ഇതെന്തൊരു കുരിശു?ഒരു കുരിശിന്റെ വിലാപം.

(വേളാങ്കണ്ണിയിലെ വിഗ്രഹാരാധന" എന്ന പോസ്റ്റിനു ജോണ്‍ മൂന്നു ഭാഗങ്ങളായി അയച്ചുതന്ന കമന്റാണ് ഒരു പോസ്റ്റായി ഇവിടെ കൊടുക്കുന്നത്. Administrator)

ആളും അരങ്ങും ഒഴിഞ്ഞപ്പോള്‍ ചിക്കാഗോ കത്തീദ്രല്‍ നിശബ്ദം ആയി. അള്‍ത്താരയിലെ വലതു വശത്തെ ക്രൂശിത രൂപത്തില്‍ നിന്നും ഒരു നിശ്വാസം ഉയര്‍ന്നത് ഇടതു വശത്തെ ക്ലാവര്‍ കുരിശു കേട്ട് ഇങ്ങനെ ചോദിച്ചു. എന്തെ?

ക്രൂശിത രൂപം ഇങ്ങനെ മൊഴിഞ്ഞു.

ഹ ഇനി നിന്റെ കാലമാ. ഇത്രയും കാലം എന്നെ അവര്‍ കഴുത്തിലണിഞ്ഞു. ഭിത്തിയില്‍ തൂക്കി ഇട്ടു. ശവക്കോട്ടയില്‍ സ്ഥാപിച്ചു. പള്ളികള്‍ക് മുകളില്‍ വച്ചു, കപ്പേളയുടെ ഗോപുരത്തില്‍ പിടിപ്പിച്ചു. അന്നൊക്കെ ഒത്തിരി ആശ്വാസം ഉണ്ടായിരുന്നു. ഇന്നോ എന്നെ വേണ്ട നിന്നെ മതി എല്ലാവര്‍ക്കും. ഇനി എത്ര കാലം ഇവിടെ ഉണ്ടാവും എന്നറിയില്ല. എനിക്കാണേല്‍ പ്രായവും ഇത്രേം ആയില്ലേ? എന്നെ പാശ്ചാത്യര്‍ കൊണ്ട് വന്നതാണത്രേ. അതുകൊണ്ട് മാത്രം ഞാന്‍ അത്ര മോശക്കാരന്‍ ആണോ? ഇപ്പൊ നിന്നെ ആണ് അവര്‍ക്കിഷ്ടം. നിന്നെ സുറിയാനികുരിശു, തോമാകുരിശു, ക്ലാവര്‍കുരിശു എന്നൊക്കെ എന്തെല്ലാം ഓമനപേരുകള്‍ ഇട്ടാണ് വിളിക്കുന്നത്‌. നിന്‍റെ ഒരു ഭാഗ്യെ! എനിക്കാണേല്‍ കുരിശെന്ന പേരല്ലാതെ വേറെ പേരില്ല. ഇതെന്തൊരു കുരിശാണ് തമ്പുരാനേ എന്നോര്‍ത്ത് ഞാന്‍ ദിവസവും കരയും. അല്ല നീയും വിദേശി ഞാനും വിദേശി. ഒരു പക്ഷെ കുറെ കഴിയുമ്പോള്‍ നിന്നെ മാറ്റി അവര്‍ ഒരു ശിവലിംഗകുരിശു ഉണ്ടാക്കും. അപ്പൊ നിനക്ക് മനസിലാവും എന്‍റെ വേദന. അത്ര നന്ദി ഇല്ലാത്തവരാണ് ഈ സുറിയാനി ക്രിസ്തിയാനി എന്ന വര്‍ഗം. പാശ്ചാത്യര്‍ തരുന്ന ഡോളറും, മാര്‍ക്കും, യുറോയും ഒക്കെ രണ്ടു കയ്യും നീട്ടി ഇളിച്ച മുഖത്തോടെ വാങ്ങി പോക്കറ്റിലും ബാങ്കിലും ഇടും. പള്ളി പണിയും, മഠം പണിയും, പള്ളിക്കൂടം പണിയും, എസ്റ്റേറ്റ്‌ വാങ്ങിക്കും, വിദേശയാത്ര നടത്തും എന്തിനേറെ വീട്ടുകാരെയും രക്ഷിക്കും. എന്നിട്ടും പാശ്ചാത്യം എന്ന് കേള്‍ക്കുമ്പോള്‍ ഇവര്‍ക്ക് പുശ്ചം. പുച്ഛം ആണത്രേ പുച്ഛം. പാശ്ചാത്യ കുരിശും ദൈവശാസ്ത്രവും കൊള്ളില്ലത്രേ. നിന്നെ പോലുള്ള സുറിയാനി കുരിശു വച്ചാലേ ദൈവത്തിനു പ്രീതി ഉണ്ടാകൂ അത്രേ. ഇവര്‍ക്ക് നന്ദി ഇല്ല എന്ന് മാത്രം അല്ല യുക്തിയും ബുദ്ധിയും ഇല്ലതായല്ലോ കര്‍ത്താവേ. കേരള സുറിയാനി സഭയിലെ അച്ചനും, മെത്രാനും അവരുടെ ഏറാന്‍ മൂളികള്‍ക്കും പുച്ഛം. ഇവരൊക്കെ അമേരിക്കയില്‍ വരുന്നത് "ഇന്‍ ഗോഡ് വി ട്രസ്റ്റ്‌ എന്ന്" ഡോളറില്‍ അച്ചടിച്ചിട്ടുള്ളത് കൊണ്ടാണത്രേ. ഹോ എന്തൊരു പുണ്യം. ആ വാക്കുകള്‍ ഉള്ള ഡോളര്‍ കാണുമ്പോള്‍ അവരുടെ വിശ്വാസം പതിന്മടങ്ങ്‌ വര്‍ധിക്കും എന്നാണ് പറയപ്പെടുന്നത്‌. പക്ഷെ ബാക്കി പാശ്ചാത്യം എന്ന് പറയുന്നതിനോട് അവര്‍ക്ക് വലിയ മതിപ്പില്ല. എന്നെ തെറി പറയാനും നിന്നെ പുകഴ്ത്താനും ബ്ലോഗുകളും, സെമിനാറുകളും വരെ ഉണ്ടത്രേ. കാലം പോയ പോക്കെ. നീ വന്നതില്‍ പിന്നെ ആണ് ഇത്രയും വഴക്ക് സഭയില്‍ തുടങ്ങിയത്. നിന്‍റെയും എന്റെയും പേര് പറഞ്ഞ്‌ ഈ മെത്രാന്‍മാരും അച്ചന്മാരും അല്മേനികളും അലമുറയിട്ടു അടി നടത്താന്‍ തുടങ്ങിയിട്ട് കുറെ കാലമായി. കര്‍ത്താവേ കഴിയുമെങ്കില്‍ ഈ പാനപാത്രം എന്നില്‍ നിന്ന് ഒഴിവാക്കി തരണമേ എന്നേ എനിക്ക് പ്രാര്‍ത്ഥിക്കാന്‍ ഉള്ളു. സക്രാരിയിലേക്ക് നോക്കി കുരിശു പറഞ്ഞ്‌ നീ പറുദീസയില്‍ ആയിരുക്കുമ്പോള്‍ എന്നെയും ഓര്‍ക്കേണമേ.

ഇടതു വശത്തെ ക്ലാവര്‍ കുരിശു തിരിച്ചടിച്ചു.

അതെന്‍റെ മിടുക്കാ. ഞാന്‍ എല്ലാവരെയും തമ്മില്‍ തല്ലിക്കും. മണ്ടന്മാര്‍ അവര്‍ തലത്തല്ലി ചാകും. തല്ലി പിരിയും. ആരാണ് എന്‍റെ പിന്നില്‍ ഉള്ളത് എന്നറിയാമോ?. സാക്ഷാല്‍ ലുസിഫര്‍ ആണ്!!. എന്തിനാ എന്നറിയുമോ?. ഇത്രയും നല്ല ഒരു സഭയെ കുരിശെന്ന മായയില്‍ കുരുക്കി നശിപ്പിക്കാന്‍. യേശു എന്ന മഹാരക്ഷയെ മറന്നിട്ടു കുരിശെന്ന മഹാകെണിയില്‍ കുരുക്കി അവരുടെ ആത്മാവിനെ തറച്ചു കൊല്ലാന്‍ അങ്ങിനെ ഇപ്പോള്‍ കത്തോലിക്കാസഭയിലെ അവസാനത്തെ ശക്തിയായ സുറിയാനിസഭയെ മൂന്നാണികളില്‍ തറച്ചു അവന്‍ കൊല്ലും. ആ നാശത്തിന്റെ പെരുമ്പറ മുഴക്കം ആണ് ഈ കേള്‍ക്കുന്നത്. എന്നിട്ട് ക്ലാവര്‍ കുരിശു സക്രാരിയിലേക്ക് നോക്കി പറഞ്ഞു. നീ സര്‍വശക്തന്‍ അല്ലെ.ഞങ്ങളെയും നിന്നെയും നിന്‍റെ ജനത്തെയും രക്ഷിക്ക്.

അപ്പോള്‍ സക്രരിയില്‍ നിന്ന് ഇങ്ങനെ കേട്ടു.

ഛെ ഒന്ന് മിണ്ടാതിരി. ഇനി ഇത് കേട്ടിട്ട് വേണം അവര്‍ എന്നെ കൂടി അടിച്ചു പുറത്താക്കാന്‍. ചിലപ്പോള്‍ അവര്‍ എന്നെ ഇവിടെ നിന്നും മാറ്റി വേറെ വല്ല സുറിയാനി അപ്പവും ചിലപ്പോള്‍ അയ്യപ്പ ഓസ്തിയും, അല്‍ഫോന്‍സവീഞ്ഞും, ചാവറവെള്ളവും ഒക്കെ ഉപയോഗിക്കാന്‍ തുടങ്ങും. പിന്നെ അതിന്‍റെ പേരില്‍ വേറെ ചവിട്ടു നാടകവും, ദൈവശാസ്ത്ര സമ്മേളനവും ബ്ലോഗും ഒക്കെ അവര്‍ തുടങ്ങി സഭാനഗരത്തിനു തീയിട്ടു വീണ വായിക്കും. റോമക്കാര്‍ എന്നെ കുരിശില്‍ തറച്ചപ്പോള്‍ ഈ കുരിശു കേരളത്തില്‍ പോയി ഇത്രയും വലിയ കുരിശാകും എന്ന് എല്ലാം അറിയാവുന്ന ഞാന്‍ പോലും ഓര്‍ത്തില്ല. ഞാന്‍ ഏതാനും മണിക്കൂര്‍ കിടന്ന ഈ കുരിശിന്റെ പേരില്‍ ഇത്ര പേക്കൂത്ത് നടത്തുന്നവര്‍ എന്തെ എന്നെ മറന്നു പോയി? എന്നെ വാളിന് വെട്ടി കൊന്നിരുന്നെങ്കില്‍ അല്ലെങ്കില്‍ കുന്തത്തിനു കുത്തി കൊന്നിരുന്നു എങ്കില്‍ ഇവര്‍ എന്ത് ചെയ്യുമായിരുന്നു. അതോര്‍ക്കുമ്പോള്‍ എനിക്ക് തന്നെ ചിരി വരുന്നു. ഒരു പ്രാവ് തല കീഴായി കുന്തിന്റെ മുനയില്‍. ഒരു വാളിന്റെ ഏത് വശത്ത് ഇവര്‍ ഇവര്‍ ക്ലാവര്‍ വയ്ക്കും?.അവര്‍ അതൊക്കെ നേരെ വക്കുമോ? ചരിച്ചു വയ്ക്കുമോ? എനിക്ക് വയ്യ.

വലതു വശത്തെ കുരിശു ഇങ്ങനെ കേട്ടു. നീ ഇന്ന് മുതല്‍ എന്നോടൊപ്പം ലത്തീന്‍ പള്ളിയില്‍ ആയിരിക്കും.

ഇടതു വശത്തെ കുരിശു ഇങ്ങനെ കേട്ടു. നീ കലഹത്തിന്റെ ചിഹ്നമാകയാല്‍ എന്‍റെ ജനത്തെ ആണ് നശിപ്പിക്കുന്നത്. അത് കൊണ്ട് വിദ്വേഷം നിറയ്ക്കുന്ന ഈ സുറിയാനി പള്ളിയില്‍ തന്നെ ഇരുന്നോ. തല്ലു കൂടുന്നവര്‍ ഇനിയും തല്ലു കൂടട്ടെ. അവരാണ് അന്ധരെ നയിക്കുന്ന അന്ധര്‍ എന്ന് പണ്ട് ഞാന്‍ പറഞ്ഞത്.മനുഷ്യന്‍ കുരിശിനെ സ്രഷ്ടിച്ചു, റീത്തുകള്‍ കുരിശുകളെ സ്രഷ്ടിച്ചു. മനുഷ്യരും മെത്രാനും വൈദികരും കൂടി കുരിശു പങ്കുവച്ചു, അവര്‍ മനസ് പങ്കു വച്ചു. ജനങ്ങള്‍ പള്ളിയില്‍ തളരുന്നു. മെത്രാന്‍ ചിരിക്കുന്നു. മനസില്‍ ദൈവം മരിക്കുന്നു.

ആരോ അവിടെ കടന്നു വന്ന്‌ ഈ പാരഡി മൂളിപ്പാട്ട് പാടിയപ്പോള്‍ അവിടത്തെ തിരശീല കീറിപ്പോയി.

ഈ കുരിശൊന്നും തന്നെ നിങ്ങളെ രക്ഷിക്കില്ല. മാര്‍ത്തോമ കുരിശും മറ്റേ കുരിശിന്റെയും പേരില്‍ തമ്മില്‍ തല്ലുന്ന നമ്മളെ തമ്പുരാന്‍ അവസാന നാളില്‍ ഇടതുവശത്തേക്ക് ഒറ്റ തള്ള് തള്ളും. എന്നിട്ട് പറയും നിങ്ങള്‍ പിശാചിനും അവന്റെ സന്തതികള്‍കും വേണ്ടി ഒരുക്കിയ അഗ്നിയിലേക്ക് പോയ്കോ എന്ന്. അന്ന് ഈ ക്ലാവര്‍ കുരിശും വിരിയും, അല്ലാത്ത ലത്തീന്‍ കുരിശും പിന്നെ ഈ കിട്ടിയ ഡോളറും ഉണ്ടാക്കിയ കഴുത്തിലിട്ട ഉറാലയും,തലയിലെ തൊപ്പിയും, പ്രസംഗത്തിലെ ശാപങ്ങളും, പെരുന്നാളിന്റെ വെടിക്കെട്ടും ചെണ്ടയും, ഈ കുരിശിന്റെ പേരിലെ ദുരഭിമാനവും കള്ളവിശ്വസവും ഒക്കെ വെറും മിഥ്യ ആയിരുന്നു എന്ന് മാത്രമല്ല മഹാപപങ്ങളുടെയും ഉതപ്പിന്റെയും കാരണങ്ങള്‍ ആണെന്ന് തിരിച്ചറിയും. അന്ന് ഇന്ന് കളിച്ച ഈ രാഷ്ട്രീയക്കളി ആത്മനാശത്തിനു കാരണമായല്ലോ എന്നോര്‍ത്ത് കരഞ്ഞിട്ടു കാര്യം ഉണ്ടാവുമോ?

ഈ എളിയവരില്‍ ഒരുവന് ഇടര്‍ച്ച ഉണ്ടാക്കുന്നതിനെക്കാള്‍ നല്ലത് സ്വന്തം കഴുത്തില്‍ ഒരു തിരികല്ല് കെട്ടി കടലില്‍ ചാടുന്നതാണ് എന്ന് കര്‍ത്താവു പറഞ്ഞ ഒറ്റ വാക്ക് ഓര്‍ത്താല്‍ ഈ പൌരോഹിത്യ ഇടര്‍ച്ചയും അല്‍മായ ഇടര്‍ച്ചയും ഒഴിവാക്കാവുന്നതാണ്.നാശം പടിവാതുക്കല്‍ കാത്ത് നില്കുന്നത് കണ്ടാലും ഓടിരക്ഷപ്പെടാന്‍ നോക്കാത്തത് എന്തേ? ഈ പറയുന്ന പൌരസ്ത്യ സഭ പരിഭോഷണം എന്ന് തുടങ്ങി എന്തിനു തുടങ്ങി. പാശ്ചാത്യസഭ ശുന്യമായ് തീര്‍ന്നു. ഇന്ന് യൂറോപ്പില്‍ പള്ളികള്‍ എല്ലാം കാലി. എന്നാല്‍ കേരളത്തില്‍ പള്ളി ഫുള്‍. അപ്പോള്‍ ആ പറയുന്ന പള്ളികള്‍ പോഷിപ്പിചില്ലെങ്കില്‍ സഭ ഇല്ലാതാകും. പാശ്ചാത്യര്‍ ബുദ്ധി ഉള്ളവരാ. നമ്മള്‍ വിഡ്ഢികള്‍ അവരുടെ പരിപോഷണം കേട്ട് തമ്മില്‍ തല്ലി തല കീറുന്നു. എന്തൊരു സഭാസ്നേഹം. പരസ്പരം തല തല്ലി കീറുന്ന സഭാസ്നേഹം വേശ്യയുടെ ചാരിത്ര്യ പ്രസംഗം പോലെയാണ്. കുരിശിനും, കര്ട്ടനും കിഴക്കിനും വേണ്ടി വെറുതെ നമ്മള്‍ കര്‍ത്താവിന്റെ സ്നേഹത്തെ ബാലികൊടുക്കുന്നു.ആരൊക്കെയോ നിങ്ങളെ കൊണ്ട് മുതലെടുക്കുന്നു. നമുക്കും കിട്ടണം പണം.നമുക്കും കിട്ടണം അധികാരം.അല്ലാതെ ഈ കുരങ്ങിനെ കൊണ്ട് കനല്‍ വരിക്കുന്ന സഭ നേതാക്കളും അല്‍മായ നേതാക്കളും ദൈവതിരുമുന്‍പില്‍ കണക്കു ബോധിപ്പിക്കേണ്ടി വരും. സുവിശേഷത്തിനു നിരക്കാത്ത ആചാരങ്ങള്‍ക്ക് വേണ്ടി ജനങ്ങളെ നിങ്ങള്‍ തല്ല് കൂടി ആത്മനാശത്തില്‍ പെടല്ലേ. വെറുതെയല്ല ആയിരങ്ങള്‍ പെന്തക്കൊസ്തയിലും , അതെയിസത്തിലും, ഇസ്ലാമിലും ശരണം തേടുന്നത്.

പാശ്ചാത്യ സഭക്ക് വന്ന അഭഭ്രംശം പൌരസ്ത്യ സുറിയാനി സഭയിലും വലിയ താമസം ഇല്ലാതെ ഉണ്ടാകാന്‍ പോകുന്നതിന്റെ അശുഭലക്ഷണമാണിത്. വിശുദ്ധസ്ഥലത്ത് നില്‍ക്കുന്ന അശുദ്ധിയുടെ അടയാളം എന്ന് വിളിക്കാം. എവിടെ അധ്യാത്മികതക്ക് പകരം പാരമ്പര്യവും, നിയമവും, ബാഹ്യചാരങ്ങളും, കൊടിയും തോരണവും, തൊപ്പിയും, വടിയും കുടയും, അഹങ്കാരവും, അഞ്ജ്തയും, അധികാരവും, അവസരവാദവും അടിയൊഴുക്കുകള്‍ ആകുന്നുവോ അവിടെ ക്രിസ്തുമതം മരിക്കുന്നു. വിഗ്രഹാരാധനയും അധാര്‍മികതയും വളര്‍ന്നു നാശത്തിന്റെ തമോഗര്‍ത്തം രൂപം കൊള്ളുന്നു. പിന്നെ പറയാം എന്റെ ഉപ്പാപ്പക്ക് ഒരാനെന്ടര്‍ന്നു എന്ന്. ഊരയില്‍ തഴമ്പുണ്ടാവില്ല. നാമമാത്ര ക്രിസ്ത്യാനികള്‍. "റോമന്‍" "സുറിയന്‍ " എന്നൊക്കെ പറയാവുന്ന ഒരു ഊര് തെണ്ടിയുടെ അവസ്ഥയിലെത്തിയ ഒരു ശവസഭയായി മാറുന്ന കാഴ്ച ഇങ്ങനെ പോയാല്‍ വിദൂരമല്ല. മക്കളെ കുരിശിലെ കര്‍ത്താവിലേക്ക് നോക്കുക. ഏതെങ്കിലും തിയോളജിയിലേക്കല്ല മനുഷ്യനിര്‍മിത ദൈവശാസ്ത്ര പുഷ്പാങ്കിത കുരിശിലേക്കും അല്ല ഹൃദയം തുറക്കേണ്ടത്. ക്രൂശിതനെ മറന്നിട്ടുള്ള ഒരു കുരിശു പ്രേമവും ഒരുവനെയും രക്ഷിക്കില്ല.