Translate

Tuesday, August 22, 2017

ദളിത് ക്രൈസ്തവര്‍ക്കു നീതി ലഭ്യമാക്കുക മാര്‍ച്ചും ധര്‍ണയും വിജയിപ്പിക്കുക II


(തുടര്‍ച്ച) 

ജോര്‍ജ് മൂലേച്ചാലില്‍

(എഡിറ്റോറിയല്‍ സത്യജ്വാല ആഗസ്റ്റ് 2017)

പുതുതായി ക്രൈസ്തവരായ അധഃസ്ഥിതരോട് പ്രോട്ടസ്റ്റന്റ് മിഷനറിമാര്‍ പറഞ്ഞത്, 'ഇനിമുതല്‍ നിങ്ങള്‍ സ്വതന്ത്രരും തുല്യരുമാണ്' എന്നായിരുന്നെങ്കില്‍, നസ്രാണി കത്തോലിക്കാപുരോഹിതര്‍, 'നിങ്ങളുടെ ജാതി മറക്കരുത്' എന്ന് അവരോട് താക്കീതുചെയ്യുകയായിരുന്നു. അങ്ങനെ അതുവരെ നസ്രാണി കത്തോലിക്കാസഭയ്ക്കുള്ളില്‍ ഇല്ലാതിരുന്ന ജാതിവ്യവസ്ഥയെ അകത്തേക്കു കടത്തി പ്രതിഷ്ഠിക്കുകയാണ് പ്രേഷിതപ്രവര്‍ത്തനത്തിന്റെപേരില്‍ നമ്മുടെ സഭ ചെയ്തത്. മിഷനറിപ്രവര്‍ത്തനത്തില്‍ നമ്മുടെ സഭ ചെയ്ത ഈ ആദിപാപത്തെക്കുറിച്ച് പശ്ചാത്തപിക്കാനോ അതു തിരുത്താനോ നാം ഇന്നുവരെ തയ്യാറായിട്ടില്ല. മറിച്ച്, പുതുതായി സഭയിലേക്കു വന്നവരെ തരംതാഴ്ത്തി നിര്‍ത്താനും അവരെ ഉപയോഗിച്ച് ഭൗതികമായി തടിച്ചുകൊഴുക്കാനുമുള്ള സംഘടിതശ്രമങ്ങളിലാണ് എന്നും നമ്മുടെ സഭ. ആഢ്യക്രൈസ്തവരുടെ നേതൃത്വമുള്ള ഇന്ത്യയിലെ എല്ലാ സഭകളും ഈ സ്വാര്‍ത്ഥസമീപനമാണ് പുലര്‍ത്തുന്നത്.

ഇതിന്റെ ഭാഗമായാണ്, 1950 വരെ 'ഇന്ത്യന്‍ ക്രൈസ്തവര്‍' എന്നറിയപ്പെട്ടിരുന്നവരും പട്ടികജാതി വിഭാഗങ്ങളെന്ന നിലയില്‍ എല്ലാ പരിരക്ഷകളും സംവരണാവകാശങ്ങളും ലഭിച്ചുപോന്നിരുന്നവരുമായ ദളിത് ക്രൈസ്തവര്‍ക്ക് അതു നിഷേധിക്കുന്ന തരത്തില്‍, ക്രൈസ്തവസഭകളെ പ്രതിനിധീകരിച്ച് 1950-ലെ ഭരണഘടനാനിര്‍മ്മാണസഭയില്‍ പങ്കെടുത്ത ഡോ. എച്ച്.സി.മുഖര്‍ജി, ഫാ. ജറോം ഡിസൂസ, രാജ്കുമാരി അമൃത് കൗര്‍ എന്നീ ആഢ്യക്രൈസ്തവര്‍ നിലപാടു സ്വീകരിച്ചത്. ക്രിസ്തുമതത്തില്‍ ജാതിയില്ല എന്നും, അതിനാല്‍ ക്രൈസ്തവസമുദായത്തിലുള്ളവര്‍ക്ക് ജാതിയുടെ അടിസ്ഥാനത്തിലുള്ള സംവരണം ആവശ്യമില്ല എന്നുമാണ് ഇവര്‍ ശിപാര്‍ശ ചെയ്തത്. പകരം, ന്യൂനപക്ഷമായതിനാല്‍ തങ്ങളുടെ മതാടിസ്ഥാനത്തിലുള്ള സാംസ്‌കാരികത്തനിമ നിലനിര്‍ത്താനാവശ്യമായ വിദ്യാഭ്യാസാവകാശങ്ങള്‍ ജനസംഖ്യാനുപാതികമായി ലഭ്യമാക്കണം എന്നവര്‍ ആവശ്യപ്പെടുകയുംചെയ്തു. അതോടെ, 'ഇന്ത്യന്‍ ക്രൈസ്തവര്‍' എന്ന നിലയില്‍  ദളിത് ക്രൈസ്തവര്‍ക്കു കിട്ടിക്കൊണ്ടിരുന്ന എല്ലാ പരിരക്ഷകളും സംവരണാവകാശവും ഈ ജനതയ്ക്കു നഷ്ടമായി. പകരം, അവരുടെകൂടി എണ്ണത്തിന്റെ അടിസ്ഥാനത്തില്‍ മൊത്തം ക്രൈസ്തവസമുദായത്തിന് കൂടുതല്‍ വിദ്യാഭ്യാസസ്ഥാപനങ്ങള്‍ക്ക് അര്‍ഹതയുണ്ടാകുകയുംചെയ്തു. മൊത്തം ക്രൈസ്തവസമുദായത്തിനായി നല്‍കപ്പെട്ട ഈ ന്യൂനപക്ഷാവകാശം, നസ്രാണി പാരമ്പര്യം പറയുന്ന ആഢ്യക്രൈസ്തവര്‍ക്കുപോലും ലഭിക്കാത്തവിധത്തില്‍ ഒരു പുരോഹിതാവകാശമാക്കി മാറ്റപ്പെട്ട സാഹചര്യത്തില്‍, ദളിത് ക്രൈസ്തവര്‍ക്ക് അതില്‍നിന്നെന്തു കിട്ടാന്‍? അങ്ങനെ കക്ഷത്തിലുണ്ടായിരുന്നതും ഉത്തരത്തിലിരുന്നതും നഷ്ടപ്പെട്ട അവസ്ഥയിലാണിന്ന്, ദളിത് ക്രൈസ്തവസമൂഹം.

കത്തോലിക്കാപുരോഹിതനേതൃത്വം ദളിത് ക്രൈസ്തവസമൂഹത്തോടു തുടര്‍ന്നു കാണിച്ചതും ഇപ്പോഴും കാണിച്ചുകൊണ്ടിരിക്കുന്നതുമായ ഏറ്റവും ജുഗുപ്‌സാവഹമായ കാപട്യം, അവരെയെല്ലാം തങ്ങളുടെ പിന്നിലണിനിരത്തി സംവരണാവകാശത്തിനായി ഗവണ്‍മെന്റിനെതിരെ സമരം സംഘടിപ്പിച്ച് അവര്‍ക്കുവേണ്ടി മുതലക്കണ്ണീരൊഴുക്കുന്നു എന്നതാണ്. നീതിയെ കൊലചെയ്തിട്ട്, അതിന്റെ ആണ്ടുചാത്തമാഘോഷിക്കാനെന്നപോലെ, വര്‍ഷംതോറും 'നീതിയുടെ ഞായര്‍' ആചരിച്ച് തങ്ങളുടെ കാപട്യത്തെ ഒരനുഷ്ഠാനമാക്കി മാറ്റുകയും ചെയ്തിരിക്കുന്നു, അവര്‍. രൂപതകള്‍തോറും ദളിത് കത്തോലിക്കരുടേതായി 'ദളിത് കത്തോലിക്കാ മഹാജനസഭ' (DCMS) എന്ന സംഘടനയുണ്ടാക്കി അതിന്റെ ഡയറക്ടറായി ഏതെങ്കിലും ഒരച്ചനെ പ്രതിഷ്ഠിച്ച് അവരെ നിശ്ശബ്ദരാക്കുന്ന ക്രൂരതയും തുടരുകയാണ്.

സഭാധികൃതര്‍ ഈ ജനവിഭാഗത്തോടു ചെയ്ത തും ചെയ്തുകൊണ്ടിരിക്കുന്നതുമായ ഈ മഹാപാതകങ്ങളില്‍, ഇതെല്ലാം കണ്ടുകൊണ്ട് മിണ്ടാതിരിക്കുന്ന കേരളത്തിലെ നസ്രാണിസമൂഹമൊന്നാകെ പങ്കുകാരാണെന്ന വസ്തുതയും നാം തിരിച്ചറിയേണ്ടതുണ്ട്. പാലാക്കുന്നേല്‍ വല്യച്ചന്‍ മാമ്മോദീസാ മുക്കിയ ദളിതരെ പള്ളിയില്‍ കയറാന്‍ അനുവദിക്കാതെ ആഢ്യത്വമെന്ന സാമുദായിക അഹന്ത പ്രദര്‍ശിപ്പിച്ചവരാണ് നസ്രാണികളായ നാം എന്നോര്‍ക്കുക. അവര്‍ക്കു പള്ളിയായിട്ടുപയോഗിക്കുവാന്‍ വല്യച്ചന്‍തന്നെ പല സ്ഥലങ്ങളിലും, അവസാനം സ്വന്തം സ്ഥലത്തുതന്നെയും, കെട്ടിക്കൊടുത്ത കൊട്ടിലുകള്‍ പൊളിച്ചുകളയുകയും തീയിട്ടു നശിപ്പിക്കുകയും ചെയ്തവരാണു നാം. അതുകൊണ്ട്, അതേ ആഢ്യമനോഭാവത്തിന്റെ ചാലില്‍ ദളിത് കത്തോലിക്കര്‍ക്ക് അസ്പൃശ്യത കല്പിച്ചും അവരെ ചൂഷണംചെയ്തുമുള്ള ഇന്നത്തെ സഭാധികൃതരുടെ തെറ്റായ നീക്കങ്ങള്‍ക്കുപിന്നില്‍ നമ്മിലെല്ലാമുള്ള ഈ അക്രൈസ്തവപാരമ്പര്യഘടകങ്ങളാണു പ്രവര്‍ത്തിക്കുന്നത് എന്നും കാണേണ്ടിയിരിക്കുന്നു.

കഴിഞ്ഞ 160 വര്‍ഷമായി ദശലക്ഷക്കണക്കായ ദളിത്കത്തോലിക്കരുടെ വിലപ്പെട്ട ജീവിതങ്ങള്‍ ചവിട്ടിയരയ്ക്കപ്പെടാനിടയാക്കിയ അഢ്യത്വബോധമെന്ന അല്പത്വത്തെ സാമാന്യബുദ്ധിയും ഹൃദയവുമുള്ള കത്തോലിക്കര്‍ ഇനിയെങ്കിലും മനസ്സുകളില്‍നിന്ന് തൂത്തെറിഞ്ഞേ മതിയാകൂ. അവര്‍ക്കും അവരുടെകൂടി പിതാവായ ദൈവത്തിനുമെതിരെ ഇക്കാലമത്രയും ചെയ്തുകൂട്ടിയ മഹാപാതകങ്ങളെയോര്‍ത്ത് നാം അനുതപിച്ചേ മതിയാകൂ. നമ്മളും നമ്മുടെ പുരോഹിതരുംചേര്‍ന്നു സംഘടിതമായി തകര്‍ത്തെറിഞ്ഞ ദളിത് ക്രൈസ്തവരുടെ ജീവിതങ്ങളെ ആ തകര്‍ച്ചയില്‍നിന്ന് എങ്ങനെ കരകയറ്റാനാകുമെന്ന് ഇനിയെങ്കിലും അവര്‍ക്കൊപ്പംനിന്ന് ആലോചിക്കുവാനും അതിനുവേണ്ടി കര്‍മ്മനിരതരാകുവാനും തയ്യാറായേ പറ്റൂ. ഈ ഉത്തരവാദിത്വം സാമുദായികമായി ഏറ്റെടുത്തുകൊണ്ടു മാത്രമേ, നമ്മുടെയെല്ലാം ശിരസ്സുകളില്‍ വന്നുപതിച്ച് അടിഞ്ഞുകിടക്കുന്ന പാപഭാരത്തിനു പരിഹാരംചെയ്യാന്‍ ഇവിടുത്തെ നസ്രാണിസമൂഹത്തിനാവൂ. നമ്മുടെ അഹന്തയ്ക്ക് ആഭരണമായി പള്ളികളിലുണ്ടാക്കിവച്ചിരിക്കുന്ന പൊന്‍-വെള്ളിക്കുരിശുകള്‍ വിറ്റും ദളിത് കത്തോലിക്കരുടെ ജീവിതങ്ങള്‍ നാം പടുത്തയര്‍ത്തേണ്ടതുണ്ട്. നമ്മുടെ രൂപതകള്‍ വക ഷോപ്പിംഗ് കോംപ്ലക്‌സുകളില്‍നിന്നും എസ്റ്റേറ്റുകളില്‍നിന്നുമെല്ലാമുള്ള ശതകോടിക്കണക്കായ രൂപയുടെ വരുമാനം ദളിത് കത്തോലിക്കരുടെ സര്‍വ്വോന്മുഖമായ അഭിവൃദ്ധിക്കുവേണ്ടി ഉപയോഗിക്കേണ്ടതാണെന്ന ചിന്ത കേരളകത്തോലിക്കാസമൂഹത്തില്‍ ഉയര്‍ന്നുവരേണ്ടിയിരിക്കുന്നു. നോക്കൂകൂലിയെന്നപോലെ, ഇടവകകളില്‍നിന്ന് 10-ഉം 12-ഉം ശതമാനം വരുമാനവിഹിതം അരമനയ്ക്കു 'കപ്പം' കൊടുക്കുന്ന ഏര്‍പ്പാടു നിര്‍ത്തലാക്കി, ആ തുക ഓരോ ഇടവകയിലെയും ദളിത് കത്തോലിക്കരുടെ ഉന്നമനത്തിനായി ഉപയോഗിക്കേണ്ടതിനെക്കുറിച്ച് ഇടവകതലങ്ങളിലും ചിന്തിക്കേണ്ടിയിരിക്കുന്നു. അവരുടെകൂടി എണ്ണംപറഞ്ഞ് നാം നേടിയ അനവധിയായ വിദ്യാഭ്യാസസ്ഥാപനങ്ങള്‍ അവരുടേതുകൂടിയാണെന്നംഗീകരിച്ചുകൊണ്ട്, അവരുടെ കുട്ടികള്‍ക്ക് സൗജന്യവിദ്യാഭ്യാസം നല്‍കാനും അവരില്‍ നിശ്ചിതയോഗ്യത നേടിയവര്‍ക്കെല്ലാം അവിടെ ജോലി നല്‍കാനുമുള്ള സാമൂഹിക-സാംസ്‌കാരികാന്തരീക്ഷം രൂപപ്പെടുത്തുകയെന്നതും നമ്മുടെ കടമയായി നാമെടുക്കേണ്ടതുണ്ട്.

ദളിത് കത്തോലിക്കരുടെ വിഷയത്തില്‍ ഏതാണ്ട് സമാനമായൊരു വീക്ഷണം സി.ബി.സി.ഐ.തന്നെ അടുത്തകാലത്തു പ്രകടിപ്പിക്കുകയുണ്ടായി. കത്തോലിക്കാസഭയ്ക്കുള്ളിലുള്ള ദളിത് വിവേചനത്തെയും അവകാശനിഷേധങ്ങളെയും പാപമായിക്കണ്ട് ആത്മപരിശോധനയ്ക്കും തിരുത്തലിനും സഭ തയ്യാറാകാന്‍ പോകുന്നു എന്നാണ് സി.ബി.സി.ഐ. അദ്ധ്യക്ഷന്‍ കര്‍ദ്ദിനാള്‍ ബസേലിയോസ് ക്ലീമിസ് കാതോലിക്കാ ബാവാ 2016 ഡിസംബര്‍ 14-ാം തീയതി പ്രസ്താവിച്ചത്. സഭ അവരോട് നീതി കാണിച്ചില്ല എന്നേറ്റുപറഞ്ഞ അദ്ദേഹം അതിനുള്ള പരിഹാരമായി ഒട്ടുവളരെ നടപടികള്‍ പ്രഖ്യാപിക്കുകയും ചെയ്തിരുന്നു. എന്നാല്‍, അതിനുശേഷം 8 മാസം കടന്നുപോയിട്ടും അതുസംബന്ധിച്ച് ഒരു നടപടിയും ഉണ്ടാകാത്ത സാഹചര്യത്തില്‍ അതും മുമ്പു നടത്തിയിട്ടുള്ളതുപോലുള്ള ഒരു ചതി പ്രസ്താവനയായിരുന്നുവോ എന്നു സംശയിക്കണം. മുമ്പുനടത്തിയ ചതിപ്രസ്താവനകളില്‍ പ്രധാനം, 1995-ല്‍ KCBC-യും CBCI-യും നടത്തിയവയാണ്. സഭയില്‍ ദളിത് കത്തോലിക്കരുടെ 30% പങ്കാളിത്തവും അവര്‍ക്ക് സഭാസ്ഥാപനങ്ങളില്‍ 30% സംവരണവുമാണ് അന്ന് KCBC-യും  CBCI-യും വാഗ്ദാനംചെയ്തിരുന്നത്.

ദളിത് കത്തോലിക്കര്‍ ഒത്തിരി കാര്യങ്ങളൊന്നും ഇപ്പോള്‍ ആവശ്യപ്പെടുന്നില്ല. KCBC- 1995-ലും CBCI 1996-ലും 2016-ലും സ്വമേധയാ പ്രഖ്യാപിച്ചിട്ടുള്ള വാഗ്ദാനങ്ങള്‍ ഇനിയും വച്ചുതാമസിപ്പിക്കാതെ ഉടന്‍ പ്രാബല്യത്തില്‍ കൊണ്ടുവരണമെന്നുമാത്രമാണ് ദളിത് ക്രൈസ്തവരെ പ്രതിനിധീകരിച്ച് DCFI (Dalit Christian Federation of India) ആവശ്യപ്പെടുന്നത്. ഈ ആവശ്യം തികച്ചും നീതിയുക്തമാണെന്നു കണ്ടതുകൊണ്ടാണ്, KCRMഉം JCC-യുമുള്‍പ്പെടെയുള്ള മറ്റ് 6 സ്വതന്ത്രഅത്മായപ്രസ്ഥാനങ്ങള്‍ DCFI-യോടു കൈകോര്‍ത്തതും സംയുക്തസമരസമിതിയുണ്ടാക്കി സമരപ്രഖ്യാപനം നടത്തിയതും.

അതിന്‍പ്രകാരം, ഈ മാസം (ആഗസ്റ്റ്) 31-ാം തീയതി വ്യാഴാഴ്ച, ഇആഇക അദ്ധ്യക്ഷന്‍ കര്‍ദ്ദിനാള്‍ മാര്‍ ബസേലിയോസ് ക്ലീമീസ് കാതോലിക്കാ ബാവായുടെ തിരുവനന്തപുരത്തുള്ള അരമനയിലേക്കു മാര്‍ച്ചുനടത്താനും, തുടര്‍ന്ന് അരമനപ്പടിക്കല്‍ ധര്‍ണയിരിക്കാനും തീരുമാനിച്ചിരിക്കുകയാണ് (വിശദവിവരങ്ങള്‍ക്ക് 5-ാം പേജില്‍ ജോസഫ് പനമൂടന്‍ എഴുതിയ ലേഖനം കാണുക). ഈ നീതിസമരം വിജയിക്കേണ്ടത് ദളിത് കത്തോലിക്കരുടെ മാത്രമല്ല, കേരളത്തിലെ മുഴുവന്‍ കത്തോലിക്കരുടെയും ഇവിടുത്തെ കത്തോലിക്കാസഭയുടെതന്നെയും ആവശ്യമാണ്. കാരണം, സഭാഗാത്രത്തില്‍ ഒരവയവമെങ്കിലും ശോഷിച്ചിരിക്കുന്നത് സഭയ്ക്കാകെ ക്ഷീണവും അവലക്ഷണവുമാണ്. അതുകൊണ്ട്, ക്രൈസ്തവധാര്‍മ്മികതയും നീതിബോധവുമുള്ള എല്ലാ ക്രൈസ്തവരോടും, സഭാവ്യത്യാസങ്ങളോ റീത്തുഭേദമോ വിചാരിക്കാതെ, ഈ മഹാസംരംഭത്തില്‍ പങ്കാളിത്തം വഹിക്കണമെന്ന് അഭ്യര്‍ത്ഥിക്കുന്നു. കേരളസഭയെ ജാതിഭേദമില്ലാത്ത ഒരു മാതൃകാസഭയാക്കാന്‍ ഈ സമരം നിമിത്തമാകട്ടെ!
NB
കത്തോലിക്കാസഭയുടെ ദളിത് ക്രൈസ്തവചൂഷണത്തിനെതിരെ ആഗസ്റ്റ് 31-നു നടത്തുന്ന മാര്‍ച്ചിനും ധര്‍ണയ്ക്കും മുമ്പേ വ്യാപകമായി പ്രചരിപ്പിക്കേണ്ട സത്യജ്വാലാ ലേഖനങ്ങള്‍ ഫേസ്ബുക്കിലെ ഗ്രൂപ്പുകളിലൂടെ പ്രചരിപ്പിക്കാന്‍ സഹകരിക്കുക. എഡിറ്റോറിയല്‍ വളരെ ദീര്‍ഘമായതിനാല്‍ ബ്ലോഗില്‍ പ്രസിദ്ധീകരിക്കുന്നതുതന്നെ രണ്ടു ഭാഗമായാണ്.

Monday, August 21, 2017

ക്രിസ്തീയപൗരോഹിത്യം ശരശയ്യയിൽ

ഭീഷ്മപിതാമഹനും ക്രിസ്തീയപൗരോഹിത്യവും ശരശയ്യയിൽ !
['ക്രിസ്തീയത' അമ്പേ നഷ്ടപ്പെട്ട ഇന്നിന്റെ പൗരോഹിത്യത്തെ ''ക്രിസ്തീയ പൗരോഹിത്യം'' എന്ന് വിളിച്ചതിൽ.... ക്രിസ്തുവേ, മാപ്പു!]

കൗരവരുടെ ,വിശിഷ്യാ ദുര്യോധനന്റെ നീചഭാവത്തെ നീചമെന്നറിഞ്ഞുകൊണ്ടുതന്നെ വയറ്റിപാടിനുവേണ്ടി ആ പക്ഷത്തു നിന്നുകൊണ്ട് ധർമ്മത്തെ നിഗ്രഹിക്കുവാൻ പാണ്ഡവരോട് കുരുക്ഷേത്ര യുദ്ധം നയിച്ച പടനായകൻ ഭീഷ്മാചാര്യരെ, ശരശയ്യയിൽ കിടന്നുകൊണ്ടുതന്നെ യുധീഷ്ഠിതനോട്  എത്ര ''സഹസ്രനാമം'' ജപിച്ചാലും, കാലം നീചനായെ കാണുകയുള്ളൂ! സഹോദരിതുല്യയായ പാഞ്ചാലിയുടെ വസ്ത്രാക്ഷേപം ചെയ്യുന്ന ദുശാസനനോട്, അരുതുകാട്ടാള // ''മാനിഷാദാ '' എന്ന് ഒരുവട്ടം ഉരിയാടാൻ കഴിയാതെ മൗനമായി അധർമ്മത്തിന് കൂട്ടുനിന്ന ആ നാവുകൊണ്ട് മരണം വരിക്കുംമുമ്പേ ഒരു പ്രായശ്ചിത്തമെന്നോണം ''സഹസ്രനാമം'' ജപിച്ചതുമാകാം ആ പുണ്യമാനസം! എന്തുമാകട്ടെ, ഒരുമനസാക്ഷിക്കുത്തുമില്ലാതെ വയറ്റിപ്പാടിന് വേണ്ടി ഇന്നും  അധർമ്മം കൈമുതലായ ക്രിസ്തീയ സഭകളിൽ  ളോഹാധാരികളായി, തങ്ങൾക്കുപോലും വിശ്വാസമില്ലാത്ത കൂദാശക്കച്ചവടം നടത്തുന്ന നാറുന്ന പുരോഹിതരെ, നിങ്ങൾക്കുമുണ്ടോ ഒടുവിലൊരു കുറ്റബോധവും സഹസ്രനാമജപവും ?! കുരിശിലെ തന്റെ വലതുഭാഗത്തെ കള്ളനെന്നപ്പോലെ ക്രിസ്തു നിങ്ങൾക്കും മാപ്പുതരുമോ അവസാന കുമ്പസാരം മൂലം ? മരണം കള്ളനെപ്പോലെ വരുമെന്നതിനാൽ വേഗം മാനസാന്തരപ്പെടുവിൻ //ളോഹകൂടും അതിലെ 'മണവാട്ടിഭോജനവും' വെടിഞ്ഞോടുവീൻ..അല്ലാഞ്ഞാൽ സോദോമ്യരെ കൈകാര്യം ചെയ്തവൻ കുരിശിൽ മരിച്ചിട്ടില്ല എന്നും ഓർത്തുകൊള്ളുവീൻ ..samuelkoodal    

Sunday, August 20, 2017

കുടുംബവാര്‍ഷിക കുര്‍ബാനയ്ക്ക് സ്‌ത്രോത്രകാഴ്ചയായി ലഭിക്കുന്ന പണം പോലും പള്ളി ചെലവിനെന്ന് ???



പി.സി റോക്കി മൊ: 9961217493


            കേരളത്തിലെ കത്തോലിക്ക പള്ളി ഇടവകകളിലെല്ലാം തന്നെ കുടുംബയൂണിറ്റുകള്‍ മാസംതോറും കൂടുക പതിവാണ്. ഇരുപതോ അതിലധികമോ കുടുംബങ്ങള്‍ ഉള്‍പ്പെടുന്നതാണ് ഓരോ കുടുംബയൂണിറ്റും. ഇടവകാംഗങ്ങള്‍ കൂടുതല്‍ ഉള്ളയിടത്ത് അവയെ ഇരുപത്തഞ്ചോ അതിലധികമോ യൂണിറ്റുകളാക്കി തിരിക്കുന്നു. ഓരോ യൂണിറ്റും ഓരോ പുണ്യവാന്റെയോ, പുണ്യവതിയുടെയോ പേരിലായിരിക്കും ചേരുക. യൂണിറ്റ് യോഗത്തില്‍ തന്റെ വീട്ടില്‍ വച്ച് നടത്തിക്കൊള്ളാമെന്ന് സമ്മതിക്കുന്ന ആളുടെ വീട്ടില്‍ വച്ച് കുടുംബയോഗം നടത്തുന്നു. വര്‍ഷത്തില്‍ ഒരിക്കല്‍ പോലും കൂടാതിരിക്കുന്ന വീടുകളുടെ  ലിസ്റ്റ് നറുക്കിട്ടെടുത്ത് ആ വീട്ടിലും യോഗം കൂടാറുണ്ട്. ഇതില്‍ ഇടവക വികാരിയോ കന്യാസ്ത്രീ മഠത്തിലെ സിസ്റ്ററോ വിശിഷ്ടാതിഥിയായിരിക്കും. കൂടാതെ വൈദികപഠനം ഇടയ്ക്ക് വച്ച് ഉപേക്ഷിച്ചവരോ, വേദോപദേശ ടീച്ചര്‍മാരോ സര്‍ക്കാര്‍ സര്‍വ്വീസില്‍ നിന്നും പെന്‍ഷന്‍ പറ്റി പിരിഞ്ഞവരോ പ്രത്യേകം ക്ഷണിതാക്കളായി പങ്കെടുക്കാറുണ്ട്. 

            കുടുംബയൂണിറ്റുകള്‍ കൂടുന്നതിന്റെ ഉദ്ദേശലക്ഷ്യം കുടുംബാംഗങ്ങള്‍ തമ്മിലുള്ള സ്വരചേര്‍ച്ചയില്ലായ്മ, ബന്ധുമിത്രാദികളും അയല്‍ക്കാരും മറ്റും തമ്മിലുള്ള രമ്യതയില്ലായ്മ, അതിര്‍ത്തി തര്‍ക്കം മുതലായവ പരിഹരിക്കുതിനും മറ്റുമാണ് എന്നാണ് അറിയുന്നത്. ബൈബിളിനെ പറ്റിയുള്ള പഠനചര്‍ച്ചകള്‍ക്കും കുടുംബയൂണിറ്റ് വേദിയാകാറുണ്ട്.

            എന്നാല്‍ ഇന്നിത് വിവിധ കലാപരിപാടികളായ ഡാന്‍സ്, നാടകം, മാര്‍ഗ്ഗംകളി ഇങ്ങനെ വേണ്ടതും വേണ്ടാത്തതുമായ പല പല മത്സരങ്ങളുടെയും വേദിയായി മാറിയിരിക്കയാണെന്ന് ആക്ഷേപമുയരുന്നു. കുടംബയൂണിറ്റ് ആരംഭിച്ച കാലത്ത് കടുംചായയും, ബിസ്‌ക്കറ്റും നല്‍കിയിരുന്നിടത്ത് ഇന്ന് മത്സരബുദ്ധിയോടെ മട്ടന്‍, ചിക്കന്‍ ബിരിയാണി വരെ വിളമ്പുന്ന രീതിയുണ്ടത്രേ. എത്ര ദരിദ്രകുടുംബമായാല്‍ പോലും  കുടുംബയൂണിറ്റ് യോഗം നടത്തുന്നതിന് മൂവായിരമോ അതിലധികമോ തുക പാവപ്പെട്ട കുഞ്ഞാടുകള്‍ ചിലവാക്കേണ്ടി വരുന്നു.

            ഒരു വര്‍ഷം പിന്നിടുമ്പോള്‍ കുടുംബവാര്‍ഷികമെന്ന പേരില്‍ ഒരു കുടുംബത്തില്‍ നിന്നും 500 രൂപ മുതല്‍ 1000 രൂപ വരെ പിരിച്ചെടുത്ത് മാസങ്ങളുടെ തയ്യാറെടുപ്പുകളോടെയും പരിശീലനങ്ങളോടെയും വടംവലി, നാടകം, മാര്‍ഗ്ഗംകളി ഇവ നടത്തപ്പെടുന്നു.  മത്സരവിജയികള്‍ക്ക് ഒന്നാം സമ്മാനത്തിന്റെ തുക ലാഭിക്കാന്‍ ചിലവു കുറഞ്ഞ വെറും മെഡലുകള്‍ നല്‍കുന്നു. ബാക്കി വരുന്ന തുക എവിടെപ്പോകുന്നു ??.

            കുടുംബവാര്‍ഷിക യോഗത്തില്‍ ദിവ്യബലി അര്‍പ്പിക്കുന്നതിനിടെ ബലിയുടെ കാഴ്ചസമര്‍പ്പണം എന്ന പേരില്‍ ഓരോ കുടുബാംഗങ്ങളും സ്‌തോത്രകാഴ്ച നല്‍കണമെന്ന് അനുശാസിക്കുന്നതായി അറിയുന്നു. മുമ്പ് സ്‌ത്രോത്രകാഴ്ചകളായി സ്‌ക്കൂള്‍ ബാഗുകള്‍, ബുക്കുകള്‍, കുട ഇവയാണ്  നല്‍കിയിരുന്നത്. എന്നാല്‍ എറണാകുളം അതിരുപത പെരുമ്പാവൂര്‍ മണ്ഡലം വല്ലം ഫൊറോനയുടെ കീഴിലുള്ള ചേരാനല്ലൂര്‍ സെന്റ് സേവ്യേഴ്‌സ് പള്ളിയില്‍ പുതിയ വികാരി ചാര്‍ജെടുത്തതോടെ മുന്‍പറഞ്ഞ സിസ്റ്റത്തിന് മാറ്റം വരുത്തിയിരിക്കുകയാണെന്ന് ഈ ഇടവകയിലും പരിസര ഇടവകകളിലും ആക്ഷേപം ഉയര്‍ന്നുകൊണ്ടിരിക്കുകയാണ്.

            മാറ്റം ഇങ്ങനെയാണ്. വിശ്വാസികള്‍ നല്‍കുന്ന സ്‌തോത്ര കാഴ്ച വികാരി സൗജന്യമായി  നല്‍കുന്ന കാലി കവറില്‍ 100 രൂപയുടെയോ അതിലധികമോ തുക ഇട്ട് നല്‍കണമെന്നാണ് അറിയിച്ചിരിക്കുന്നത്. ഇങ്ങനെ കിട്ടുന്ന തുക പള്ളിച്ചെലവിനായി ഉപയോഗിക്കാനാണത്രേ. ബഹുമാനപ്പെട്ട കെ.സി.ബി.സി ഇത് അറിയുന്നുണ്ടോ.

            പെരിയാറിന്റെ തീരത്ത് അഞ്ച് ഏക്കറോളം വിസ്തൃതിയുള്ള ഭൂമിയില്‍ ലക്ഷങ്ങള്‍ വരുമാനമുള്ള ജാതിതോട്ടം, വാഴ, തെങ്ങ്, വൃക്ഷത്തോട്ടം എന്നിവ ചേരാനല്ലൂര്‍ സെന്റ്. സേവ്യഴ്‌സ് പള്ളിക്കുണ്ട്. ഇടവകാംഗങ്ങള്‍ പിരിവെടുത്തും ശ്രമദാനം നടത്തിയും നിര്‍മ്മിച്ച വന്‍ പാരീഷ്‌ഹോളും സ്വന്തമായുണ്ട്.  പതിനായിരം രൂപ വീതം നാനാജാതി മതസ്ഥര്‍ ഉള്‍പ്പെടെയുള്ളവര്‍ നടത്തുന്ന ഒരു സദ്യയ്ക്ക് ഹാള്‍ വാടകയായി രസീത് നല്‍കാതെ ഈടാക്കുന്നതായും അറിയുന്നു. ആഴ്ചയില്‍ മൂന്നും നാലും പരിപാടികള്‍ ഇവിടെ നടക്കാറുണ്ട്.  ഈ ഹാളിനോട് ചേര്‍ന്ന് തന്നെ ഒരു മിനി പാരീഷ്‌ഹോളുമുണ്ട്. 3000 രൂപയാണത്രേ ഇതിന്റെ വാടക. ഇവിടെയും സ്ഥിരം പരിപാടികളുണ്ട്. ഏഴ് കുരിശടിപ്പള്ളികളില്‍ നിന്നും നേര്‍ച്ചയായി വന്‍തുക ഒന്നോ രണ്ടോ മാസത്തിലൊരിക്കല്‍ ലഭിക്കുന്നുണ്ടത്രേ.

            കൂടാതെ ഞായറാഴ്ചയിലെ രണ്ട് കുര്‍ബാനകളിലുമായി സ്‌തോത്രകാഴ്ച പതിനായിരം രൂപയോളം  ഒരാഴ്ചയില്‍ ലഭിക്കുമത്രേ. ഒരു മാസത്തെ തുക നമുക്ക് ചിന്തിക്കാവുന്നതേയുള്ളൂ. ഞായറാഴ്ച കുര്‍ബാനയിലെ സ്‌തോത്ര കാഴ്ചയുടെ തുക കണക്ക് പള്ളി വാര്‍ഷിക പൊതുയോഗത്തില്‍ വായിക്കാറില്ലെന്നാണ് വിശ്വാസികള്‍ പരാതിപ്പെടുന്നത്.  കണക്ക് രേഖപ്പെടുത്തിയാല്‍ ഇതിന്റെ ദശാംശം അരമനയില്‍ കൊടുക്കേണ്ടി വരും എന്നതിനാലാണത്രേ ഇത് വായിക്കാത്തതെന്നും കേള്‍ക്കുന്നു.കെ.സി.ബി.സി യുടെ അറിവോടെയാണോ ഇത്തരം കാര്യങ്ങള്‍ നടക്കുന്നതെന്ന് അറിയുവാന്‍ വിശ്വാസികള്‍ ആഗ്രഹിക്കുന്നു.

            അത്യാസന്ന രോഗികളുടെ മാരക രോഗങ്ങള്‍ക്കുള്ള മരുന്നിന് സര്‍ക്കാര്‍ ജി.എസ്.ടിയും സി.ഇ. എസ്.ടി.യും ഈടാക്കുമ്പോള്‍ കോടികള്‍ വരുമാനമുള്ള കത്തോലിക്കാ പള്ളികളുടെ പാരീഷ്‌ഹോളുകള്‍ക്ക് ജി.എസ്.ടിയും, സി.ഇ.എസ്.ടിയും ഈടാക്കാറുണ്ടോ???

Saturday, August 19, 2017

ദളിത് ക്രൈസ്തവര്‍ക്കു നീതി ലഭ്യമാക്കുക മാര്‍ച്ചും ധര്‍ണയും വിജയിപ്പിക്കുക I

ജോര്‍ജ് മൂലേച്ചാലില്‍

(എഡിറ്റോറിയല്‍ സത്യജ്വാല ആഗസ്റ്റ് 2017)

പൗലോസ് റോമാക്കാര്‍ക്കെഴുതി: ''നീ യഹൂദന്‍ എന്നു സ്വയം വിളിക്കുന്നു; നീ നിയമത്തില്‍ അഭയംതേടുന്നു; ദൈവത്തെച്ചൊല്ലി നീ വീമ്പിളക്കുന്നു... വിശുദ്ധ ലിഖിതത്തില്‍ കാണുന്നതുപോലെ, 'നിങ്ങള്‍ നിമിത്തം വിജാതീയരുടെ ഇടയില്‍ ദൈവനാമം അവമതിക്കപ്പെടുന്നു.... യഹൂദരായ നമുക്ക് എന്തെങ്കിലും മേന്മയുണ്ടോ? ഇല്ല, ഒട്ടുമില്ല'' (റോമാ. 1:17, 24, 3:9). ഒരു യഹൂദനായിരുന്ന പൗലോസ് ശ്ലീഹാ സ്വന്തം ജനം പുലര്‍ത്തിയിരുന്ന സാമുദായിക അഹന്തയെ ചൂണ്ടിക്കാണിക്കാനും പുതുതായി സഭയിലേക്കു വരുന്നവരെ വംശമഹിമ നോക്കാതെ ഉള്‍ക്കൊള്ളാന്‍ പാകത്തില്‍ മനോഭാവം തിരുത്തിക്കാനുമായിരുന്നു ഇങ്ങനെ എഴുതിയത്. ഗലാത്തിയാക്കാര്‍ക്കുള്ള ലേഖനത്തില്‍ അദ്ദേഹം ഇങ്ങനെയും എഴുതി: ''ക്രിസ്തുവില്‍ സ്‌നാപനമേറ്റ് നിങ്ങളെല്ലാവരും ക്രിസ്തുവിനെ ധരിച്ചിരിക്കുന്നു. യഹൂദനെന്നോ ഗ്രീക്കുകാരനെന്നോ, അടിമയെന്നോ സ്വതന്ത്രനെന്നോ, സ്ത്രീയെന്നോ പുരുഷനെന്നോ ഭേദമില്ല; നിങ്ങളെല്ലാവരും ക്രിസ്തുവില്‍ ഒന്നാണ്'' (ഗലാ. 3:27-28).

തോമ്മാശ്ലീഹാ മാമ്മോദീസാമുക്കിയ നമ്പൂതിരിമാരുടെ പൈതൃകം പറഞ്ഞ് അഹങ്കരിക്കുന്ന കേരളനസ്രാണികള്‍ക്കും പൗലോസ് ശ്ലീഹായുടെ ഈ ഉപദേശം ബാധകമാണ്. 8-ാം നൂറ്റാണ്ടില്‍മാത്രമാണ് കേരളത്തില്‍ നമ്പൂതിരിമാര്‍ ഉണ്ടായത് എന്നതില്‍നിന്നുതന്നെ ഈ സാമുദായികാഹന്തയുടെ അടിത്തറ പൊളിയുന്നുണ്ട്. എങ്കിലും, തങ്ങളുടെ ആഢ്യമനോഭാവത്തില്‍ നസ്രാണിസമൂഹം മാറ്റമൊന്നും വരുത്തിയിട്ടുള്ളതായി കാണുന്നില്ല. അതുകൊണ്ടുതന്നെ, പിന്നോക്കജാതിക്കാര്‍ എന്നു പറയപ്പെടുന്നവരില്‍നിന്ന് ആരെയും തങ്ങളുള്‍പ്പെട്ട കത്തോലിക്കാസഭയില്‍ പ്രവേശിപ്പിക്കാന്‍ നസ്രാണികള്‍ തയ്യാറായിരുന്നുമില്ല. 19-ാം നൂറ്റാണ്ടിന്റെ തുടക്കത്തില്‍, പ്രോട്ടസ്റ്റന്റ് മിഷനറിമാരുടെ മതപരിവര്‍ത്തനപ്രവര്‍ത്തനങ്ങള്‍ ഊര്‍ജ്ജിതമാകുന്നതും അധഃസ്ഥിതജനവിഭാഗം എല്‍.എം.എസ് (London Missionary Society) സി.എം.എസ് (Church Mission Society) സഭകളിലേക്കു കൂട്ടത്തോടെ ചേക്കേറുന്നതും കണ്ടപ്പോള്‍മാത്രമാണ്, കേരളത്തില്‍ തങ്ങള്‍ പിന്തള്ളപ്പെട്ടുപോകുമോ എന്ന ആശങ്കമൂലം, പിന്നോക്കജാതി വിഭാഗങ്ങളില്‍ നിന്നുള്ളവരെ മാമ്മോദീസാമുക്കാന്‍ കത്തോലിക്കാസഭ തുടങ്ങിയത്. പക്ഷേ, എല്‍.എം.എസ്-സി.എം.എസ്. മിഷനറിമാരുടേതില്‍നിന്നു തികച്ചും വ്യത്യസ്തമായ ലക്ഷ്യത്തോടെയായിരുന്നു, ഇവിടുത്തെ കത്തോലിക്കാസഭ അന്നത്തെ അധഃസ്ഥിതജനവിഭാഗങ്ങള്‍ക്കു മാമ്മോദീസ നല്‍കാന്‍ തയ്യാറായതെന്ന്, അക്കാലത്തെ ചരിത്രം പരിശോധിച്ചാല്‍ കാണാവുന്നതാണ്.

കേരളത്തിലെ ക്രൈസ്തവദളിതരുടെ ആദിപിതാവ്, പറയവിഭാഗത്തില്‍നിന്ന് 1806-ല്‍ ക്രിസ്തുമതത്തിലേക്കുവന്ന മഹാരാശന്‍ എന്നയാളാണ്. എല്‍.എം.എസ്. മിഷനറിമാരുടെ പ്രവര്‍ത്തനഫലമായി വേദമാണിക്യം എന്ന പേരു സ്വീകരിച്ച് അദ്ദേഹം മതം മാറുകയായിരുന്നു. പറയവിഭാഗത്തിലും ചാന്നാര്‍ വിഭാഗത്തിലും പ്രവര്‍ത്തിച്ച ഈ മിഷനറിമാര്‍ അവരെ വെറുതെ മതംമാറ്റുക മാത്രമല്ല ചെയ്തത്; അവരില്‍ അഭിമാനബോധവും, സമത്വത്തിലും സ്വാതന്ത്ര്യത്തിലും സാഹോദര്യത്തിലും അടിത്തറയിട്ട ഒരു മൂല്യബോധവും ഉണര്‍ത്തുകകൂടി ചെയ്തു. അന്നുവരെ മാറുമറയ്ക്കാന്‍ അനുവാദമില്ലാതിരുന്ന ചാന്നാര്‍ യുവതികള്‍ മാറുമറയ്ക്കാന്‍ ധൈര്യപ്പെട്ടതും, ചാന്നാര്‍ ലഹള എന്നറിയപ്പെടുന്ന ഒരു വിപ്ലവത്തിനു കാരണമായതും ഈ മതംമാറ്റമായിരുന്നു. 1822 മുതല്‍ 1859 വരെ നീണ്ടുനിന്ന ഈ സാംസ്‌കാരികവിപ്ലവത്തിന്റെ ഫലമായാണ്, സ്വതന്ത്രമായി വസ്ത്രം ധരിക്കുവാനുള്ള അവകാശം എല്ലാ അധഃസ്ഥിത വിഭാഗങ്ങളിലുംപെട്ട ഇവിടുത്തെ മുഴുവന്‍ സ്ത്രീകള്‍ക്കും ലഭിച്ചത്.

കേരളത്തിലെ അടിമസമ്പ്രദായം അവസാനിച്ചതും എല്‍.എം.എസ്-സി.എം.എസ്. മിഷനറി പ്രവര്‍ത്തനങ്ങളുടെ ഫലമായിട്ടാണ്. പുലയ-പറയ-കുറവവിഭാഗങ്ങളില്‍പ്പെട്ടവരെല്ലാം അന്നത്തെ ജന്മിവര്‍ഗ്ഗത്തിന്റെ അടിമകളായിരുന്നു. യജമാനനായ ജന്മിക്ക് തന്റെ അടിമയായ സ്ത്രീയെ അവളുടെ ഭര്‍ത്താവില്‍നിന്നും അകറ്റി, ദൂരെയുള്ള മറ്റൊരു യജമാനനു വില്‍ക്കാനവകാശമുണ്ടായിരുന്നു. അവരുടെ മക്കളെയും മാതാപിതാക്കളില്‍നിന്നകറ്റി വിറ്റിരുന്നു. ഒരേ കുടുംബത്തിലുള്ളവര്‍ക്ക് തമ്മില്‍ക്കാണാന്‍പോലും ഒരിക്കലും അവസരം നല്‍കാത്തത്ര ക്രൂരമായിരുന്ന ഈ അടിമസമ്പ്രദായത്തിന് അറുതിവരുത്തുകയെന്ന മനുഷ്യത്വപരമായ ലക്ഷ്യം എല്‍.എം.എസ്-സി.എം.എസ്. മിഷനറിമാര്‍ക്കുണ്ടായിരുന്നു. അവരുടെ ശ്രമഫലമായാണ് 1855-ല്‍ അന്നത്തെ തിരുവിതാംകൂര്‍-കൊച്ചി നാട്ടുരാജ്യങ്ങളില്‍ അടിമസമ്പ്രദായത്തിന് തിരശീല വീണത്.

കൂടാതെ, അടിമകളെ ഉടമകളില്‍നിന്നു മോചിപ്പിച്ചു പുനരധിവസിപ്പിക്കുക, അവരുടെ മക്കള്‍ക്കു വിദ്യാഭ്യാസം നല്‍കുക, തൊഴില്‍സൗകര്യങ്ങളും താമസസൗകര്യങ്ങളും നല്‍കി അവരെ സംരക്ഷിക്കുക എന്നീ ഭാരപ്പെട്ട ഉത്തരവാദിത്വങ്ങളും ഈ മിഷനറിമാര്‍ നിര്‍വ്വഹിക്കുകയുണ്ടായി. ഇതെല്ലാം, സ്വാഭാവികമായും, അങ്ങേയറ്റത്തെ അടിമത്തവും അവശതകളും അനുഭവിച്ചു ജീവിച്ചിരുന്ന കേരളത്തിലെ അന്നത്തെ പിന്നോക്ക ജാതിവിഭാഗങ്ങളെ ഈ മിഷനറിപ്രസ്ഥാനങ്ങളിലേക്കും അവ പ്രതിനിധാനം ചെയ്ത ക്രൈസ്തവസഭകളിലേക്കും ആകര്‍ഷിക്കുകയും കൂട്ടത്തോടെയുള്ള മതംമാറ്റത്തിനു കാരണമാകുകയും ചെയ്തു (വിവരസമാഹരണം: ദളിത് ബന്ധു എന്‍.കെ. ജോസ് രചിച്ച 'ക്രൈസ്തവ ദളിതര്‍' എന്ന പുസ്തകത്തില്‍നിന്ന്).

ഈ മിഷനറിമാര്‍ക്കും അവരെ പിന്തുണച്ച ഈസ്റ്റ് ഇന്ത്യാ കമ്പനിക്കും ബ്രിട്ടീഷ് ഗവണ്‍മെന്റിനുമൊക്കെ, ഈ മിഷനറി പ്രവര്‍ത്തനങ്ങള്‍ക്കുപിന്നില്‍ മറ്റൊരു സ്വാര്‍ത്ഥലക്ഷ്യമുണ്ടായിരുന്നുവെന്ന് പിന്നീടുള്ള ചരിത്രകാരന്മാര്‍ ആരോപിക്കുന്നുണ്ട്. ഈസ്റ്റ് ഇന്ത്യാ കമ്പനിക്കും മിഷനറി പ്രവര്‍ത്തനങ്ങള്‍ക്കു നേതൃത്വം കൊടുത്തവര്‍ക്കും (ഉദാ: ഹെന്‍ട്രി ബേക്കര്‍, ബെഞ്ചമിന്‍ ബെയ്‌ലി) ഉണ്ടായിരുന്ന വമ്പന്‍ തോട്ടങ്ങളില്‍ പണിയെടുപ്പിക്കുന്നതിനുവേണ്ടി, ഒരു ദളിത് ക്രൈസ്തവസമൂഹത്തെത്തന്നെ സൃഷ്ടിക്കുകയാണവര്‍ ചെയ്തത് എന്നതാണത്. ഇതു ശരിയാണെങ്കില്‍പ്പോലും, അവരുടെ ഇടപെടല്‍ അന്നത്തെ അയിത്തജാതിക്കാരെ സംബന്ധിച്ച് വളരെ വിലപ്പെട്ടതായിരുന്നുവെന്ന് അംഗീകരിക്കാതെ വയ്യ. അടിമയില്‍നിന്ന് കൂലിവേലക്കാരനിലേക്കുള്ള മാറ്റം ഒരു ഉയര്‍ച്ചയാണല്ലോ. മുതലാളിത്തമനോഭാവം സൂക്ഷിച്ചപ്പോഴും 18-ാം നൂറ്റാണ്ടില്‍ യൂറോപ്പിനെ പിടിച്ചുകുലുക്കിയ നവോത്ഥാനവിപ്ലവ (Renaissance)ത്തിന്റെ 'സമത്വം, സ്വാതന്ത്ര്യം, സാഹോദര്യം' എന്നീ മൂല്യത്രയത്തിന്റെ സ്വാധീനം ഈ മിഷനറിമാരുടെ സമീപനത്തിലും പ്രവര്‍ത്തനങ്ങളിലും പ്രകടമായിരുന്നു എന്ന കാര്യം കാണാതിരിക്കാനാവില്ല.

ഇവിടെയാണ്, കേരളത്തിലെ നസ്രാണിമുഖമുള്ള കത്തോലിക്കാസഭയുടെ പിന്നോക്കജാതിക്കാരോടുള്ള സമീപനത്തെ നാം താരതമ്യംചെയ്തു നോക്കേണ്ടത്. കേരളത്തിലെ പിന്നോക്കജാതിക്കാര്‍ അനുഭവിച്ചുപോന്ന അടിമത്തത്തെയും തീണ്ടല്‍, തൊടീല്‍ പോലുള്ള അനാചാരങ്ങളെയും നിസ്സംഗമായി നോക്കിനില്‍ക്കുകമാത്രമല്ല, ശ്രേഷ്ഠജാതി എന്നു ഭാവിച്ച് അവരെ അകറ്റിനിര്‍ത്തുകയും, മേല്‍ജാതികളുമായി സമരസപ്പെടാന്‍ തീണ്ടല്‍പോലുള്ള ചില അനാചാരങ്ങള്‍ പാലിക്കുകയുമാണ്, അന്നത്തെ കത്തോലിക്കാസഭ ഇവിടെ ചെയ്തത്. അല്ലായിരുന്നുവെങ്കില്‍, സ്‌നേഹത്തിലും നീതിബോധത്തിലും അധിഷ്ഠിതമായ യേശുദര്‍ശനം ഹൃദയത്തിലുള്‍ക്കൊണ്ട് ഇവരെ സഹോദരരായികണ്ടു പ്രവര്‍ത്തിച്ചിരുന്നെങ്കില്‍, 'വീടുകളില്‍ അപ്പം മുറിക്കുകയും ആഹ്ലാദത്തോടും ഉദാരമനസ്സോടുംകൂടി ഭക്ഷണത്തില്‍ പങ്കുചേരുകയും' അങ്ങനെ 'സകലജനങ്ങളുടെയും പ്രീതീപാത്രങ്ങളാകുകയും' ചെയ്തിരുന്നെങ്കില്‍, കേരളത്തില്‍ പിന്നോക്കജാതികളായിക്കഴിഞ്ഞിരുന്നവര്‍ ദിനംപ്രതിയെന്നോണം നസ്രാണിസമൂഹത്തിന്റെ കൂട്ടത്തിലേക്ക്, പാശ്ചാത്യസഭകള്‍ക്ക് അവസരം നല്‍കാതെ, എത്രയോ മുമ്പേ കടന്നുവരുമായിരുന്നു! പകരം, സാമ്രാജ്യത്വലാക്കോടും മുതലാളിത്തമനോഭാവത്തോടുംകൂടി ഇവിടെയെത്തിയ പാശ്ചാത്യമിഷനറിമാരെക്കാള്‍ സ്വാര്‍ത്ഥതയും ചൂഷണമനോഭാവവുമാണ് കേരളത്തിലെ സഭാനേതൃത്വം-സമുദായവും-ഇവിടുത്തെ പിന്നോക്കജാതിക്കാരോടു കാട്ടിയത്.

അധഃസ്ഥിതവിഭാഗങ്ങളില്‍നിന്നുള്ളവരെ കത്തോലിക്കാസഭയിലേക്കു 'മാര്‍ഗ്ഗംകൂട്ടു'ന്നതിനു തുടക്കംകുറിച്ചത് 1857-ല്‍ പാലാക്കുന്നേല്‍ വല്യച്ചനാണ്. അന്നത്തെ വരാപ്പുഴ മെത്രാന്‍ അതു സംബന്ധിച്ച് അദ്ദേഹത്തിനു നല്‍കിയിരുന്ന കത്തിന്റെ ഉള്ളടക്കം പാലാക്കുന്നേല്‍ വല്യച്ചന്റെ 'നാളാഗമ'ത്തില്‍ കൊടുത്തിട്ടുള്ളത് ഇങ്ങനെയാണ്: ''മുണ്ടക്കയത്തിനു സമീപിച്ച് കൊരട്ടി എന്നൊരു സ്ഥലമുണ്ടെന്നും അവിടെ ഏതാനും ഈഴവര്‍ വന്നുചേര്‍ന്നിട്ടുണ്ടെന്നും, അവര്‍ക്കു സത്യവേദം അനുസരിക്കുന്നതിനു മനസ്സുണ്ടെന്നും, അവിടെ ഒരു പള്ളി പണിയാമെങ്കില്‍ അനേകം ഈഴവരും അരയന്മാരും പുലയരും മാര്‍ഗ്ഗത്തില്‍ കൂടുന്നതിന് ഇടയാകുമെന്നും, ആ സ്ഥലം പെരുത്ത വിശേഷമുള്ളതും മുണ്ടക്കയത്തിനേക്കാളും ഇരട്ടി ഭൂമി നല്ലതാകുന്നു എന്നും അറിയിച്ചു... ഇപ്പോള്‍ ഇങ്കിരെസു പാതിരിയുടെ ഉപദേശികള്‍ ഈ സ്ഥലത്തില്‍വന്ന് പുസ്തകങ്ങളുംമറ്റും കൊരട്ടിയിലുള്ള ഈഴവര്‍ക്കു കൊടുത്തിരിക്കുന്നു. വേഗത്തില്‍ അച്ചന്‍ അവിടെ ചെന്നാല്‍ ആ ജനങ്ങളെ സത്യവേദത്തില്‍ കൂട്ടാം.... അച്ചന്‍ നെടുങ്കുന്നത്തുനിന്നും ഇവിടെ വന്നില്ലായെങ്കില്‍, ഇംഗ്ലീഷുപാതിരിയുടെ കൈവശത്തില്‍ ഈഴവരും ഈ സ്ഥലവും ആയിപ്പോകുമെന്നു പറഞ്ഞയച്ചിരുന്നതിനാല്‍ എത്രയും നിമിഷത്തില്‍ തത്രപ്പെട്ട് ഞാന്‍ മണിമല പള്ളിയില്‍വന്നു...'' (നാളാഗമം പേജ് 1, 2) തുടര്‍ന്ന്, അഡ്മിനിസ്‌ട്രേറ്റര്‍ അപ്പസ്‌തോലിക്കാ ബര്‍ണ്ണര്‍ദീനോസ് അദ്ദേഹത്തിനു നല്‍കിയ കല്പനയില്‍ ഇപ്രകാരം കാണുന്നു: ''..... ഈ സ്ഥലത്തിന്റെയും മറ്റും വിവരങ്ങള്‍ ചോദിച്ചറിഞ്ഞ് താമസംകൂടാതെ രഹസ്യമായിട്ട് ഹര്‍ജി ഉണ്ടാക്കി ദിവാന്‍ജി അവര്‍കളെ ബോധിപ്പിച്ച് തന്റെ പേരില്‍ പതിപ്പിച്ച് ആ വിവരം നമ്മെ ബോധിപ്പിച്ചുകൊള്ളുകയുംവേണം...'' (നാളാഗമം, പേജ് 4).

ഈ വാക്കുകളില്‍നിന്ന്, കേരളത്തിലെ കത്തോലിക്കാസഭ ഇവിടെ നടത്തിയ മതപരിവര്‍ത്തനപ്രവര്‍ത്തനങ്ങളുടെ പിന്നിലുണ്ടായിരുന്ന ലക്ഷ്യം, യേശുവിന്റെ സുവിശേഷം അറിയിക്കുന്നതിലുള്ള താല്പര്യമോ അധഃസ്ഥിതജനവിഭാഗങ്ങളോടുള്ള സ്‌നേഹമോ ആയിരുന്നില്ല എന്നു വ്യക്തമാണ്. ഇംഗ്ലീഷ് പാതിരിമാര്‍ അവിടെ എത്തുംമുമ്പ്, അവിടുത്തെ ഈഴവരെ തങ്ങളുടെ സഭയ്ക്കുള്ളിലാക്കുകയും സ്ഥലം കൈവശപ്പെടുത്തുകയുംവേണം എന്നതായിരുന്നു താല്പര്യം. പുതുതായി ക്രൈസ്തവരാകാനെത്തുന്നവരെക്കൊണ്ട് ചൊല്ലിക്കുന്ന സത്യപ്രതിജ്ഞാവാചകങ്ങള്‍ ശ്രദ്ധിച്ചാല്‍, അവരുടെ അന്തസ്സില്ലായ്മയും നസ്രാണികളുടെ ആഢ്യത്വവും മുന്‍കൂറായിത്തന്നെ അവരെക്കൊണ്ട് അംഗീകരിപ്പിക്കാനുദ്ദേശിച്ചുള്ളതായിരുന്നെന്നും കാണാം. പുലയവിഭാഗത്തില്‍പ്പെട്ടവര്‍ക്കു നല്‍കിയിരുന്ന പല കല്പനകളിലൊന്നു താഴെ കൊടുക്കുന്നു:

''നിങ്ങള്‍ മാമ്മോദീസാ മുങ്ങുന്നതിനാല്‍ ഈ അന്തസ്സുകള്‍വിട്ട് മാപ്പിളമാരുടെ അന്തസ്സില്‍ നടക്കാമെന്നുംമറ്റും നിങ്ങള്‍ വിചാരിച്ചാല്‍ നിങ്ങള്‍ക്കു യാതൊരു ഫലവുമില്ല. ഏതന്തസ്സിലും സര്‍വ്വേശ്വരന്‍ തമ്പുരാന്റെ മക്കളായിട്ടു നടന്ന് വേദം അനുസരിക്കാം. വേദത്തിന് അവനവന്റെ അന്തസ്സു മാറുന്നതിന് ആവശ്യമില്ല.''

ഇതിനുത്തരമായിട്ടു ചൊല്ലിക്കുന്ന സത്യപ്രതിജ്ഞ: ''ഞങ്ങളു പുലയരുതന്നെ ആയിരുന്നുകൊള്ളാം. ഞങ്ങള്‍ക്കു വേദംമാത്രം മതി'' (നാളാഗമം, പേജ് 10-11).

(തുടരും)