യേശു ചൊല്ലുന്നതെന്തേ?

എന്നുള്ളിലുണ്ടെന്നു ഞാന്‍ കണ്ടിടുന്നൊരെന്‍

യേശു ചൊല്ലുന്നതെന്തേ?

യേശു പ്രാര്‍ഥിക്കുന്നു: ''താതാ പൊറുക്കണേ
അജ്ഞര്‍തന്‍ തെറ്റുകള്‍ നീ
എങ്കിലും ജ്ഞാനികള്‍ ചെയ്യുന്ന തെറ്റുകള്‍
നീ പൊറുത്തീടരുതേ.

കാരുണ്യത്താലര്‍പ്പിച്ചീടുന്ന ത്യാഗത്തി-
ലേറിയൊരാചാരമായ്
ഈ ഭൂമിയില്‍ ബലിയര്‍പ്പിച്ചിടാന്‍ പണം 
വാങ്ങും പുരോഹിതരും
ദൈവത്തിന്‍ കല്പനയില്‍പ്പരം കല്പന
വേണ്ടെന്നുചൊല്ലുവോരെ
ശിക്ഷവിധിക്കുമധികാരിവര്‍ഗവും
ശിക്ഷയര്‍ഹിപ്പോരല്ലേ? 

നിന്‍പുത്രരായവര്‍ക്കൊക്കെയും സ്‌നേഹമായ് 
മാറിയാല്‍ ദൈവമാകാം
എന്നു പഠിപ്പിച്ചൊരെന്നമാത്രം ദൈവ- 
പുത്രനായ് കാട്ടിടുന്നോര്‍
എന്നെയും ചൂഷണവസ്തുവായ് മാറ്റിയോര്‍
ശിക്ഷയര്‍ഹിപ്പതില്ലേ?

വിശ്വാധിനാഥനാം ദൈവത്തിന്‍ പാലനം
ഏവര്‍ക്കുമെന്നറിഞ്ഞാല്‍
സോദരസ്‌നേഹമുണര്‍ന്നിടും മര്‍ത്യരില്‍
എന്നോതുവാന്‍ വന്നു ഞാന്‍.
ഏതു മതസ്ഥനും മുങ്ങിക്കുളിക്കുവാന്‍
ഈ ജ്ഞാനസ്‌നാനമല്ലോ.

വെള്ളയടിച്ചതാം കല്ലറകള്‍ക്കെതി-
രാണു ഞാനന്നുമിന്നും
ഉള്ളില്‍നിന്നും പുറത്തേക്കുവരുന്നതാം
മാലിന്യത്തിന്നെതിര്‍ ഞാന്‍.
തന്റെയഹന്ത വെടിഞ്ഞു ദൈവത്തിന്റെ
യിഷ്ടം തന്നിഷ്ടമാക്കാന്‍ 
എന്നെയനുഗമിച്ചീടുവോന്‍ മാത്രമാം 
ക്രിസ്ത്യാനിയെന്നു കാണൂ.''