"നിങ്ങളിൽ പാപമില്ലാത്തവർ ഇവളെ കല്ലെറിയട്ടെ."

ഡോ. ജെയിംസ് കോട്ടൂര്‍ എഴുതിയ MEDICINE OF MERCY, NOT SEVERITY എന്ന അത്മായാ ശബ്ദത്തില്‍ വന്ന ലേഖനം നിരവധി പണ്ഡിതര്‍ ചര്‍ച്ച ചെയ്യുന്നതായി അറിയുന്നു. ഈടുറ്റ ലേഖനങ്ങള്‍ അമേരിക്കന്‍ പ്രസിദ്ധീകരണങ്ങളില്‍ എഴുതുന്ന ശ്രി. ജൊസഫ് മാത്യു (USA)  ഈ ലേഖനത്തിന് എഴുതിയ കുറിപ്പ് ഒരു പ്രത്യേക പോസ്ടായി ഞങ്ങള്‍ ഇവിടെ കൊടുക്കുന്നു. എഡിറ്റര്‍

 

നല്ലയൊരു ലേഖനം വായനക്കാർക്കായി കാഴ്ച വെച്ച പണ്ഡിതനായ ഡോ. ജെയിംസ് കോട്ടൂരിനെ അഭിനന്ദിക്കുന്നു.  

കാരുണ്യത്തിന്റെ ദേവനായ യേശു  പാപിനിയായ സ്ത്രീയെ കല്ലെറിഞ്ഞ ജനക്കൂട്ടത്തോടായി പറഞ്ഞു, "നിങ്ങളിൽ പാപമില്ലാത്തവർ ഇവളെ കല്ലെറിയട്ടെ."  നാഥൻ അവളെ സമാധാനിപ്പിച്ച് നന്മയുടെ ശ്രീകോവിൽ തുറന്നു കൊടുത്തു. ഒറ്റുകാരനായ യൂദായ്ക്കും ഗുരുവിനെ നിഷേധിച്ച പീറ്ററിനും അവിടുന്ന് തീന്മേശയിൽ നിന്ന് അപ്പവും പാനം ചെയ്യാൻ വീഞ്ഞും കൊടുത്തു. വലതു ഭാഗത്ത് തറച്ച നല്ല കള്ളനും സ്വർഗരാജ്യത്തിൽ  ഇടം കൊടുത്തു. ചുങ്കക്കാരും വേശ്യകളും കുഷ്ഠ രോഗികളും അവിടുത്തെ കാരുണ്യം ലഭിച്ചവരായിരുന്നു. 

സഭയിന്നു നയിക്കുന്നത് ക്രിസ്തുവിന്റെ തത്ത്വങ്ങളെ ബലികഴിച്ച യാഥാസ്ഥിതിക ലോകത്തിലെ മൂത്തു മുരടിച്ച ബുദ്ധിയും ബോധവും നശിച്ച ഒരു കൂട്ടം കർദ്ദിനാൾമാരും അഭിഷിക്ത ലോകവുമാണ്.  സഭയെ  ഇവർ നൂറ്റാണ്ടുകൾ പിന്നിലേക്ക് നയിക്കുന്നു.  ഇക്കഴിഞ്ഞ മാസം നടന്ന ബിഷപ്പ് സിനഡിൽ സ്വവർഗരതിക്കാരോടും വിവാഹ മോചനം നടത്തിയവരോടും സിനഡിൽ  സംബന്ധിച്ചവർ   അനുഭാവപൂർവമായ ഒരു പരിഗണന കാണിച്ചില്ല. 62 വോട്ടിനെതിരെ 118 വോട്ടിന്  യാഥാസ്ഥിതിക ലോകം  അവരുടെ മധ്യകാല യുഗത്തിലെ പഴഞ്ചനാശയങ്ങൾ നടപ്പിലാക്കിക്കൊണ്ട്   വിജയിച്ചു കഴിഞ്ഞു. സഭയുടെ ആത്മീയ ധാരയിൽ നിന്നും അകത്തി നിർത്തിയ സ്വവർഗക്കാരെ ഫ്രാൻസീസ് മാർപാപ്പാ അനുഭാവപൂർവ്വമാണ് കാണുന്നത്. അവരെപ്പറ്റി ചോദ്യങ്ങൾ വന്നപ്പോൾ ' ഞാൻ ആരാണ് അവരെ വിധിക്കാൻ' എന്നായിരുന്നു മാർപാപ്പായുടെ മറുപടി. അവർക്കും സഭയുടെ വാതായനങ്ങൾ തുറന്നുകൊടുക്കാൻ മാർപാപ്പാ ആഗ്രഹിക്കുന്നു.  

സഭയിന്ന് ജീർണ്ണിച്ചു കൊണ്ടിരിക്കുകയാണ്. സഭയുടെ  ഈ പോക്കിൽ മാറ്റങ്ങൾ വരുത്തിയില്ലെങ്കിൽ നാളത്തെ വലിയ തലക്കെട്ടിലുള്ള വാർത്തകളിൽ കത്തോലിക്കാ സഭയുണ്ടാവില്ല. സഭ വിട്ടുപോവുന്ന സ്വവർഗരതികളെയും പുനർവിവാഹം ചെയ്യുന്നവരെയും മടക്കിക്കൊണ്ടുവരാൻ മൂത്തുമുരടിച്ച സഭയുടെ യാഥാസ്ഥിതികരായ പുരോഹിതലോകം അനുവദിക്കില്ല. ഏകാധിപതികൾ ഭരിച്ചിരുന്ന നാടുകളിൽ നിന്നു വന്ന   യാഥാസ്ഥിതികരായ ഒരു പോളീഷ് മാർപാപ്പയും ഒരു ജർമ്മൻ മാർപാപ്പായും സഭ മൊത്തം യാഥാസ്ഥിതികരെക്കൊണ്ട് നിറച്ചിരിക്കുകയാണ്. പൌരാവകാശമെന്നതു  എന്തെന്ന് ഈ മാർപ്പാപ്പാമാർക്ക് അറിയില്ലായിരുന്നു.  ഇന്നത്തെ സഭ  നയിക്കുന്നതും   വില്ലന്മാരായ അതേ യാഥാസ്ഥിതികരുടെ   'ടീ പാർട്ടി'  സിനഡാണ്.  ഇവരുടെ പദ്ധതികൾ മുഴുവൻ ബൈബിളിലെ പ്രാകൃത നിയമം തലയിൽവെച്ച്  'ഷാരിയാ'  നിയമം പോലുള്ള നിയമങ്ങൾ  സഭയിൽ നടപ്പിലാക്കാനാണ്. പ്രാകൃത വചനങ്ങൾ കഷത്തിൽ വെച്ചുകൊണ്ട് സ്വവർഗരതികളെ കല്ലെറിയാനും വേണ്ടിവന്നാൽ ഇവർ തയാറാകും. 

കുടുംബാസൂത്രണ പദ്ധതികളിൽ സഭ കടും പിടുത്തം പിടിക്കുന്നു. ഗർഭ നിരോധക മാർഗങ്ങൾ പിന്തുടരുന്നത്  പാപമെന്നു പറയുന്നു. ഇതൊക്കെ ഏതു വേദ ഗ്രന്ഥങ്ങളിൽ എഴുതി വെച്ചുവെന്നു  സഭ വിവരിക്കുന്നില്ല. ഗർഭനിരോധക  മാർഗങ്ങളിൽക്കൂടി ഗർഭച്ഛിദ്രം തടയാൻ സാധിക്കുമെന്ന വിവേകവും യാഥാസ്ഥിതികർക്ക് അറിയേണ്ട ആവശ്യമില്ല. ഏതു ദുർമ്മാർഗിയായ ഭര്ത്താവിന്റെ കൂടെ ജീവിച്ചാലും കൂടുതൽ മക്കളെ ഉത്ഭാദിപ്പിച്ചു സ്ത്രീകൾ ജീവിക്കണം അല്ലെങ്കിൽ അന്യ പുരുഷന്റെ കൂടെ പൊറുക്കുന്ന സ്ത്രീയേയും പുരുഷൻ വഹിച്ചുകൊള്ളണമെന്ന നയമാണ് സഭയ്ക്കുള്ളത്. ഏതു സാഹചര്യത്തിലും   വിവാഹമോചനം പാപമെന്നാണ് സഭയുടെ പഴഞ്ചന്മാർ പഠിപ്പിക്കുന്നത്. അവർക്ക്,  ദിവ്യകാരുണ്യം പാടില്ല, കള്ളനും കൊലപാതകിയ്ക്കും അനുതപിച്ചാൽ പാപമോചനമുണ്ട്;  ദിവ്യകാരുണ്യവും സ്വീകരിക്കാം. 

സഭയുടെ ഇന്നത്തെ പോക്കിൽ ഫ്രാൻസീസ് മാർപാപ്പാ  നിരാശയുടെ ശബ്ദത്തിൽ സംസാരിക്കുന്നു.  അദ്ദേഹംതന്നെ ഒരിക്കൽ ഞാൻ പാപിയാണെന്ന് വിളിച്ചു പറഞ്ഞു. വചനത്തിലെ അടിസ്ഥാന തത്ത്വങ്ങൾ  മാനിക്കാതെ സഭയിലെ ബ്യൂറോ ക്രസ്സിയും തൊഴുത്തിൽ കുത്തും സഭാ രാഷ്ട്രീയവും അവസാനിപ്പിച്ചില്ലെങ്കിൽ ചീട്ടുകൊട്ടാരം പോലെ സഭ തകർന്നു വീഴുമെന്നും  മാര്പാപ്പാ മുന്നറിയിപ്പു നല്കി. സ്വവർഗ രതിക്കാരെയും വിവാഹമോചനം നടത്തിയവരെയും  സഭയുടെ കുഞ്ഞുങ്ങളായി കാണാൻ അദ്ദേഹം ആഗ്രഹിക്കുന്നു. സഭയുടെ അധിപനെന്ന നിലയിൽ അവരെ ഉൾക്കൊള്ളാൻ സാധിക്കാത്തതിലുള്ള നിരാശകൊണ്ടായിരിക്കാം അദ്ദേഹം സ്വയം പാപിയെന്ന് എറ്റു പറഞ്ഞത്. "ഞാനിന്ന് കൂട്ടിലടയ്ക്കപ്പെട്ട കിളിയെപ്പോലെയാണെന്നും" മാർപാപ്പാ പറഞ്ഞു.

The author can be contacted at: : jmathew@msn.com