ലത്തീൻ - സീറോ മലബാർ റീത്ത് വിദ്വേഷം

ഡോ. ജെയിംസ് കോട്ടൂരിന്റെ  'Divisive Rite - Issue (Syro - Latin ) Explodes in Delhi' എന്ന ലേഖനം കാലികവും വളരെ പ്രസക്തവുമാണ്. അത് സഭാനവീകരണ ആശയവുമായി യോജിച്ചുപോകുകയും ചെയ്യുന്ന ഒരു വിഷയമാണ്. ഇരുപത്തിയൊന്നാം നൂറ്റാണ്ടിലും മതപരമായ അധിനിവേശം നിർബാധം തുടരാൻ സിറോ മലബാർ സഭാധികാരികൾ അരയും തലയും മുറുക്കി ഇറങ്ങിയിരിക്കയാണന്നകാര്യം ഒരു വിശ്വാസിയെ അലട്ടുമെന്ന് തീർച്ചയാണ്. മത അധിനിവേശത്തെ തടയാൻ തുറന്ന സംവാദങ്ങളും ചർച്ചകളും പഠനങ്ങളും ഇന്ന് ആവശ്യമായി വന്നിരിക്കുകയാണ്. 

ദൈവം തന്നിരിക്കുന്ന അധികാരം അല്മായരെ അടക്കിഭരിക്കാനാണെന്ന് മെത്രാൻറെ ബുദ്ധി മെത്രാനെത്തന്നെ  പറഞ്ഞ് പഠിപ്പിക്കുകയാണോയെന്ന് സംശയിക്കേണ്ടിയിരിക്കുന്നു. സഭയെന്നു പറയുന്നത് ദൈവജനത്തിൻറെ കൂട്ടായ്മയാണന്നും എല്ലാവരും ഒത്തുചേർന്ന് ഏകമനസ്ക്കരായി (അപ്പോ. 1:14)  സഭാതീരുമാനങ്ങളിൽ പങ്കാളികളാകേണ്ടത് അനിവാര്യമാണന്നും അല്മേനികൾ സഭാശ്രേഷ്ഠരെ പറഞ്ഞ് മനസ്സിലാക്കികൊടുക്കേണ്ട അവസ്ഥയാണിന്നുള്ളത്.  ഓരോ വിശ്വാസിയുടെയും സ്വാതന്ത്ര്യം പവിത്രമായ ഒരു നിക്ഷേപമാണ്. ആ സ്വാതന്ത്ര്യത്തെ കാത്തുസൂക്ഷിക്കാൻ ത്യാഗങ്ങൾ സഹിക്കേണ്ടിവരും. അത് ദൈവീകമാണ്. അതിന് ഉദാഹരണമാണ് പലസ്തീനയിൽ ജനിച്ചുവളർന്ന് സ്വാതന്ത്ര്യത്തിനുവേണ്ടി കുരിശുമരണം വരെ സഹിച്ച യേശുവിൻറെ ജീവിതകഥ. പൌരോഹിത്യ ഗർവിൻറെ സന്തതിയായ ആദ്ധ്യാത്മിക ദുഷ്പ്രഭുത്വം യഹൂദ ജനതയെ പീഡിപ്പിച്ചപ്പോൾ  അവരുടെ രക്ഷയ്ക്കായിട്ടാണ് യേശു അവതരിച്ചത്. യേശു അവരുടെ വഴിയും സത്യവും ജീവനും ആയിരുന്നു (യോഹ. 14: 16). യേശു അവർക്ക് സിദ്ധാന്തപരമായ ഒരു സത്യമായിരുന്നില്ല; മറിച്ച്, ജീവിതമാതൃക കാണിച്ചുകൊടുത്ത പച്ചമനുഷനായിരുന്നു. സത്യത്തിലേക്കും ജീവനിലേക്കും  വഴികാണിച്ചുകൊടുത്ത ഗുരുവായിരുന്നു, യേശു.

ഈ സദ്ഗുരുവി ൻറെ നാമം ഉപയോഗിച്ചുകൊണ്ട് വിശ്വാസികളെ മുഴുവൻ ആത്മീയമായി പറ്റിക്കുന്ന പ്രസ്ഥാനമാണ് പള്ളിയെന്ന് പള്ളിയിലിരിക്കുന്നവർ തിരിച്ചറിഞ്ഞുകൊണ്ടിരിക്കുന്നു. പള്ളിയധികാരികളുടെ ചൂഷണമാണ് മതപരമായ അധിനിവേശമെന്ന് കല്ല്യാൻകാരും ഫരിദാബാദുകാരും അമേരിക്കക്കാരും ആസ്ട്രേലിയാക്കാരും യൂറോപ്പി ൽ  താമസിക്കുന്നവരുമെല്ലാം തിരിച്ചറിഞ്ഞുകൊണ്ടിരിക്കുന്നു. സുഖജീവിതത്തി ൽ   മുഴുകിക്കഴിയുന്ന സഭാധികാരികൾ  തങ്ങളുടെ സാമ്രാജ്യം പരത്താൻ തുനിയുന്നതിൽ അത്ഭുതപ്പെടാനില്ല. ലത്തീൻസഭ കഴിഞ്ഞാൽ ഏറ്റവും കൂടുതൽ രൂപതകളും മെത്രാന്മാരുമുള്ളത് സീറോ മലബാർ സഭക്കാണ്. ലത്തീൻസഭയുടെ തലസ്ഥാനമായ വത്തിക്കാന് സമാന്തരമായി ഒരു 'കുട്ടിവത്തിക്കാ'നെ സൃഷ്ടിക്കാനായിരുന്നല്ലോ റോമിൽ സീറോ മലബാർ ആസ്ഥാനം വാങ്ങിക്കാൻ  മാര് ആലഞ്ചേരി പ്ലാനിട്ടത്. ഒരു മെത്രാപ്പോലീത്തയെയോ കർദിനാളിനെത്തന്നെയോ അവിടെ കുടിയിരുത്തി സീറോ മലബാർ സഭയുടെ പ്രതാപവും ശക്തിയും വർദ്ധിപ്പിക്കാനും ലോകരെ കാണിക്കാനും അത് കാരണമായേനെ. ആ പദ്ധതി ചീറ്റിപ്പോയ ലക്ഷണമാണ് കാണുന്നത്.

സീറോ മലബാർ സഭാധികാരികളുടെ നിയന്ത്രണം തെറ്റിയ ലത്തീൻ വിദ്വേഷത്തെ സംബന്ധിച്ച്  ചിന്തിക്കുമ്പോൾ  വളരെ പ്രസക്തമായ  പല കാര്യങ്ങളും നമ്മുടെ മനസ്സിൽ പൊന്തിവരും. 1962-ലാണ്  കേരളത്തിനു വെളിയിൽ സീറോ മലബാർ സഭയ്ക്ക് ആദ്യമായി ചാന്ദാ മിഷൻ ലഭിക്കുന്നത്,  അത് ലോകം മുഴുവൻ  സീറോ മലബാർ വളർത്താനുള്ള ആദ്യ  ചവിട്ടുപടിയായിത്തീർന്നിരിക്കുന്നു. രൂപതകളുടെയും മെത്രാന്മാരുടെയും  എണ്ണമാണ് സഭയുടെ വളർച്ചയായി ഇന്ന് കാണപ്പെടുന്നത്: മറിച്ച്, വിശ്വാസികളുടെ ആദ്ധ്യാത്മീക വളർച്ചയല്ല! (ഷിക്കാഗോയിൽ പുതിയ ഒരു മെത്രാനെ വാഴിക്കുന്നതിന് മൂന്നുലക്ഷം ഡോളറാണ് ചിലവഴിക്കുന്നതെന്നുകേട്ടു. അതിനും അല്മേനി അദ്വാനിച്ച് പണമുണ്ടാക്കണം).

1950-കൾ  തുടങ്ങി സീറോ മലബാർ സഭയിലെ ആയിരക്കണക്കിന് യുവതീയുവാക്കന്മാർ കന്യസ്ത്രികളാകാനും  വൈദികരാകാനും ലത്തീൻ രൂപതകളിൽ ചേരാൻ  തുടങ്ങി. ഇന്ന് ഇന്ത്യയിലെ എല്ലാ ലത്തീൻ രൂപതകളിലും ലത്തീൻ സന്യാസ ആശ്രമങ്ങളിലും നമ്മുടെ കന്യസ്ത്രികളും  വൈദികരും സേവനം ചെയ്യുന്നുണ്ട്. ലത്തീൻ സഭയിൽ കന്യസ്ത്രികളാകാനും  വൈദികരാകാനും തടസ്സങ്ങൾ ഒന്നുമില്ല. ഒരു പെണ്ണിനേയോ ചെറുക്കനേയോ ലത്തീൻ പള്ളിയിൽ കെട്ടിക്കുന്നതാണ് പ്രശ്നം. ഒരു കുടുംബം ലത്തീൻ ഇടവകയിൽ അംഗത്വമെടുക്കുന്നതാണ് പ്രശ്നം. ലത്തീൻ പള്ളിക്കുവേണ്ടി പട്ടമേൽക്കാം. എന്നാൽ ലത്തീൻ പള്ളിയിൽ കെട്ടാൻ പാടില്ല. ഇത് അല്മായരോട് കാണിക്കുന്ന വിവേചനമല്ലേ? സഭാനിയമങ്ങൾ മെത്രാന്മാരുടെ ഇഷ്ടംപോലെ വളച്ചൊടിക്കാമെന്നല്ലേ  ഇതിനർത്ഥം? ലത്തീൻ സഭയിൽ ചേരുന്ന കന്യസ്ത്രികൾക്കും  വൈദികർക്കും മാർതോമായുടെ പൈതൃകം വേണ്ടേ? അവരതിൽ ജീവിക്കണ്ടേ?

ഒരു ശെമാശന് ലത്തീൻ  രൂപതയിൽ പട്ടമേല്ക്കുന്നതിനുമുൻപ് അയാളുടെ സീറോ മലബാർ  ഇടവകപള്ളിയിലെ വികാരിയുടെ കുറിവാങ്ങി  പട്ടം നല്കുന്ന മെത്രാനെ കാണിച്ച് ബോധ്യപ്പെടുത്തിയശേഷമാണോ ആ മെത്രാൻ  പട്ടം നല്കുന്നത്. പണ്ടുകാലത്ത് പള്ളിപോതുയോഗമായിരുന്നു ശെമാശൻ പട്ടമേൽക്കാൻ യോഗ്യനാണോ എന്ന് തീരുമാനിച്ചിരുന്നത്. പൊതുയോഗം നല്കുന്ന കുറിയുടെ പേരായിരുന്നു ദേശക്കുറി. നിത്യവ്രതവാഗ്ദാനത്തിനുമുൻപ് ഒരു കന്യാസ്ത്രി താൻ ജനിച്ചുവളർന്ന സീറോ മലബാർ  ഇടവകയിലെ വികാരിയുടെ കുറിവാങ്ങി വൃതവാഗ്ദാനം സ്വീകരിക്കുന്ന സഭാധികാരിക്ക് നല്കുന്നുണ്ടോ? പെണ്ണിനേയോ ചെറുക്കനേയോ കെട്ടിക്കണമെങ്കിൽ മാതാപിതാക്കൾ ജീവിക്കുന്നത് ദൽഹിയിലോ  ഗൾഫിലോ ആയിരുന്നാൽപോലും രായിക്കുരായെ പറന്നെത്തി നാട്ടിലെ ഇടവക വികാരിയുടെ കുറി ഹാജരാക്കണം. ഇതും അല്മായരോടുള്ള വിവേചനമല്ലേ?

തിരുവിവാഹം എന്ന കൂദാശ ഞായറാഴ്ചകളിലും നോയമ്പു കാലങ്ങളിലും പരികർമ്മം ചെയ്യൽ മെത്രാൻ സിനഡ് മുടക്കിയിരിക്കയാണ്. വൃതവാഗ്ദാനത്തിനും പട്ടംകൊടുക്കലിനും ഒരു നിബന്ധനകളും ഇല്ല. ഇതും അല്മേനിളോടുള്ള വിവേചനമല്ലേ?

ഇന്ന് ആയിരക്കണക്കിന് വൈദികരും കന്യാസ്ത്രികളും ലോകമെമ്പാടും ലത്തീൻ സഭയിൽ സേവനം ചെയ്യുന്നുണ്ട്. ഇന്നത്തെ ഭാഷയിൽ പറഞ്ഞാൽ അവരെ ഔട്ട്സോഴ്സ് ചെയ്യുന്നു. യൂറോയും പൌണ്ടും ഡോളറും രൂപതകളിലേക്കും സന്യാസാശ്രമങ്ങളിലേക്കും ഒഴുകുന്നു. ഈ വൈദികരും കന്യാസ്ത്രികളും ലത്തീൻ രൂപതകളിൽ സേവനം  ചെയ്യാൻ പാടില്ല. കാരണം അവരും മാർതോമയുടെ പൈതൃകത്തിൽ ജീവിക്കണ്ടവരാണ്. സീറോ മലബാർ കുടുംബങ്ങൾ മാർതോമയുടെ പൈതൃകത്തിൽ ജീവിക്കണ്ടവരായതുകൊണ്ടാണല്ലോ കല്ല്യാണിലും ഫാരിദാബാദിലും അമേരിക്കയിലും ആസ്ത്രേലിയായിലും സീറോ മലബാർ രൂപതകൾ സ്ഥാപിച്ചത്. അപ്പോൾ വൈദികരും കന്യാസ്ത്രികളും ലത്തീൻ രൂപതകളിൽ ജോലി ചെയ്യുന്നത് ഒരു അപവാദമാണ്. സീറോ മലബാർ കുടുംബങ്ങളോടുള്ള വിവേചനമല്ലേ നാമിവിടെ കാണുന്നത്.

ലത്തീൻ സഭയിൽ പട്ടമേൽക്കുന്ന സീറോ മലബാറുകാരന് ലത്തീൻ പൈതൃകത്തിൽ ജീവിക്കാം. ഒരു അല്മായൻ നിർബന്ധമായും സീറോ മലബാർ പൈതൃകത്തിൽ ജീവിച്ചിരിക്കണം. എന്തൊരു വിരോധാഭാസം. ഇതെല്ലാം അല്മേനിയെ അടക്കിഭരിച്ചുവാഴാനുള്ള ചൊല്പ്പിടി വിദ്യകൾമാത്രം!
നമ്മുടെ വൈദികരും കന്യാസ്ത്രികളും ലത്തീൻ രൂപതകളിൽ ജോലി ചെയ്യുന്നതിനെ സീറോ മലബാർ മെത്രാൻ സിനഡ് അടിയന്തിരമായി നിർത്തൽ ചെയ്യണം.

റീത്ത് കയറ്റുമതി ശരിയല്ല. ഉദാഹരണത്തിന് അമേരിക്കയിലേക്ക് കുടിയേറിയ ഒരു കുടുംബമെടുക്കാം. ആ കുടുംബത്തിലെ അംഗങ്ങൾ കാലാന്തരത്തിൽ അമേരിക്കൻ പൌരന്മാരാകുന്നു.  അമേരിക്കയുടെ ഭാഷ, സംസ്ക്കാരം, സാമ്പത്തീകം, നിയമം, നികുതി, രാഷ്ട്രിയം, സാമൂഹികം എന്നുവേണ്ട എല്ലാ തുറകളിലും കുറെ വർഷങ്ങൾകൊണ്ട്  ആ കുടുംബം അലിഞ്ഞുചേരുന്നു. മക്കളുടെ കാലമാകുമ്പോഴേക്കും  അവർ കൂടുതൽ അമേരിക്കകാരാകുന്നു. നമുക്കാർക്കും പിടിച്ചുനിർത്താൻ സാധിക്കാത്ത ഒരു പരിണാമമാണത്. ഈ കുടുംബത്തിന് സീറോ മലബാർ റീത്തുമായി എന്ത് ബന്ധമാണുള്ളത്. ഒന്നാം തലമുറക്ക് അൽപ്പമൊക്കെ ബന്ധമുണ്ടെന്നിരുന്നാലും പിന്നീടുവരുന്ന തലമുറക്കാർ സീറോ മലബാർ എന്നുകേൾക്കുമ്പോൾ ചിരിക്കുകയേയുള്ളൂ. അവർ ഇംഗ്ലീഷ് പള്ളികളിൽ തുടരുകയെയുള്ളൂ. തന്നെയുമല്ല അവരുടെ മാതൃഭാഷയിലുള്ള  റീത്ത് ലത്തീൻ തന്നെ. ഏതാനും  കുറെ മെത്രാന്മാരെ സൃഷ്ടിക്കാനും കുറെ വൈദികരെ വിദേശത്തേയ്ക്ക് വിടാനും സഭയ്ക്ക്  സമ്പത്തും അധികാരവും വർദ്ധിപ്പിക്കാനും സധാരണ  വിശ്വാസികളുടെ ജീവിതം നരകതുല്ല്യമാക്കുവാനെ റീത്ത് കയറ്റുമതികൊണ്ട് സാധിക്കൂ. ഇതിൻറെ എല്ലാം ദുഷ്ഫലങ്ങൾ അനുഭവിക്കണ്ടത് അല്മേനികൾ. കത്തോലിക്കാ സഭ സാർവ്വത്രികമാണ്. അത് ലോകത്തിൻറെ എല്ലാ മുക്കിലും മൂലയിലും ഉണ്ട്. അതിൻറെ വിശ്വാസവും ഒന്നുതന്നെ. അപ്പോൾ അമേരിക്കയിലെ സഭയിൽ ചേരുന്നതല്ലേ അമേരിക്കൻ മലയാളി കുടുംബങ്ങൾക്ക് നല്ലത്? ല്ത്തീൻ പള്ളിയിൽ അംഗത്വമെടുത്ത് ആ ഇടവകക്കാരുമായി ഇടപഴകി കുട്ടികളെ ആ പള്ളിയിൽ വിട്ട് വേദപാഠം പഠിപ്പിച്ച് മുൻപോട്ട് പോകുന്നതാണ് ആ കുടുംബത്തിൻറെ ഭാവിക്ക് നല്ലത്.

ഇംഗ്ലീഷ് പള്ളികളിൽ പോയാൽ മാന്യമായ ഒരു ദിവ്യബലിയിൽ സംബന്ധിക്കാം. അവിടെ കുരിശിനെച്ചൊല്ലിയുള്ള വഴക്കില്ല. മദുബഹായുടെ മുൻപിൽ തുണി തൂക്കലില്ല. പള്ളിക്കകത്തിരിക്കുന്ന അല്മേനികളെ 'പേപ്പട്ടികൾ' എന്ന്  പള്ളിവികാരി തൻറെ പ്രസംഗത്തിൽ വിളിച്ചുപറഞ്ഞ് അധിക്ഷേപിക്കുകയില്ല. എന്തെങ്കിലും കാര്യസാധ്യത്തിനായി പള്ളിമുറിയിൽ ചെന്നാൽ കാര്യം മാന്യമായി നടത്തി തിരിച്ചുപോരാം. കല്യാണകുറിക്ക് കൈക്കൂലി കൊടുക്കേണ്ട. അതുകൊണ്ട് റീത്ത് ഇറക്കുമതി വിശ്വാസികൾ സർവ്വശക്തിയോടെ എതിർക്കണം.

പണ്ടുകാലത്ത് പാത്രിയാക്കീസുമാർ തമ്മിൽ അധികാരത്തിനായി വഴക്കുണ്ടാക്കി ഓരോരുത്തരും അവരവരുടെ സഭ ഉണ്ടാക്കി. പിന്നീട് ശക്തനായ റോമൻ  പാത്രിയാക്കിസിൻറെ കീഴിൽ  പല സഭകളായി. ഈ സഭകളിൽ അല്മേനികളെ തളച്ചിടാൻ ഇന്ന് പരിശ്രമിക്കുന്നു. അതിൻറെ പരിണത ഫലമാണ്   റീത്തു പരത്തലും ലത്തീൻ വിദ്വേഷവും.

സീറോ മലബാർ സഭയ്ക്ക് മാർതോമായുടെ പൈതൃകം ആണെന്നാണ് വെപ്പ്. മാർതോമ കേരളത്തിൽ വന്നു എന്നതിനുതന്നെ തെളിവില്ല. ഇത് ഒരു പ്രത്യേക സഭയാണങ്കിൽ അതിന് തനതായ ലിറ്റർജിയും ദൈവശാസ്ത്രവും പള്ളിഭരണസമ്പ്രദായവും ശിക്ഷണവും എല്ലാം ഉണ്ടായിരിക്കണം. ഇന്ന് സീറോ മലബാർ സഭയ്ക്ക് കൽദായ ലിറ്റർജിയും ലത്തീൻ ദൈവശാസ്ത്രവും പാശ്ചാത്യ പള്ളിഭരണസമ്പ്രദായവും കിഴക്കിൻറെ കാനോൻ നിയമവുമാണുള്ളത്. അപ്പോൾ ഈ സഭ ഒരു വ്യക്തിസഭയാണെന്ന് പറയുന്നതിൽ എന്തർത്ഥമാണുളളത്?

അമ്മയുടെ യോനിയാണ് ജാതി നിശ്ചയിക്കുന്നത് എന്നു കേട്ടിട്ടുണ്ട്. ഉത്ഭവപാപവും അതുപോലെയാണല്ലോ പിന്തുടരുന്നത്. സീറോ മലബാർ  റീത്തും നമ്മൾ ചന്ദ്രനിൽ പോയാലും അങ്ങനെ പിന്തുടരുമെന്നാണ് സഭയുടെ സിദ്ധാന്തം. ജാതി വ്യവസ്ഥ ഇന്നത്തെ സാമൂഹിക  ചുറ്റുപാടിൽ കാലഹരണപ്പെട്ട ഒന്നാണ്; അപലപനീയമാണ്. കത്തോലിക്കാ സഭയിലെ  റീത്തുവ്യവസ്ഥയും കാലഹരണപ്പെട്ട ഒന്നാണ്.

യേശുവിൻറെ അനുശാസനം നിങ്ങൾ പരസ്പരം സ്നേഹിക്കണമെന്നാണ് (യോഹ. 13: 34-35). മറിച്ച് നിങ്ങൾ റീത്തുകൾ  സൃഷ്ടിച്ച് ആ റീത്തിൽക്കൂടിയേ സ്വർഗ്ഗത്തിലേക്ക് പ്രവേശിക്കാവു എന്ന് യേശു പഠിപ്പിച്ചിട്ടില്ല. റീത്ത് വിഭജനം കത്തോലിക്ക സഭയിൽ ഇല്ലാതിരുന്നാൽ അതിൻറെ അടിസ്ഥാനത്തിലുള്ള പള്ളിവഴക്കുകളും വിദ്വേഷവും മത്സരവും ഇല്ലാതാകും. റീത്തിൻറെ പേരും പറഞ്ഞ് ആരും വിശ്വാസികളുടെ പുറകെ വരുകയുമില്ല.