു വേണോ' എന്നൊക്കെ ചോദിച്ചു, മരിക്കാൻ കിടക്കുന്ന അപ്പനു ചുറ്റും മക്കളു നിൽക്കുന്നതു കണ്ടിട്ടില്ലെ? അതിവർക്കു വിധിച്ചിട്ടില്ല. രാത്രിയിൽ മരണപെട്ട ഒരു കന്യാസ്ത്രിയുടെ കഥ കേൾക്കാൻ ഇടയായി. കൂട്ടു കന്യാസ്ത്രികൾ കാണൂമ്പോൾ രക്തത്തിൽ കുളിച്ചു തറയിൽ കിടക്കുന്നു. അച്ചന്മാരും കന്യാസ്ത്രികളും കൂടുതൽ മരിക്കുന്നതു രാത്രികളിലാണൊ കർത്താവെ? അത്മായൻ സഭക്കു വെയിസ്റ്റ് ആകുമ്പോലെ ഇവരും സഭക്കു വെയിസ്റ്റ് ആകുന്നു. അത്മായനെ സഹായിക്കാൻ ആരെങ്കിലും കാണും, ഇവർക്ക് ആരും കാണില്ല. എഡ്വിൻ അച്ചനും ഒരു വെയിസ്റ്റ് ആയില്ലെ? സങ്കടം തോന്നുന്നു.

ഞാൻ ചിലപ്പോൾ കാഞ്ഞിരപ്പള്ളീ മെത്രാന്റെ കാര്യം ഓർക്കും. വെടീം പടക്കോം രണ്ടെണ്ണം കൂടുതൽ പൊട്ടിച്ചാ അങ്ങേര് അധികാരം ഏറ്റത്. ആദ്യം ദീപികയിൽ തൊട്ടു, അതു ശരിയായി. മെത്രാന്മാർ ഉണ്ടാക്കുന്ന ഏതു കമ്മറ്റിയിലും കറിയിൽ കരിയാപ്പില പോലെ അദ്ദേഹവും കാണും എന്ന സ്ഥിതിയായി. അങ്ങേരുടെ പേരിൽ സഭയിൽ രണ്ട് അത്മായ സംഘടനകൾ ഉണ്ട്. ഒന്നിൽ ഒരത്മായൻ മാത്രം; അതെനിക്കു കൃത്യം അറിയാം. ആ നിലക്ക് സഭയിൽ ദശാംശം പ്രത്യക്ഷപ്പെട്ടതിനു പിന്നിലും, താമരക്കുരിശിനു പിന്നിലും എല്ലാം അദ്ദേഹത്തിന്റെ കരസ്പർശം ആരെങ്കിലും കണ്ടെങ്കിൽ കുറ്റപ്പെടുത്താൻ പറ്റുമോ? റോമിലെ ക്യുരിയാ ഹൗസിനു പിന്നിലും അദ്ദെഹം സജീവമായി ഉണ്ടായിരുന്നിരിക്കണമല്ലോ! അദ്ദേഹം താമര കുരിശും പൊക്കിപ്പിടിച്ചോണ്ട് റോമിൽ നിൽക്കുന്ന ഫോട്ടോ കാണാത്തവരുണ്ടോ? അവിടുത്തെ സീറോ മലബാർ മലയാളീ ഹൗസിൽ എന്തൊ സംഭവിച്ചെന്നു ഇപ്പോ കേൾക്കുന്നു. മെൽബോണിലെ കത്തീദ്രൽ പള്ളിപോലെ അത് ആവിയായെന്നും കേൾക്കുന്നു. കേൾക്കാൻ ആരുടെയും അനുവാദം വേണ്ടല്ലൊ. കേട്ടെന്നു പറഞ്ഞതു കൊണ്ട് തൂക്കി കൊല്ലാനും പോകുന്നില്ലല്ലൊ. കാഞ്ഞിരപ്പള്ളിയിൽ കത്തീദ്രൽ പള്ളിയും പഴയ പള്ളിയും തമ്മിൽ തുരങ്കം പോലെ എന്തോ കൊണ്ട് ബന്ധിപ്പിക്കാൻ കുറെ കോടികൾ മുടക്കി; അതു പോയിയെന്നും പോയില്ലെന്നും പറയുന്നവരുണ്ട്. മോനിക്കായുടെ കണക്കിൽ വരവ് അഞ്ചെക്കർ പൊന്നിൻ പുരയിടം, സഭക്കുണ്ടായ നാണക്കേട് ഒരു പത്തേക്കർ കയത്തിൽ മുങ്ങിയാലും തീരുമൊ? കാഞ്ഞിരപ്പള്ളി കഥകൾ പറയുന്നവൻ മടുക്കും, അത്രേയുള്ളൂ. പറഞ്ഞത് കാക്കനാട് ഉണ്ടാക്കുന്ന കോർ കമ്മറ്റിയിൽ അറക്കൽ അദ്ദെഹം കൂടി ഉണ്ടെങ്കിൽ മെത്രാൻ-അത്മായാ യുദ്ധം എപ്പൊ തീർന്നെന്നു ചോദിച്ചാൽ മതി എന്നാണ്. 

മെത്രാൻ 75 ൽ വിരമിക്കണം. അതാണല്ലൊ കാനോൻ പറയുന്നത്. തന്റെ നാളുകൾ എണ്ണപ്പെട്ടുവെന്നും കാഞ്ഞിരപ്പള്ളീ മെത്രാൻ മുന്നെ കണ്ടു കാണണം. അതിനു തടയിടാൻ, 75 കഴിഞ്ഞ അച്ചന്മാർക്കു ഇപ്പോൾ പള്ളികൾ കൊടുത്തു തുടങ്ങി. ഇതിനു മുമ്പുള്ള അനുഭവം വെച്ചു നോക്കിയാൽ, ഒന്നും കാണാതെ അപ്പൻ ഇന്നേവരെ കുടിക്കാൻ പോയിട്ടില്ല. അധികാരം കിട്ടിയാൽ പിന്നെ പറിയത്തുമില്ല, കമ്പ്ലീറ്റ് നശിപ്പിച്ചിട്ടെ പോകൂ താനും. ഈ വർഗ്ഗത്തെ ആരു മേയിക്കും കർത്താവേ? സ്വന്തം പെങ്ങടെ മകനെ മെത്രാൻ ആക്കാൻ ശ്രമിച്ച അങ്ങാടിയത്തോ?

അത്മായശബ്ദം വായിക്കുന്നവരും ഫെയിസ് ബുക്കിൽ കറങ്ങുന്നവരും ഓർക്കുക, കൈരളീദുരന്തം ഉണ്ടായതിൽ പിന്നെ ചാനലുകാരെ നേരിടാൻ തേലക്കാട്ടച്ചനെ ഒറ്റക്കു വിടരുതെന്നു തീരുമാനമുണ്ട്. എന്നും വെച്ചു, മറുപടി പറയാൻ ആളില്ലാത്തതു കൊണ്ട് അവരെപ്പറ്റി എന്തും പറയാമെന്നു കരുതരുത്. സഭ എന്തും ചെയ്യട്ടെ; നാം അത്മായർ സത്യവും ധർമ്മവും ഒരിക്കലും കൈവിടരുത്. 

ഇപ്പോ ആലഞ്ചെരി അടിയന്തിര കമ്മറ്റി വിളിച്ചു കൂട്ടേണ്ടി വന്നില്ലേ, എറണാകുളത്ത്? കമ്മറ്റിയിൽ അംഗങ്ങൾ പരസ്പരം ചോദിച്ചത്, ഈ സഭയെ എങ്ങിനെ നേരെയാക്കാം എന്നാണെന്നും അതിനു ഒരു പത്തംഗ മത്തങ്ങാ കമ്മറ്റി ഉണ്ടാക്കിയെന്നും ബെന്നിച്ചൻ എന്നെ വിളിച്ചു പറഞ്ഞു. കൂടുതൽ വിവരങ്ങൾ കിട്ടുന്ന മുറക്കു പറയാമെന്നും ബെന്നിച്ചൻ ഉറപ്പു പറഞ്ഞിട്ടുണ്ട്. എടപ്പള്ളിയിലെ ലുലു പള്ളി ആദ്യം പൊളിക്കട്ടെ. യൂദാ തദേവൂസല്ല, സാക്ഷാൽ പത്രോസ് തന്നെ വന്നാലും അവിടുത്തെ ശരിയായ കണക്കു പുറത്തു വരാൻ പോകുന്നില്ല. 

കത്തൊലിക്കാ സഭ രണ്ടും കൽപ്പിച്ചു തന്നെ മുന്നോട്ടു പോകുന്നു; മൂന്നിരട്ടി വീഞ്ഞു വാറ്റാനുള്ള ലൈസൻസിനാണൂ ഇപ്രാവശ്യം ഏറനാകുളത്തെ പള്ളി വാറ്റുകാർ അപേക്ഷിച്ചിരിക്കുന്നത്. വെട്ടുകത്തി, വാക്കത്തി ഇവ പണിയാനും അവർ അപേക്ഷിച്ചിട്ടുണ്ടൊയെന്നു തിരക്കുന്നതു കൊള്ളാം. ഞള്ളാനി, ഇപ്പൻ, മൂലേച്ചാലിൽ സഹോദരന്മാർ തുടങ്ങിയവർ ഏതായാലും സൂക്ഷിക്കുക. അംഗസംഖ്യ കുത്തനെ കുറയുന്നു എന്നു ദേശീയ സർവ്വെയിൽ എടുത്തു പറയുന്ന നമ്മുടെ സഭയിൽ, കൂടുതൽ വീഞ്ഞ് ആവശ്യം വന്നുവെന്നു പിതാവു പറഞ്ഞാൽ അതുപയൊഗിക്കുന്നവർ വർദ്ധിച്ചു എന്നു നാം മനസ്സിലാക്കിയാൽ മതി. ഇപ്പോ ഒരു വികാരിയച്ചനെ മാത്രമെ പോലീസ് അന്വേഷിക്കുന്നുള്ളൂ. അടുത്ത വർഷം അതൊരു മെത്രാനെ തന്നെ ആയേക്കാം. 

സീറോമലബാർ ഒട്ടകങ്ങൾ

'പർവ്വത'ത്തിലെ ഒരു പുത്തൻ ഗിരിപ്രഭാഷണം
(ഇവിടെ 'പർവ്വതം' പേരില്ലാത്ത ഒരു മലയല്ല, ഒരു ദശനക്ഷത്ര ആഡംബര ഹോട്ടൽ പോലുള്ള KCBC ആസ്ഥാനമാണ്)
ഇരുമ്പുചട്ടയുള്ള, ടൈറ്റാനിയംപൂശിയ, ആവശ്യപ്രകാരം നിർമ്മിച്ചുകൊടുക്കുന്ന
സൂചികൾ ഉത്പാദിപ്പിക്കുന്ന
ദശലക്ഷക്കണക്കിന് മുതൽമുടക്കുള്ള
ഒരു ബഹുരാഷ്ട്രകമ്പനി തുടങ്ങുന്നതിനെക്കുറിച്ച്
മുപ്പത്തിമൂന്നു വയസുകാരൻ യേശുവിന്റെ മലയാളിപിൻഗാമികളെന്നഭിമാനിക്കുന്ന വൃദ്ധശ്രീമാന്മാർ സംസാരിച്ചുകൊണ്ടിരിക്കുകയാണ്;
ഭീകരരൂപിയോളം വലിപ്പമുള്ള ഒട്ടകങ്ങൾക്ക്
സുഖമായി കടന്നുപോകാവുന്നത്ര വലിപ്പത്തിൽ കുഴകളുള്ള സൂചികൾ! 

-        (ആധാരം: മീന കന്ദസാമിയുടെ ഒരു കുറിപ്പ്, ജിജോ കുര്യന്റെ  വിവർത്തനം സാക് നെടുങ്കനാൽ മാറ്റിയെഴുതിയത് )