ആരാണ് നല്ല ക്രിസ്ത്യാനി?

കത്തോലിക്കാ സഭക്കെതിരായി കടുത്ത ആരോപണങ്ങളുമായി അകത്തു നിന്നും പുറത്തു നിന്നും ആക്രമണം; സഭയുടെ നയങ്ങളോടുള്ള വിയോജിപ്പ് അതിരുകള്‍ കടന്ന് ഉത്തരവാദിത്വപ്പെട്ട വ്യക്തികളിലേക്ക് കത്തിക്കയറുന്നു. വിയോജിപ്പുള്ളവര്‍ മിണ്ടാതിരിക്കുകയല്ലേ വേണ്ടത്, വൈദികര്‍ തന്നെ ഇങ്ങിനെയൊക്കെ വിളിച്ചു കൂവുന്നത് ശരിയോ, അത്മായര്‍ എന്തിനു വെറുതെ പ്രാക്ക് വാങ്ങിച്ചു കെട്ടുന്നു ...... നിരവധിയായ ഇത്തരം ചോദ്യങ്ങള്‍ വിശ്വാസികളില്‍ നിന്നുയരുന്ന ഈ സാഹചര്യത്തില്‍ ആരാണ് നല്ലവന്‍, ഒരു നല്ല ക്രിസ്ത്യാനി എന്താണ് ചെയ്യേണ്ടത് എന്നൊക്കെ വിശകലനം ചെയ്യുന്നത് അസ്ഥാനത്തായിരിക്കില്ല. ഒരു ക്രിസ്ത്യാനിയെ സിറോ മലബാര്‍ സഭ കൃത്യമായി നിര്‍വ്വചിച്ചിട്ടുണ്ട്; അതിന്‍ പ്രകാരം സഭാപിതാക്കന്മാര്‍ പറയുന്നതെന്തും തിരിഞ്ഞു നോക്കാതെ അനുസരിക്കുകയും വേണം ഒരാള്‍ക്ക്‌ ക്രിസ്ത്യാനി ആയിരിക്കാന്‍. ആ വ്യവസ്ഥകള്‍ മുഴുവന്‍ കൃത്യമായി പാലിക്കുന്നവനാണോ നല്ല ക്രിസ്ത്യാനി?

സഭയെ ലോകം കാണുന്നതിങ്ങിനെ

ഇക്കഴിഞ്ഞ ഏപ്രില്‍ 14 ന് കേരളത്തില്‍ നിന്നുള്ള ഒരു പ്രമുഖ പത്രത്തിന്‍റെ സീനിയര്‍ ലേഖകനോടൊപ്പം അഹമ്മദാബാദില്‍ ഒരു പ്രസിദ്ധനായ മലയാളി ജസ്യുറ്റ്‌ വൈദികനുമായുള്ള അഭിമുഖത്തിനു ഞാനും ഉണ്ടായിരുന്നു. വാര്ധക്യത്തിലായിരുന്നിട്ടും കര്‍മ്മനിരതനായ ആ വൈദികന്‍ എല്ലാ മതങ്ങളും മനുഷ്യനെ സത്യത്തിലേക്ക് നയിക്കുന്നവ തന്നെയാണെന്ന് ഉറച്ചു വിശ്വസിക്കുന്നു. എന്‍റെ ഒപ്പമുണ്ടായിരുന്ന ലേഖകന്‍ അറിയേണ്ടിയിരുന്നത് മതസൌഹാര്‍ദ്ദമേഖലയില്‍ അദ്ദേഹം കൊയ്ത നേട്ടങ്ങളെപ്പറ്റിയായിരുന്നു. അദ്ദേഹത്തിന്‍റെ കൊച്ചു പ്രാര്‍ഥനാമുറിയിലേക്ക് അദ്ദേഹം ഞങ്ങളെ കൊണ്ടുപോയി. ഒരു വശത്ത്‌ മാതാവിന്‍റെയും യേശുവിന്‍റെയും രൂപങ്ങള്‍, ഒരു വശത്ത്‌ വലിയ ഒരു ഓംകാരം, മൂന്നാമത് വശത്ത്‌ അറബി ലിഖിതങ്ങള്‍, അവശേഷിക്കുന്ന വശം ശൂന്യം. ഒരാള്‍ക്ക്‌ ഏതു വശത്തോട്ടു തിരിഞ്ഞിരുന്നു വേണമെങ്കിലും പ്രാര്‍ഥിക്കാം എന്നാണദ്ദേഹത്തിന്‍റെ വാദം. മറ്റു മതങ്ങളെപ്പറ്റി ആഴത്തില്‍ പഠിച്ചിട്ടുള്ള അദ്ദേഹം എഴുതിയ Krishna and Christ എന്ന ബ്രഹദ്ഗ്രന്ഥം വളരെ ശ്രദ്ധ ആകര്‍ഷിച്ച ഒന്നായിരുന്നു. ഈ വര്ഷം അദ്ദേഹം പ്രസിദ്ധീകരിച്ച Corruption: A National Cancer എന്ന ഗ്രന്ഥം ദേശ വ്യാപകമായി ചര്‍ച്ച ചെയ്യപ്പെടുന്നു. ഭാരതത്തെ കാര്‍ന്നു തിന്നുന്ന അഴിമതിയുടെ വശങ്ങള്‍ തേടി അദ്ദേഹം നാല് വര്‍ഷങ്ങള്‍ സഞ്ചരിച്ചു, ആയിരക്കണക്കിന് ലേഖനങ്ങളില്‍ നിന്നുള്ള പരാമര്‍ശങ്ങള്‍ അതില്‍ ഉണ്ട്. വ്യത്യസ്തമായ ഒരു ഗവേഷണ ഗ്രന്ഥം തന്നെയാണത്.  

ബന്ധു ഈശാനന്ദ്‌ എന്ന് പൊതുവേ അറിയപ്പെടുന്ന ഡോ. ഈശാനന്ദ്‌ വേമ്പെനി SJ, സംഭാഷണത്തിനിടക്ക് ഒരു കഥ പറഞ്ഞു. 35,000 ത്തോളം വിദ്യാര്‍ഥികള്‍ പഠിക്കുന്ന ഒരു യൂണിവേഴ്സിറ്റിയുടെ വൈസ് ചാന്‍സലറായിരുന്ന   അദ്ദേഹത്തിന്‍റെ ഒരു സുഹൃത്ത് പറഞ്ഞ തായിരുന്നത്. വൈസ് ചാന്‍സലര്‍ അദ്ദേഹത്തോട് പറഞ്ഞു, “ആകെയുള്ള 35,000 വിദ്യാര്‍ഥികളില്‍ അയ്യായിരം പേര്‍ മിടുക്കര്‍, അതില്‍ ഒരായിരം പേര്‍ ബഹു മിടുക്കര്‍, അതില്‍ ഒരു നൂറു പേര്‍ അതീവ സദ്ഗുണസമ്പന്നരും ലോകോത്തര നിലവാരമുള്ള പ്രതിഭാശാലികളുമാണ്. മറ്റൊരയ്യായിരം പേര്‍ സാധാരണയില്‍ താഴെ, അതില്‍ ഒരായിരം മുഴു ഉഴപ്പന്മാര്‍, അതില്‍ ഒരു നൂറെണ്ണം റൌഡികള്‍, അതില്‍ ഒരു മൂന്നെണ്ണം തനി ഗുണ്ടകള്‍. പക്ഷെ, ഈ മൂന്നു ഗുണ്ടകളാണ് കോളേജില്‍ എന്ന് ക്ലാസ്സു വേണമെന്നും വേണ്ടെന്നും തീരുമാനിക്കുന്നതത്രേ. ഈ മൂന്നു പേര്‍ മുപ്പത്തയ്യായിരം പേരുടെ വിധി നിയന്ത്രിക്കുന്നു. ആദ്യം പറഞ്ഞ അതീവ സദ്‌ഗുണസമ്പന്നര്‍ ആ പേരിന് അര്ഹരാകണമെങ്കില്‍, ഈ മൂന്നു ഗുണ്ടകളുടെ പിടിയില്‍ നിന്നും ബാക്കി മുപ്പത്തയ്യായിരത്തെയും രക്ഷിക്കുന്നവരും കൂടി ആയിരിക്കണം.”

ഈ കഥ ആവര്‍ത്തിക്കുന്നതിലൂടെ ആരാണ് നല്ല ക്രിസ്ത്യാനിയെന്ന്‍ അദ്ദേഹം പറയുകയായിരുന്നു. ഞാന്‍ പെട്ടെന്നോര്‍ത്തത് സഹിച്ചും ക്ഷമിച്ചും ഇവിടെ ഒതുങ്ങി കഴിയുന്ന, നാം നല്ലവരെന്നു കരുതുന്ന അനേകം ക്രൈസ്തവരെപ്പറ്റിയായിരുന്നു. വിരലിലെണ്ണാവുന്ന ഏതാനും ഗുണ്ടകളാണല്ലോ സിറോ മലബാര്‍ സഭയെ ഇത്രയും അപഹാസ്യമാക്കുന്നതെന്നും ഓര്‍ക്കാതിരിക്കാന്‍ കഴിഞ്ഞില്ല, നല്ല ക്രിസ്ത്യാനികള്‍ എന്ന് നാം വിളിക്കുന്നത് വെറും ഭീരുക്കളെയാണല്ലോ എന്ന് കാണാതിരിക്കാനും കഴിഞ്ഞില്ല. ഉപനിഷത്തുകളും വേദങ്ങളും പ്രഘോഷിക്കുന്നത് ഒരേ സത്യമാണെന്ന് അദ്ദേഹം തറപ്പിച്ചു പറയുന്നു. എനിക്കോര്‍മ്മ വന്നത് സത്യത്തെ ഒരു കുടത്തിലെ ജലത്തോടുപമിച്ച ഒരു ഗുരുവിന്‍റെ വാക്കുകളായിരുന്നു. ആ കുടത്തില്‍ നിന്നും ജലം കുടിച്ചാല്‍ നമ്മുടെ ദാഹം തീരും. കുടത്തിലെ വെള്ളം വായില്‍ എത്തിക്കുന്ന മാര്‍ഗ്ഗങ്ങള്‍ നിരവധി, ഓരോ മാര്‍ഗ്ഗങ്ങളും ഓരോ മതങ്ങളായി മാറിയിരിക്കുന്നു. ഗ്ലാസ്സില്‍ എടുത്തു കുടിക്കുന്നവന്‍ സ്ട്രോ ഉപയോഗിച്ച് കുടിക്കുന്നവനെ പരിഹസിക്കുന്നു. എന്‍റെ ദൈവം കത്തോലിക്കനല്ലെന്നു മാര്‍പ്പാപ്പാ പറഞ്ഞത് മനസ്സിലാക്കണമെന്നുണ്ടെങ്കില്‍ ഈ ഉപമയും ഗ്രഹിക്കേണ്ടതുണ്ടല്ലോയെന്നും ഓര്‍ത്തു. 

 

ഫാ. ഈശാനന്ദിന്റെ  പ്രാര്‍ത്ഥനാ മുറി (Omni temple)

ഫാ. ഈശാനന്ദ് എഴുത്തിന്‍റെയും വായനയുടെയും ലോകത്ത് 

ഈ ബന്ധു ഈശാനന്ദ് കേരളത്തിലായിരുന്നു താമസിക്കുന്നതെങ്കില്‍ കിട്ടുന്ന സ്വീകരണത്തെപ്പറ്റിയും ഓര്‍ക്കാതിരിക്കാന്‍ കഴിഞ്ഞില്ല. അദ്ദേഹത്തിന്‍റെ ഒരു സഹപാഠി മൂന്നാറില്‍ ഒരാശ്രമം തുടങ്ങി, ഏതാനും വര്‍ഷങ്ങള്‍ക്കു മുമ്പ്. അതിന്‍റെ നെയിംബോര്‍ഡ് ആദ്യരാത്രിയില്‍ തന്നെ അടിച്ചു പൊട്ടിച്ചു, സ്ഥലത്തെ യുവദീപ്തി പ്രവര്‍ത്തകര്‍. ഈശോസഭക്കാരെ അടച്ചാക്ഷേപിക്കാന്‍ വരട്ടെ, അവരില്‍ ഒരുവന്‍ തന്നെയാണ് സാക്ഷാല്‍ ഫ്രാന്‍സിസ് മാര്‍പ്പാപ്പയും. വിദേശങ്ങളില്‍ മെത്രാന്മാര്‍ തെരുവിലിറങ്ങി ഓട വൃത്തിയാക്കുന്നു, തൊഴിലാളികളോടൊപ്പം ചേര്‍ന്ന് ജോലി ചെയ്യുന്നു. സാധാരണക്കാരുടെ കൂടെ കൂടി ജോലി ചെയ്യുകയും അവരോടൊപ്പം ബീഡിയും വലിക്കുന്ന ഒരു മെത്രാന്‍ വടക്കേ ഇന്ത്യയില്‍ ഉണ്ടെന്ന് എത്ര പേര്‍ക്ക് അറിയാം? ഒരു കേരള മെത്രാന്‍ ഒരു വടക്കേ ഇന്ത്യന്‍ യാത്രക്കിടയില്‍ മൂത്രമൊഴിക്കാന്‍ സ്ഥാനത്തിനൊത്ത മൂത്രപ്പുര കാണാതെ ബ്ലാഡര്‍ പൊട്ടി ആസ്പത്രിയിലായ കഥയും മലയാളികള്‍ കേട്ടിരിക്കേണ്ടതാണ്. ഈ കഥ പറഞ്ഞത് സ്വാമി സച്ചിദാനന്ദ ഭാരതി.

ഇതും ഒരു കത്തോലിക്കാ ബിഷപ്പ്

എത്ര അപഹാസ്യമായ സ്ഥാനഭ്രമക്കാരാണ് കേരളാ മെത്രാന്മാര്‍ എന്ന് കാണിക്കാന്‍ ഏതാനും ഉദാഹരണങ്ങള്‍ ചൂണ്ടിക്കാണിച്ചുവെന്നു മാത്രം. വടക്കേ ഇന്ത്യയില്‍ ഒരൊറ്റ മെത്രാനും ഈ ജാടയുമായി നടക്കാറില്ല. ഇവിടുള്ളവര്‍ കാണിക്കുന്നതോ യേശുവിനു ചേരാത്ത തോന്ന്യാസങ്ങള്‍, പറയുന്നതോ അസംബന്ധം മാത്രവും. ഇവിടെ ഒരു കല്യാണം നടന്നാല്‍ അച്ചന്മാര്‍ക്കുള്ളത് പ്രത്യേകം പള്ളി മുറിയില്‍ എത്തിക്കണം. ഇവിടെ ഒരു ബിഷപ്പ് എവിടെയെങ്കിലും പോകണമെങ്കില്‍ ആവശ്യക്കാര്‍ ആദ്യം അരമനയില്‍ ഫീസ് അടച്ച് രസീതു വാങ്ങണം. വടക്കേ ഇന്ത്യയില്‍ ഒരു ബിഷപ്പ് കല്യാണത്തിനു വന്നാല്‍ ആ തിരക്കിനിടയില്‍ അനേകരില്‍ ഒരാളായി അദ്ദേഹവും കാണും. എങ്ങിനെ നമ്മുടെ സഭ ലോകത്തിനു മുമ്പില്‍ അപമാനിതരാകാതിരിക്കും? അഹമ്മദാബാദില്‍ ഓശാന ദിവസം ലത്തിന്‍ കുര്‍ബാനയ്ക്ക് വെഞ്ചരിച്ച ഓല എടുക്കാതെ മലയാളത്തില്‍ ഓല വെഞ്ചരിച്ച് മലയാളികള്‍ക്ക് വിതരണം ചെയ്ത വൈദികനെ എന്ത് വിളിക്കണം? ഇവിടെ അനേകം വര്‍ഷങ്ങളായി താമസിക്കുന്ന മലയാളികളുണ്ട്; അവര്‍ക്കും ഒന്നേ പറയാനുള്ളൂ, ഇത് അസംബന്ധമാണ്. അടുത്ത കാലത്ത് കുടിയേറിയ, മലയാളികളായ തീവ്രവാദികളാണ് എല്ലായിടത്തും ഇവരുടെ ഇരകള്‍.

പത്രങ്ങളുടെ പരിഹാസപാത്രമായി സഭ അധ:പതിച്ചിരിക്കുന്നു; ഇന്ത്യ ടുഡെ എഴുതിയത് ശരിയാണ്; മാര്‍പ്പാപ്പയെ സിറോ മലബാര്‍ കര്‍ദ്ദിനാളന്മാരും ഗൌനിക്കുന്നില്ല, സിറോ കര്‍ദ്ദിനാളന്മാരെ മെത്രാന്മാരും ഗൌനിക്കുന്നില്ല, മെത്രാന്മാരെ വിശ്വാസികളും വിശ്വാസത്തില്‍ എടുത്തിട്ടില്ല - ഇവരുടെ കൂട്ടത്തെ സീറോ മലബാര്‍ സഭ എന്നല്ലാതെ എന്താ വിളിക്കുക? പ്രസിദ്ധ സാഹിത്യകാരനായ സക്കറിയാ പറഞ്ഞത്, "ലോകത്തില്‍ തന്നെ ഏറ്റവും യാഥാസ്ഥിതികവും പ്രതിലോമകരവുമാണ് കത്തോലിക്കാ സഭ" എന്നാണ്. ഈ സഭ പൊളിച്ചു പണിയാന്‍ ശ്രമിച്ചാല്‍ ശ്രമിക്കുന്നവന്‍ വിഡ്ഢിയാവും, വീണ്ടും ഉപയോഗിക്കാന്‍ കൊള്ളാവുന്ന ഒന്നും ഇന്ന് സിറോ മലബാര്‍ സഭയിലില്ലായെന്നതാണ് സത്യം - വേണ്ടതൊട്ടില്ല താനും, വേണ്ടാത്തതെല്ലാം ഉണ്ട് താനും.  

ഒരു നല്ല ക്രിസ്ത്യാനി ആയിരിക്കാന്‍ സമൂഹത്തില്‍ മൂല്യച്യുതി വരുത്തുന്ന അംശങ്ങള്‍ക്കെതിരായി സുധീരം പട പോരുതേണ്ടതുണ്ട്. അതാണ്‌ യേശു ചെയ്തത്, അതാണ്‌ ശിക്ഷ്യന്മാരും ചെയ്തത്. വാല് ചുരുട്ടി മടയില്‍ ഒതുങ്ങിയിരുന്നു സൂത്രത്തില്‍ കാര്യം നേടുന്നവരില്‍ കേരളത്തിലെ സിറോ മെത്രാന്മാര്‍ മാത്രമല്ല ഉള്ളത്. മോഡിയുടെ നാട്ടില്‍ ക്രിസ്ത്യാനികള്‍ക്ക് പരമ സുഖം എന്ന് ഒരു ഓര്‍ത്തഡോക്സ് ബിഷപ്പ് പറഞ്ഞത് വായിച്ചിരിക്കുമല്ലോ. അദ്ദേഹത്തിനു വേണ്ടത് ഏതാനും സ്കൂളുകള്‍ക്ക് പെര്മിഷന്‍ എന്നാണു കേട്ടത്. എല്ലാവര്ക്കും സ്വന്തം കാര്യം, അതിനെന്തും വില്‍ക്കും. അനുദിനമെന്നോണമാണ് കേരളത്തിലെ കാലാവസ്ഥ മാറിക്കൊണ്ടിരിക്കുന്നത്. ഒരു വര്ഷം മുമ്പ് വരെ മടിച്ചു നിന്ന അത്മായരും ഇപ്പോള്‍ അടര്‍ക്കളത്തിലിറങ്ങിയിരിക്കുന്നു. മെത്രാന്മാരുടെ ന്യായീകരണങ്ങള്‍ പ്രസിദ്ധീകരിക്കാന്‍ മെത്രാന്‍ മാസികകള്‍ മാത്രമേ ഇന്നുള്ളൂ. സമൂഹത്തില്‍ നിന്ന് ഒറ്റപ്പെട്ടുകൊണ്ടിരിക്കുന്ന കേരളത്തിലെ മെത്രാന്മാര്‍ എത്രകാലം കൂടി ഓഡി കാറുകളില്‍ പിടിച്ചു നില്‍ക്കും എന്നേ ഇനി അറിയേണ്ടതുള്ളൂ.