'സത്യജ്വാല'-കിഴക്കുദിച്ച വെള്ളിനക്ഷത്രം!

ഫാ. ഏബ്രഹാം വെള്ളാംതടത്തില്‍

2012 ഏപ്രില്‍മാസത്തില്‍ നവജാതയായ 'സത്യജ്വാല' എന്ന മാധ്യമശിശു, വിദ്വാന്മാര്‍ക്ക് തിരിച്ചറിയുവാനാകുന്ന ''കിഴക്കുദിച്ച അവന്റെ നക്ഷത്ര''മാണെന്ന് എനിക്കു തോന്നുന്നു. അതിന്റെ 'മുഖക്കുറി'യിലൂടെ രേഖപ്പെടുത്തപ്പെട്ടിരിക്കുന്ന ആ ശിശുവിന്റെ ജാതകം എന്റെ തോന്നലിനെ സ്ഥിരീകരിക്കുന്നു. ക്രിസ്ത്യാനികളെന്ന് തെറ്റിദ്ധരിക്കപ്പെട്ടിരിക്കുന്ന 'ചര്‍ച്ചിയാനി'കള്‍ക്കുവേണ്ടി ഒരുക്കിയിരിക്കുന്ന രക്ഷയുടെ പ്രകാശമായി ഇതിനെ ഞാന്‍ കരുതുന്നു. ഇത് ''പലരുടെയും വീഴ്ചയ്ക്കും'' ചവിട്ടിത്താഴ്ത്തപ്പെട്ട അനേക സത്യങ്ങളുടെ ''എഴുന്നേല്പിനും'' മുഖാന്തരമാകുമെന്നും തോന്നുന്നു. അതോടൊപ്പംതന്നെ, 'ചര്‍ച്ചിയാനി'കളെ 'ക്രിസ്ത്യാനിപ്പട്ടം'കെട്ടിച്ച്, അവരെ അടക്കിവാണ് ചൂഷണംനടത്തുന്ന അനേകം ഹേറോദ്മാരും ചുറ്റുമുള്ള മഹാപുരോഹിത-ശാസ്ത്രിവൃന്ദവും ഈ ശിശുവിന്റെ ജാതകമറിഞ്ഞു ഭ്രമിക്കും. ''ശിശുവിനെക്കുറിച്ച് അന്വേഷിച്ചു കണ്ടെത്തിയാല്‍ ഞങ്ങളും ചെന്ന് അതിനെ ന(ത)മസ്‌കരിക്കേണ്ടതിന്'' എന്ന ഭാവത്തില്‍, ഈ ശിശുവിനെ നശിപ്പിക്കേണ്ടതിന് സകലമാര്‍ഗ്ഗങ്ങളും അവര്‍ പ്രയോഗിക്കുമെന്നു നിശ്ചയം. വേണ്ടിവന്നാല്‍, സമാനചിന്താഗതികാരായ എല്ലാ 'ആണ്‍'മാധ്യമശിശുക്കളെയും കൊല്ലേണ്ടതിന് ഗുണ്ടാ-ക്വട്ടേഷന്‍ സംഘങ്ങളെ നിരത്തിയെന്നുംവരാം.

പ്രസിദ്ധദൈവശാസ്ത്രജ്ഞനായ ഹോള്‍ഗര്‍ കേര്‍സ്റ്റന്‍ 'Jesus Lived in India' എന്ന തന്റെ ചരിത്രഗവേഷണഗ്രന്ഥത്തില്‍ സമര്‍ത്ഥിച്ചിരിക്കുന്നതുപോലെ, 'യേശുവിന്റെ ദൗത്യം തിരിച്ചറിയാനാവാത്തവിധം വികലമാക്കപ്പെട്ടിരിക്കുന്നു' (The message of Jesus has been distorted beyond recognition). ഏതാനും വര്‍ഷങ്ങള്‍ക്കുമുമ്പ് 'ചര്‍ച്ചിയന്‍ ലോക'ത്തെ ഇളക്കിമറിച്ച, വിവാദം സൃഷ്ടിച്ച, ‘Da Vinci Code’ -ന്റെ ഗ്രന്ഥകര്‍ത്താവ് പറഞ്ഞു: “We are not against the message of Jesus, but the message ABOUT Jesus''(ഞങ്ങള്‍ എതിര്‍ക്കുന്നത് യേശുവിന്റെ ദൗത്യത്തെയല്ല, യേശുവിനെപ്പറ്റിയുള്ള ദൗത്യത്തെയാണ്).

സുതാര്യവും ലളിതവും ജീവസ്പര്‍ശിയുമായ യേശുവിന്റെ ദൗത്യം, ഈ ഭൂമിയില്‍ ദൈവരാജ്യം സ്ഥാപിക്കുക എന്നതായിരുന്നു. ദൈവരാജ്യം പടുത്തുയര്‍ത്തിയത് രണ്ടു ബന്ധങ്ങളിലൂടെ. മുകളില്‍നിന്ന് താഴോട്ടുള്ള, അഥവാ താഴെനിന്നു മുകളിലോട്ടുള്ള, ബന്ധം: 'തന്റെ പൂര്‍ണ്ണആത്മാവോടും പൂര്‍ണ്ണമനസ്സോടും പൂര്‍ണ്ണശക്തിയോടുംകൂടെ ദൈവത്തെ-ധാര്‍മ്മികപരമാധികാരത്തെ, സത്യവും നീതിയുമായ ദൈവത്തെ -സ്‌നേഹിക്കുക'. രണ്ടാമത്തേത്, ഇടത്തുനിന്നു, വലത്തോട്ടുള്ള, അഥവാ വലത്തുനിന്ന് ഇടത്തോട്ട് ഉള്ള മനുഷ്യവ്യാപാരബന്ധങ്ങളെ ഈ ബന്ധത്തില്‍ അധിഷ്ഠിതമാക്കുക എന്നതാ ണ്; സത്യത്തിലും നീതിയിലും സ്‌നേഹത്തിലും അധിഷ്ഠിതമാക്കുക എന്നതാണ്. ഇതിലേക്ക് ഉള്‍ക്കാഴ്ച പകരുന്ന മറ്റൊന്നുകൂടി യേശു കൂട്ടിച്ചേര്‍ത്തു: ''ഈ രണ്ടു പ്രമാണങ്ങളില്‍ സകലന്യായപ്രമാണവും പ്രവാചകന്മാരും അടങ്ങിയിരിക്കുന്നു'', എന്ന്! കേവലം ആചാരാനുഷ്ഠാനപ്രസക്തമായ മതങ്ങള്‍ അപ്രസക്തങ്ങളാകുന്നു എന്ന്! രണ്ടു ബന്ധങ്ങളുടേതായ ഊ കുരിശ് ഏറ്റെടുക്കുവാന്‍ കഴിയണമെങ്കില്‍, സ്വാര്‍ത്ഥത വെടിയണം- 'ഞാന്‍ഭാവ'വും 'ഞങ്ങള്‍ഭാവ'വും ഉപേക്ഷിച്ച്, 'നമ്മള്‍ഭാവം' കൈവരിക്കണം. ഇതാണ് യേശുശിഷ്യത്വത്തിന്റെ അടയാളം: ''തന്നത്താന്‍ ത്യജിച്ച് തന്റെ കുരിശുമെടുത്തുകൊണ്ട് എന്റെ പിന്നാലെ വരുക'' എന്ന യേശുവിന്റെ ആഹ്വാനത്തിന്റെ അര്‍ത്ഥവും അതുതന്നെ.

ആചാരാനുഷ്ഠാനങ്ങളുടെ ആഘോഷങ്ങള്‍ മനുഷ്യസമൂഹത്തെ ഇളക്കിമറിക്കുമ്പോഴും ധാര്‍മ്മികമൂല്യങ്ങള്‍ വറ്റി സമൂഹം വരളുകയാണ്. യേശു രൂപംകൊടുത്ത ധാര്‍മ്മികപരമാധികാരത്തോടും, അതില്‍ അധിഷ്ഠിതമായ മനുഷ്യസമൂഹത്തോടുമുള്ള ബന്ധങ്ങളുടെ കുരിശ് എവിടെയോ, എങ്ങോ, പോയിമറഞ്ഞു. പകരം, 'ചര്‍ച്ചിയാനിറ്റി' സഹനത്തിന്റെ, അഥവാ ജീവിതനിഷേധങ്ങളുടെ, കുരിശ് രൂപപ്പെടുത്തി നിഷ്‌കളങ്കരായ വിശ്വാസികളുടെ ചുമലില്‍ ഏറ്റുന്നു. സ്വര്‍ഗ്ഗീയ ജീവിതാനുഭവമാക്കിത്തീര്‍ക്കുവാന്‍ ദൈവം ഈ ലോകജീവിതത്തെ മനുഷ്യനു നല്കി. 'ചര്‍ച്ചിയാനിറ്റി' ഈ ലോകജീവിതത്തെ സഹനത്തിന്റെയും ആശാനിഗ്രഹത്തിന്റെയും താഴ്‌വരയാക്കി ചിത്രീകരിച്ച്, വിശ്വാസികളെ അങ്ങുമുകളില്‍ തട്ടുമ്പുറത്തെങ്ങാണ്ടുണ്ടെന്ന് വിശ്വസിക്കപ്പെടുന്ന മരണാനന്തരസ്വര്‍ഗ്ഗം ചൂണ്ടിക്കാണിച്ച്, ദൈവജനത്തെ ആകാശംനോക്കികളാക്കിമാറ്റുന്നു. ഇതൊക്കെ ദൈവികശാസ്ത്രത്തിന്റെ വെളിപ്പെടുത്തല്‍ എന്നാണ് വയ്പ്. ദൈവദത്തമായ യുക്തിയുടെ വെളിച്ചത്തിനു പ്രവേശനമില്ലാത്ത ഒന്നിനെ ദൈവികശാസ്ത്രം എന്നതിനേക്കാള്‍, വൈദികസൂത്രം എന്നു വിവരിക്കുന്നതായിരിക്കും കൂടുതല്‍ അന്വര്‍ത്ഥം. എന്നാല്‍, ഈ വൈദികസൂത്ര ഉപജ്ഞാതാക്കളാകട്ടെ, അവരുടെ മൂക്കിനുതാഴെയുള്ള ഈ ഭൂമിയില്‍ കണ്ണും കാലും ഉറപ്പിച്ചു നടക്കുന്നു!

യേശുവിന്റെ സുതാര്യമായ സ്വാഭാവിക മാനുഷികധാര്‍മ്മികതയെന്ന സന്ദേശത്തെ തമസ്‌കരിച്ച് വൈദികസൂത്രധാരന്മാര്‍ അമ്മൂമ്മക്കഥകളിലൂടെ മെനഞ്ഞുണ്ടാക്കിയ അന്ധമായ വിശ്വാസങ്ങളുടെ 'രഹസ്യങ്ങള്‍' ശൈശവപ്രായംമുതല്‍ ദൈവജനങ്ങളില്‍ അടിച്ചേല്പിച്ച്, ഈ ഭൂമിയില്‍ സ്വര്‍ഗ്ഗീയാനുഭവത്തിന്റെ അനുഭൂതിയില്‍ ജീവിക്കാനുള്ള ദൈവദത്തമായ അവരുടെ അവകാശത്തെ കവര്‍ന്നെടുത്ത് ആസ്വദിക്കുന്ന അനുഷ്ഠാനമതകാപട്യത്തെ തിരിച്ചറിയേണ്ടകാലം അതിക്രമിച്ചിരിക്കുന്നു.

ആ തിരിച്ചറിവ് ആരംഭിച്ചിരിക്കുന്നു എന്നാണ് ഈ നവജാതമാധ്യമശിശുവിന്റെ ജാതക'മുഖക്കുറി'യിലൂടെ മനസ്സിലാക്കുവാന്‍ സാധിച്ചത്: ''ഇന്നിപ്പോള്‍ മാനുഷികമൂല്യങ്ങളെയെല്ലാം ചതച്ചരച്ചുകൊണ്ട് കച്ചവടമൂല്യങ്ങളുടെ ബുള്‍ഡോസറുകള്‍ ജീവിതത്തിന്റെ എല്ലാ മേഖലകളിലേക്കും കടന്നുകയറുകയാണ്. അതിന് അടിസ്ഥാനകാരണം മതങ്ങള്‍ അവയുടെ ധര്‍മ്മനിര്‍വ്വഹണത്തില്‍ പരാജയപ്പെട്ടതാണ്......മതങ്ങളും മനുഷ്യരില്‍ മാത്സര്യത്തിന്റെ കച്ചവടമൂല്യങ്ങളാണ് വിതയ്ക്കുന്നതെങ്കില്‍പ്പിന്നെ മറ്റെന്താണ് മനുഷ്യന് കൊയ്യാന്‍ കിട്ടുക?'' യേശുവിന്റെ ദൈവരാജ്യസന്ദേശത്തെ വികലമാക്കി വിലസുന്ന 'ചര്‍ച്ചിയാനിറ്റി' എന്ന വിഷമരത്തെ അതിന്റെ ഫലംകൊണ്ട് തിരിച്ചറിയുവാന്‍ തുടങ്ങിയിരിക്കുന്നു. അതുപോലെതന്നെ, യേശുവിന്റെ വികലമാക്കപ്പെട്ട സ്വര്‍ഗ്ഗരാജ്യദൗത്യത്തെ തിരിച്ചറിയുവാനുള്ള ആരംഭവും ഈ ജാതക'മുഖക്കുറി'യില്‍ ദൃശ്യമാണ്.

ദൈവദത്തമായ യുക്തിയുടെ വെളിച്ചം തമസ്‌കരിച്ച് വിശ്വാസികളെ അന്ധവിശ്വാസത്തിന്റെ ഇരുട്ടിലാക്കി, മതാധികാരത്തിന്റെ അംശവടി നീട്ടി അതില്‍ പിടിപ്പിച്ചുകൊണ്ട്, തപ്പിത്തടഞ്ഞ് ഉദ്ദിഷ്ഠസ്ഥാനത്തെത്തിക്കുവാന്‍ പരിശ്രമിക്കുന്നത് മനുഷ്യത്വത്തിനെതിരെയുള്ള കുറ്റകൃത്യമല്ലേ? ദൈവദത്തമായ ഇഹലോകസ്വര്‍ഗ്ഗീയജീവിതത്തെ വിശ്വാസികള്‍ക്ക് നിഷേധിക്കുന്നത് അവരോടുള്ള വഞ്ചനയല്ലേ? തങ്ങളുടെ മതവിശ്വാസം യുക്തിക്കതീതമെന്നും ഇതരന്റേത് യുക്തിക്കു വിരുദ്ധമെന്നും ഓരോമതവും പ്രഘോഷിക്കുന്നു. എന്നാല്‍, ഇതുരണ്ടും യുക്തിക്ക് അന്യമാണ്- യുക്തിയുടെ വെളിച്ചത്തില്‍ നടക്കുവാന്‍ വിളിക്കപ്പെട്ട മനുഷ്യന് യുക്തിക്കന്യമായ കാര്യങ്ങളുമായി എന്തുബന്ധം?

രണ്ടായിരം വര്‍ഷത്തെ 'ചര്‍ച്ചിയാനിറ്റി' നേടിവച്ചിരിക്കുന്നത്, ധാര്‍മ്മികപരമാധികാരമായ ദൈവത്തിന്റെ സ്ഥാനത്ത് മാമ്മോന്‍ ഭരിക്കുന്ന ഒരു സമൂഹമാണ്; ധാര്‍മ്മികമൂല്യച്യുതിയില്‍ അമരുന്ന, പൊട്ടിത്തെറിയുടെ വക്കില്‍ എത്തിയിരിക്കുന്ന, ഒരഗ്നിപര്‍വ്വതം! ഒരുപക്ഷെ അവിശുദ്ധമായ, കപടമായ, മത-രാഷ്ട്രീയ കൂട്ടുകെട്ടായിരിക്കാം ഈ അവസ്ഥക്ക് കൂട്ടുത്തരവാദി. പിശാചിന് മറുത കൂട്ട്. പക്ഷേ ആരാണ് കൂടുതല്‍ ഉത്തരവാദി? ദൈവത്തിന്റെ അധികാരം സ്വയംപേറുന്ന മതങ്ങള്‍തന്നെ. ഏതു ചീഞ്ഞാലാണ് ഏറ്റവും ദുര്‍ഗന്ധം? ഏറ്റവും നല്ലതു ചീഞ്ഞാല്‍ ദുര്‍ഗന്ധം ഏറ്റവും വലുത്! Corruption of the best is the worst.

എന്താണ് പ്രതിവിധി? 'സത്യജ്വാല'യെന്ന നവജാതശിശുവിന്റെ ജാതകമുഖക്കുറി ഫലപ്രദമായ ഏകപ്രതിവിധിയിലേക്കു വിരല്‍ ചൂണ്ടിയിരിക്കുന്നു. ''ഈ സാഹചര്യത്തില്‍ മോചനംപ്രാപിക്കുവാന്‍...അവരവര്‍ അംഗങ്ങളായിരിക്കുന്ന മതങ്ങളെ അവയുടെ പ്രാക്തനവിശുദ്ധിയിലേക്ക് വിമര്‍ശനാത്മകമായും സൃഷ്ടിപരമായും അവരവര്‍തന്നെ നയിക്കേണ്ടതുണ്ട്''. പ്രബുദ്ധമായി ചിന്തിക്കുവാനും യുക്തമായ കര്‍മ്മപരിപാടികള്‍ ആസൂത്രണം ചെയ്യുവാനും തീരുമാനങ്ങളെടുത്തു മുന്നോട്ടു പോകുവാനും വിശ്വാസികള്‍ തയ്യാറാകണം. മാമ്മോന്റെ ആധിപത്യം അവസാനിപ്പിച്ച്, ധാര്‍മ്മികപരമാധികാരമെന്ന ഈശ്വരനില്‍ വിശ്വസിച്ച്, 'സ്വാഭാവിക മാനുഷികധാര്‍മ്മികത' എന്ന മതജീവിതം നയിക്കാന്‍ 'സത്യജ്വാല' വെളിച്ചമാവട്ടെ! ''ഞങ്ങളിവിടുള്ളപ്പോള്‍ നിങ്ങള്‍ക്ക് ചിന്തിക്കുവാന്‍ എന്തവകാശ''മെന്ന് ആരെങ്കിലും ചോദിച്ചാല്‍, ''ദൈവം ആരുടെയും നീണ്ട പോക്കറ്റിലല്ല'' എന്നു പറയുവാനുള്ള ആര്‍ജ്ജവം പകര്‍ന്നുകൊടുക്കുവാന്‍ ഈ വെള്ളിനക്ഷത്രത്തിന് കഴിയട്ടെ എന്ന് ആശംസിക്കുന്നു; പ്രാര്‍ത്ഥിക്കുന്നു.