ക്നാനായ വിശേഷങ്ങള്‍ : നമുക്ക് പ്രാര്ഥിക്കാം, പരിശുദ്ധ പിതാവിനു വേണ്ടി.....

ഈ വര്ഷം മാര്‍ച്ച് പതിമൂന്നാം തിയതി ലോകമെമ്പാടുമുള്ള കത്തോലിക്കാ വിശ്വാസികളുടെ കാത്തിരിപ്പിന് വിരാമമിട്ടുകൊണ്ട് Jorge Mario Bergoglio എന്ന അര്‍ജന്റീനിയന്‍ കര്‍ദ്ദിനാള്‍ പുതിയ മാര്‍പാപ്പയായി തെരഞ്ഞെടുക്കപ്പെട്ടു. വത്തിക്കാനിലെ വിശുദ്ധ പത്രോസിന്റെ ബസ്ലീക്കായുടെ മുന്നില്‍ തടിച്ചുകൂടുന്ന ജനങ്ങളെ ആശീര്‍വദിക്കുക എല്ലാ പാപ്പമാരുടെയും ആദ്യചടങ്ങാണ്. അതിനായി കാത്തിരുന്ന ജനകൂട്ടത്തിനു ഒരു സുഖമുള്ള ഷോക്ക്‌ ലഭിച്ചു – തങ്ങളെ ആശീര്‍വദിക്കാന്‍ വന്ന പാപ്പ അവരോട്, തനിക്കുവേണ്ടി പ്രാര്‍ഥിക്കാന്‍ പറഞ്ഞ് ശിരസ്സ്‌ നമിച്ചു. ചരിത്രത്തില്‍ ഇതിനുമുമ്പ് പറഞ്ഞു കേട്ടിട്ടില്ലാത്തതായിരുന്നു അത്തരത്തിലൊരു സംഭവം. പരിശുദ്ധ പിതാവിന്റെ ലാളിത്യത്തിന്റെയും എളിമയുടെയും ലക്ഷണമായാണ് എല്ലാവരും അതിനെ അന്ന് കണ്ടത്.

അന്നുമുതല്‍ പരിശുദ്ധ പിതാവിനു അളവറ്റ മാധ്യമശ്രദ്ധ ലഭിച്ചു കൊണ്ടിരിക്കുന്നു. എണ്‍പതു ലക്ഷം വിലയുള്ള ഓഡി കാറില്‍ സഞ്ചരിക്കുന്ന നമ്മുടെ ലോക്കല്‍ ഓര്‍ഡിനറി പിതാക്കന്മാര്‍ തങ്ങളുടെ ജീവിതശൈലി മാറ്റുന്നതിനെക്കുറിച്ച് ചിന്തിക്കുന്നില്ലെങ്കിലും, പരിശുദ്ധ പിതാവിന്റെ ലാളിത്യത്തെ വര്‍ണ്ണിച്ച് ലേഖനങ്ങള്‍ എഴുതാന്‍ മത്സരിക്കുന്നുണ്ട്.

ഫ്രാന്‍സിസ്‌ പാപ്പ കത്തോലിക്കാസഭയുടെ തലവനായി മൂന്നുമാസം മുഴുപ്പിച്ചു. ഇപ്പോള്‍ തിരിഞ്ഞുനോക്കിയാല്‍ എന്തുകൊണ്ടാണ് തനിക്കുവേണ്ടി പ്രാര്‍ഥിക്കണം എന്ന് അദ്ദേഹം ജനങ്ങളോട് ആവശ്യപ്പെട്ടതെന്ന് മനസിലാകും.

വളര്‍ന്നത്‌ അര്‍ജന്റീനയിലാണെങ്കിലും അദ്ദേഹം ഇറ്റാലിയന്‍ വംശജനാണ്. വത്തിക്കാനിലെ അധികാരത്തിന്റെ ഇടനാഴികളില്‍ സംഭവിക്കുന്ന, ലോകമറിയാത്ത, അധികാര വടംവലികളെക്കുറിച്ചും, പ്രതികാര നടപടികളെക്കുറിച്ചും തികച്ചും ബോധവാനായിരിക്കണം പാപ്പ. തന്റെ ജീവിതശൈലിയും വിശ്വാസവീക്ഷണവും നന്മയും വത്തിക്കാന്‍ശൈലിയ്ക്ക് പറ്റിയതല്ല എന്ന് അദ്ദേഹം മനസിലാക്കിയിട്ടുണ്ട് എന്നത് തീര്‍ച്ചയാണ്. മഫിയായെ വെല്ലുന്ന സംഘങ്ങളുള്ള വത്തിക്കാനില്‍ തന്റെ ജീവന്‍ അപകടത്തിലാകാന്‍ അധികം നാള്‍ വേണ്ടിവരില്ല എന്നു മനസിലാക്കിയാണ്, തനിക്കു വേണ്ടി പ്രാര്‍ഥിക്കാന്‍ മഴയത്ത് തടിച്ചുകൂടിനിന്ന ജനക്കൂട്ടത്തോട് പാപ്പ അഭ്യര്‍ത്ഥിച്ചത്.

മൂന്നു മാസം കഴിഞ്ഞിട്ടും ഈ പാപ്പ ജീവനോടെ ഇരിക്കുന്നത് സത്യത്തില്‍ ഒരു അത്ഭുതമാണ്.

List of murdered popes എന്ന വാക്കുകള്‍ ഉപയോഗിച്ച് ഇന്റര്‍നെറ്റില്‍ പരതിയാല്‍ വധിക്കപ്പെട്ട പരിശുദ്ധ പിതാക്കന്മാരുടെ നീണ്ട ലിസ്റ്റ് കാണാം. പലരും പ്രതീക്ഷിക്കുന്നതിലും വളരെ നീണ്ടതാണ് പ്രസ്തുത ലിസ്റ്റ്. 

സമീപകാലത്താണ് (28 September 1978) വെറും മുപ്പത്തിമൂന്നു ദിവസങ്ങള്‍ മാത്രം പത്രോസിന്റെ സിംഹാസനത്തില്‍ ഇരുന്ന ജോണ്‍ പോള്‍ ഒന്നാമന്‍ കാലം ചെയ്തത്. അദ്ദേഹത്തിന്റെ മരണത്തില്‍ ഇന്നും നിലനില്‍ക്കുന്ന ദുരൂഹതകള്‍ ചില്ലറയല്ല. “In God's Name: An Investigation Into the Murder of Pope John Paul I” എന്ന പേരില്‍ ഡേവിഡ്‌ യാല്ലോപ് ഒരു പുസ്തകമെഴുതിയിട്ടുണ്ട്. ഈ വിഷയത്തില്‍ വേറെയും രചനകള്‍ പുറത്തുവന്നിട്ടുണ്ട്. അദ്ദേഹത്തിന്റെ മരണം കൊലപാതകം മൂലമായിരുന്നു എന്ന് സ്ഥാപിക്കാന്‍ കഴിഞ്ഞിട്ടില്ലെങ്കിലും അങ്ങിനെ വിശ്വസിക്കുന്ന അനേകര്‍ കത്തോലിക്കാ സഭയ്ക്കുള്ളിലും വെളിയിലും ഉണ്ട്. വത്തിക്കാനിലെ സാമ്പത്തിക തിരിമറികളെക്കുറിച്ച് അന്വേക്ഷിക്കാന്‍ തുനിഞ്ഞതാണ് അദ്ദേഹത്തെ ഇല്ലായ്മ ചെയ്തതിന്റെ പിന്നില്‍ എന്നാണ് ചിലരെങ്കിലും വിശ്വസിക്കുന്നത്. അക്കണക്കിന്, ഇപ്പോഴത്തെ മാര്‍പാപ്പ മൂന്നുമാസം മുഴിപ്പിച്ചത് വിശ്വാസിസമൂഹത്തിന്റെ പ്രാര്‍ത്ഥനമൂലവും ദൈവത്തിന്റെ പ്രത്യേക താല്പര്യം കൊണ്ടുമാണെന്നു വിശ്വസിക്കേണ്ടിയിരിക്കുന്നു.

എന്തെല്ലാം അസൌകര്യങ്ങളാണ് പിതാവ് വത്തിക്കാന്‍ സാമ്രാജ്യത്തിലെ രാജാക്കന്മാര്‍ക്കും, അതിന്റെ കീഴില്‍ ലോകത്തിന്റെ നാനാഭാഗങ്ങളിലുള്ള നാട്ടുരാജ്യങ്ങളിലെ "കുട്ടിരാജാക്കന്മാര്‍ക്കും” നിത്യമെന്നോണം ഉണ്ടാക്കിക്കൊണ്ടിരിക്കുന്നത്!

ഫ്രാന്‍സിസ്‌ പാപ്പായെപ്പോലെ പത്തു പാപ്പാമാര്‍ വന്നാലും നമ്മുടെ സീറോമലബാറിലെ അരപ്പട്ടകെട്ടിയവരുടെ ആഡംബരജീവിതത്തിനു ഒരു മാറ്റവും ഉണ്ടാകാന്‍ പോകുന്നില്ല. എങ്കിലും കര്‍ദ്ദിനാള്‍ പദവിയില്‍ കഴിയുമ്പോള്‍ നഗരപ്രാന്തത്തിലെ ചെറിയ അപ്പാര്‍ട്ട്മെന്റില്‍ സ്വയം പാചകം ചെയ്ത്, ബസില്‍ യാത്ര ചെയ്ത്, ജീവിച്ച ഇന്നത്തെ ‘ദരിദ്രവാസി’ പാപ്പ നമ്മുടെ തിരുമേനിമാര്‍ക്ക് ഒരു അസൌകര്യം തന്നെയാണ്. ജീവിതശൈലി പോട്ടെ, വായില്‍ നിന്നും വരുന്നതോ?

നന്മ ചെയ്‌താല്‍ നിരീശ്വരവാദികള്‍ക്കും സ്വര്‍ഗത്തിലെത്താന്‍ സാധിക്കും പോലും! അങ്ങിനെയാണെങ്കില്‍ ഇക്കണ്ട പള്ളികളും, പട്ടക്കാരും മേല്പ്പട്ടക്കാരും എന്തിനാണ്? “സ്വര്‍ഗം വേണോ, ഞാന്‍ പറയുന്നത് കേട്ടോ” എന്ന ഭാവത്തില്‍ നടന്നവര്‍ ഇനി മനുഷ്യരുടെ മുഖത്തെങ്ങിനെ നോക്കും. ഈയടുത്തകാലംവരെ കത്തോലിക്കാ സഭയിലൂടെയല്ലാതെ “രക്ഷയില്ല” എന്ന് പറഞ്ഞു നടന്നതാ... എന്നിട്ടിപ്പോള്‍, നിരീശ്വരവാദിയെയും സ്വര്‍ഗത്തിലോട്ട് കേട്ടിയെടുക്കുമെന്ന്!.

പാലാ രൂപതയിലെ ഒരു വൈദികന്‍ കുറെ വര്‍ഷങ്ങള്‍ മുമ്പ് ഉപരിപഠനാര്‍ത്ഥം ഒരു യുറോപ്യന്‍ രാജ്യത്ത് പോയി. ഗവേഷണവിഷയം തെരഞ്ഞെടുത്തു – “കത്തോലിക്കാ സഭയ്ക്ക് വെളിയില്‍ ആത്മാവിനു രക്ഷയുണ്ടോ?” വിവരം മെത്രാനെ അറിയിച്ചു. മെത്രാന് അതിശയം.. “എടോ കെഴങ്ങന്‍ കത്തനാരെ, അതിനെന്തിനാടോ ഗവേഷണം ചെയ്യുന്നത്? അതിന്റെ ഉത്തരം അറിയാന്‍ വയ്യാത്ത തനിക്കു അച്ചനാണെന്നു പറയാന്‍ നാണമില്ലേ?” ആ കലഹത്തിന്റെ ഒടുവില്‍ വൈദികന്‍ പൌരഹിത്യം ഉപേക്ഷിച്ചു. സ്വിറ്റ്സര്‍ലന്‍ഡില്‍ വച്ച് പ്രസ്തുത പുരോഹിതന്‍ ലേഖകനോട് നേരിട്ട് പറഞ്ഞതാണ് ഇക്കാര്യം. അദ്ദേഹം ഇന്ന് വിശ്രമജീവിതം നയിക്കുന്നു.

ഇപ്പോള്‍ പറയുന്നു – നിരീശ്വരവാദികളേ, സ്വര്‍ഗം നിങ്ങളെ മാടിമാടി വിളിക്കുന്നു. പച്ചമലയാളത്തില്‍ പറഞ്ഞാല്‍ നന്മ ചെയ്യാന്‍ വല്ല ഉദ്ദേശവും ഉണ്ടെങ്കില്‍, പള്ളിയും വേണ്ട പട്ടക്കാരനും വേണ്ട.

ആ പറഞ്ഞതാണല്ലോ ബുദ്ധിമുട്ടുള്ള കാര്യം – നന്മ ചെയ്യുകയെന്നത്. നന്മ പ്രവര്‍ത്തിക്കണമെങ്കില്‍ ആദ്യം ഉള്ളില്‍ നന്മയുണ്ടാവണം, മനസ്സില്‍ അലിവുണ്ടാവണം. അതൊക്കെ വലിയ ബുദ്ധിമുട്ടാണ്. അച്ചനോ മെത്രാനോ വന്നു ചോദിക്കുമ്പോള്‍, പിടിച്ചുപറിച്ചുണ്ടാക്കിയതില്‍ അഞ്ചോ പത്തോ കൊടുത്താല്‍ സ്വര്‍ഗം കിട്ടുമെങ്കില്‍ അതല്ലേ നല്ലത്? അച്ചന്മാര്‍ പേടിക്കേണ്ട, അത്തരക്കാര്‍ കണ്ടമാനമുണ്ട് നമ്മുടെ നാട്ടില്‍. അതുകൊണ്ട് അച്ചന്മാര്‍ തങ്ങളുടെ കഞ്ഞികുടിമുട്ടുമെന്നൊന്നും പേടിക്കേണ്ട. നമ്മുടെ പ്രാഞ്ചിക്കുട്ടന്മാരുള്ളപ്പോള്‍ നിങ്ങളെന്തിനാണ് പേടിക്കുന്നത്. ഈ ജന്മത്തില്‍ ഒരു നന്മയും അവര്‍ അറിഞ്ഞോ അറിയാതെയോ ചെയ്യുകയില്ലെന്നു ഞാനല്ലേ പറയുന്നത്. നിങ്ങളുടെ കാര്യങ്ങള്‍ ഒക്കെ കുശാലായി കഴിയും.

അതൊക്കെ സഹിക്കാം.

പരിശുദ്ധ പിതാവ് ഇതാ ഇപ്പോള്‍ പറയുന്നു വത്തിക്കാനില്‍ സ്വവര്‍ഗാനുരാഗികളുടെയും,അഴിമതിക്കാരുടേയും സംഘം പ്രവര്‍ത്തിക്കുന്നുണ്ടെന്ന്.

ഇത് സംഗതി തീക്കളിയാണ്. പരിശുദ്ധ പിതാവിന്റെ ജീവന്‍ ശരിയ്ക്കും അപകടത്തിലാണ്.

കര്‍ത്താവേ, എത്രനാള്‍ കാത്തിരുന്നിട്ടാണ് ഇങ്ങിനെയൊരു കൊള്ളാവുന്ന പോപ്പിനെ കിട്ടിയത്. വത്തിക്കാനിലെ നീചന്മാരില്‍ നിന്ന് അദ്ദേഹത്തെ കാത്തുകൊള്ളേണമേ....

ക്നാനായ വിശേഷങ്ങള്‍ : നമുക്ക് പ്രാര്ഥിക്കാം, പരിശുദ്ധ പിതാവിനു വേണ്ടി.....:

'via Blog this'