ദളിത്പെണ്‍കുട്ടിയെ പ്രേമിച്ച തിരുമേനി

ക്രിസോസ്റ്റം തിരുമേനി

മാത്യു സാമുവല്‍ (മാനേജിംഗ് എഡിറ്റര്‍, തെഹല്‍ക്ക)

Source: Mangalam, Story Dated: Thursday, October 16, 2014 07:29

  Mar Chrysostom Valiya Tirumeny

1

മാര്‍ത്തോമാ ചര്‍ച്ചിന്റെ നേതൃത്വസ്ഥാനം അങ്ങെന്താണ് വേണ്ട എന്നു വച്ചത്?

അത് വലിയൊരു കാര്യമാക്കി എടുക്കേണ്ട, എനിക്കത് വളരെ ഭംഗിയായി ചെയ്യാന്‍ അറിയാം. പിന്നെ പറയുവാണേല്‍ പണ്ടൊക്കെ പള്ളീല്‍ കാര്യങ്ങള്‍ ഒക്കെ നല്ലോണം നോക്കി നടത്തുന്ന കറിയാച്ചന്‍ ഉണ്ടല്ലോ, അങ്ങനെ ഒരാളെ ഉണ്ടാവാറുള്ളൂ, അതാണേല്‍ നല്ല കാര്യ വിവരം ഉള്ള ഒരാള്‍. ഇപ്പോഴാണേല്‍ പള്ളി മുഴുവന്‍ കറിയാച്ചന്‍മാര്‍ ആണെന്നേ, എണ്ണി തിട്ടപ്പെടുത്താന്‍ കൂടി ഒക്കത്തില്ല, എന്നാ വല്ല കാര്യോം ഉണ്ടോ ? അതും ഇല്ല. ഞാന്‍ ഒരു സാധാരണക്കാരന്‍ ആണ്, എനിക്ക് സമാധാനപൂര്‍വ്വമായ ഒരു സഹവര്‍ത്തിത്വത്തോടാണ് ഇഷ്ടം. ഗ്രാമങ്ങളും, അവിടത്തെ ആള്‍ക്കാരും, അവരുടെ ചിന്താഗതികളും, അവരോടുള്ള കൊച്ചു വര്‍ത്താനങ്ങളും എല്ലാമാണ് എന്റെയൊരു ആവേശം എന്നൊക്കെ പറയുന്നത്. പള്ളീല്‍ ആണേല്‍ ഇതൊന്നും അല്ലാതെ ഞാന്‍ കുറെ കള്ളം പറയേണ്ടിവരും, എനിക്കെങ്ങുംവയ്യ കള്ളം പറയാന്‍, സംഭവം
മനസിലായില്ലേ?

അങ്ങ് അപ്പോള്‍ കള്ളം പറയാറെ ഇല്ല? സത്യത്തിന്റെ സംരക്ഷകന്‍ ആണോ?

അതാരാ അങ്ങനെ പറഞ്ഞെ? ഞാന്‍ നല്ല ഒന്നാംതരം കള്ളന്‍തന്നെ ആയിരുന്നു ചെറുപ്പത്തില്‍. നല്ല ഭേഷായി കള്ളം പറയാറും ഉണ്ട്. ഞാന്‍ ദൈവത്തോടും, രക്ഷിതാക്കളോടും കള്ളം പറഞ്ഞിട്ടുണ്ട്. ഞാന്‍ ഒരു ചെറിയ കഥ പറഞ്ഞുതരാം, കഥയല്ല, പണ്ട് നടന്ന ഒരു സംഭവം ആന്നു. നമ്മടെ മാരാമണ്‍ കണ്‍വന്‍ഷന്‍ ഇല്ലയോ? അതിന്നു പോകുമ്പോള്‍ നേര്‍ച്ച കൊടുക്കാനായി അമ്മച്ചി ഒരണ തരും, പഴേ നാലു പൈസ. ഞാന്‍ ആണേല്‍ കപ്പലണ്ടി വാങ്ങാനായി അമ്മച്ചിയോട് ഒരണകൂടി ചോദിക്കും, അമ്മച്ചി തരുകേല. ഞാന്‍ അപ്പൊ കിട്ടിയ ഒരണ അങ്ങ് പകുത്ത് പകുതി നേര്‍ച്ചയും, പകുതിക്ക് കപ്പലണ്ടിയും വാങ്ങി തിന്നും, ഇങ്ങനെ മാന്യന്‍ ആയ ഒരു കള്ളനെക്കുറിച്ച് കേട്ടിട്ടുണ്ടോ?

അപ്പോള്‍ ദൈവത്തിന്റെ പണം കട്ടല്ലേ?

ദൈവത്തിനു എന്നാത്തിനാ പണം? നമ്മള്‍ ചുമ്മാ കൊടുക്കുവല്ലേ? ദൈവം എന്നേലും പണം വേണം എന്ന് നിന്നോട് ആവശ്യപ്പെട്ടിട്ടുണ്ടോ?

ശരിയാ! അങ്ങയുടെ ജീവിതത്തിലെ ഒരു മറക്കാനാവാത്ത ഒരു കാര്യം പറയാമോ?

പറയാല്ലോ, എന്റെ ആദ്യത്തെ ജോലി തമിഴ് നാട്ടിലെ ജോലാര്‍പേട്ട് റയില്‍വേ സ്‌റ്റേഷനില്‍ പോര്‍ട്ടര്‍ ആയിട്ടായിരുന്നു. അങ്ങനെ ഒരു ദിവസം ഞാന്‍ സ്‌റ്റേഷനില്‍ നിക്കുമ്പോ ഒരു കുടുംബം ട്രെയിന്‍ ഇറങ്ങി വന്നു. തൊപ്പി ഒക്കെവച്ച ഒരാള്‍, അയാള്‍ടെ അമ്മ, മകള്‍ ഇവരുടെ അടുത്താണേല്‍ എടുത്താല്‍ പൊങ്ങാത്ത വലിയൊരു പെട്ടിയും. എന്നെ കണ്ടപ്പോ അദ്ദേഹം ആ പെട്ടി എടുത്തുകൊണ്ട് വരാന്‍ എത്രയാവും എന്ന് ചോദിച്ചു. ഞാന്‍ പറഞ്ഞു ' നിങ്ങള്‍ക്ക് അരമണിക്കൂര്‍ ജോലി ചെയ്താല്‍ എത്ര കൂലികിട്ടും? അതെനിക്ക് തന്നാ മതി'.
മൂപ്പര്‍ അത് കേട്ട് എന്നെ അങ്ങ് സൂക്ഷിച്ചു നോക്കി , എന്നിട്ട് പറഞ്ഞു!
നീ കൊള്ളാമല്ലോ! എന്നിട്ട് അവസാനം ഞാന്‍ പെട്ടിയൊക്കെ എടുത്തുവെച്ചപ്പോള്‍ പ്രതീക്ഷിച്ചതില്‍ കൂടുതല്‍ കാശ് തരാന്‍ അദ്ദേഹം
തയ്യാറാവുകയും ചെയ്തു. ഞാന്‍ പറഞ്ഞു എന്നെ ഇഷ്ടപ്പെട്ടത് കൊണ്ട് എനിക്ക് കൂടുതല്‍ കാശ് വേണ്ട, ഞാന്‍ പണിയെടുത്തതിന്റെ കൂലി മതി. അത് കേട്ട് അദ്ദേഹം എന്നെ ആലിംഗനം ചെയ്തു. ഇപ്പോ എന്താ നടക്കുന്നെ? ഇഷ്ടപെട്ടവര്‍ക്ക് കൂടുതല്‍ കാശു കൊടുക്കുന്നു, അധ്വാനിച്ചു
പണിയെടുക്കുന്നവര്‍ക്ക് തുച്ഛമായ വേതനം. ഞാന്‍ ഇനി കൂടുതല്‍ പറയണോ?

വേണ്ട, വേണ്ട! മനസിലായി! അങ്ങയുടെ വായനാശീലം എങ്ങനെ? പുതിയ സംഭവവികാസങ്ങള്‍ ഒക്കെ അറിയുന്നുണ്ടോ?

അതിപ്പോ പറയുവാണേല്‍, നമ്മുടെ എം.ഒ. മത്തായി ഇല്ലയോ? നെഹ്‌റുവിന്റെ സെക്രട്ടറി ഒക്കെ ആയിരുന്ന ആള്‍, ഇന്ദിരാഗാന്ധിയുടെയും സെക്രട്ടറി ആയിരുന്നു, ഗാന്ധിഫാമിലി ആയും നല്ല അടുപ്പം ആയിരുന്നു. മത്തായിച്ചന്‍ ആലുവ ക്രിസ്ത്യന്‍ കോളേജില്‍ എന്റെ സീനിയര്‍ ആയിരുന്നു. ഞാന്‍ മത്തായിച്ചനോട് ചോദിച്ചു, മത്തായിച്ചാ എന്നാത്തിനാ ഇങ്ങനൊക്കെ ഇന്ദിരയെക്കുറിച്ച് എഴുതുന്നേ? അവരുടെകൂടെ ജോലി ചെയ്തു പിന്നീട് അവര്‍ക്കെതിരെ എഴുതുക, ഇതെന്തു പരിപാടി ആണ്? അങ്ങേരു പറയുവാണ്, അതിപ്പോ ആരായാലും എഴുതിപ്പോവും, അതായിരുന്നു അവരുടെകൂടെ ഉള്ള അവസ്ഥ എന്ന്! മാത്യു പറ, ഇങ്ങനെ ഒരാളുടെകൂടെ കുറെകാലം ജോലി ചെയ്യുക, എന്നിട്ട് പിന്നെ അവരെ കുറിച്ച് എഴുതുക. ഇങ്ങനെ കുറെ എണ്ണം ഇറങ്ങുന്നുണ്ടല്ലോ ഇപ്പോള്‍, ല്ലേ? നമ്മള്‍ ഇതാരെയാ വിശ്വസിക്കുക?

ശെരിയാ, അങ്ങേയ്ക്ക് ഇഷ്ടപെട്ട രാഷ്ട്രീയക്കാര്‍ ആരൊക്കെയാണ്?

അത് വേറെ കഥ! എനിക്ക് കുറെ ഇഷ്ടായിരുന്നു, നല്ല പ്രതീക്ഷയും വിശ്വാസവും ഒക്കെ ആയിരുന്നു. പക്ഷെ കുറച്ചു കഴിയുമ്പോള്‍ അവരൊക്കെ കള്ളന്‍മാര്‍ ആണ് എന്നാ പിന്നെ അറിയുന്നെ! എന്തെങ്കിലും ഒക്കെ തട്ടിപ്പ് കാണിച്ചു കുടുങ്ങും എല്ലാവന്‍മാരും, ഞാന്‍ പിന്നെ ഇവരെ ഇഷ്ടപെടുന്നത് അങ്ങ്നിര്‍ത്തി! പിന്നെ വെറുതെ അവരുടെ കള്ളക്കഥ കേട്ട് സങ്കടപെടേണ്ടല്ലോ

പള്ളി കല്യാണം ഒന്നും അംഗീകരിച്ചിട്ടില്ലാല്ലോ, അങ്ങ് ഈ സ്ത്രീ സൌന്ദര്യം ഒക്കെ ആസ്വദിക്കാറുണ്ടോ? പ്രണയം ഒക്കെ ഉണ്ടായിട്ടുണ്ടോ?

പിന്നല്ലാതെ, ഞാന്‍ നിന്നെപോലൊക്കെ തന്നെയാണ്. ഞാന്‍ രണ്ടു പേരെ പ്രേമിച്ചിട്ടുണ്ട്. ഒന്ന് ഞാന്‍ സ്‌കൂളില്‍ പഠിക്കുമ്പോഴാ.. എനിക്കാ
കൊച്ചിനോട് ഒടുക്കത്തെ പ്രേമം ആയിരുന്നു, ഞാന്‍ അച്ചന്‍ ആയപ്പോഴും, ബിഷപ്പ് ആയപ്പോഴും ഒക്കെ അവരെ പിന്നെ കണ്ടിടുണ്ട്, ഒരിക്കല്‍ പള്ളീല്‍ കുര്‍ബാനക്ക് വന്നപ്പോള്‍ ഞാന്‍ കണ്ണിറുക്കി കാണിച്ചിട്ടൊക്കെയുണ്ട്

രണ്ടാമത്തേതൊ?

അതൊരു നല്ല തങ്കപെട്ട കോച്ചായിരുന്നു. ഞാന്‍ അവളെ കല്യാണം കഴിക്കാന്‍വരെ ആലോചിച്ചതാണ്. ഞങ്ങടെ വീട്ടില്‍ ജോലിക്ക് വന്നിരുന്ന ദളിതന്‍ ആയ അഴഗപ്പന്റെ മകള്‍ ആയിരുന്നു അവള്‍. കല്യാണത്തിന്റെ കാര്യം പറഞ്ഞപ്പോള്‍ വീട്ടില്‍ ആകെ കുഴപ്പം ആയി. ആലോചിച്ചു നോക്കുക, ഒന്നാമതായി പ്രേമിക്കുക എന്നൊക്കെ പറഞ്ഞാല്‍ത്തന്നെ മഹാഅപരാധം, അതും ഒരു ദളിത് പെണ്ണിനെ എന്നു പറഞ്ഞാല്‍ അതിനപ്പുറം ഒരു അപരാധം വേറെ ഇല്ല. അപ്പച്ചനും, അമ്മച്ചിയും ഉടക്കില്‍ത്തന്നെ ആയിരുന്നു. എന്റെ മൂത്ത ചേട്ടനെന്റെ കൂടെ ആയിരുന്നു.
പക്ഷെ മൂപ്പര്‍ ഒരു കാര്യം പറഞ്ഞു. അതായത് അങ്ങേരും കല്യാണം കഴിക്കും, അത് വല്ല മാത്തുകുട്ടിയുടെയും മോള്‍ ആയിരിക്കും, നീ ദളിതനായ അഴഗപ്പന്റെ മോളെ കെട്ടാന്‍ പോകുന്നു. കാലം കടന്നു പോകും. മക്കളെ കാണാന്‍ മാത്തുകുട്ടിയും, അഴഗപ്പനും വീട്ടില്‍ വരും,
മാത്തുകുട്ടിക്ക് ഇരിക്കാന്‍ നമ്മുടെ വീട്ടുകാര്‍ കസേര കൊടുക്കും, എന്നാല്‍ അഴഗപ്പന്‍ വന്നാല്‍ നിലത്തു പായ ..സ്വാഭാവികമായും നിന്റെയും
എന്റെയും ഭാര്യമാര്‍ തമ്മില്‍ ഇതൊക്കെകൊണ്ട് അടിയാവും, അതൊരു പ്രശ്‌നം ആവും... അങ്ങനെ വരാനിരുന്ന മഹാ ദുരന്തത്തെ ഒഴിവാക്കാന്‍ ഞാന്‍ അങ്ങനെ ആ പ്രേമം ത്യജിച്ചു. ഇതാണ് എന്റെ പ്രേമകഥ

നന്നായിട്ടുണ്ട്... ഇപ്പോഴത്തെ രാഷ്ട്രീയ സാഹചര്യങ്ങളെ അങ്ങ് എങ്ങനെ ആണ് വിലയിരുത്തുന്നത്?

ഞാനേ നെഹ്‌റുവിനെ കണ്ടിട്ടൊക്കെ ഉണ്ട്, സംസാരിച്ചിട്ടുണ്ട്.. ചില കാര്യങ്ങളില്‍ എല്ലാം അദ്ദേഹം ഓക്കേ ആയിരുന്നു.. എല്ലാത്തിനോടും എനിക്ക് യോജിക്കാന്‍ ഒന്നും പറ്റീട്ടില്ല... ആ സമയത്ത് സായിപ്പ് നമ്മളെ ഭരിച്ചു, പിന്നെ മദാമ്മ നമ്മളെ ഭരിച്ചു.. ദേ ഇപ്പോ പോയിട്ടേ ഉള്ളു! പ്രത്യേകിച്ച് വല്യ മാറ്റം ഒന്നും ഇല്ല..ഇതിങ്ങനെ ഒരു ആവര്‍ത്തനം പോലെ ഇങ്ങനെ സംഭവിക്കുന്നു..അത്രന്നെ

ദൈവികതയെ കുറിച്ച് നമുക്ക് സംസാരിക്കാം, നമ്മള്‍ എന്തിനാണ് നമ്മെ ദൈവത്തിന് സമര്‍പ്പിക്കുന്നത്? നമ്മള്‍ എന്തിനു ദൈവത്തിനെ വിളിക്കണം?

തന്നെ വിളിക്കാന്‍ ദൈവം നിന്നോട് പറഞ്ഞോ? ദൈവത്തിനു ആവശ്യം ഉണ്ടേല്‍ നിന്നെ അങ്ങേരു വിളിച്ചോളും..ദൈവത്തിനു ആവശ്യം ഉള്ള കാര്യങ്ങള്‍ ചെയ്യാന്‍ ആണ് നമ്മള്‍ ഇവിടെ.. ചെയ്യേണ്ട കര്‍മ്മത്തില്‍ എകാഗ്രത പുലര്‍ത്തുക, അതു നേരാം വണ്ണം ചെയ്യുക..അല്ലാതെ ഇരുപത്തിനാലു മണിക്കൂറും ദൈവമേ എന്നും വിളിച്ച് ഇരിക്കേണ്ട ഒരാവശ്യോം ഇല്ല..

ആളുകളെ കൊണ്ട് തോറ്റല്ലോ! എന്നാ പറയാനാ

- See more at: http://www.mangalam.com/mangalam-special/240101?page=0,2#sthash.BvZu87sa.dpuf