ആ ആ ആ ആമ്മേന്‍

ഈ വേത്താനത്തച്ചന്‍ അമേരിക്കയിലെ ഗാര്‍ലണ്ടില്‍ പോയി ഇത്ര ബുദ്ധിമോശം കാണിക്കുമെന്ന് കരുതിയില്ല. അല്മായാ ശബ്ദം പോലുള്ള ബ്ലോഗ്ഗുകള്‍ വായിക്കരുതെന്നുള്ള അങ്ങേരുടെ പ്രസംഗം കേട്ട പലരും അല്മായാ ശബ്ദം എവിടെയാണെന്ന് അന്വേഷിക്കുമെന്നുള്ളത് ഉറപ്പല്ലേ? തപ്പി ചെല്ലുന്നവര്‍ സത്യജ്വാലയും കൂടി വായിച്ചിട്ടേ മടങ്ങാന്‍ ഇടയുള്ളൂ താനും. മറഞ്ഞിരിക്കുന്നത് കാണാനല്ലേ മാനുഷ്യന് താത്പര്യം. പകുതി മറഞ്ഞത് കൂടുതല്‍ സുന്ദരമെന്നാണ് കവികള്‍ പോലും പറയുന്നത്. അല്മായാ ശബ്ദം വേണ്ടപ്പെട്ടവര്‍ വായിക്കുന്നുണ്ടെന്ന് എല്ലാവര്ക്കും അറിയാവുന്ന കാര്യമായിരുന്നെങ്കിലും ഇത്ര പരസ്യമായി പറഞ്ഞ് അതിന് വായനക്കാരെ ഉണ്ടാക്കേണ്ടായിരുന്നു. ഇയ്യിടെ ഒരു മെത്രാന്‍ എന്ത് ചെയ്തെന്നോ? ഒരു ആഘോഷത്തില്‍ പങ്കെടുക്കാമെന്ന് സമ്മതിച്ചു. രണ്ടു ദിവസം കഴിഞ്ഞപ്പോളാണ് കേട്ടത് പ്രസംഗകരുടെ കൂട്ടത്തില്‍ ഒരു പ്രസിദ്ധ വിമതനുമുണ്ടെന്ന്. മെത്രാന്‍ മിണ്ടിയില്ല, ചടങ്ങിനു രണ്ടു ദിവസം മുമ്പ് മെത്രാന്‍ എപ്പോഴാ വരുന്നതെന്ന് ബന്ധപ്പെട്ടവര്‍ അന്വേഷിച്ചപ്പോഴാണ് മെത്രാന്‍ വരുന്നില്ലെന്ന് അരുളിയത്. വേറൊരു മെത്രാന് പറ്റിയ അബദ്ധം അതില് ഭയങ്കരം. കല്യാണം ആശിര്‍വ്വദിക്കാന്‍ ചെന്നപ്പോള്‍ അതാ നില്‍ക്കുന്നു മുമ്പില്‍, ഒന്നാന്തരം ഒരു വിമതന്‍. ഈ വിമതരെ ചവിട്ടിയിട്ടു നടക്കാന്‍ മേലെന്നായപ്പോഴായിരിക്കണം വേത്താനത്തച്ചന്‍ ഹൃദയ വേദനയോടെ ഇങ്ങിനെ പറഞ്ഞത്. ഇരയുടെ ഫോട്ടോ കാണിക്കാതെ ക്വട്ടേഷന്‍ കൊടുക്കാന്‍ പറ്റില്ലല്ലോ. അത് കൊണ്ട് സംഭവിച്ചതായിരിക്കണം ഈ പിഴ.

കളരിക്കലെ ചാക്കോ സാര്‍ പറയുന്നതുപോലെയാണെങ്കില്‍ ഭൂമിയില്‍ രണ്ടുതരം ആളുകളാണ് ഉണ്ടായിരിക്കാന്‍ സാദ്ധ്യത. ഒരു വിഭാഗം അവിടുത്തെ ഇഷ്ടം ഭൂമിയില്‍ നടപ്പാക്കാന്‍ ശ്രമിക്കുമ്പോള്‍ മറുവിഭാഗം ഇവിടുത്തെ ഇഷ്ടം സ്വര്‍ഗ്ഗത്തില്‍ നടത്താന്‍ ശ്രമിക്കുന്നു. സീറോ മലബാര്‍ സഭയെ വിവരമുള്ള ആരും ആദ്യത്തെ വിഭാഗത്തില്‍ പെടുത്താന്‍ ഇടയില്ല, അതുകൊണ്ടായിരിക്കണം അതിനുള്ളിലും രണ്ടു വിഭാഗമുണ്ടായിരിക്കുന്നത്; അധികാരികളുടെ ഇഷ്ടം വിശ്വാസികളില്‍ നടപ്പാക്കുന്നവരും, വിശ്വാസികളുടെ ഇഷ്ടം അരമനകളില്‍ നടപ്പാക്കാന്‍ ശ്രമിക്കുന്നവരും. ഒടുക്കത്തെ മടയ ലേഖനപ്രകാരം ആകെ സീറോ സഭയിലുള്ളത് 45 ലക്ഷം അംഗങ്ങള്‍. 123.6 കോടി ജനസംഖ്യയുള്ള ഒരു രാജ്യത്ത് അര ശതമാനം പോലുമില്ലാത്ത ഈ സഭ മോഡിയെ പിന്തുണക്കാം എന്ന് പറയുമ്പോള്‍ BJP ക്കാര്‍ക്ക് എങ്ങിനെ അത് വേണ്ടാന്ന് പറയാന്‍ കഴിയും? എന്‍റെ അറിവ് ശരിയാണെങ്കില്‍ അഞ്ചു വര്ഷം മുമ്പും നമ്മുടെ ജനസംഖ്യ ഇത് തന്നെയായിരുന്നു. അങ്ങിനെയെങ്കില്‍ കുറഞ്ഞത്‌ 15 ലക്ഷം പേരെങ്കിലും ഇവിടെ നിന്ന് പോഴിഞ്ഞിട്ടുണ്ട്. നാലു മക്കളില്‍ കൂടുതല്‍ ആയാല്‍ പതിനായിരം രൂപാ സമ്മാനം പദ്ധതി എല്ലാ ഇടവകകളിലേക്കും വ്യാപിപ്പിക്കാന്‍ ശ്രമിക്കുന്നത് ഇത് മുന്നില്‍ കണ്ടുകൊണ്ടായിരിക്കണം. ആ പതിനായിരം രൂപയ്ക്കു വേണ്ടി ഏതെങ്കിലും പെണ്ണിനെ ആരെങ്കിലും ബുദ്ധിമുട്ടിക്കാന്‍ ശ്രമിച്ചാല്‍ വിവരം അറിയും. അത്രേ എനിക്ക് പറയാനുള്ളൂ. ഒരു സെസ്സെറിയന്‍ ഓപ്പറേഷന് ഇപ്പൊ മുപ്പതിനായിരം രൂപയാ; നല്ല നിലയില്‍ ഒരുത്തനെ അഞ്ചു വര്ഷം വളര്‍ത്തി വലുതാക്കാന്‍ മറ്റൊരു ആറു ലക്ഷം വേണം. CBSC പള്ളിക്കൂടത്തില്‍ അഡ്മിഷന്‍ ഒപ്പിക്കാന്‍ വേണം കുറഞ്ഞത്‌ മുപ്പതിനായിരം. ഉണ്ടാകുന്നത് പെണ്ണാണെങ്കിലോ, തൃശ്ശൂര്കാരാണെങ്കില്‍ മരിക്കുവോളം ക്ഷമിച്ചെന്നിരിക്കില്ല. എന്തായാലും, ഈ പോക്ക് പോയാല്‍ സഭക്ക് വംശനാശം സംഭവിച്ചെക്കില്ലേയെന്നു ഞാന്‍ സംശയിക്കുന്നു.

കാഞ്ഞിരപ്പള്ളിയില്‍ നിന്ന് പെമ്പ്രന്നോര് ദുക്രാനാ കഥ പറയാന്‍ വിളിച്ചിരുന്നു. ഇപ്പോള്‍ കുര്‍ബാന മദ്ധ്യേ എല്ലാവരും പോയി സ്ലീബാ മുത്തി മാര്‍ത്തോമ്മായുടെ പാരമ്പര്യം കാത്തു സംരക്ഷിച്ചു കൊള്ളാമെന്നുറപ്പിക്കുന്ന ഒരു ചടങ്ങ് കൂടി പിറന്നിരിക്കുന്നുവെന്നു കേട്ടപ്പോള്‍ ചിരിക്കാനാണ് തോന്നിയത്. മാര്‍ത്തോമ്മാ പഠിപ്പിച്ചത് പോലെ ചെയ്യണമെന്ന് ആരും നിഷ്കര്‍ഷിക്കുന്നില്ല, ആ പാരമ്പര്യം കളയരുതെന്നെ എല്ലാവരും പറയുന്നുള്ളൂ. കാതില്‍ കടുക്കനുമിട്ടു കുടുമ്മിയും മുറുക്കി ഒറ്റമുണ്ടും നേര്യതുമായി കാലന്‍ കുടയും കുത്തി നസ്രാണികള്‍ പള്ളിയില്‍ വരുന്ന കാലം ഹൂ... ഹോ.... ഓര്‍ക്കുമ്പോള്‍ കുളിര് കോരിയിടുന്നതുപോലെ തോന്നുന്നു. അന്നൊക്കെ ക്രിസ്ത്യാനിക്ക് നല്ല വിലയുണ്ടായിരുന്നുവെന്നത് വിസ്മരിക്കാനാവില്ല. എണ്ണ തൊടാന്‍ അമ്പലത്തില്‍ ചെല്ലുന്ന നസ്രാണിയെ അസൂയയോടെ നോക്കുമായിരുന്നത്രേ നമ്പൂരിമാര്‍ പോലും. അന്ന് ‘ഞാന്‍ ക്രിസ്ത്യാനിയാടാ’ എന്ന് പറയാന്‍ അഭിമാനിക്കുന്ന മനുഷ്യരായിരുന്നു ഉണ്ടായിരുന്നതെങ്കില്‍ ഇന്ന് കുരിശുവര തിങ്കളാഴ്ച പോലും കരിക്കുരിശും വരച്ചു പുറത്തിറങ്ങാന്‍ ആളുകള്‍ തയ്യാറാകുന്നില്ല. അന്ന് ഭൂകമ്പം ഉണ്ടായാല്‍ എല്ലാവരും പള്ളിക്കകത്തേക്കായിരുന്നു ഓടിയിരുന്നതെങ്കില്‍ ഇന്ന് പള്ളിയിലിരിക്കുന്നവര്‍ പുറത്തേക്കാണ് ഓടുക. അന്ന് മരിക്കാന്‍ കിടക്കുന്നവന് ഈശോ മറിയം യൌസേപ്പേന്ന പ്രാര്‍ത്ഥന ചൊല്ലിക്കൊടുക്കുമായിരുന്നെങ്കില്‍ ഇന്ന് അത് പ്രതീക്ഷിച്ച് ആരും മരിക്കാന്‍ കിടക്കണമെന്നില്ല. വലിയ ആഴ്ചയില്‍ കുമ്പസ്സാരക്കൂടിനു മുന്നില്‍ ഉന്തും തള്ളും വരെ നടക്കുമായിരുന്നു എന്ന് കേട്ടിട്ടുണ്ട്, അതും പോയി. മെത്രാന്‍ കണക്കു നോക്കുമ്പോള്‍ വാര്‍ഡ്‌ കൂട്ടായ്മകള്‍ മുറക്ക് നടക്കുന്നുണ്ട്, നന്നായി നടന്നത് കാപ്പി സല്ക്കാരമായിരുന്നുവെന്നത് അങ്ങേര് അറിയുന്നില്ലല്ലോ. അല്‍പ്പകാലം മുമ്പ്, ഒരു ബന്ധു വീട്ടില്‍ രാത്രി കിടക്കേണ്ടി വന്നു. അറിയപ്പെടുന്ന ഭക്തരായിരുന്നവര്‍. എത്ര തിരക്കുണ്ടായിരുന്നാലും സന്ധ്യാ പ്രാര്‍ത്ഥന അവര്‍ മുടക്കുമായിരുന്നില്ല. അന്നാ പ്രാര്‍ഥനയില്‍ ഞാനും കൂടി. പകുതിയായപ്പോള്‍ പിള്ളേര് മൂന്നും ഉറങ്ങി, ഒരു കാല്‍ ഭാഗം കൂടി കഴിഞ്ഞപ്പോള്‍ അമ്മ ഉറങ്ങി, പിറകെ മരുമകള്‍, ഒടുവില്‍ വീട്ടപ്പനും. ആരെങ്കിലും ഉണരുമായിരിക്കും എന്ന് വിചാരിച്ചു ഒരു പത്നഞ്ചു മിനിട്ട് കൂടി ഞാന്‍ അവിടെ ഇരുന്നു; നിരാശയായിരുന്നു ഫലം.

പണ്ട് പള്ളിയോടു ചേര്‍ന്ന് ഒരിറച്ചിക്കടയും കാണുമായിരുന്നെന്നു കേട്ടിട്ടുണ്ട്. ഇറച്ചി മേടിക്കാന്‍ പോകുന്ന വഴി പള്ളിയിലും പോകുമായിരുന്ന അന്നത്തെ ചേട്ടന്മാരുടെ മക്കള്‍ ഇന്ന് ഡ്രൈവര്‍മാരായിട്ടാണ് പള്ളിയില്‍ പോകുന്നതെന്ന് ആരും അറിയുന്നില്ല. ഇപ്പോ ട്രെന്‍ഡ് വീണ്ടും മാറി. പുതു തലമുറ  പറയുന്നത്, പത്തു കല്‍പ്പനകള്‍ അപ്ഡേറ്റ് ചെയ്യാനുള്ള സമയം കഴിഞ്ഞുവെന്നാണ്. വിമതരെ ഒഴിവാക്കാനുള്ള ആപ്പ് ഉണ്ടാക്കി സഭയുടെ നിറുകയില്‍ ഫിറ്റ് ചെയ്യാന്‍ പറ്റുമോയെന്നാണ് ഇപ്പോള്‍ മെത്രാന്മാര്‍ അന്വേഷിക്കുന്നത്. പരസ്യമായി കുരിശു വരക്കാന്‍ ശ്രീശാന്ത് കാണിച്ച ധൈര്യം ഒരു ക്രിസ്ത്യാനിക്കില്ലല്ലോ എന്ന് കാണുമ്പോള്‍ എങ്ങിനെ കരച്ചില്‍ വരാതിരിക്കും? അതിന്‍റെ ഫലമാണോ അങ്ങേര്‍ക്കു കിട്ടിയ ആയുഷ്കാല വിലക്കെന്നതിനെപ്പറ്റിയും വിമത വിഭാഗം അന്വേഷിക്കുന്നത് കൊള്ളാം. മെത്രാന്മാരുടെ സ്വകാര്യ പരിപാടികളുടെ പിറകെയും ഇപ്പോള്‍ ചില വിദേശ സുറിയാനിക്കാര്‍ ഇറങ്ങിയിട്ടുണ്ടെന്ന് കേട്ടു. ഏതായാലും അല്മായാ ശബ്ദം പുറത്തു വന്നതിനു ശേഷമാണ് വിമതരുടെ ഒരു ധ്രുവീകരണം അന്താരാഷ്‌ട്ര തലത്തില്‍ ഉണ്ടായിരിക്കുന്നതെന്ന് പറയാതെ വയ്യ. ലത്തിന്‍ സഭയുടെ പിന്നിലാണ് നാമെങ്കിലും ഉള്ളിലെ വിമതരുടെ കാര്യത്തില്‍ ഏറെ മുമ്പിലാണെന്നു പറയാതിരിക്കാന്‍ വയ്യ. മെത്രാന്മാര്‍ക്ക് വകുപ്പ് വിഭജിച്ചു കൊടുക്കുന്ന വിഭാഗം ഒരു വിമതപ്രതിരോധ വകുപ്പ് കൂടി ഉണ്ടാക്കേണ്ടി വന്നേക്കാം. വിശ്വാസം നഷ്ടപ്പെട്ട ഒരു തലമുറയെ സൃഷ്ടിച്ചെടുത്തതിന്‍റെ ഉത്തരവാദിത്വം ഏല്‍ക്കാന്‍ ഒരു മെത്രാനും എന്നെങ്കിലും തയ്യാറാകുമെന്ന് ഞാന്‍ കരുതുന്നില്ല.