ഇതെന്റെയാലയമാണ്, അതിനെ മനോഹരമാക്കൂ, ഫ്രഞ്ചെസ്കൊ!

അസ്സീസിയിലെ ഫ്രാൻസിസിന്റെ കാലത്ത് സഭയുടെ സ്ഥിതി വളരെ ശോചനീയമായിരുന്നു. എന്റെ ആലയം പുതുക്കിപ്പണിയുക എന്ന ഉൾവിളി കേട്ട ഫ്രാൻസിസ്  ആദ്യം കരുതിയത് താൻ പ്രാർഥിച്ചുകൊണ്ടിരുന്ന, അസ്സീസിക്കടുത്തുള്ള സാൻ ദാമിയാനൊ എന്ന, ഇടിഞ്ഞുപൊളിഞ്ഞ ചെറിയ പള്ളിയെയായിരിക്കും യേശു ഉദ്ദേശിച്ചത് എന്നായിരുന്നു. ഏതായാലും ദൈവത്തിന്റെ ഭോഷനായി ജീവിച്ച ആ പ്രകൃതിസ്നേഹിയും അദ്ദേഹത്തിൻറെ സഹോദരവൃന്ദവും പിന്നീടെപ്പോഴോ ആണ് തിരിച്ചറിഞ്ഞത്, അധികാരാർത്തികൊണ്ടും രാഷ്ട്രീയ കയ്യാങ്കളികൾകൊണ്ടും താറുമാറായിപ്പോയ കത്തോലിക്കാ സഭയുടെ നവീകരണമാണ്  തന്റെ തോളിൽ ചുമത്തപ്പെട്ടത്‌ എന്ന്. തന്റെ കഴിവുകൾക്കപ്പുറവും ശ്രമിച്ചെങ്കിലും അദ്ദേഹത്തിന് സാധിച്ചത് വളരെ കുറച്ചുമാത്രമാണ്.

മൂല്യച്യുതി സൃഷ്ടിക്കുന്ന അന്ത:ക്ഷോഭങ്ങൾ ഇന്ന് അതേ സഭയുടെ അസ്തിത്വത്തെ തന്നെ ചോദ്യം ചെയ്യുകയാണ്. നിയതി ലോകത്തിനു സമ്മാനിച്ച രണ്ടാം ഫ്രാൻസിസ്, എല്ലാംകൊണ്ടും അസ്സാധാരണനായ നമ്മുടെ പപ്പാ, ഉള്ളിൽ ശ്രവിച്ചതും എന്റെ ആലയം പുതുക്കിപ്പണിയുക എന്ന സ്വരമാണ്. എന്നാൽ, വിചിത്രം തന്നെ, പന്ത്രണ്ടാം നൂറ്റാണ്ടിലെ ഫ്രാൻസിസിന് സംഭവിച്ച തെറ്റിദ്ധാരണ ഇരുപത്തൊന്നാം നൂറ്റാണ്ടിലെ ഫ്രാൻസിസിനും സംഭവിച്ചു. 'കേവലം ഒരു കത്തോലിക്കാ അമൂഹത്തെയല്ല നീ പുതുക്കിപ്പണിയേണ്ടത്, മരണപ്പിടച്ചിൽ തുടങ്ങിയിരിക്കുന്ന ഈ ഭൂമിയെ പുനരുജ്ജീവിപ്പിക്കുക എന്നതാണ് നിന്റെ ദൗത്യം' എന്നാണദ്ദേഹം ഒരു ഞെട്ടലോടെ തിരിച്ചറിയുന്നത്‌. ആ തിരിച്ചറിവാണ്  'Laudato Si' എന്ന തൻറെ അതിമനോഹരമായ ചാക്രിക ലേഖനത്തിൽ അദ്ദേഹം വെളിപ്പെടുത്തുന്നത്. അതിന്റെ ഉപശീർഷകം 'നമ്മുടെ ആവാസസ്ഥലത്തെ സംരക്ഷിക്കുക' എന്നാണ്. 'Laudato Si' വി. ഫ്രാൻസിസിന്റെ പ്രഖ്യാതമായ 'സമസ്ത ജീവജാലങ്ങൾക്കുമായി നിന്നെ ഞങ്ങൾ സ്തുതിക്കുന്നു' എന്നു തുടങ്ങുന്ന കീർത്തനത്തിൽ (Canticle of the Sun*) നിന്നെടുത്തതാണ്. പ്രകൃതിയിലെ ഓരോ ജീവതന്തുവിനും പുതുജീവൻ പകർന്നു കൊടുക്കാൻ വേണ്ടി തൻറെ വാക്കിലൂടെയും പ്രവൃത്തിയിലൂടെയും യാത്രകളിലൂടെയും സ്വന്തം ജീവൻ പണയപ്പെടുത്തിയാണ് അദ്ദേഹം ജീവിക്കുന്നത്.

മുകളിലത്തെ പടത്തിലെന്നപോലെ, ഫ്രാൻസിസ് പപ്പാ ഓരോ കുഞ്ഞിനേയും അതീവ വാത്സല്യത്തോടെ ആശ്ലേഷിക്കുമ്പോൾ, ആകാശവിസ്തൃതിയാവാഹിക്കുന്ന ആ കൈകൾ പുണരുന്നത് ഒരു വെറും മനുഷ്യജീവനെയല്ല, സമൃദ്ധവും മനോഹരവുമായി ദൈവം നമുക്ക് നല്കിയ, എന്നാൽ മനുഷ്യനിർമിതമായ മുറിവുകളാൽ തളർന്നുപോകുന്ന ഈ ഭൂമിയെയാണ്, ഈ പ്രകൃതിയെയാണ് എന്ന് നമുക്കറിയാം. അതാണ്‌ സത്യം. എന്റെ ആലയം എന്ന് ദൈവം പറയുന്നത് ഈ പ്രപഞ്ചത്തെ ഉദ്ദേശിച്ചാണ്, നമ്മെ സംബന്ധിച്ചിടത്തോളം ഈ ഭൂമിയാണത്  എന്നദ്ദേഹത്തിനറിയാം.

**ഫ്രഞ്ചെസ്കൊ,
പോവുക, എന്റെയാലയം പുതുക്കിപ്പണിയുക.
വിള്ളലുകൾ നികത്തുക, ദ്വാരങ്ങളടക്കുക.
കല്ലും ചാന്തുകൂട്ടും കൊണ്ടുവരിക - 
എന്നാലവ വിലക്ക് വാങ്ങരുത്. യാചിക്കുക.
തൊഴിലും യാചിക്കുക, കൂലി ഞാൻ കൊടുത്തുകൊള്ളാം.
കാരുണ്യത്തിലും കൊടുക്കലിന്റെ ആനന്ദത്തിലുമാണ് 
എന്റെയാലയം ഉയരേണ്ടത്.
എല്ലാ ജനത്തേയും കൂട്ടുക, ആരെയും തഴയരുത്.
വിവാഹിതരും, അവിവാഹിതരും, വിവാഹമോചിതരും 
ലിംഗഭേദമെന്യേ എല്ലാ അനുരാഗികളും, 
മതഭേദമെന്യേ എല്ലാ വിശ്വാസികളും 
അതേ അന്തസ്സോടെ അവിശ്വാസികളും 
നിരീശ്വരരും കൂടെക്കൂടട്ടെ.
വാതായനങ്ങളെല്ലാം തുറന്നിടുക,
അതിരുകളില്ലാത്തയാകാശം 
അകത്തേയ്ക്ക് കടക്കട്ടെ.
ചുവരുകളിൽ കുഞ്ഞുങ്ങൾ നിറങ്ങൾ കോരിയൊഴിക്കട്ടെ,
ഉച്ചത്തിലുള്ള ചിരിയുടെ സ്വന്തം വദനങ്ങൾ അവരതിൽ കോറിയിടട്ടെ.
പാട്ടുപാടിയും നൃത്തം ചവുട്ടിയും അവർ ഓടിക്കളിക്കട്ടെ. 
ഇതെന്റെയാലയമാണ്. ആരുമതിനെ മലിനപ്പെടുത്തരുത്! 
ആർക്കുമത് തടവറയാവരുത്.
അതിന്റേതായ ഇടത്തിൽ വളരാനുള്ള സ്വാതന്ത്ര്യം 
ഓരോ ജീവിയുടെയും അവകാശമാണ്.
വന്യജീവികൾക്ക് അവരുടെയിടം വിട്ടുകൊടുക്കുക.
വൃക്ഷങ്ങൾ അവരുടെയായുസ് ജീവിച്ചുതീർക്കട്ടെ.
വിലയില്ലാത്ത വാർത്തകൾക്കായി നടത്തുന്ന 
കടലാസിന്റെ വൃഥാവ്യയം തടയുക. 
യുവത്വത്തിന്റെ കൈകളിൽ വിത്തുകൾ നിറക്കുക.  
അകത്തും പുറത്തും അവരത് വാരി വിതക്കട്ടെ, 
അനുദിനമവ പൊട്ടിക്കിളിര്ക്കട്ടെ.
എന്റെയാലയം മനുഷ്യപരമ്പരകളുടെയും 
പക്ഷിമൃഗാദികളുടെയും ജലനിവാസികളുടെയും 
സന്തോഷാരവംകൊണ്ട് നിറയണം.
അതിനെ മനോഹരമാക്കൂ, ഫ്രാൻസിസ്,
അതിനെ മനോഹരമാക്കൂ! 

*“Laudato Si’, mi’ Signore” = “Praise be to you, my Lord”. In the words of this beautiful canticle, Saint Francis of Assisi reminds us that our common home is like a sister with whom we share our life and like a beautiful mother who opens her arms to embrace us. Full text of the Canticle can be read at http://www.franciscanfriarstor.com/archive/stfrancis/stf_canticle_of_the_sun.htm
** ഫ്രാൻസിസ് ഇറ്റാലിയൻ ഭാഷയിൽ ഫ്രഞ്ചെസ്കൊ ആണ്. 
ഈ ഭാഗത്ത് ഏതാനും വരികൾക്ക് കടപ്പാട്: Christopher Coelho  ofm - A new kind of fool, ദൈവത്തിന്റെ ഭോഷൻ, ഭാഷാന്തരം Jijo Kurian ofm, capuchin)