ലെയിറ്റി വോയിസ് പൊല്ലാപ്പ്

ഒരു ക്രിസ്ത്യാനിക്കു ചിരിച്ചു മടുക്കാന്‍ മാത്രം വാര്‍ത്തകള്‍ ഇപ്പോള്‍ നാട്ടില്‍ കിട്ടുന്നുണ്ട്‌. ലെയിറ്റി വോയിസിനെതിരെ കേന്ദ്ര മന്ത്രി ജയറാം രമേശ്‌ പത്ര സമ്മേളനം വിളിച്ചു ഭീഷണി മുഴക്കിയിരിക്കുന്നുവെന്ന വാര്‍ത്തയാണ് ഏറ്റവും ചൂടുള്ളത്. പാവം രമേശ്‌ ഓര്‍ത്തിരിക്കുന്നത് ഈ സാധനം സീറോ മലബാര്‍ സഭയുടെ ഔദ്യോഗിക പ്രസിദ്ധീകരണം ആണെന്നാണെന്നു തോന്നുന്നു. പേരില്‍ പറയുന്നതുപോലെ അത്മായരുടെ വകയല്ല ഈ മാരണമെന്നും അത്മായര്‍ ഔദ്യോഗികമായി യോഗം ചേര്‍ന്ന് ആരെയും ഇതിന് ചുമതലപ്പെടുത്തിയിട്ടില്ലെന്നും അങ്ങേര് അറിഞ്ഞിട്ടില്ല. പാവം വി. സി. സെബാസ്റ്യന്‍! അഡ്വോക്കെറ്റ് എന്ന വിശേഷണം മാറ്റി ഷെവലിയര്‍ വി. സി. സെബാസ്റ്യന്‍ എന്ന് നീട്ടി അച്ചടിച്ച്‌ പുറത്തിറക്കിയ ആദ്യം ലക്കം ഇങ്ങിനെയായി; ഇനിയുള്ളതിന്‍റെ ഗതി എന്താകുമോ?  

ഇതില്‍ പരസ്യം കൊടുക്കുന്നത് വാണിജ്യപരമായി ഭയങ്കര നേട്ടമായിരിക്കും, എല്ലാ പരസ്യങ്ങളും ഇതില്‍ പ്രസിദ്ധീകരിക്കാന്‍ പറ്റണമെന്നില്ല എന്നൊക്കെ അര്‍ഥം വരുന്ന കുറിപ്പുകള്‍ ഇതില്‍ കണ്ടിട്ടുണ്ട്, പക്ഷേ പരസ്യം മാത്രം ഇപ്പറഞ്ഞപോലെ കണ്ടിട്ടില്ല. ബിസ്സിനസ്സ്കാര്‍ നോക്കുമ്പോള്‍ ലെയിറ്റി വോയിസ് ഒന്ന്‍/രണ്ട്/..... @ ജി മെയില്‍.കോം എന്ന വിലാസത്തിലാണ് ഈ സാധനം ആരോ അയക്കുന്നത്. സാധാരണ ഒരു ജി മെയില്‍ വിലാസത്തില്‍ നിന്ന് സൌജന്യമായി അയക്കാവുന്ന മെയിലുകളുടെ എണ്ണം എന്‍റെ അറിവില്‍ ഒരു ദിവസം 500 ആണ്. അപ്പോള്‍ എങ്ങിനെ കണക്കു കൂട്ടിയാലും ഇത് കിട്ടുന്നവരുടെ എണ്ണം ഇപ്പറയുന്നതുപോലെ ലക്ഷക്കണക്കിന് ആവില്ല. ഇന്‍റര്‍ നെറ്റില്‍ ചില നിയമങ്ങളും പരിമിതികളുമൊക്കെയുണ്ട്, ഒരുവനെ അയാളുടെ അനുവാദം കൂടാതെ ബള്‍ക്ക് മെയില്‍ ലിസ്റ്റില്‍ ഇടാന്‍ ചില നിയന്ത്രണങ്ങളുണ്ട്. ലെയിറ്റി വോയിസ്, എന്‍റെ അറിവില്‍ അവിടെ നിന്നും ഇവിടെ നിന്നുമൊക്കെ കിട്ടിയ മെയില്‍ ലിസ്റ്റുകള്‍ ഉപയോഗപ്പെടുത്തി നിലനില്‍ക്കുന്ന ഒരു പ്രസിദ്ധീകരണമാണ്. അത് അല്മായന്‍റെ ശബ്ദമല്ല, സെബാസ്റ്യന്റെ ശബ്ദമെന്നെ വായനക്കാര്‍ക്ക് തോന്നാനിടയുള്ളൂ. ‘ഇന്ത്യക്ക് സ്വാതന്ത്ര്യം കിട്ടി’ എന്നതു പോലെ വലിപ്പത്തില്‍ സെബാസ്റ്യന് ഷെവലിയര്‍ പദവി എന്ന് അച്ചടിക്കണമെങ്കില്‍ സ്വന്തം പത്രം വേണം.

മറ്റൊരു തെഹല്‍ക്കാ എന്ന് തോന്നിപ്പിക്കുമാറ് വീറോടെ പശ്ചിമ ഘട്ടത്തെ പ്പറ്റി അദ്ദേഹം എഴുതിയ ലേഖനം ഞാന്‍ പലവുരു വായിച്ചു. എനിക്ക് മനസ്സിലായത്‌, ഏതൊക്കെയോ വിദേശ ഏജന്‍സികളില്‍ നിന്ന് അനേകം കോടി രൂപാ കൈക്കലാക്കി അവരുടെ രഹസ്യ അജണ്ടായായ പശ്ചിമഘട്ടം പരിസ്ഥിതി സംരക്ഷണം ജെയറാം രമേശു മുതല്‍പ്പേര്‍ ഇവിടെ നടപ്പാക്കുന്നുവെന്നാണ്. അല്ല, ഒരു നാടിന്‍റെ പരിസ്ഥിതി സംരക്ഷിക്കപ്പെടണമെന്ന് വിദേശ ഏജന്‍സികള്‍ എന്തിന് താല്പ്പര്യപ്പെടണം? അങ്ങിനെ ഒരു മണ്ടത്തരം ആരെങ്കിലും കാണിച്ചാല്‍ നാം സന്തോഷിക്കുകയല്ലേ വേണ്ടത്? മാറി മാറി വന്ന സര്‍ക്കാരുകളുടെ പിടിപ്പു കേടുകൊണ്ട് പരിസ്ഥിതിലോല പ്രദേശങ്ങളില്‍ കുടിയേറിയ കര്‍ഷകരെ നിരുല്സാഹപ്പെടുത്താനോ, കുടിയേറ്റങ്ങള്‍ ഉണ്ടാകാതെ നോക്കാനോ ആര്‍ക്കും കഴിഞ്ഞില്ല. ഒരു കുഴപ്പവുമില്ലെന്നു വിശ്വസിച്ച് അവിടങ്ങളില്‍ രക്തം വിയര്‍പ്പാക്കിയ കര്‍ഷകര്‍ക്ക് ഇപ്പോഴത്തെ സംഭവ വികാസങ്ങള്‍ വിഷമം ഉണ്ടാക്കുന്നുമുണ്ട്. അതില്‍ വ്യക്തിപരമായി എനിക്ക് വേദനയുണ്ട്, ഈ പ്രശ്നം അവരെ ആരെയും നിസ്സഹായാവസ്തയിലേക്ക് തള്ളി വിടാതെ പരിഹരിക്കുകയും വേണം. പക്ഷേ, ഈ പഴി മുഴുവന്‍ ഉമ്മന്‍ ചാണ്ടി സര്‍ക്കാരിന്‍റെ തലയിലേക്ക് ചാര്‍ത്താന്‍ ശ്രമിക്കുന്നത് ഷെവലിയരാണെങ്കിലും  ഉദ്ദേശശുദ്ധിയെ സംശയിക്കാതെ വയ്യ.

കഴിഞ്ഞ വര്ഷം, 'ഇതാ മുല്ലപ്പെരിയാര്‍ പൊട്ടിക്കഴിഞ്ഞു'വെന്നു വിളിച്ചു കൂവിക്കൊണ്ട് നാട് മുഴുവന്‍ കൊടികള്‍ പൊങ്ങിയപ്പോള്‍, ഈ സഭയും പൊക്കാവുന്നത്ര കോടികള്‍ പോക്കിയിരുന്നു. എല്ലാവരും കൂടി അന്നാട്ടിലെ സ്ഥലത്തിന്‍റെ ക്രയവിക്രയം പാടെ നിര്‍ത്തി. അതാണ്‌ ബാക്കി പത്രം. മുല്ലപ്പെരിയാര്‍ മേഖലയിലെ കര്‍ഷകന്‍റെ സ്ഥലത്തിനു പുല്ല് വിലയാണിന്ന്. അത് പോലൊരു ദുരന്തം പശ്ചിമ ഘട്ട മേഖലയിലെ കര്‍ഷകനെയും തുറിച്ചു നോക്കുന്നു. അവസാനം കര്‍ഷകന്‍ മണ്ടന്‍ തന്നെയായി അവശേഷിക്കും. 

സീറോ മലബാര്‍ സഭ പൊതുക്കാര്യത്തിനു ഇറങ്ങുമ്പോളോക്കെ ചില രഹസ്യ അജണ്ടാകളും പിന്നില്‍ ഉണ്ടായിരുന്നതുപോലെ എനിക്ക് തോന്നിയിട്ടുണ്ട്‌. പത്തു വര്ഷം മുമ്പ് റബര്‍ വില തീരെ താഴ്ന്നപ്പോള്‍ കൊട്ടിഘോഷിച്ചുണ്ടായതാണ് ഇന്‍ഫാം. ക്രിസ്ത്യാനി കര്‍ഷകര്‍ മാത്രമല്ല അന്ന് സന്തോഷിച്ചത്‌. പിന്നിടത് ഒരു രാഷ്ട്രിയ കക്ഷിയായി രൂപപ്പെടുന്നതുപോലെ തോന്നിയെങ്കിലും ഒന്നും സംഭവിച്ചില്ല, ഇന്‍ഫാം തന്നെ അപ്രസക്തമാവുന്നതാണ് നാം കണ്ടത്. അടുത്ത കാലത്ത് ശ്രി. റെജി ഞള്ളനാനി പത്ര സമ്മേളനം നടത്തി ഇന്ഫാമിന്‍റെ പേരില്‍ നടന്ന തട്ടിപ്പുകളെപ്പറ്റി  മാലോകരെ അറിയിച്ചപ്പോഴാണ് സംഗതിയുടെ പോക്ക് അവിടെയും സുഗമായിരുന്നില്ലെന്ന് ജനത്തിനു മനസ്സിലായത്‌. ഇപ്പോള്‍ പശ്ചിമഘട്ട പ്രശ്നം ചൂട് പിടിച്ചപ്പോള്‍ വീണ്ടും ഇന്‍ഫാം പൊക്കിക്കൊണ്ട് വരുന്നുണ്ട്, അടുത്ത ഫെബ്രുവരി 12 ന് തൊടുപുഴയില്‍ വെച്ച് കര്‍ഷക സമ്മേളനം നടക്കാന്‍ പോകുന്നുവെന്ന് ഇടയലേഖനത്തില്‍ കൂടി അറിയിച്ചിരിക്കുന്നത് ഇന്ഫാമിന്‍റെ എപ്പിസ്കോപ്പല്‍ ഉപദേശി അറക്കല്‍ മെത്രാനാണ്. ശവം ഉള്ളിടത്ത് കഴുകന്‍ വരുന്നതുപോലെയെ എനിക്ക് തോന്നുന്നുള്ളൂ. മെത്രാന്മാര്‍ നേരിട്ടിറങ്ങിയത്  ഉണ്ടാക്കിയ പൊല്ലാപ്പില്‍ നിന്ന് തന്ത്രപൂര്‍വ്വം തലയൂരാനും സഭയുടെ പിടി ശക്തമാക്കാനുമുള്ള ഒരു തന്ത്രമായേ ഞാനിതിനെ കാണുന്നുള്ളൂ. AICC കോണ്ഗ്രസ്സ് എം പി മാരെ പ്പറ്റിയുള്ള പൊതുജനാഭിപ്രായം അറിയാന്‍ നടത്തിയ സര്‍വ്വേയില്‍ താമരശ്ശേരിയില്‍ മെത്രാന്‍റെ മുമ്പില്‍ വിനയ പൂര്‍വ്വം നിന്ന ഷാനവാസിനെക്കാള്‍ ഇടുക്കി മെത്രാന്‍റെ നേരെ വാളോങ്ങിയ പിറ്റി തോമസ്‌ വളരെ മുമ്പിലാണെന്നാണ് കേട്ടത്. ശരിയോ തെറ്റോ; ഇത്, സഭ ജനങ്ങളുടെ ആദരവല്ല പിടിച്ചു പറ്റിയതെന്നല്ലേ കാണിക്കുന്നത്?  

ലെയിറ്റി വോയിസ് ആര്‍ക്കു വേണ്ടി നിലകൊള്ളുന്നുവെന്നും ജയറാം രമേശ്‌ കേസില്‍ സഭ എന്ത് നിലപാടെടുക്കുന്നുവെന്നും, ലെയിറ്റി വോയിസിന്‍റെ ഭാവി എന്തെന്നുമൊക്കെ അറിയാനിരിക്കുന്നതേയുള്ളൂ. എന്തായാലും, ഷെവലിയര്‍ പദവി കിട്ടിയ ഒരാള്‍ ജയിലിലേക്ക് പോവുകയെന്നതും, ക്ഷമാപണം നടത്തേണ്ടി വരുന്നതുമൊന്നും സഭക്ക് ഭൂഷണമല്ല. ഇത് സംഭവിക്കാനുള്ള സാദ്ധ്യത ചെറുതുമല്ല. വിദേശ ഏജന്‍സികള്‍ പണം നല്‍കിയ വിവരം ലേഖനത്തിലുണ്ട്. ആ പണം എങ്ങിനെ ചിലവു ചെയ്തു എന്ന് രേഖാമൂലം തെളിയിക്കാന്‍ ഷെവലിയര്‍ക്ക് സാധിക്കണമെന്നില്ല, പണം പോയത് അദ്ദേഹം ഉദ്ദേശിച്ചതുപോലെ ആയിരിക്കണമെന്നുമില്ല. കേരളാ ഗവണ്മെന്റിനെയും കേന്ദ്ര ഗവണ്മെന്റിനെയും ഒരുപോലെ വസ്താക്ഷേപം ചെയ്ത ആ ലേഖനത്തെ പിന്താങ്ങാന്‍ ഭരണകക്ഷികളില്‍ നിന്നാരും ഉണ്ടാവാന്‍ പോകുന്നില്ല. അത്മായന്‍റെ പേരില്‍ കാണിച്ച ഈ തോന്ന്യാസത്തിനു മാപ്പ് നല്‍കാന്‍ അത്മായരും തയ്യാറാകണമെന്നില്ല. ഇക്കാര്യം ചൂണ്ടിക്കാണിച്ച് ഏതെങ്കിലും അത്മായന്‍ കേസില്‍ കക്ഷി ചേര്‍ന്നാല്‍ സംഗതി വീണ്ടും വഷളായേക്കാം.