ആത്മയോഗ്‌ ജ്ഞാനപടികൾ

S.J.Ananth

ലോകമെങ്ങും അറിയപ്പെടുന്ന ഒരു ബൈബിൾ ഉപമയുണ്ട്‌ - ധൂർത്തപുത്രന്റെ കഥ.
അർത്ഥവത്തായ ഒരു ആത്മോപദേശമാണത്‌. സായൂജ്യത്തിലേക്കുള്ള എട്ടു പടികൾ അതിലുണ്ട്‌.
തന്റെ ഉണ്മ ആത്മാവാണെന്നും,  ആത്മാവ്‌ പ്രകാശമാണെന്നും, ഞാൻ ആ പ്രകാശത്തിലാകയാൽ, ആ പ്രകാശം എന്നിലാകയാൽ ഞാൻ പ്രകാശമാണെന്നും അറിയാതെ  പ്രകാശത്തിനു പുറം തിരിഞ്ഞപ്പോൾ മുമ്പിൽ കണ്ട നിഴലിന്റെ ഇരുട്ടിൽ അകപ്പെട്ട്‌ ആന്തരിക അസ്വസ്ഥതയിലും അസന്തുഷ്ടിയിലും കഴിയുന്ന ആളിന്റെ മാനസിക അവസ്ഥയാണ്‌ ധൂർത്തപുത്ര കഥ.

പ്രകാശത്തിനു പുറംതിരിഞ്ഞ്‌ നടന്നു നീങ്ങിയപ്പോൾ നിഴലിനു നീളവും വ്യാസവും വർദ്ധിച്ച്‌ ആകെ അന്ധകാരമായി. അങ്ങനെ ചെന്നകപ്പെട്ടത്‌ കൂരിരുട്ടിൽ അഥവാ ചെളിക്കുണ്ടിൽ. ഇനി തിരികെ തന്റെ സഹജാവസ്ഥയെ പ്രാപിക്കാൻ എട്ടു പടികൾ കയറണം.

1 - അറിയുക
ഒരുനാൾ ധൂർത്ത പുത്രനു ബോധോദയമുണ്ടായി. അതായത്‌ താൻ ഇവിടെ ഇങ്ങനെ കിടന്നു നരകിക്കേണ്ടവനല്ലെന്നും, തന്റെ സഹജാവസ്ഥയിലേക്കൊന്നു തിരിഞ്ഞാൽ മതിയെന്നും.
ഞാൻ പിതാവിന്റെ ഭവനത്തിൽ പിതാവുമൊത്ത്‌ പ്രകാശത്തിൽ പ്രകാശമായി കഴിഞ്ഞവനാണ്‌. ഞാനാണ്‌ അവിടം വിട്ട്‌ തലതിരിഞ്ഞു നടന്നതും ഇവിടിങ്ങനെ ആയതും. അവൻ പിടഞ്ഞെണീറ്റു.

2 - അഭിമുഖമാകുക (തിരിയുക)
 തന്റെ സ്വത്വത്തിനു നേരെ അവൻ തിരിഞ്ഞു. തിരിഞ്ഞ നിമിഷം നിഴൽ പിന്നിലായി; വന്ന ഇടവും പ്രകാശവും അതാ അങ്ങകലെ! ഇപ്പോൾ ഞാൻ ഇങ്ങിവിടെ, പ്രകാശം അങ്ങവിടെ . ഇതാണ്‌ ദ്വൈതാവസ്ഥ. ഇപ്പോഴും എന്റെ പിന്നിൽ നീണ്ട നിഴൽ ഉണ്ട്‌. വെളിച്ചത്തിൽ നിന്ന് വളരെ അകലെ ആയതിനാൽ നിഴലിനു നീളവും കൂടുതലാണ്‌. ഇനി ആ കൂരിരുട്ടിലേക്കു തിരിയുന്ന പ്രശ്നമില്ല. എനിക്ക്‌ ഇവിടം വിടണം.

3 - അകലുക
കൂരിരുട്ടിൽ നിന്ന് അഥവാ ചെളിക്കുഴിയിൽ നിന്ന് കര കയറണം. കുഴിയിൽ നിന്ന് അകന്നാലും, ചേറിന്റെ മണവും നിറവും എന്നിൽ അവശേഷിക്കും.  അതെല്ലാം കഴുകി വൃത്തി വരുത്തി വേണം പ്രകാശത്തിലേക്ക്‌ അടുക്കാൻ. പരമാനന്ദത്തിന്റെ കൊടുമുടി കയറാൻ ഒരുങ്ങുന്നവൻ പഴയ മനുഷ്യനെ ഉരിഞ്ഞുമാറ്റി വേണം അതിനൊരുമ്പെടാൻ എന്ന് ആചാര്യന്മാരെല്ലാം പറഞ്ഞു വച്ചിട്ടുണ്ട്‌.

4 - അടുക്കുക
സാധന, സ്വാദ്ധ്യായം, തപസ്സ്‌, സമർപ്പണം എന്നിവയിലൂടെ സത്യത്തോട്‌/ വെളിച്ചത്തോട്‌ അടുക്കുക എന്നതാണ്‌ അടുത്ത പടി. ഇവിടെയാണ്‌ പ്രലോഭനങ്ങളും, പ്രതികൂല സാഹചര്യങ്ങളും നമ്മെ പുറകോട്ടു വലിക്കുക. ഇവിടെയാണ്‌ പൗലോസാചാര്യന്റെ വാക്കുകൾ ഓർക്കേണ്ടത്‌: " നിങ്ങൾ ജാഗരൂകരായിരിക്കുവിൻ, വിശ്വാസത്തിൽ ഉറച്ചു നിൽക്കുവിൻ, പൗരുഷവും കരുത്തുമുള്ളവരായിരിക്കുവിൻ... (be alert, be firm in faith, be brave, be strong..) ഇവിടെ സാധനക്ക്‌ വളരെ പ്രസക്തിയുണ്ട്‌. സാദ്ധ്യമായ ഒന്നിനെ സാധിക്കാൻ വേണ്ടി സാധകൻ ചെയ്യുന്ന പ്രവർത്തിയാണ്‌ സാധന. അതായത്‌ ഉൽഭവസ്ഥാനത്തേക്ക്‌ തിരികെ നടക്കുന്നതിന്‌ സത്യാന്വേഷിക്ക്‌ ഒരു സഞ്ചാര സഹായി. തങ്ങളിൽത്തന്നെയുള്ള ശക്തിവിശേഷങ്ങളെ പരിശീലനത്താൽ ഉജ്ജ്വലിപ്പിക്കലിന്‌ ( ഹെബ്രാ.5:14) ഈ അവസ്ഥയിൽ ഒത്തിരി പ്രാധാന്യമുണ്ട്‌.

5 - അരികിലാകുക
പ്രതിബന്ധങ്ങളെയെല്ലാം തരണം ചെയ്ത്‌ ലക്ഷ്യസ്ഥാനത്തിനരികെ എത്തിയാൽ രക്ഷപ്പെട്ടു എന്നു പറയാം. മഹത്‌ ജ്യോതിയിൽ നിന്ന് അകന്നു പോയത്‌ എന്റെ മനസ്സാണ്‌. മഹത്‌ ജ്യോതി എന്നെ അകറ്റി മാറ്റിയതല്ല. അതിനാൽ എന്റെ തിരിച്ചുവരവിൽ യാതൊരു ഭാവഭേദവുമില്ലാതെ എന്നെ ഉൾക്കൊള്ളുന്നതാണ്‌ ആ മഹത്‌ ശക്തി. ധൂർത്തപുത്രന്റെ കഥയിലെ പിതാവ്‌ പുത്രനെ അത്യാഹ്ലാദമോടെ വാരിപ്പുണർന്ന് വീടിനുള്ളിലേക്കു കൂട്ടിക്കൊണ്ടുപോയതുപോലെ മഹത്‌ ജ്യോതിയിലേക്കു ഞാൻ പ്രവേശിക്കുന്നു. ഇപ്പോൾ ഞാൻ പ്രകാശവലയത്തിനുള്ളിലാണ്‌. ഞാൻ പിതാവിന്നരികെ, പിതാവ്‌ എന്റെ അരികെ. ഇതല്ലെ വിശിഷ്ടാദ്വൈതാവസ്ഥ?

6 - അകത്താകുക
ഇനി ഞാനൊന്നുമറിയേണ്ട. പിതാവ്‌ എന്നെ വീടിനകത്തേക്കു കൂട്ടിക്കൊണ്ടുപോകും. ചുരുക്കത്തിൽ, ഞാൻ എന്റെ സഹജാവസ്ഥയെ പുൽകുന്നു. ഇതാണ്‌ പരമാനന്ദാവസ്ഥ. ഇപ്പോൾ ഞാൻ പ്രകാശത്തിനുള്ളിൽ, പ്രകാശം എനിക്കു ചുറ്റിലും. ഇപ്പോൾ മുന്നിലും പിന്നിലും നിഴലില്ല.

7 - അതാകുക
സമ്പൂർണ്ണ വിമോചനത്തിന്റെ സുഖ സുന്ദരാവസ്ഥ!
ഇനി ഞാനും പ്രകാശവും ഒന്നാകുന്നു. പിതാവിനോട്‌ എനിക്ക്‌ യാതൊന്നും ചോദിക്കേണ്ടതില്ല. ഞാനും പിതാവും ഒന്ന്. ഈ ഒരവസ്ഥയെക്കുറിച്ചു സെന്റ്‌ പോൾ പറഞ്ഞു: ഇത്‌ കണ്ണുകൾ കാണുകയോ, ചെവികൾ കേൾക്കുകയോ മനുഷ്യ മനസ്സ് ഗ്രഹിക്കുകയോ ചെയ്തിട്ടില്ല.

8 - അതേകുക
ഞാൻ പ്രാകശത്തിലായാൽ/ഞാൻ പ്രകാശമായാൽ എന്നിൽ നിന്നു പ്രവഹിക്കുന്നതും പ്രകാശം. ദൈവവും ഞാനും ഒന്നാകുന്ന ഒരവസ്ഥയിൽ സ്നേഹം, ദയ, ക്ഷമ, വിശ്വസ്തത, സന്തോഷം, ആത്മസംയമനം, സൗമ്യത, നന്മ, സമാധാനം എന്നീ പുണ്യങ്ങളുടെ വിളഭൂമിയായി മാറും, എന്റെ ജീവിതം.
ചുരുക്കത്തിൽ, ദൈവ മനുഷ്യ ഐക്യം - പരമസത്യത്തിലേക്ക്‌ ഒരു മടക്ക യാത്ര -  കേന്ദ്രത്തിലേക്ക്‌ ഒരു കടന്നുചെല്ലലും കണ്ടുമുട്ടലും - അതാണ്‌ ആത്മയോഗ്‌.